Khetos Sawv Rov Los Lawm; Kev Ntseeg Nws Yuav Muab cov Roob Txav Tau
Kev ntseeg Yexus Khetos yog lub hwj chim loj tshaj plaws nyob hauv lub neej no. Tus uas ntseeg yeej ua tau txhua yam.
Kuv cov kwv tij thiab cov muam, kuv zoo siab vim kuv muaj lub cib fim no hais lus rau nej thaum txog Hnub Caiv Easter.1 Yexus Khetos txoj kev txi theej txhoj thiab txoj Kev Sawv Rov Los tau hloov peb lub neej tag nrho. Peb hlub Nws thiab teev tiam Nws thiab peb Leej Txiv Saum Ntuj Ceeb Tsheej.
Nyob hauv rau lub hlis tas los, peb yeej sim kov yeej ib phaum mob uas kis thoob ntiaj teb. Kuv xav tsis thoob txog nej lub peev xwm thiab nej sab ntsuj plig lub dag zog uas tiv tau qhov mob,kev kho siab, thiab kev sib cais. Kuv thov Vajtswv tsis tu tsis tseg hais tias nej yuav paub txog tus Tswv txoj kev hlub rau nej. Yog tias nej tej kev sim siab tau pab nej ua ib tug thwj tim zoo dua, ces xyoo tas los no yeej yuav muaj nqis heev.
Tag kis no, peb tau hnov los ntawm lub Koom Txoos cov thawj coj uas nyob hauv txhua thooj av teb chaws hauv lub ntiaj teb. Muaj tseeb tiag, txoj moo zoo cov koob hmoov yeej yog rau txhua haiv neeg, yam lus, thiab cov neeg. Yexus Khetos lub Koom Txoos yog ib lub koom txoos nyob thoob plaws lub ntiaj teb. Yexus Khetos yog peb tus thawj coj.
Ua Vajtswv tsaug vim tsis muaj dab tsi tab kaum Nws txoj lus tseeb, tsis hais ib phaum mob los yog. Yexus Khetos txoj moo zoo yeej yog qhov uas peb xav tau nyob hauv lub ntiaj teb uas ntxhov hnyo, sib cav sib ceg, thiab qaug zog no.
Vajtswv cov me nyuam txhua leej txhua tus yeej tsim nyog muaj cib fim mloog thiab lees txais Yexus Khetos zaj xov uas txhiv lawv dim. Tsis muaj lwm zaj lus uas tseem ceeb tshaj rau peb txoj kev zoo siab—tam sim no thiab tas mus li.2 Tsis muaj lwm zaj lus uas muaj kev cia siab tshaj. Tsis muaj lwm zaj lus uas yuav txiav kev sib cav sib ceg hauv peb cov pej xeem.
Kev ntseeg Yexus Khetos yeej yog qhov uas ua rau peb txais tau Vajtswv lub hwj chim. Raws li tus Thwj Tim Povlauj hais tias, “Tus uas tsis ntseeg yeej ua tsis tau haum Vajtswv siab, rau qhov tus uas xav los cuag Vajtswv, tus ntawd yuav tsum ntseeg hais tias yeej muaj Vajtswv tiag, thiab Vajtswv yuav muab nqi zog rau tus uas los cuag Vajtswv.”3
Txhua yam zoo hauv lub neej no—txhua txoj koob hmoov uas nyob mus ib txhis—yuav pib los ntawm kev ntseeg. Qhov uas peb cia Vajtswv yeej hauv peb lub neej pib los ntawm kev ntseeg tias Nws txaus siab coj peb txoj hau kev. Kev hloov siab lees txim pib los ntawm kev ntseeg tias Yexus Khetos muaj hwj chim ntxuav peb, kho peb zoo, thiab txhawb peb lub dag zog.4
Tus yaj saub Maulaunais hais tias, “Tsis txhob xyeej Vajtswv lub hwj chim; vim nws ua hauj lwm los ntawm lub hwj chim, raws li noob neej txoj kev ntseeg.”5 Yog peb txoj kev ntseeg uas ua rau peb txais tau Vajtswv lub hwj chim nyob hauv peb lub neej.
Tiam sis, kev muab siab rau ntseeg yeej nyuaj heev. Tej lub sij hawm peb xav paub seb peb puas muaj kev ntseeg txaus kom txais tau cov koob hmoov uas peb xav tau. Tiam sis, tus Tswv ua rau peb tej kev ntshai ploj los ntawm tus yaj saub Amas cov lus hauv Phau Ntawv Maumoos.
