Tej uas Peb Tab Tom Kawm thiab Yeej Yuav Nco Ntsoov
Yog nej thov Vajtswv thiab xav txog nej lub neej, kuv ntseeg tias nej yuav pom ntau yam uas tus Tswv tau coj nej mus kom dhau qhov nyuaj no.
Kuv cov kwv tij, kuv twb tos ntsoov txog lub sij hawm nrog nej sib ntsib online no. Zaum tas los uas peb muaj ib tuas pov thawj hwj hauv lub tuam rooj sab laj yog thaum lub Plaub Hlis Ntuj xyoo 2019. Ob xyoo dhau los no twb muaj ntau yam tshwm sim! Nej ib txhia tau xiam cov uas nej hlub. Lwm tus tau poob hauj lwm los yog lawv txoj kev noj qab nyob zoo. Lwm tus tau poob lawv txoj kev kaj siab lug los sis kev cia siab txog yav tom ntej. Kuv pab nej tu siab, nej cov uas tau raug tej yam no los sis lwm yam kev txom nyem. Txhua lub sij hawm kuv thov kom tus Tswv yuav nplij nej lub siab. Thaum nej cia Vajtswv yeej hauv nej lub neej, kuv paub tias Nws yeej ib txwm xav zoo txog nej thaum yav tom ntej.
Nrog rau tej yam uas peb poob lawm, kuj muaj tej yam uas peb tau txais. Ib txhia tau txais kev ntseeg peb Leej Txiv Saum Ntuj Ceeb Tsheej thiab Nws Leej Tub, Yexus Khetos, loj ntxiv. Feem coob tau txais ib lub zeem muag txog lub neej tshiab—twb yog ib lub zeem muag pom mus ib txhis li. Tej zaum nej txoj kev sib raug zoo nrog cov uas nej hlub thiab tus Tswv haj yam muaj zog. Kuv cia siab tias nej tau txais ib txoj kev muaj peev xwm mloog Nws hais thiab txais kev tshwm sim rau nej tus kheej. Tej kev sim siab feem ntau muab cib fim rau peb loj hlob tuaj uas tej zaum tsis muaj lwm txoj kev yuav los tau.
Cia li xav txog ob xyoo tas los no. Nej tau loj hlob tuaj li cas? Nej tau kawm dab tsi? Tej zaum thaum xub thawj nej yuav xav rov qab mus nyob hauv xyoo 2019 thiab nyob ntawd tas li! Tiam sis yog nej thov Vajtswv thiab xav txog nej lub neej, kuv ntseeg tias nej yuav pom ntau yam uas tus Tswv tau coj nej mus kom dhau qhov nyuaj no, pab nej ua ib tug txiv neej uas hloov siab los ntseeg ntxiv—ib tug txiv neej tseeb rau Vajtswv.
Kuv paub tias tus Tswv tau npaj tej yam tseem ceeb thiab zoo kawg nkaus rau peb—rau ib leeg thiab sawv daws. Nrog kev khuv leej thiab kev ua siab ntev, Nws hais tias:
“Nej yog me nyuam yaus, thiab nej tseem tsis to taub hais tias Leej Txiv muaj cov koob hmoov tseem ceeb npaum li cas … [uas Nws] tau npaj rau nej;
“Thiab nej ris tsis taus txhua yam lub sij hawm no; txawm li ntawd los, cia li zoo siab, vim kuv yuav coj nej kev.”1
Kuv cov kwv tij, kuv ua tim khawv tias Nws yeej ib txwm, thiab tam sim no, coj peb txoj hau kev, thaum peb muaj siab xav mloog Nws hais. Nws xav kom peb loj hlob tuaj thiab kawm, txawm yog—tej zaum qhov tseem ceeb yog dhau los ntawm—tej kev nyuaj.
Tej yam nyuaj yeej pab yus kawm tau zoo. Nej tau kawm dab tsi hauv ob xyoos no uas nej xav nco ntsoov? Nej nyias yuav muaj nyias lus teb, tiam sis kuv xav qhia plaub qhov uas kuv cia siab tias peb txhua tus tau kawm thiab yeej yuav nco ntsoov.
