Kev Qhia Raws Li tus Cawm Seej txoj Kev
Peb txhua tus lav ris qhov uas peb yuav tsum ua raws li tus Xwb Hwb tus yam ntxwv thiab qhia zoo ib yam li Nws.
Cov Xib Hwb Zoo Tshaj Plaws
Ob peb hlis dhau los no, kuv ib tug qub khub ntawv los ntawm lub zos Overton, Nevada, hais kom wb npaj ib qho khoom plig ua Christmas rau wb tus xib hwb qhia ntawv kindergarten, uas tsis ntev ua ntej ntawd tau nto 98 xyoo. Tus xib hwb qhia ntawv no tau qhia peb ua siab zoo, saib qhov uas so tsaug zog thaum yav tav su tseem ceeb npaum li cas, saib ib khob mis nyuj thiab tej khoom noj txom ncauj zoo npaum li cas, thiab nws qhia kom peb ib leeg hlub ib leeg. Ua tsaug ntau, tus Muam Davis, uas koj yog ib tug xwb hwb zoo heev.
Kuv muaj dua ib tug xib hwb qhia ntawv zoo tshaj plaws thaum kuv kawm ntawv rau ntawm lub tsev kawm ntawv qib siab Ricks College ntau xyoo dhau los. Thaum ntawd, kuv tab tom npaj mus ua tub txib thiab xav tias yuav pab kuv yog tias kuv kawm ib hoob kawm ntawv npaj mus ua tub txib. Qhov uas muaj los tau hloov kuv lub neej.
Txij hnub thib ib los, kuv pom tau tias kuv tab tom mloog ib tug xib hwb zoo kawg nkaus. Tus xib hwb no yog Tij Laug F. Melvin Hammond. Kuv paub hais tias Tij Laug Hammond hlub tug Tswv thiab nws hlub kuv. Kuv pom tau tias nws lub meej mom thiab nws lub suab hais lus qhia tias nws hlub. Thaum nws qhia peb, tus Ntsuj Plig ua rau kuv lub siab lub ntsws to taub meej meej li. Tij Laug Hammond qhia cov lus qhuab qhia, tiam sis nws kuj caw kuv los kawm tej lus ntawd kuv tus kheej thiab. Nws txoj lus caw ntawd tau pab kuv to taub meej meej li tias yog kuv lub luag hauj lwm kom kawm tus Tswv cov lus qhuab qhia rau kuv tus kheej. Qhov uas kuv pom tias muaj li ntawd hloov kuv mus ib txhis li. Ua tsaug, Tij Laug Hammond, vim koj qhia raws li tus Cawm Seej txoj kev.
Cov kwv tij thiab cov muam, tsim nyog uas txhua tus neeg muaj tej kev kawm paub zoo li no txawm tias yog nyob hauv tsev los sis nyob tom tshawj.
Cov lus cev rau phau Los, Nrog Kuv Mus qhia peb saib txoj kev qhia zoo li tus Khetos yuav pab tau peb li cas. Cov lus cev no hais tias, “Lub hom phiaj ntawm tag nrho kev kawm thiab kev qhia txog txoj moo zoo yog kom peb hloov siab los ntseeg Yexus Khetos thiab pab peb hloov los ua neeg zoo li Nws.” … Tiam sis txoj kev kawm txog txoj moo zoo uas txhawb peb txoj kev ntseeg kom muaj zog thiab ua rau peb hloov siab los ntseeg tsis yog ib txoj kev uas peb muaj peev xwm ua tau ib me pliag xwb. Txoj kev kawm li no yeej tawm chav kawm mus nkag rau hauv yus lub siab thiab lub tsev.”1
Cov vaj lug kub hais tias tus Cawm Seej txoj kev qhia hauv Teb Chaws Amelikas yav thaum ub muaj hwj chim ntau heev thiab ncha mus npaum li tias “cov neeg tag nrho tau hloov siab los ntseeg tus Tswv, thoob plaws rau hauv thaj av, cov Neeg Nifais thiab cov Neeg Lamas, thiab twb tsis muaj kev sib cav thiab kev sib ceg nyob hauv lawv, thiab txhua tus neeg ib tug ua ncaj rau ib tug.”2
Peb cov lus qhia yuav ua li cas pab tau cov neeg uas peb hlub zoo li ntawd? Peb yuav ua li cas qhia zoo li tus Cawm Seej thiab pab lwm tus neeg hloov siab los ntseeg tiag tiag? Cia kuv qhia ob peb lub tswv yim rau nej.
