Vajtswv Hlub Nws cov Me Nyuam
Kuv xav qhia peb txoj kev uas peb Leej Txiv Saum Ntuj Ceeb Tsheej qhia txog Nws txoj kev hlub rau peb, uas yog Nws cov me nyuam.
Cov kwv tij thiab cov muam, kuv nrog nej zoo siab txog Yexus Khetos txoj moo zoo. Kuv xav qhia nej txog cov mej zeej hauv teb chaws Philippines txoj kev hlub rau nej thiab sawv lawv cev hais tias, Mabuhay!
Nyob hauv Easter sawv ntxov no, kuv ua tim khawv tias Khetos muaj txoj sia nyob, Nws tau sawv rov los thiab Nws txoj kev hlub rau peb thiab peb Leej Txiv Saum Ntuj Ceeb Tsheej yeej yog kev hlub dawb huv thiab nyob mus ib txhis. Hnub no, kuv xav tsom ntsoov rau Leej Txiv Saum Ntuj Ceeb Tsheej thiab Yexus Khetos txoj kev hlub rau txhua leej txhua tus, uas muaj los ntawm Yexus Khetos txoj Kev Theej Txhoj. “Rau qhov Vajtswv hlub neeg ntiaj teb kawg li, nws thiaj li txib nws tib leeg Tub los rau hauv ntiaj teb” (Yauhas 3:16).
Thaum ib tug tim tswv nug Nifais txog tej yam nws paub txog Vajtswv, Nifais teb hais tias, “Kuv paub tias nws yeej hlub nws cov me nyuam” (saib 1 Nifais 11:16–17).
Ib nqe los ntawm Phau Ntawv Maumoos: Ib zaj Tim Khawv Ntxiv txog Yexus Khetos piav zoo txog tus Cawm Seej txoj kev hlub dawb huv: “Thiab tej neeg ntiaj teb, vim yog lawv txoj kev ua phem, yuav txiav txim hais tias nws tsis muaj nuj nqis; … lawv thiaj muab nws nplawm, … lawv muab nws ntaus, … lawv nto qaub ncaug rau nws, thiab nws ua siab ntev nyiaj, vim yog nws txoj kev hlub thiab nws txoj kev ua siab ntev rau noob neej” (1 Nifais 19:9). Txhua yam uas tus Cawm Seej ua yog vim Nws hlub txhua leej txhua tus. Peb paub tias peb Leej Txiv Saum Ntuj Ceeb Tsheej txoj kev hlub yeej zoo ib yam, vim tus Cawm Seej txo hwj chim qhia tias Nws thiab Nws Leej Txiv “koom ib siab” (saib Yauhas 10:30; 17:20–23).
Ces peb yuav ua li cas kom qhia Nkawd tias peb ris Nkawd txiaj rau Nkawd txoj kev hlub? Tus Cawm Seej tau qhia peb thaum nws caw txhua leej txhua tus ua raws li qhov yooj yim no: “Yog nej hlub kuv, nej yeej yuav ua raws li kuv [tej lus txib]” (saib Yauhas 14:15).
Thawj Tswj Hwm Dallin H. Oaks qhia hais tias, “Vajtswv txoj kev hlub uas zoo tag nrho yeej nyob hauv tag nrho cov koob hmoov los ntawm Nws txoj moo zoo, tsis hais qhov tseeb uas qhia tias Nws cov koob hmoov zoo tshaj plaws los yuav pub rau cov uas ua raws li Nws tej kev cai.”1
Kuv xav qhia peb txoj kev uas peb Leej Txiv Saum Ntuj Ceeb Tsheej qhia txog Nws txoj kev hlub rau peb, uas yog Nws cov me nyuam.
