Peb tus Kheej tus Cawm Seej

Peb caug plaub xyoo tas los, kuv tus khub tub txib thiab kuv tau ntsib thiab qhia ib tug txiv neej uas txawj ntse nyob hauv Davao City, hauv teb chaws Philippines uas yog ib tug kws sau ntawv hauv ntawv xov xwm nyob hauv Davao City, Philippines. Wb nyiam qhia nws vim nws muaj ntau lus nug thiab saib taus tej yam uas peb ntseeg. Qhov uas nws nug wb uas kuv nco qab tshaj yog “Nej xav li cas txog Khetos?”² Wb zoo siab qhia txog tej yam wb xav thiab ua tim khawv txog Yexus Khetos. Tom qab nws tau muab ib zaj lus luam tawm uas muaj tej lus zoo hais txog tus Cawm Seej. Kuv nco qab thaum ntawd tias tej lus ntawd txaus qhuas tiam sis tsis tau txhawb nqa kuv. Zaj lus luam tawm ntawd muaj lus qhuab qhia zoo tiam sis tsis muaj lub hwj chim ntawm sab ntsuj plig.

“Nej xav li cas txog Khetos?” Kuv pom tau tias thaum kuv paub kuv tus Cawm Seej zoo ces haj yam pab kuv hnov Nws zoo dua thiab pab kuv teb rov qab. Ob peb xyoos tas los, Txwj Laug David A. Bednar tau nug cov lus no: “Peb puas tsuas paub txog tus Cawm Seej xwb, los sis peb puas paub Nws zuj zus tuaj tsis tu tsis tseg? Peb yuav ua li cas thiaj li paub tus Tswv?”³

Thaum kuv kawm thiab xav mus xav los, kuv tau los paub tias tej yam uas kuv paub txog tus Cawm Seej yeej muaj ntau dua qhov uas kuv paub Nws npaum li cas. Kuv txiav txim siab tam sim ntawd kuv yuav siv zog los paub Nws. Kuv zoo siab heev uas muaj cov vaj lug kub thiab tej zaj lus tim khawv los ntawm cov txiv neej thiab poj niam uas yog Yexus Khetos cov thwj tim. Ob peb xyoos tas los kuv twb tau kawm ntawv thiab los paub txog ntau yam. Kuv thov kom tus Vaj Ntsuj Plig Dawb Huv qhia rau nej hnub no ib zaj lus uas zoo tshaj tej lus uas kuv tau sau tseg lawm.

Qhov xub thawj, peb yuav tsum paub tias kev los paub tus Cawm Seej yeej yog qhov tseem ceeb tshaj plaws uas peb yuav tsum xav ua hauv peb lub neej. Yeej yuav tsum saib qhov no tseem ceeb tshaj txhua yam.

“Txoj sia nyob mus ib txhis ntawd yog qhov uas lawv paub koj thiab paub hais tias koj tib leeg thiaj yog Vajtswv thiab paub Yexus Khetos tus uas koj txib los.”⁴

“Yexus teb Thaumas hais tias, Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.”⁵

“Kuv yog qhov kaj rau neeg ntiaj teb. Tus uas raws kuv qab yuav tsis taug txoj kev uas tsaus ntuj nti, tiam sis nws yuav tau lub neej tshav ntuj nrig.”⁶

Qhov thib ob, thaum peb haj yam los paub tus Cawm Seej, cov vaj lug kub thiab cov yaj saub tej lus yuav haj yam muaj nuj nqi rau peb tej lus ntawd thiaj li yuav los ua peb cov lus thiab. Tsis yog peb siv lwm tus tej lus, tej kev xav, thiab lub neej tiam sis peb los paub ntawm peb tus kheej, nyias raws nyias kev, sim tus Tswv txoj lus ⁷ thiab txais tus Vaj Ntsuj Plig Dawb Huv txoj kev ua tim khawv. Tus yaj saub Amas tshaj tawm hais tias:

“Nej puas xav tias kuv paub tau tej yam no ntawm kuv tus kheej? Saib seb, kuv ua tim khawv rau nej tias kuv yeej paub tias tej yam uas kuv tau hais no muaj tseeb. Thiab nej xav seb ua li cas kuv ho paub tias tej yam no muaj tseeb?