Qhov 1: Lub Tsev Yog Qhov Chaw Tseem Ceeb Tshaj rau Kev Ntseeg thiab Kev Teev Tiam
Thaum tus Tswv ceeb toom peb txog tej xwm txheej phem hauv hnub nyoog kawg, Nws pheej hais tej lus no: “Sawv hauv tej chaw dawb huv, thiab tsis txhob txav mus.”2 “Tej chaw dawb huv” no yeej yog tus Tswv lub tsev thiab tej tsev sib ntsib. Tiam sis vim peb tsis muaj cai sib ntsib rau hauv tej tsev li no zoo pes tsawg, peb tau kawm tias ib qho chaw dawb huv tshaj plaws hauv lub ntiaj teb no yog peb lub tsev—muaj tseeb tiag, nej lub tsev.
Cov kwv tij, nej ris Vajtswv lub pov thawj hwj. “Tej kev tej cai ntawm lub pov thawj hwj sib txuas nrog tej lub hwj chim saum ntuj ceeb tsheej uas yeej tsis sib cais.”3 Nej thiab nej tsev neeg tau txais cov kab ke pov thawj hwj. “Los ntawm tej kab ke [pov thawj hwj] ntawd thiaj pom lub hwj chim ua li Vajtswv tshwm sim.”4 Lub hwj chim ntawd mas nej thiab nej tsev neeg txais tau nyob hauv nej lub tsev thaum nej ua raws li tej kev khi lus uas nej tau khi tseg lawm.5
185 xyoo tas los xwb, thaum lub Plaub Hlis Ntuj hnub tim 3, xyoo 1836, Eliyas tau muab cov yawm sij pov thawj hwj txum tim rov qab los uas cia peb tsev neeg ua kev cai sib khi ua ke tas mus li. Yog li ntawd nej thiaj li tau xav zoo zoo thaum nej muab lub cim nco txog rau nej tsev neeg. Nej xav tias nej tsev neeg tau hloov siab li cas thaum lawv pom nej—lawv txiv, lawv yawg, lawv yawm txiv, lawv tus txiv, lawv tus tub, los sis tus nus—ua txoj kab ke dawb huv no? Nej yuav ua li cas kom tseem xav txog qhov dawb huv ntawd nyob hauv nej tsev neeg?
Tej zaum nej xav tias tseem muaj ntxiv uas nej yuav tsum ua kom nej lub tsev ua ib chaw tiv thaiv nej txoj kev ntseeg. Yog tias muaj, ces thov nej ua li ntawd kiag! Yog nej tau yuav poj niam, nrog nej tus poj niam thaum vim nws yog ib tug sib luag zos hauv txoj hauj lwm tseem ceeb no. Yeej tsis muaj lwm yam uas tseem ceeb npaum li qhov no. Txij no mus txog lub sij hawm uas tus Tswv rov qab los, peb sawv daws yuav tsum muaj ib lub tsev uas muaj kev nyab xeeb thiab ke pov hwm.6
Tej cwj pwm thiab tej yam uas nej ua kom thov tus Ntsuj Plig los yuav ua rau nej lub tsev haj yam dawb huv. Tiam sis peb kuj paub tseeb hais tias kev dawb huv yuav ploj mus yog tias nej ua ib yam dab tsi los sis hauv nej lub tsev uas ua rau tus Ntsuj Plig Dawb Huv tu siab, vim thaum ntawd “ntuj ceeb tsheej txawm thim mus.”7
Nej puas tau xav paub vim li cas tus Tswv xav kom peb kho peb lub tsev hloov ua qhov chaw rau kev kawm thiab kev ua raws li txoj moo zoo? Tsis yog Nws xav kom peb npaj rau, thiab pab peb nyiaj kom dhau ib phaum mob xwb. Tej kev txwv tsis pub sib sau ua ke los yuav muaj qhov kawg. Tiam sis, nej txoj kev cog lus tias nej yuav kho nej lub tsev ua thawj lub tsev pov hwm kev ntseeg los yeej yuav tsum tsis txhob muaj qhov kawg. Thaum kev ntseeg thiab kev dawb huv nqeg zuj zus hauv lub ntiaj teb no, nej haj yam yuav tsum muaj tej qhov chaw dawb huv ntxiv. Kuv thov kom nej tseem yuav npaj kom nej lub tsev yuav ua ib qho chaw dawb huv “thiab tsis txhob txav mus li”8 ntawm lub hom phiaj tseem ceeb ntawd.