Amas hais kom peb cia li los sim ua li tus Tswv tej lus, thiab “muab siab rau ntseeg me me, muaj tseeb tiag, txawm hais tias tsuas yog [peb] xav kom muaj kev ntseeg xwb los.”6 Cov lus “muab siab rau ntseeg me me” ua rau kuv nco txog tus Tswv cov lus cog tseg hais tias yog peb “muaj kev ntseeg luaj lub noob zaub,” ces peb yuav muaj peev xwm “hais rau lub roob no hais tias, Cia li txav ntawm no mus rau tod! Ces lub roob ntawd yeej yuav txav mus. [Peb] yuav ua tau txhua yam huv tib si.”7
Tus Tswv to taub peb tej kev qaug zog. Tej lub sij hawm peb txhua tus ua yuam kev. Tiam sis Nws kuj paub peb muaj peev xwm npaum li cas. Lub noob zaub me me heev thaum xub thawj tiam sis loj tuaj ua ib tug ntoo loj txaus kom cov noog los ua zes hauv tej ceg ntoo. Lub noob zaub piv txog ib txoj kev ntseeg uas me me tiam sis loj tuaj.8
Tus Tswv tsis xav tias peb yuav muaj kev ntseeg zoo tag nrho ua ntej peb txais tau Nws lub hwj chim uas zoo tag nrho. Tiam sis Nws hais kom peb ntseeg ua ntej.
Kuv cov kwv tij thiab cov muam, hnub Easter sawv ntxov no kuv xav hais kom nej pib hnub no kom nej txoj kev ntseeg loj tuaj. Dhau los ntawm nej txoj kev ntseeg, Yexus Khetos yuav ua rau nej muaj peev xwm muab cov roob txav mus hauv nej lub neej,9 txawm yog nej xav tias nej tej teeb meem loj npaum li lub Roob Everest los yog.
Tej zaum nej cov roob yog kev kho siab, kev ua xyem xyav, kev muaj mob, los yog lwm yam teeb meem. Nej cov roob yuav tsis zoo ib yam, tiam sis qhov uas yuav pab nej txhua yam teeb meem yog kev ua kom nej txoj kev ntseeg loj tuaj. Yuav tsum ua hauj lwm kom ua li ntawd. Cov tub nkeeg kawm thiab cov uas lam ua thwj tim mas yeej nyuaj rau lawv muab siab rau ntseeg tsis hais kev ntseeg me me los yog.
Yog tias yus xav ua ib yam dab tsi zoo yus yuav tsum siv zog ua. Kev los ua Yexus Khetos ib tug thwj tim tseeb yeej zoo ib yam. Yuav tsum siv zog kom nej txoj kev ntseeg thiab kev tso siab rau Nws loj tuaj. Kuv thov mloog tsib lub tswv yim kom pab nej txoj kev ntseeg thiab kev tso siab loj tuaj.
Qhov thib ib, cia li kawm. Hloov los ua ib tug uas nyiam kawm ntawv. Cia li nyeem nej cov vaj lug kub kom to taub Khetos lub luag hauj lwm qhuab qhia zoo dua. Cia li paub txog Khetos cov lus qhuab qhia kom nej thiaj li yuav to taub nws muaj hwj chim li cas hauv nej lub neej. Cia li paub qhov tseeb hais tias Yexus Khetos txoj Kev Theej Txhoj yog rau nej. Nws tau ris nej txoj kev tu siab, nej tej kev ua yuam kev, nej tej kev qaug zog, thiab nej tej kev txhaum. Nws tau them tus nqi thiab muab hwj chim rau nej muab txhua lub roob txav mus. Nej txais tau lub hwj chim ntawd thaum nej ntseeg, tso siab, thiab txaus siab coj raws li Nws.
