Khiav Ncaj Nraim Mus rau tus Ciam Tom Kawg

Thaum kuv nyeem phau Tes Hauj Lwm thiab Povlauj tej tsab ntawv, kuv xav tsis thoob vim Povlauj yeej hlub thiab ris Vajtswv txiaj thaum nws ua hauj lwm, qhia, thiab ua tim khawv txog Yexus Khetos. Vim li cas ib tug neeg yuav txawj ua hauj lwm, nrog kev hlub thiab kev ris txiaj li ntawd, thaum nws twb raug tej kev txom nyem loj ua luaj li? Muaj dab tsi uas ua rau Povlauj xav ua hauj lwm li no? “Kuv … khiav ncaj nraim mus rau tus ciam tom kawg kom kuv tau nqi zog … uas Vajtswv khaws cia rau saum ntuj ceeb tsheej tos peb cov uas ntseeg Yexus Khetos.”¹

Qhov uas peb khiav ncaj nraim mus rau tus ciam tom kawg yog qhov uas peb rau siab taug “txoj kev ti thiab nqaim uas yuav coj mus rau txoj sia nyob mus ib txhis”² nrog peb tus Cawm Seej thiab peb Leej Txiv Saum Ntuj Ceeb Tsheej. Povlauj tau xav tias nws tej kev txom nyem “yeej piv tsis tau lub hwj chim ci ntsa iab uas Vajtswv yuav pub rau peb yav tom ntej no.”³ Povlauj tsab ntawv rau cov neeg Filipis uas nws sau thaum nws raug kaw hauv lub tsev rau txim yog ib tsab ntawv uas qhia txog nws txoj kev xyiv fab thiab kev zoo siab, thiab txhawb nqa peb txhua tus, qhov tseem ceeb thaum lub caij nyoog uas peb tsis paub tseeb no. Peb txhua tus yuav tsum ua siab loj vim Povlauj hais tias: “Kuv ua kuv lub neej kom haum Yexus Khetos siab, kuv thiaj li tso ib puas tsav yam tseg. Kuv saib tej ntawd zoo ib yam li tej liam sim uas luag muab pov tseg lawm xwb; kuv ua li ntawd kom kuv thiaj tau Yexus Khetos los ua kuv tus Tswv.”⁴

Thaum peb xav txog Povlauj tej hauj lwm, ua rau peb txais kev tshoov siab thiab kev txhawb nqa los ntawm cov neeg zoo li “Povlauj” hauv peb lub caij nyoog uas kuj ua hauj lwm, qhia, thiab ua tim khawv nrog kev hlub thiab kev ris txiaj txawm lawv raug xwm txheej hauv lawv lub neej thiab hauv cov uas lawv hlub lub neej. Ib yam uas kuv raug cuaj xyoos tas los tau pab kuv to taub tias kev khiav ncaj nraim mus rau tus ciam tom kawg tseem ceeb npaum li cas.

Nyob rau xyoo 2012, thawj zaug uas kuv mus rau lub tuam rooj sab laj kev sib ntsib rau cov thawj coj, ua rau kuv txhawj heev thiab xav tias kuv zoo tsis txaus. Hauv kuv lub siab kuv pheej xav hais tias, “Tsis tsim nyog koj nyob no! Lawv twb ua yuam kev loj heev!” Thaum kuv tab tom nrhiav ib qho chaw rau kuv zaum, Txwj Laug Jeffrey R. Holland pom kuv. Nws los txog kuv thiab hais tias, “Edward, zoo siab pom koj nyob no,” ces nws maj mam npuaj kuv sab plhu. Kuv xav tias kuv zoo li ib tug me nyuam mos liab! Nws txoj kev hlub tau tshoov kuv lub siab thiab pab kuv xav tias kuv tsim nyog nyob ntawd, xav tias lawv yog kuv cov kwv tij. Hnub tom qab ntawd, kuv pom Txwj Laug Holland ua ib yam li nws tau ua rau kuv hnub ua ntej, maj mam npuaj Txwj Laug Dallin H. Oaks sab plhu, tiam sis Txwj Laug Oaks laus dua nws!