Qhov 2: Peb Ib Leeg Xav Tau Ib Leeg
Vajtswv xav kom peb ua hauj lwm ua ke thiab ib leeg pab ib leeg. Yog vim li ntawd Nws thiaj li txib peb rau hauv lub ntiaj teb koom ib tsev neeg thiab muab peb faib hauv tej pawg ntseeg thiab ceg txheem ntseeg. Yog vim li ntawd Nws thiaj li hais kom peb ua hauj lwm thiab txhawb pab lwm tus. Yog vim li ntawd Nws thiaj li hais kom peb nyob hauv lub ntiaj teb tiam sis tsis txhob ua li neeg ntiaj teb.9 Peb yeej ua ntau yam ntxiv thaum peb ua ib ke thiab tsis txhob ua peb ib leeg xwb.10 Vajtswv txoj hau kev zoo siab yuav ploj mus yog tias Nws cov me nyuam nyias nyob nyias xwb.
Phaum mob no yeej txawv heev vim txhua tus hauv lub ntiaj teb raug phaum mob no thaum tib lub sij hawm. Txawm yog muaj ib txhia uas raug txom nyem ntau tshaj lwm tus los, peb txhua tus twb raug tej yam nyuaj. Yog vim li no, peb txhua tus txoj kev sim siab yeej pab tau Vajtswv cov me nyuam koom siab koom ntsws ntau dua li yav tas los. Yog li ntawd, kuv xav nug nej, kev sim siab no puas tau ua rau nej sib raug zoo nrog nej cov neeg zej zog—rau nej cov kwv tij thiab cov muam nyob ntawm nej txoj kev thiab nyob thoob plaws lub ntiaj teb?
Ob txoj lus txib tseem ceeb tshaj plaws coj peb txoj hau kev: thib ib, hlub Vajtswv thiab, thib ob, hlub peb cov neeg zej zog.11 Peb qhia txog peb txoj kev hlub thaum peb pab lawv.
Yog nej paub leej twg uas kho siab, cia li nrog nws tham—tsis hais yog nej kho siab ib yam los yog! Nej tsis tas xav ua lag luam los yog muaj ib zaj lus xov los sis muaj lwm yam kom mus xyuas lawv. Cia li hais nyob zoo thiab qhia tias nej hlub lawv. Tej txuj ci technology pab tau nej. Yog muaj phaum mob los sis tsis muaj, txhua tus me nyuam muaj nqi thiab xav paub tias nws tsis nyob nws ib leeg!
Qhov 3: Nej Pawg Pov Thawj Hwj Tsis Yog rau Nej Muaj Kev Sib Ntsib Xwb
Nyob hauv phaum mob no, twb txiav nej pawg tej kev sib ntsib thaum Hnub Sunday rau ib ntus. Tam sim no tej pawg sib ntsib tau nyob online. Txawm li ntawd los, tej hauj lwm uas tus Tswv tau muab rau tej pawg pov thawj hwj ua yeej tsis yog kom nej sib ntsib xwb. Tej kev sib ntsib yeej yog ib feem ntawm tej yam uas ib pawg pov thawj hwj yuav tsum ua.