“Saib seb, kuv hais rau nej tias Vajtswv tus Ntsuj Plig Dawb Huv ua rau kuv paub tej yam no. Saib seb, kuv tau yoo mov thiab thov Vajtswv tau ntau hnub xwv kom kuv yuav paub tau tej yam no ntawm kuv tus kheej. Thiab nim no kuv paub ntawm kuv tus kheej tias tej yam no muaj tseeb; vim tus Tswv Vajtswv tau ua tej yam no tshwm sim rau kuv los ntawm nws tus Ntsuj Plig Dawb Huv; thiab nov yog lub txiaj ntsim txais tau kev tshwm sim uas yog nyob hauv kuv.”⁸

Qhov thib peb, qhov uas peb haj yam to taub tias Yexus Khetos txoj Kev Theej Txhoj pab peb tus kheej thiab txhua leej yuav pab peb los paub Nws. Feem ntau yooj yim rau peb lam xav thiab hais txog Khetos txoj Kev Theej Txhoj ces tsis to taub qhov ntawd muaj nuj nqis npaum li cas hauv peb lub neej. Yexus Khetos txoj Kev Theej Txhoj yeej nyob mus ib txhis rau txhua leej txhua tus tag nrho tiam sis pab tau yus tus kheej tiag tiag. Vim los ntawm Nws txoj kev txi theej txhoj, tus Cawm Seej muaj hwj chim los ntxuav peb huv, kho peb zoo, thiab ua kom peb muaj zog ib leeg dhau ib leeg zuj zus.

Tus Cawm Seej tsuas xav, thiab Nws tib lub hom phiaj txij thaum chiv keeb los, yog ua raws li Leej Txiv lub siab nyiam. Leej Txiv lub siab nyiam yog kom Nws pab “[ua kom] tib neeg tsis txawj tuag thiab tau txoj sia nyob mus ib txhis”⁹ los ua peb tus “uas thov Vajtswv pab peb.”¹⁰ Yog li ntawd, “txawm yog Yexus yog Vajtswv tus Tub los nws tseem kawm mloog lus los ntawm txoj kev uas tiv kev txom nyem; thaum Vajtswv ua rau nws zoo kawg nkaus lawm, nws thiaj yog tus uas pub txoj sia ntev dhawv mus ib txhis rau txhua tus uas mloog nws lus.”¹¹

“Thiab nws yuav mus, raug tej kev mob nkeeg thiab tej kev txom nyem thiab tej kev dag ntxias txhua yam. …

“Thiab nws yuav ris txoj kev tuag, xwv kom nws yuav daws tau kev tuag tej hlua … thiab nws yuav ris lawv tej kev qaug dag qaug zog, xwv kom nws lub siab thiaj li yuav muaj kev hlub tshua puv nkaus, … xwv kom nws yuav paub pab nws cov neeg ntawm sab cev nqaij daim tawv raws li lawv tej kev qaug dag qaug zog.

“… Vajtswv Leej Tub yuav raug kev txom nyem ntawm sab cev nqaij daim tawv xwv kom nws yuav ris tau nws cov neeg tej kev txhaum, xwv kom nws yuav rho tau lawv tej kev ua txhaum tawm raws li lub hwj chim ntawm nws txoj kev txhiv dim.”¹²

Kuv xav piav ib zaj txog ib lub sij hawm uas qhia txog kev nyiaj ntxeem uas tej lub sij hawm peb yuav tsum nyiaj mus kom paub tias tus Tswv txoj Kev Theej Txhoj pab tau peb tus kheej.