Tej zaum nej yuav tsum muaj ib qho txuj ci tseem ceeb kom muab nej cov roob txav mus. Cia li kawm txog tej qhov txuj ci tseem ceeb. Tej txuj ci tseem ceeb los ntawm nej txoj kev ntseeg tus Tswv. Qhov tseem ceeb rau txoj kev ntseeg li ntawd yog kev tso siab rau Nws lub siab nyiam thiab lub sij hawm uas Nws teem tseg—thaum twg thiab ua li cas Nws yuav foom koob hmoov rau nej kom txais tau kev pab uas nej xav tau. Tsuas yog nej txoj kev tsis ntseeg yuav ua rau nej txais tsis taus Vajtswv tej txuj ci tseem ceeb kom muab cov roob txav mus nyob hauv nej lub neej.10
Nej yim kawm txog tus Cawm Seej, ces nej yim yuav tso siab rau Nws txoj kev sib hlub, Nws txoj kev hlub mus ib txhis, thiab Nws lub hwj chim kho thiab txhiv nej dim. Tus Cawm Seej yeej nyob ze tshaj plaws thaum nej muaj kev ntseeg nce ib lub roob.
Qhov thib ob, xaiv kom ntseeg Yexus Khetos. Yog nej ua xyem xyav txog Vajtswv Leej Txiv thiab Nws Leej Tub, los yog qhov uas txoj kev muab Txoj Moo Zoo Txum Tim Rov Qab Los los sis Joseph Smith puas yog Vajtswv ib tug yaj saub tiag, cia li xaiv kom ntseeg11 thiab rau siab ntseeg tsis tseg. Nug tus Tswv thiab nyeem tej yam uas txhawb kev ntseeg. Thaum nej kawm cia li xav muaj kev ntseeg tsis txhob cia siab tias nej yuav nrhiav kev txhaum hauv ib tug yaj saub lub neej los sis ib yam ua yuam kev nyob hauv vaj lug kub. Txhob ua kom nej txoj kev tsis ntseeg loj tuaj thaum nej qhia tej ntawd rau lwm tus uas tsis ntseeg. Cia tus Tswv coj nej txoj hau kev kom nej kawm txog tej yam ntawm sab ntsuj plig.
Qhov thib peb, ua raws li kev ntseeg. Nej yuav ua li cas yog tias nej muaj kev ntseeg ntxiv? Cia li xav txog qhov no. Sau ntawv txog qhov no. Ces cia li txais kev ntseeg ntxiv thaum nej ua ib yam dab tsi uas ua rau nej yuav tsum muaj kev ntseeg ntxiv.
Qhov thib plaub, ua neeg tsim nyog txais cov kab ke. Cov kab ke qhib kev rau nej lub neej txais tau Vajtswv lub hwj chim.12
Thiab qhov thib tsib, thov nej Leej Txiv Saum Ntuj Ceeb Tsheej, los ntawm Yexus Khetos lub npe, kom pab nej.
Yuav tsum siv zog thiaj li muaj kev ntseeg. Yuav tsum siv zog thiaj li txais tau kev tshwm sim. Tiam sis “txhua tus uas thov yeej yuav tau, txhua tus uas nrhiav yeej ntsib, thiab txhua tus uas khob, Vajtswv yeej yuav qhib qhov rooj rau nws.”13 Vajtswv paub tias dab tsi yuav pab nej txoj kev ntseeg loj tuaj. Thov, ces cia li rov qab thov ntxiv.
Ib tug uas tsis ntseeg yuav hais tias kev ntseeg yog rau cov qaug zog xwb. Tiam sis txoj kev tsis ntseeg no yeej tsis nco qab txog lub hwj chim ntawm kev ntseeg. Tus Cawm Seej cov Thwj Tim puas kam qhia txog Nws cov lus qhuab qhia tom qab Nws tuag, thaum lawv raug tej yam txaus ntshai, yog tias lawv tsis ntseeg Nws?14 Joseph thiab Hyrum Smith puas txaus siab tuag thaum lawv tiv thaiv tus Tswv lub Koom Txoos yog tias lawv tsis tau paub tseeb tias nws muaj tseeb? 2,000 tus Neeg Ntseeg puas txaus siab tuag thaum lawv ua pioneer taug txoj kev15 yog tias lawv tsis ntseeg tias Yexus Khetos txoj moo zoo tau raug txum tim rov qab los. Muaj tseeb tiag, kev ntseeg yog lub hwj chim uas ua rau cov neeg tsis muaj peev xwm ua tau tej yam uas ua tsis taus.
