Lub Ntxa Yuav Tsis Kov Yeej
Los ntawm Yexus Khetos txoj Kev Theej Txhoj thiab txoj Kev Sawv Rov Los, yuav kho tau tej lub siab uas tawg rhe, kev tu siab yuav pauv los ua kev thaj yeeb, thiab kev poob siab yuav pauv los ua kev cia siab.
Hnub Caiv Easter zoo kawg nkaus no, peb cov me nyuam hu hais tias, “Thaum lub caij nplooj ntoo hlav, Yexus Khetos tsim los thiab tawm ntawm lub ntxa uas nws pw hauv; nws hle tej hlua ntawm txoj kev tuag.”1
Peb zoo siab vim peb paub txog Yexus Khetos txoj Kev Sawv Rov Los. Tab sis mas, tej lub sij hawm hauv peb lub neej, peb yeej nyuaj siab vim peb xiam ib tug neeg uas peb hlub. Thaum muaj tus phaum mob no thoob ntiaj teb, peb coob leej tau xiam ib co neeg uas peb hlub—cov uas nyob hauv peb tsev neeg thiab peb cov phooj ywg.2 Peb thov Vajtswv pab cov neeg uas muaj kev nyuaj siab no.
Thawj Tswj Hwm Russell M. Nelson tau hais tias:
“Tab txawm muaj hnub nyoog li cas los, peb tu siab thaum peb xiam ib tug neeg uas peb hlub. Kev tu siab ntawd tsuas yog qhia peb txoj kev hlub lawv xwb. …
“Tsis tas li ntawd xwb, peb yuav tsis paub kev zoo siab yav tom ntej thaum peb rov los sib pom dua yog peb tsis quaj thaum sib ncaim li no. Tib txoj kev uas yuav tshem kev tu siab los ntawm kev tuag yuav yog hais tias peb tshem txoj kev hlub ntawm lub neej no.”3
Peb to taub tias Yexus cov phooj ywg, cov uas tau raws Nws qab thiab cov uas tau tu Nws,4 xav li cas thaum lawv pom Nws txoj kev tuag.5 Peb paub tias lawv yeej “tu siab thiab quaj heev.”6 Hnub uas muab Nws Ntsia Saum Ntoo Khaub Lig, thaum tsis paub hais tias yuav muaj dab tsi Hnub Caiv ntawd, lawv yeej yuav nyuaj siab heev, vim tsis paub lawv yuav ua li cas yog tsis muaj lawv tus Tswv. Txawm li ntawd los, lawv tseem tu Nws tom qab Nws tuag.
Yauxej los ntawm Alimathas tau thov Philaj muab Yexus lub cev rau nws. Nws muab tau Yexus lub cev, muab qhwv hauv ib co ntaub zoo, tso rau hauv nws lub ntxa tshiab, thiab muab daim txiag zeb dov los npog lub qhov rooj ntxa ntawd.7
Nikaudemaus nqa roj thiab tshuaj pleev los. Nws pab Yauxej nqa lub cev thiab qhwv hauv cov ntaub nrog rau cov tshuaj tsw qab.8
Maivliag Madalas, lwm tus poj niam tau raws Yauxej thiab Nikaudemaus qab, tau xauj seb tau tso Yexus lub cev qhov twg, thiab tau npaj tej tshuaj tsw qab thiab roj uas yuav pleev nws lub cev.9 Raws li tej kev cai nruj heev lub sij hawm ntawd, lawv tseem tau tos npaj thiab pleev lub cev vim hais tias hnub Saturday yog lawv Hnub Caiv.10 Ces, kaj ntug hnub Sunday, lawv rov mus rau lub ntxa. Tom qab lawv paub hais tias tus Cawm Seej lub cev tsis nyob ntawd, lawv khiav mus qhia cov pab coj, uas yog Yexus cov Thwj Tim. Cov Thwj Tim nrog lawv mus xyuas lub ntxa thiab pom hais tias tsis muaj dab tsi nyob hauv lawm. Ces lawv sawv daws khiav lawm tsuas tshuav Maivliag Madalas xwb, nws tseem xav paub seb ua li cas rau tus Cawm Seej lub cev lawm.11
