Peb txoj Kev Nyuaj Siab Yuav Hloov Ua Kev Xyiv Fab
Kuv caw nej txhua tus uas muaj kev tu siab, tag nrho cov uas xav paub yuav muaj li cas tom qab peb tuag, kom nej tso siab ntseeg Khetos.
Ob peb xyoos tas los, thaum kuv koom tej kev sib ntsib nyob hauv Salt Lake City, kuv ntsib peb tus yaj saub, Russell M. Nelson. Raws li nws ib txwm hais rau txhua tus, nws nug hais tias, “Mark, koj niam nyob li cas?”
Kuv qhia nws tias kuv twb ntsib nws nyob hauv nws lub tsev hauv New Zealand thaum lub lim tiam ntawd thiab nws laus laus lawm tiam sis tseem muaj kev ntseeg heev thiab yeej tshoov txhua tus lub siab ntawm cov uas paub nws.
Ces nws hais tias, “Thov qhia nws tias kuv hlub nws … thiab qhia nws tias kuv zoo siab yuav rov qab ntsib nws dua.”
Kuv xav tsis thoob me ntsis thiab nug hais tias, “Koj puas npaj mus rau teb chaws New Zealand?”
Nws ua tib zoo xav thiab teb hais tias, “Tsis yog li ntawd, kuv yuav ntsib nws nyob hauv lub neej tom ntej.”
Nws tsis tso dag tso luag hlo li. Yeej yog ib co lus uas muaj tseeb xwb. Nyob hauv lub sij hawm rau wb ob leeg xwb, kuv mloog thiab hnov ib zaj lus tim khawv los ntawm ib tug yaj saub uas hais tias tom qab kev tuag los tseem muaj txoj sia.
Nyob hauv lub rooj sab laj no nej yuav mloog cov thwj tim thiab cov yaj saub ua tim khawv txog Yexus Khetos txoj Kev Sawv Rov Los. “Cov hauv paus ntsiab cai ntawm peb txoj kev ntseeg yog zaj lus tim khawv los ntawm cov Thwj Tim thiab cov Yaj Saub, txog Yexus Khetos, hais tias Nws tau tuag, tau raug muab faus, thiab tau nce mus dua saum ntuj ceeb tsheej lawm[;] … thiab tag nrho lwm yam uas hais txog peb txoj kev ntseeg ces yog kev txuas ntxiv rau qhov [tseeb] no xwb.”1 Kuv cog lus thaum nej rau siab xav mloog, tus Ntsuj Plig yuav nyob hauv nej lub siab lub ntsws qhia nej tias tej lus tim khawv no muaj tseeb.2
Yexus cov Thwj Tim puag thaum ub tau hloov siab hlo tom qab Nws tshwm sim rau lawv pom tom qab Nws tau tuag lawm. Kaum tus tau pom tias Nws tau sawv rov los. Thaumas tsis nyob thaum ntawd, nws hais tias, “Yog kuv tsis pom … mas kuv yeej tsis ntseeg li.”3 Tom qab ntawd Yexus qhuab ntuas Thaumas hais tias, “Tsis txhob ua xyem xyav, cia li ntseeg.”4 Ces tus Tswv qhia qhov tseem ceeb tshaj plaws txog kev ntseeg: “Tus uas tsis tau pom kuv tiam sis nws ntseeg, tus ntawd tau koob hmoov.”5
Tus Tswv uas tau sawv rov los tau txib Nws cov Thwj Tim mus ua tim khawv txog Nws. Ib yam li peb cov Thwj Tim niaj hnub no, lawv twb tso lawv tej hauj lwm tseg thiab siv sij hawm tas lawv lub neej tshaj tawm tias Vajtswv tau muab tus Yexus no tsa sawv rov los. Lawv tej zaj lus tim khawv uas muaj hwj chim heev ua rau neeg coob xav ua kev cai raus dej.6
Zaj lus txog Easter sawv ntxov yeej tseem ceeb rau tag nrho cov Ntseeg Khetos. Yexus Khetos tau sawv rov los, thiab vim muaj li no, peb kuj yuav rov qab ua neej tom qab peb tuag ib yam thiab. Peb paub qhov no mas ua rau peb lub neej muaj nqi thiab muaj hom phiaj. Yog peb mus tom ntej nrog kev ntseeg, peb yuav hloov siab tas mus li, ib yam li cov Thwj Tim puag thaum ub. Zoo li lawv, peb yuav muaj peev xwm nyiaj txhua yam kev nyuaj nrog kev ntseeg Yexus Khetos. Kev ntseeg no kuj ua rau peb cia siab txog ib lub sij hawm thaum peb “tej kev nyuaj siab ntawd yuav hloov ua kev zoo siab.”7
Kuv txoj kev ntseeg twb pib thaum ib lub sij hawm uas muaj kev nyuaj siab.