Ntau xyoo tas los, kuv tus thawj coj tau caw kuv kom nyeem Phau Ntawv Maumoos, ces kuv tau nyeem Phau Ntawv Maumoos tag nrho thiab tau cim cov nqe uas qhia txog tus Tswv txoj Kev Theej Txhoj. Kuv tus thawj coj kuj caw kom kuv sau ib nplooj ntawv ntsiab lus hais txog tej yam uas kuv tau kawm txog. Kuv hais rau kuv tus kheej, “Ib nplooj ntawv xwb? Ua tau, yuav yooj yim.” Tiam sis ua rau kuv xav tsis thoob, kuv kawm tias ua yam no nyuaj heev, thiab kuv ua tsis tau zoo.

Kuv tau los pom tias kuv ua tsis tau zoo vim tias kuv ua tsis yog thiab xav yuam kev lawm. Qhov thib ib, kuv xav tias qhov ntsiab lus yuav tsum ua rau sawv daws txais kev tshoov siab. Qhov ntsiab lus yog rau kuv xwb thiab tsis yog rau lwm tus. Kuv sau zaj ntsiab lus kom nco qab tog kuv tej kev xav hauv kuv lub siab txog tus Cawm Seej thiab tej yam uas Nws tau ua rau kuv ces txhua zaus kuv rov qab nyeem, yuav cia tej ntawd rov qab nkag los rau hauv kuv lub siab.

Qhov thib ob, kuv xav tias ntsiab lus ntawd yuav muaj txhij txhua thiab muaj tej lus ntev thiab nyuaj. Yeej ib txwm tsis yog hais txog cov lus ntev. Lub ntsiab no yeej yog ib zaj meej thiab yooj yim hais txog kev ntseeg. “Vim kuv tus ntsuj plig zoo siab rau kev qhia meej; vim tus Tswv Vajtswv ua hauj lwm rau noob neej zoo li no. Vim tus Tswv Vajtswv muab qhov kaj rau txoj kev to taub.”¹³

Qhov thib peb, kuv xav kom qhov ntawd zoo tag nrho, ib zaj ntsiab lus uas zoo tshaj lwm zaj—ib zaj ntsiab lus kawg uas tsis muaj leej twg hloov tau li—tiam sis nws yog ib zaj ua kuv hloov tau thiab sau ntxiv rau thaum kuv nkag siab dua txog Yexus Khetos txoj Kev Theej Txhoj.

Thaum kuv yog ib tug tub hluas, kuv kawm tau ntau thaum kuv sib tham nrog kuv tus npisov. Nyob rau lub caij nyoog ntawd, kuv tau los nyiam tej lus los ntawm ib zaj nkauj qhuas Vajtswv:

Tus yaj saub Maulaunais tau caw peb li no: “Thiab nim no, kuv xav kom nej nrhiav tus Yexus no, tus uas cov yaj saub thiab cov tim thawj tau sau txog.”¹⁵

Thawj Tswj Hwm Russell M. Nelson cog lus tias “yog [peb] yuav kawm tag nrho [peb] kawm tau txog Yexus Khetos, … [peb] yuav haj yam txawj tig ntawm kev txhaum mus. [Peb] yeej yuav xav ua raws li cov lus txib.”¹⁶

Hnub Easter Sunday no, ib yam li tus Cawm Seej tau tawm ntawm lub ntxa los, thov kom peb tsim los ntawm peb txoj kev tsaug zog ntawm sab ntsuj plig thiab tawm ntawm kev tsis ntseeg, kev ntshai, kev khav theeb, thiab kev lam ua xwb. Yexus Khetos thiab Leej Txiv Saum Ntuj Ceeb Tsheej muaj txoj sia nyob. Kuv ua tim khawv txog Nkawd txoj kev hlub zoo tag nrho rau peb. Los ntawm Yexus Khetos lub npe, amees.