Maivliag Madalas nyob tom lub ntxa nws ib leeg xwb. Ob peb hnub ua ntej ntawd, nws tus pom nws tus phooj ywg thiab tus Xib Hwb tuag lawm. Tsam no tsis muaj dab tsi hauv Nws lub ntxa, thiab nws tsis paub Yexus nyob qhov twg. Nws los nyiaj tsis taus ces, cia li pib los kua muag. Lub sij hawm ntawd, tus Cawm Seej uas sawv rov los lawm los ntsib nws thiab nug seb vim li cas nws quaj thiab nws tab tom nrhiav leej twg. Nws xav tias tsuas yog tus neeg yug vaj tham xwb, ces nws hais tias, yog nws twb coj nws tus Tswv lub cev qhov twg lawm, thov qhia rau nws paub seb Yexus nyob qhov twg.12
Kuv xav tias tus Tswv tau cia Maivliag Madalas tu siab thiab qhia nws tej kev xav thiab kev nyuaj siab ntawd.13 Yexus txawm tuav nws npe, ces nws tig los rau Yexus thiab paub tias nws yog Yexus. Nws pom tus Khetos uas sawv rov los lawm thiab ua tim khawv txog Nws lub yeeb koob vim Sawv Rov Los lawm.14
Zoo li nej, kuv los hnov tau kev nyuaj siab uas Maivliag Madalas thiab nws cov phooj ywg muaj thaum lawv tu siab vim lawv tus Tswv twb tso lub neej no tseg lawm. Thaum kuv tsuas muaj cuaj xyoo, kuv tus nus hlob tuag hauv ib qhov av qeeg loj. Vim qhov xwm txheej cia li tshwm los, kuv tsis tshua to taub tias muaj dab tsi lawm tiag. Kuv lub siab tawg rhe vim muaj kev tu siab kawg, ces kuv tau nug kuv tus kheej hais tias, “Ua li cas rau kuv tus nus lawm? Nws nyob qhov twg? Nws dua twg lawm? Kuv puas yuav rov pom nws dua?”
Thaum ntawd, kuv tseem tsis tau paub txog Vajtswv txoj kev cawm seej, es yeej xav paub seb peb tuaj qhov twg tuaj, lub ntsiab rau peb lub neej no yog dab tsi, thiab yuav muaj xwm dab tsi tom qab peb tuag. Peb sawv daws puas xav paub tej yam no thaum peb xiam ib tug neeg uas peb hlub los yog thaum twg peb muaj teeb meem hauv peb lub neej?
Ob peb xyoos tom qab ntawd, kuv tau pib xav txog kuv tus nus txawv me ntsis. Kuv pib xav hais tias nws los khob peb lub qhov rooj. Kuv mam li qhib qhov rooj, nws ho sawv ntawd, ces nws hais kuv hais tias, “Kuv tsis tau tuag. Kuv tseem muaj sia nyob. Kuv los ntsib koj tsis tau, tiam sis nim no yuav nrog nraim koj nyob thiab yuav tsis ncaim koj ib zaug ntxiv li.” Txoj kev xav li ntawd, zoo nkaus li kuv ua npau suav, tau pab kuv nyiaj tau kev mob siab uas kuv raug vim nws tso lub neej no tseg. Kuv pheej muaj tej kev xav li no hauv kuv lub paj hlwb. Tej thaum kuv yuav ntsia lub qhov rooj, cia siab hais tias nws yuav los khob thiab kuv yuav pom nws dua.
Ze li 40 xyoo tom qab ntawd, thaum lub caij Easter, kuv tab tom xav txog Yexus Khetos txoj kev Sawv Rov Los thiab tau pib xav txog kuv tus nus. Lub sij hawm ntawd, txawm muaj dab tsi ci hauv kuv lub paj hlwb. Kuv nco qab xav txog qhov uas nws pheej los ntsib kuv.