Coj Raws li tus Cawm Seej tus Yam Ntxwv
Qhov xub thawj, ua zaj ua ntxeev kom kawm txog tus Xib Hwb Zoo Tshaj Plaws nej tus kheej. Khetos hlub lwm tus neeg li cas? Lawv tau xav li cas hauv lawv lub nruab siab thaum Nws qhia lawv? Nws tau qhia dab tsi? Nws tau xav kom cov uas Nws qhia ua dab tsi? Tom qab uas nej xav mus xav los txog cov lus nug no, ntsuam xyuas thiab kho nej txoj kev qhia kom zoo ib yam li Yexus li.
Lub Koom Txoos muaj ntau cov ntaub ntawv pab no hauv qhov app Txoj Moo Zoo cov Ntawv thiab nyob hauv ChurchofJesusChrist.org. Muaj ib phau ntawv pab hu ua Kev Qhia Raws Li tus Cawm Seej txoj Kev. Kuv caw nej los nyeem thiab kawm txhua lo lus nyob hauv phau ntawv ntawd. Cov ntsiab cai nyob haud yuav pab nej ua zoo li tus Khetos thaum nej qhia lwm tus neeg.
Tso lub Hwj Chim ntawm Tsev Neeg Tawm
Kuv lub tswv yim thib ob yog los ntawm qhov uas ob peb hlis dhau los thaum kuv mus xyuas kuv ib tug phooj ywg. Kuv nrog nws sib tham es kuv hnov tau nws tus poj niam nrog leej twg sib tham thiab ces kuv tso tseg tawm mus cia kuv tus phooj ywg rov qab mus koom nws tsev neeg.
Ib teev tom qab ntawd kuv txais ib tsab ntawv text los ntawm kuv tus phooj ywg tus poj niam hais tias: “Tij Laug Newman, ua tsaug ntau uas koj tuaj xyuas peb. Peb kuj xav caw koj los tsev, tiam sis kuv xav qhia koj saib peb tau ua dab tsi thaum koj tuaj ntawd. Txij thaum muaj phaum mob loj no txhua hnub Sunday kuv thiab kuv tus txiv wb tau nrog peb cov me nyuam uas twb tiav nkauj tiav nraug lawm sib tham txog Los, Nrog Kuv Mus hauv Zoom hauv koospistawj. Yeej muaj txuj ci tseem ceeb los vim yog qhov ntawd. Kuv xav tias yog thawj thawj zaug uas wb tus ntxhais tau nyeem Phau Ntawv Maumoos nws tus kheej. Hnub no yog zaj lus kawg txog Phau Ntawv Maumoos thiab peb tab tom xaus lus thaum koj tuaj ntawd. … Kuv tau xav tias koj yuav txaus siab hnov saib Los, Nrog Kuv Mus, Zoom, thiab ib phaum mob tau muab lub cib fim thiab lub sij hawm yog kom ua rau wb tus ntxhais lub siab hloov. … Yeej ua rau kuv xav hais tias lub sij hawm txawv txav no muaj txuj ci tseem ceeb me me ntau heev los sav.”
Kuv xav hais tias qhov no yeej yog Thawj Tswj Hwm Russell M. Nelson cov lus cog tseg uas nws cog thaum lub Kaum Hli Ntuj xyoo 2018 muaj los ua tiav lawm. Nws hais tias tus txheej txheem kawm hauv tsev uas lub Koom Txoos txhawb nqa “yuav ua rau txhua yim neeg haj yam muaj hwj chim, thaum uas txhua yim neeg ua tib zoo ua raws li tej lus qhia no thiab pauv lawv lub tsev los ua ib qho chaw cawm sia vim muaj kev ntseeg. Kuv cog lus hais tias thaum nej rau siab ntso kho nej lub tsev kom ua lub hauv paus rau txoj kev kawm txoj moo zoo, nyob nyob ces nej tej Hnub Caiv yuav ua rau nej zoo siab kawg. Nej cov me nyuam yuav zoo siab hlo kawm thiab ua raws li tus Cawm Seej tej kev qhia. … Yuav muaj tej kev pauv loj uas kav ntev mus hauv nej tsev neeg.”3 Yog ib lo lus cog tseg zoo kawg nkaus!