Tsis txhob xav tias txoj kev ntseeg uas nej muaj lawm tsis tseem ceeb. Yuav tsum muaj kev ntseeg kom koom lub Koom Txoos thiab rau siab ntseeg. Yuav tsum muaj kev ntseeg kom coj raws li cov yaj saub thiab txhob coj raws li cov neeg txawj hais lus thiab tej kev xav uas neeg coob nyiam. Yuav tsum muaj kev ntseeg kom mus ua tub txib ntxhais txib thaum muaj phaum mob loj heev. Yuav tsum muaj kev ntseeg kom coj dawb huv thaum neeg ntiaj teb qw hais tias Vajtswv txoj kev cai coj dawb huv yeej tsis muaj nqis lawm. Yuav tsum muaj kev ntseeg kom qhia txoj moo zoo rau cov me nyuam hauv ib lub ntiaj teb uas tsis ntseeg. Yuav tsum muaj kev ntseeg kom thov Vajtswv cawm ib tug uas yus hlub thiab yuav tsum muaj kev ntseeg ntxiv yus txais lus teb uas ua rau yus poob siab.
Ob xyoo tas los, Muam Nelson thiab kuv wb mus xyuas Samoa, Tonga, Fiji, thiab Tahiti. Txhua lub teb chaws pov txwv ntawd tau los nag hlob hlob heev. Cov mej zeej tau yoo mov thiab thov Vajtswv tias lawv tej kev sib ntsib nraum zoov yuav txais kev pov hwm los ntawm cov nag lawm.
Nyob hauv Samoa, Fiji, thiab Tahiti, thaum kev sib ntsib nyuam qhuav pib, ntuj tsis los nag ntxiv. Tiam sis nyob hauv Tonga, ntuj tseem los nag hlob. Tiam sis 13,000 tus Neeg Ntseeg tau tuaj ntxov los zaum, es lawv ua siab ntev tos thaum los nag hlob hlob, ces zaum li ntawd hauv kev sib ntsib uas ntev li ob teev.
Peb tau pom tias cov neeg hauv cov pov txwv ntawd muaj kev ntseeg heev—kev ntseeg txaus kom ntuj tsis los nag ntxiv thiab kev ntseeg kom nyiaj mus thaum ntuj los nag ntxiv.
Tsis yog cov roob hauv peb lub neej yuav txav raws li peb nyiam los sis thaum twg peb xav tau. Tiam sis peb txoj kev ntseeg yeej yuav pab peb mus tom ntej. Kev ntseeg yeej yuav ua rau peb txais tau Vajtswv lub hwj chim ntxiv.
Cia li paub qhov no: yog txhua yam thiab txhua tus nyob hauv lub ntiaj teb uas nej tso siab rau yuav ua rau nej poob siab, Yexus Khetos thiab Nws lub Koom Txoos yeej yuav tsis ua rau nej poob siab. Tus Tswv yeej tsis pw, thiab nws tsis tsaug zog.16 Nws “yog tib tug Vajtswv nag hmo, hnub no, thiab mus ib txhis li.”17 Nws yeej yuav tsis tso Nws tej kev khi lus tseg,18 Nws cov lus cog tseg, los sis Nws txoj kev hlub rau Nws cov neeg. Nws ua txuj ci tseem ceeb hnub no thiab Nws yuav ua txuj ci tseem ceeb tag kis.19
Kev ntseeg Yexus Khetos yog lub hwj chim loj tshaj plaws nyob hauv lub neej no. Tus uas ntseeg yeej ua tau txhua yam.20
Nej txoj kev ntseeg Nws uas loj tuaj yuav muab cov roob txav mus—tsis yog cov roob uas ua rau lub ntiaj teb no zoo nkauj tiam sis yog cov roob ntawm kev tu siab hauv nej lub neej. Nej txoj kev ntseeg uas huaj vam yuav pab nej muab tej teeb meem hloov los ua tej cib fim uas loj tshaj qhov nej to taub.
Hnub Caiv Easter no, kuv qhia nej txog kuv txoj kev hlub thiab txoj kev ris txiaj, es kuv ua tim khawv rau nej tias Yexus Khetos tau sawv rov los lawm tiag. Nws tau sawv rov los kom coj Nws lub Koom Txoos. Nws tau sawv rov los kom foom koob hmoov rau tag nrho Vajtswv cov me nyuam lub neej, txawm lawv nyob qhov twg los yog. Yog peb ntseeg Nws, peb yuav muaj peev xwm muab cov roob ntawm peb lub neej txav mus. Kuv ua tim khawv li no los ntawm Yexus Khetos lub npe dawb ceev, amees.