Hnub ntawd kuv txawm to taub hais tias tus Ntsuj Plig twb tau los nplij kuv lub siab thaum kuv nyuaj nyuaj siab ntawd. Kuv tau lus tim khawv hais tias kuv tus nus tus ntsuj plig tsis tau tuag; nws tseem muaj sia nyob. Nws tseem loj hlob mus hauv lub neej uas nyob mus ib txhis. Kuv paub tias “[kuv] tus nus yuav sawv rov qab los”15 thaum lub sij hawm zoo, vim muaj Yexus Khetos txoj Kev Sawv Rov Los, ces peb sawv daws kuj yuav sawv rov los thiab. Tsis tas li ntawd xwb, Nws pab tau peb sawv daws rov los nyob ua ib tsev neeg thiab muaj kev zoo siab tas mus li nyob nrog Vajtswv yog peb yuav xaiv los ua thiab ceev peb tej kev sib khi lus dawb ceev nrog Nws.
Thawj Tswj Hwm Russell M. Nelson tau qhia hais tias:
“Kev tuag tsuas yog ib qho ntawm peb lub neej uas nyob mus ib txhis xwb. Tsis muaj leej twg paub hais tias yuav tuag thaum twg, tiam sis yog ib qho tseem ceeb hauv Vajtswv txoj kev cawm seej. Vim muaj tus Tswv txoj Kev Theej Txhoj, tag nrho tib neeg sawv daws yeej yuav muaj ib hnub twg uas lawv yuav sawv rov los thiab muaj sia nyob mus ib txhis li. …
“… Rau cov uas muaj kev tu siab tom qab xiam ib tug lawm … kev mob siab vim muaj kev tuag ntawd yuav zoo thaum yus rau siab ntseeg Khetos, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus, thiab xav ua hauj lwm pab lawv. Txoj kev ntseeg, kev cia siab, kev hlub ntawd yuav ua rau peb tsim nyog los cuag Vajtswv, nrog peb tus khub thiab tsev neeg, thiab nrog Nws nyob tas mus ib txhis.”16
Kuv ua tim khawv tias “Yog hais tias Khetos tsis tau sawv hauv qhov tuag rov qab los, los sis tsis tau ua rau kev tuag tej hlua tu xwv kom lub qhov ntxa tsis txhob muaj kev yeej, thiab xwv kom kev tuag tsis txhob muaj kuab, ces twb tsis muaj txoj kev sawv rov los.
“Tiam sis muaj ib txoj kev sawv rov los, yog li ntawd lub qhov ntxa thiaj tsis muaj yeej, thiab Khetos kov yeej qhov uas kev tuag muaj kuab heev tas lawm.
“Nws yog txoj kev kaj thiab txoj sia ntawm neeg ntiaj teb; muaj tseeb tiag, yog ib txoj kev kaj uas tsis txawj kawg, uas tsis muaj hnub yuav tsaus; muaj tseeb tiag, thiab kuj yog ib txoj sia uas tsis txawj kawg, xwv kom tsis txhob muaj kev tuag ntxiv lawm.”17
Yexus Khetos kiag hais tias, “Kuv yog txoj kev sawv hauv qhov tuag rov qab los thiab yog txoj sia. Tus uas ntseeg kuv, txawm yog nws tuag lawm los nws yeej yuav muaj txoj sia.”18
Kuv hais lus tim khawv tias los ntawm Yexus Khetos txoj Kev Theej Txhoj thiab txoj Kev Sawv Rov Los, yuav kho tau tej lub siab uas tawg rhe, kev tu siab yuav pauv los ua kev thaj yeeb, thiab kev poob siab yuav pauv los ua kev cia siab. Nws yuav puag peb muaj kev hlub tshua, kev nplij siab, kev pab, thiab kev kho peb txhua leej txhia tus. Los ntawm Yexus Khetos lub npe, amees.