Txoj Kev thib Ib, Kev Txheeb Ze Vajtswv thiab Tsev Neeg Qhia txog Nws txoj Kev Hlub
Tej kev txheeb ze uas muaj nqis tshaj plaws yog kev txheeb ze nrog Leej Txiv thiab Leej Tub thiab peb tsev neeg vim peb yuav nrog lawv nyob mus ib txhis. Txoj hau kev zoo siab yeej qhia tias Vajtswv hlub peb kawg nkaus. Thaum peb tsom ntsoov rau Vajtswv txoj hau kev, peb txaus siab muab qhov uas peb xav txog peb tus kheej tshem tawm thiab tsim ib lub hauv paus tshiab uas yuav txhawb nqa peb tej kev txheeb ze uas nyob mus ib txhis. Qhov uas peb ua li no hu ua ib txoj kev “hloov peb sab ntsuj plig.” Thaum peb hloov peb sab ntsuj plig, peb yuav tsum nrhiav Vajtswv thiab thov Nws lub npe (saib Yelemis 29:12–13).
Kev nrhiav Nws thiab thov Nws yuav pib tus txheej txheem kom muaj chaw txhawb nqa peb tej kev txheeb ze uas nyob mus ib txhis. Yuav ua rau peb lub zeem muag ntawm sab ntsuj plig pom dav dua thiab pab peb tsom ntsoov rau tej yam uas peb muaj hwj chim hloov es tsis ntshai txog tej yam uas peb tsis muaj hwj chim tswj kav. Thaum peb kawm txog peb tus Cawm Seej, Yexus Khetos lub neej thiab txoj kev qhuab qhia, ces yuav ua rau peb saib tej kev txhawj xeeb no los ntawm ib lub zeem muag uas txawj pom mus ib txhis.
Tej lub sij hawm muaj tej yam uas ua rau peb tsis txawj nco qab txog Vajtswv txoj kev hlub nyob hauv peb tsev neeg thiab tej yam peb ua. Ib tug niam tsev tau xav tias nws tsev neeg tsom ntsoov rau lawv tej xov tooj ntawm tes es nws tsim ib txoj kev kho teeb meem no. Thaum noj hmo thiab lwm lub sij hawm uas lawv nyob ua ke, nws cia li hais nrov tias, “Tso xov tooj tseg; cia peb sib tham tim ntsej tim muag.” Nws hais tias qhov no yog ib yam uas lawv pheej ua hauv nws tsev neeg thiab qhov no ua rau lawv tsev neeg muaj zog thaum lawv sib tham tim ntsej tim muag. Lawv nyiam sib tham txog Los, Nrog Kuv Mus thaum lawv tsev neeg nyob ua ke.
Txoj Kev thib Ob, Nws Qhia txog Nws txoj Kev Hlub rau Nws cov Me Nyuam Vim Nws Hu cov Yaj Saub
Tam sim no peb lub ntiaj teb raug “txoj kev sib cav sib ceg thiab tej kev xav nrov nroo ntws” (Joseph Smith—Keeb Kwm 1:10). Povlauj ua rau peb nco qab tias muaj ntau yam lub suab nyob hauv lub ntiaj teb (saib 1 Kauleethaus 14:10). Tej lub suab twg yeej qhia meej thiab muaj nqis tshaj lwm lub suab? Yog Vajtswv cov yaj saub, cov pom tau, thiab cov txais kev tshwm sim lub suab.
Kuv nco qab thaum kuv phais mob nyob rau xyoo 2018 thiab tom qab kuv rov qab ua hauj lwm, kuv nyob hauv chaw nres tsheb hauv lub Koom Txoos lub hauv paus. Ces ua ciav, kuv hnov Thawj Tswj Hwm Russell M. Nelson lub suab hais tias, “Taniela, Taniela.” Kuv khiav mus cuag nws, thiab nws nug seb kuv nyob li cas.
Kuv hais tias, “Kuv rov qab nyob zoo, Thawj Tswj Hwm Nelson.”
Nws qhia tswv yim rau kuv thiab khawm kuv. Tus yaj saub no tau txhawb pab “ib tug” uas yog kuv.