Kom hloov peb lub neej tiag tiag, kev hloov los ntseeg rau ntawm Yexus Khetos yuav tsum siv peb lub siab lub ntsws tag nrho thiab raug rau txhua yam hauv peb lub neej. Yog vim li ntawd uas peb yuav tsum tsom ntsoov lub hauv paus ntawm peb lub neej—peb tsev neeg.
Nco Qab Ntsoov tias Kev Hloov Siab Los Ntseeg Yog Ib Yam Yus Ua Yus tus Kheej
Kuv lub tswv yim kawg yog kom nco qab ntsoov hais tias kev hloov siab los ntseeg yuav tsum los ntawm yus lub siab lub ntsws los. Raws li hais hauv zaj dab neeg piv txwv hais txog kaum tus nkauj xwb, peb muab tsis tau peb cov roj ntawm kev hloov siab los ntseeg rau lwm tus neeg, txawm tias peb xav ua li ntawd los xij. Ib yam li Txwj Laug David A. Bednar qhia hais tias: “Cov roj no peb cug ib tee dhau ib tee … rub siab ntev thiab rau rau siab cug. Tsis muaj ib txoj kev luv; yeej npaj tsis tau thaum lig lawm.”4
Los, Nrog Kuv Mus muab qhov tseeb ntawd ua nws lub hauv paus. Kuv muab piv rau tus tim tswv uas pab Nifais kawm txog Yexus Khetos thaum nws hais tias, “Saib seb!”5 Ib yam li tus tim tswv ntawd, Los, Nrog Kuv Mus caw peb saib hauv cov vaj lug kub thiab cov yaj saub niaj hnub nim no cov lus kom thiaj nrhiav tau tus Cawm Seej thiab mloog Nws cov lus. Ib yam li Nifais, tus Ntsuj Plig yuav ua tib zoo qhia peb thaum peb nyeem thiab xav txog Vajtswv txoj lus. Los, Nrog Kuv Mus yog qhov uas yuav pab peb kawm txog tus Khetos cov lus qhuab qhia.
Ib leej niam leej txiv muaj kev lav ris ib yam nkaus. Cov me nyuam muaj keeb ntau yam los ntawm lawv niam lawv txiv, tiam sis ib zaj lus tim khawv tsis yog ib yam muaj keeb ntawd. Peb muab ib zaj lus tim khawv rau peb cov me nyuam tsis tau li, ib yam li peb ua tsis tau rau ib lub noob loj hlob tuaj. Tiam sis peb kuj npaj tau ib qho chaw ntxim pab kom lub noob ntawd loj hlob tuaj, av zoo, tsis muaj pos uas yuav “laum txoj lus.” Peb rau rau siab npaj ib qho chaw zoo heev rau peb cov me nyuam—thiab lwm tus neeg uas peb hlub—kom lawv thiaj txais tau lub noob rau ib qho chaw zoo, “[hnov] txoj lus, thiab [nkag siab] zoo”6 thiab kawm paub rau lawv tus kheej hais tias “lub noob yog ib lub noob zoo.”7
Ob peb xyoos dhau los, kuv tus tub Jack thiab kuv tau muaj lub cib fim ntaus golf rau ntawm qhov Old Course ntawm St. Andrews hauv teb chaws Scotland, qhov chaw uas txoj kev ntaus golf xub pib. Lub cib fim ntawd yeej zoo kawg nkaus! Thaum kuv rov qab los tsev kuv sim qhia rau lwm tus neeg saib nws zoo kawg nkaus npaum li cas. Tiam sis kuv piav tsis tau saib nws zoo npaum li cas. Kuv piav saib yog zoo li cas, kuv muab duab thiab duab yeeb yaj kiab rau lawv saib tiam sis tsis muaj leej twg nkag siab hais tias zoo npaum li cas. Thaum kawg kuv to taub hais tias tib txoj kev uas ib tug neeg yuav to taub saib St. Andrews zoo npaum li cas yog lawv yuav tsum mus txog mus xyuas—lawv yuav tsum saib thaj chaw dav dav thiab ntsuab xiab, nqus cov pa, hnov cov cua rau ntawm lawv lub ntsej muag, thiab ntaus lub pob mus rau hauv cov qhov loj thiab dav thiab tej me nyuam ntoo fab fab heev, ntshe wb tau siv zog ntaus pob li ntawd.