Kuv cov kwv tij hauv tej pawg lub Pov Thawj Hwj Aloos thiab pawg txwj laug, cia li xav ntxiv vim li cas peb muaj nej tej pawg. Tus Tswv xav kom nej siv nej pawg li cas kom ua Nws tej hauj lwm—tam sim no? Nrhiav kev tshwm sim los ntawm tus Tswv. Txo nej lub hwj chim! Thov! Mloog zoo! Yog Vajtswv tau hu nej ua ib tug thawj coj, cia li sib tham ua ke nrog nej pawg thawj tswj hwm thiab cov mej zeej hauv nej pawg. Nej tuav lub luag hauj lwm pov thawj hwj los sis txoj kev hu twg los, cia Vajtswv yeej thaum nej rau siab ua ib tug mej zeej hauv nej pawg thiab thaum nej pab lwm tus. Cia li muaj kev xyiv fab vim nej yuav ua ncaj ncees thaum nej “mob siab ua tej yam zoo.”12 Tej pawg yeej muaj peev xwm pab kom muab Ixayees sau los ua ke nyob ob sab ntawm daim ntaub thaiv.
Qhov 4: Peb Mloog Yexus Khetos Hais Zoo Dua Thaum Peb Nyob Tus
Peb nyob hauv ib lub caij nyoog uas cov yaj saub tau hais txog, thaum “txhua yam yuav ntxhov hnyo; thiab muaj tseeb, neeg lub siab yuav poob tag; vim txoj kev ntshai yuav los rau txhua tus neeg.”13 Qhov ntawd muaj tseeb ua ntej phaum mob no, thiab yuav muaj tseeb tom qab ntawd thiab. Kev ntxhov hnyo hauv lub ntiaj teb yuav loj zuj zus tuaj. Tiam sis, tus Tswv lub suab tsis yog “ib lub suab uas nrov nrov, tiam sis … yog ib lub suab uas meej mos muag kawg nkaus li, zoo li yog ib lub suab ntxhi, thiab lub suab no chob txog ntua nruab siab.”14 Yog tias nej xav hnov lub suab yau yau no, nej kuj yuav tsum nyob tus!15
Rau ib lub caij, phaum mob ua rau peb yuav tsum txiav tej yam ntxim saib ntxim ua uas yuav puv peb lub neej. Tsis ntev ces tej zaum peb muaj peev xwm xaiv kom puv tej lub sij hawm ntawd nrog tej suab nrov thiab kev ntxhov hnyo ntawm lub ntiaj teb. Los yog peb yuav siv peb lub sij hawm kom hnov tus Tswv lub suab ntxhi lus kom coj peb, nplij peb lub siab, thiab qhia txog kev kaj siab lug. Lub sij hawm ntsiag to yeej yog lub sij hawm dawb huv—yog lub sij hawm uas yuav pab peb txais kev tshwm sim thiab nyob kaj siab lug.
Cia li tswj nej tus kheej kom siv sij hawm nej ib leeg thiab nrog cov uas nej hlub. Qhib nej lub siab thov Vajtswv. Siv sij hawm nyeem vaj lug kub thiab teev tiam hauv lub tuam tsev.
Kuv cov kwv tij, muaj ntau yam uas tus Tswv xav kom peb kawm los ntawm phaum mob no. Kuv tau hais txog plaub yam xwb. Kuv caw nej sau ib daim ntawv rau nej tus kheej, cia li xav zoo zoo, thiab qhia cov uas nej hlub txog tej uas nej sau.
Yav tom ntej yeej ci ntsa iab rau Vajtswv cov neeg uas ua raws li lawv tej kev khi lus.16 Tus Tswv yuav hu Nws cov tub qhe uas tuav lub pov thawj hwj kom foom koob hmoov, nplij siab, thiab txhawb tib neeg lub zog thiab npaj neeg ntiaj teb rau Nws txoj Kev Los Zaum Ob. Tsim nyog uas peb txhua tus ua raws li txoj kev tsa dawb huv uas peb tau txais. Peb yeej ua tau li no! Kuv ua tim khawv, nrog kuv txoj kev hlub rau nej txhua tus li no, kuv cov kwv tij uas kuv hlub, los ntawm Yexus Khetos lub npe dawb ceev, amees.