Kuv niam kuv txiv yog cov kws yug yaj nyob hauv New Zealand.8 Nkawd nyiam nkawd lub neej. Thaum nkawd yog ib khub niam txiv uas nyuam qhuav sib yuav, nkawd muaj peb tug ntxhais. Tus ntxhais ntxawm lub npe hu ua Ann. Muaj ib hnub thaum lawv ua si ua ke nyob ze ib lub pas dej, Ann uas muaj 17 lub hlis xwb tau khiav mus es tsis muaj leej twg pom. Lawv nrhiav nrhiav, ces lawv nrhiav tau nws nyob hauv cov dej, nws twb xiam lawm.
Txoj kev phem no ua rau nkawd raug kev nyuaj siab kawg nkaus. Kuv txiv sau ntawv hais tias tom qab ntawd nkawd tsis tau tso luag npaum li dhau los. Kuj ua rau nkawd nrhiav lus teb rau lub neej no tej lus nug tseem ceeb tshaj plaws: “Wb tus Ann uas muaj nqis heev los yuav ua li cas? Wb puas yuav rov qab pom nws dua? Wb tsev neeg yuav ua li cas kom rov qab muaj kev zoo siab?”
Ntau xyoo tom qab raug xwm txheej no, ob tug tub txib los ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tau los rau peb thaj teb. Nkawd pib qhia txog tej yam tseeb nyob hauv Phau Ntawv Maumoos thiab phau Npaivnpaum. Tej yam tseeb no kuj hais txog qhov uas tam sim no Ann nyob hauv lub ntuj ntsuj plig. Vim Yexus Khetos tau Sawv Rov Los, nws kuj yuav sawv rov los thiab. Nkawd qhia tias Yexus Khetos lub Koom Txoos los twb rov qab muaj hauv lub ntiaj teb nrog ib tug yaj saub thiab kaum ob tug Thwj Tim. Thiab nkawd tau qhia cov lus qhuab qhia zoo kawg nkaus tias tsev neeg muaj cib fim ua kev cai sib khi ua ke mus ib txhis li los ntawm txoj cai pov thawj hwj uas Yexus Khetos muab rau Nws thawj tus Thwj Tim, Petus.9
Kuv niam twb paub qhov tseeb tam sim ntawd thiab tus Ntsuj Plig tau ua tim khawv rau nws. Tiam sis kuv txiv twb ua xyem xyav tau ib xyoo. Nws kuj tsis tshua xav hloov nws lub neej thiab. Muaj ib hnub thaum sawv ntxov tom qab nws pw tsis tsaug zog hlo li, thaum nws mus mus los los hauv tsev, nws tig mus rau kuv niam thiab hais tias, “Kuv yuav ua kev cai raus dej hnub no los yog tsis ua hlo li.”
Kuv niam tau qhia ob tug tub txib txog qhov no, thiab nkawd paub kiag hais tias muaj ib txoj kev ntseeg me me hauv kuv txiv uas tam sim no yuav loj tuaj los yog tuag tas.