Thawj Tswj Hwm Nelson tau mus rau ntau lub teb chaws hauv lub ntiaj teb no. Raws li kuv xav, nws tsis txhawb pab txhiab txhiab tus neeg, tiam sis nws txhawb pab ib tug dhau ib tug. Thaum nws ua li ntawd, nws qhia tias Vajtswv hlub tag nrho Nws cov me nyuam.
Tsis ntev tas los, Thawj Tswj Hwm Nelson cov lus tau muab dag zog thiab tshoov cov neeg nyob hauv Philippines lub siab. Zoo li lwm lub teb chaws hauv lub ntiaj teb no, nyob rau xyoo 2020 lub teb chaws Philippines raug phaum mob COVID-19, thiab muaj ib lub roob hluav taws tawg, av qeeg, muaj cua daj cua dub, thiab dej nyab.
Tiam sis zoo li ib qho kaj uas ci dhau cov huab tsaus ntuj uas yog kev ntshai, kev kho siab, thiab kev poob siab, muaj tus yaj saub cov lus. Nws tau hais kom cov neeg nyob thoob plaws lub ntiaj teb yoo mov thiab thov Vajtswv thiab qhia kom peb mus tom ntej txawm raug phaum mob no. Nws tau caw peb ua kom peb tej tsev hloov los ua tej chaw uas muaj kev ntseeg. Nws tau hais kom Tsoom Haiv Neeg Ntseeg hauv Hnub Nyoog Kawg nyob txhua qhov chaw saib tag nrho Vajtswv cov me nyuam rau nqi thiab cia Vajtswv yeej hauv peb lub neej.2
Thawj Tswj Hwm Nelson zaj lus tim khawv txog kev ris txiaj lub hwj chim yeej tshoov peb lub siab thiab, thiab nws zaj lus thov Vajtswv tau nrov mus thoob plaws teb chaws Philippines.3 Nyob hauv cheeb tsam Leyte, tau qhib video no thaum muaj neeg ntseeg nyob ua ke, thiab ib tug pov thawj tau hais txog qhov no nyob hauv nws zaj lus qhuas Vajtswv. Cov neeg Philippines, nrog rau tag nrho neeg ntiaj teb, tau koob hmoov vim lawv paub txog Vajtswv txoj kev hlub los ntawm Nws tus yaj saub cov lus.
Txoj Kev thib Peb, Kev Qhuab Ntuas Yog Ib txoj Kev uas Qhia tias Vajtswv Hlub Nws cov Me Nyuam.
Tej lub sij hawm Vajtswv qhia txog Nws txoj kev hlub thaum Nws qhuab ntuas peb. Yog ib txoj kev uas pab peb nco ntsoov tias Nws hlub peb thiab Nws paub tias peb yog leej twg. Nws txoj kev cog lus tias yuav muaj kev kaj siab lug los Nws hais rau tag nrho cov uas ua raws li lawv tej kev khi lus thiab txaus siab cia Nws kho lawv kev.
Thaum peb paub tias Vajtswv qhuab ntuas peb thiab peb txaus siab txais Nws tej lus, ces yeej zoo li Nws phais peb tus mob ntawm sab ntsuj plig. Es muaj leej twg nyiam kev phais mob? Tiam sis cov uas xav tau thiab txaus siab txais, ces kev phais mob yuav cawm lawv txoj sia. Tus Tswv qhuab ntuas cov uas nws hlub. Cov vaj lug kub qhia peb li no (saib Henplais 12:5–11; Hilamas 12:3; Lus Qhuab Qhia thiab Kev Khi Lus 1:27; 95:1). Kev qhuab ntuas ntawd, los sis kev phais tus mob ntawm sab ntsuj plig, yuav ua rau peb hloov tau peb lub neej. Cov kwv tij thiab cov muam, peb yuav paub tias kev qhuab ntuas yuav ua rau peb hloov siab kom dawb huv.