Nws zoo ib yam li ntawd nrog Vajtswv txoj lus. Peb qhia tau, peb qhiab qhia tau, peb piav txog kom ntxaws ntxaws tau. Peb sib tham txog, peb hais tau nws zoo li cas, peb ua tim khawv txog los tau. Tiam sis mus txog thaum ib tug neeg hnov Vajtswv txoj lus dawb ceev roos nws lub siab lub ntsws ib yam li tej lwg dej los saum ntuj los dhau los ntawm tus Ntsuj Plig,8, ces yuav yog zoo li tus neeg ntawd saib ib daim duab cia saib dab muag los yog lwm tus neeg tej duab txog lawv qhov kev mus txawv teb chaws ua si. Yus yuav tsum mus txog qhov chaw ntawd yus tus kheej. Kev hloov siab los ntseeg yog ib txoj kev uas yus taug yus tus kheej nkaus xwb—ib txoj kev sib sau ua ke.
Txhua tus neeg uas qhia hauv lub tsev thiab nyob hauv lub tsev koom txoos yeej muab tau rau lwm tus neeg lub cib fim hnov tus ntsuj plig thiab hloov siab los ntseeg. Dhau los ntawm tej yam uas muaj los rau lawv, lawv yuav los “paub tau qhov tseeb ntawm tag nrho txhua yam” rau lawv tus kheej.9 Thawj Tswj Hwm Nelson tau qhia hais tais, “Yog tias nej muaj lus nug txog txoj moo zoo los sis lub Koom Txoos, thaum nej xaiv cia Vajtswv yeej, Nws yuav coj nej kom to taub tej yam tseeb tiag uas yuav coj nej mus thiab pab nej taug raws nraim li nej tej kev khi lus.”10
Kho Kev Qhia Kom Zoo Dua Tuaj
Kuv caw cov thawj coj thiab cov xib hwb hauv txhua lub koom hauv hauv lub Koom Txoos kom nrog ib tsoom niam txiv thiab ib tsoom tub hluas ntxhais hluas sib sab laj ua ke kom kho tej kev qhia kom zoo dua tuaj nyob rau txhua txhia theem—txawm yog ceg txheem ntseeg, pawg ntseeg, los yog hauv tsev neeg los xij. Yuav los thaum peb qhia cov lus qhuab qhia thiab caw tus Ntsuj Plig rau hauv peb tej kev sib tham txog tej qhov tseeb uas tus Vaj Ntsuj Plig Dawb Huv tau qhia peb thaum peb ua tib zoo kawm peb tus kheej.
Kuv cov phooj ywg hauv Khetos, peb txhua tus lav ris qhov uas peb yuav tsum ua raws li tus Xwb Hwb tus yam ntxwv thiab qhia zoo ib yam li Nws. Yexus yog txoj kev yog lawm! Thaum peb ua raws li Nws, ces “thaum nws yuav tshwm los peb yuav zoo li nws, vim peb yuav pom nws tseeb tias nws zoo li cas tiag; xwv kom peb yuav muaj txoj kev cia siab li no; xwv kom Vajtswv yuav ua rau peb hloov ua neeg huv ib yam li nws twb huv.”11 Los ntawm lub npe ntawm tus uas sawv rov los, tus Xib Hwb Zoo Tshaj Plaws, twb yog Yexus Khetos, amees.