Hnub ntawd peb tsev neeg tau mus rau ntug hiav txwv nyob ze tshaj plaws. Peb cov me nyuam tsis tau paub tias lawv ua dab tsi, es peb noj su hauv cov roob xuab zeb thaum Txwj Laug Boyd Green thiab Gary Sheffield coj kuv niam kuv txiv mus rau hauv dej hiav txwv thiab muab nkawd ua kev cai raus dej. Ib txoj kev ua raws li kev ntseeg ntxiv, kuv txiv tau cog lus twj ywm rau tus Tswv tias muaj dab tsi los, nws yuav ua raws nraim li nws tej lus cog tseg tas nws lub neej.
Ib xyoo tom qab ntawd tau muab ib lub tuam tsev fij tseg nyob hauv Hamilton, New Zealand. Tsis ntev tom qab ntawd peb tsev neeg, muaj ib tug uas sawv cev rau Ann, txhos caug nyob ncig lub thaj nyob hauv tus Tswv lub tsev dawb ceev. Nyob ntawd, los ntawm txoj cai pov thawj hwj, peb tau ua ib txoj kab ke zoo nkauj heev ua kev cai sib khi los ua ib tsev neeg mus ib txhis li. Qhov no ua rau peb muaj kev kaj siab lug thiab kev xyiv fab heev.
Ntau xyoo tom qab ntawd kuv txiv qhia kuv tias yog tias Ann tsis tau raug tuag li ntawd, ces ntshe nws yuav tsis txo hwj chim txaus kom lees txais txoj moo zoo. Tiam sis tus Tswv tus Ntsuj Plig tau muab kev cia siab rau nws hais tias tej lus uas cov tub txib qhia muaj tseeb. Kuv niam kuv txiv txoj kev ntseeg tau loj tuaj ntxiv mus txog thaum nkawd nyias muaj nyias zaj lus tim khawv uas ua rau nkawd txo hwj chim thiab ua siab mos muag coj txhua txoj kev txiav txim hauv nkawd lub neej.
Kuv yeej yuav ris kuv niam kuv txiv txiaj vim nkawd coj yam ntxwv rau nkawd cov xeeb ntxwv. Peb ntsuas tsis taus muaj pes tsawg tus neeg uas tau hloov mus ib txhis vim nkawd tau muaj kev ntseeg thaum nkawd raug kev nyuaj siab loj kawg nkaus li.
Kuv caw nej txhua tus uas muaj kev tu siab, cov uas ua xyem xyav, tag nrho cov uas xav paub yuav muaj li cas tom qab peb tuag, kom nej tso siab ntseeg Khetos. Kuv cog lus rau nej tias yog nej xav ntseeg, ces ua raws li nej txoj kev ntseeg thiab coj raws li tus Ntsuj Plig tej lus ntxhi, ces nej yuav muaj kev xyiv fab hauv lub neej no thiab lub neej tom ntej.
Kuv tos ntsoov txog hnub uas kuv yuav ntsib kuv tus muam Ann. Kuv tos ntsoov hnub uas kuv yuav rov qab ntsib kuv leej txiv, uas tau tas sim neej 30 xyoo dhau los. Kuv ua tim khawv txog kev xyiv fab uas muaj thaum yus ua neej raws li kev ntseeg, yus ntseeg thaum tsis tau pom, tiam sis yus paub los ntawm tus Vaj Ntsuj Plig Dawb Huv lub hwj chim tias Yexus Khetos muaj txoj sia nyob. Tas kuv lub siab lub ntsws, kuv xaiv coj raws li Yexus Khetos thiab Nws txoj moo zoo. Qhov no ua rau kuv tau koob hmoov hauv kuv lub neej tag nrho. Kuv paub tias Yexus yog tus Khetos, Vajtswv Leej Tub, peb tus Cawm Seej thiab peb tus Txhiv Dim. Los ntawm Yexus Khetos lub npe, amees.