Joseph Smith, tus yaj saub ntawm Kev Muab txoj Moo Zoo Txum Tim Rov Qab Los, twb raug qhuab ntuas. Tom qab Joseph ua rau 116 phab ntawv ntawm Phau Ntawv Maumoos ploj lawm, tus Tswv tau qhuab ntuas thiab qhia txog Nws txoj kev hlub thaum Nws hais tias: “Tsim nyog koj yuav tsum tsis txhob ntshai neeg tshaj li koj hwm Vajtswv. … Tsim nyog uas koj tau rau siab ntseeg. … Saib seb, koj yog Joseph, thiab Vajtswv tau xaiv koj los ua tus Tswv txoj hauj lwm. … Nco ntsoov, Vajtswv muaj siab hlub tshua, yog li ntawd, cia li hloov siab lees txim” (Lus Qhuab Qhia thiab Kev Khi Lus 3:7–10).
Nyob rau xyoo 2016, thaum ua tub txib nyob hauv Little Rock, Arkansas, kuv tau thov Tij Laug Cava xa ib pob khoom rau kuv tus muam hlob, uas nyob hauv ib lub pov txwv nyob hauv Fiji. Kuv twb tsis tau xav tias nws yuav teb li nws tau hais. Nws hais tias, “Thawj Tswj Hwm Wakolo, koj tus muam twb tso lub ntiaj teb no tseg lawm thiab lawv muab nws faus 10 hnub tas los.” Kuv khuv xim kuv tus kheej thiab kuv npau taws me ntsis vim kuv tsev neeg tsis tau qhia kuv li no.
Hnub tom qab ntawd, thaum kuv tus poj niam qhia cov tub txib ntxhais txib, txoj kev xav no tau chob kuv lub siab: Koj twb qhia thiab hais lus tim khawv txog Yexus Khetos txoj Kev Theej Txhoj; tam sim no cia li ua raws li koj hais.” Kuv nco qab tias “Tus uas Vajtswv qhuab qhia, tus ntawd tau koob hmoov; thaum Vajtswv qhuab ntuas [peb yuav tsum] tsis txhob tu siab” (Yauj 5:17). Zoo li yog kev phais kuv sab ntsuj plig, thiab tam sim ntawd kuv twb hloov siab.
Thaum kuv xav txog qhov no, lawv hu kuv kom los hais cov lus xaus lawv tej kev sib tham. Ntxiv rau lwm yam uas kuv hais, kuv tau qhia txog qhov uas kuv tau kawm lawm: qhov thib ib, tus Vaj Ntsuj Plig Dawb Huv tau qhuab ntuas kuv thiab kuv nyiam heev vim kuv yog tib tug uas tau hnov; qhov thib ob, vim tus Cawm Seej tau theej peb lub txhoj, kuv yuav tsis hais tias kuv tej teeb meem yog tej kev sim siab thiab tej kev txom nyem, tiam sis yog kuv tej cib fim kawm; thiab qhov thib peb, vim muaj Nws lub neej zoo tag nrho uas Nws tsis tau ua txhaum kuv yuav tsis hais txog tej yam kuv uas tsis yog thiab tej yam kuv tsis txawj ua hais tias yog kev tej kev qaug zog tiam sis yog kuv tej cib fim hloov. Lub sij hawm no tau pab kuv paub tias Vajtswv qhuab ntuas peb vim Nws hlub peb.
Kuv mam li xaus lus. Peb Leej Txiv Nyob Mus Ib Txhis thiab Nws Leej Tub, Yexus Khetos, qhia peb tias Nkawd hlub peb vim Nkawd ua rau peb yuav nyob mus ib txhis nrog Nkawd thiab peb tsev neeg, Nkawd hu cov yaj saub niaj hnub no kom qhia thiab txhawb pab peb, thiab Nkawd qhuab ntuas peb kom pab peb kawm thiab loj hlob tuaj. “Peb ua Vajtswv tsaug rau Nws lub txiaj ntsim zoo tshaj plaws uas yog Nws Leej Tub,”4 peb tus Tswv uas tau sawv rov los lawm, tus uas yog tus Khetos uas muaj sia nyob. Los ntawm Yexus Khetos lub npe, amees.