Thaum lub sij hawm ntawd kuv tau hnov tus Tswv txoj kev hlub uas peb pom zoo yog peb cov yaj saub, cov pom tau, thiab cov txais kev tshwm sim. Txwj Laug Holland, los ntawm tej yam siab zoo nws ua, tau pab kuv txhob xav txog kuv tus kheej thiab tej kev xav tias kuv tsis tsim nyog. Nws pab kuv tsom ntsoov rau tej hauj lwm dawb ceev thiab xyiv fab uas Vajtswv hu kuv ua—kom coj tib neeg mus cuag Khetos. Zoo li Povlauj, nws tau pab kuv khiav mus rau tus ciam tom kawg.

Povlauj ntuas peb kom peb mus tom ntej tiam sis xav kom peb tsis nco qab txog tej uas twb dhau mus lawm—peb tej kev ntshai, tej kev xav, tej yam peb ua tsis yog, thiab peb tej kev tu siab uas muaj tas los lawm. Nws caw peb, ib yam li peb tus yaj saub uas peb hlub, Thawj Tswj Hwm Russell M. Nelson, “siv ib tug txheej txheem tshiab thiab dawb huv ntxiv.”⁵ Tus Cawm Seej cov lus cog tseg yeej muaj tseeb: “Rau qhov tus uas khuv xim nws txoj sia, tus ntawd yuav tsis tau txoj sia, tiam sis tus uas tsis khuv xim nws txoj sia, vim nws ntseeg kuv, tus ntawd yuav tau txoj sia.”⁶

Nyov hauv kuv thawj zaj lus uas kuv hais hauv lub tuam rooj sab laj, kuv tau hais txog ib lub sij hawm thaum kuv niam qhia kuv ua hauj lwm. Nws hais tias, “Tsis txhob saib nram qab hlo li. “Cia li saib tom hauv ntej saib tseem tshuav dab tsi uas yuav tsum ua nawb mog.”⁷

Thaum txog lub sij hawm uas nws lub neej yuav tas los, thaum kuv Niam muaj mob cancer, nws tau nyob nrog Naume thiab kuv. Muaj ib hmo kuv hnov nws quaj quaj hauv nws chav pw. Nws mob mob heev, tsis hais tom qab nws haus tshuaj yeeb zaum kawg ob teev ua ntej.

Kuv nkag hauv nws chav pw thiab quaj nrog nws. Kuv tau thov Vajtswv nrov kom nws tsis txhob hnov mob li ntawd. Ces nws tau ua ib yam li nws ua ntau xyoo tas los: nws nres thiab qhia ib yam tseem ceeb rau kuv. Kuv yeej yuav nco ntsoov nws lub ntsej muag thaum lub sij hawm ntawd: tsis muaj zog thiab raug mob mob heev, nws ntsia nws tus tub uas nyuaj siab heev. Nws luag nyav los kua muag, nws ntsia kuv qhov muag, thiab hais tias, “Tsis nyob ntawm koj los sis nyob ntawm lwm tus, tiam sis nyob ntawm seb Vajtswv puas yuav muab qhov mob no tshem los sis tsis tshem.”

Kuv zaum ntsiag to. Nws kuj zaum ntsiag to thiab. Kuv nco ntsoov lub sij hawm no. Hmo ntawd, los ntawm kuv niam, tus Tswv tau qhia kuv ib yam uas kuv yuav nco ntsoov tas mus li. Thaum kuv niam hais tias nws txaus siab ua raws li Vajtswv lub siab nyiam, kuv nco qab txog qhov uas vim li cas Yexus Khetos raug txom nyem hauv lub Vaj Khexemanes thiab nyob saum tus ntoo saum Khaulakhauthas. Nws hais tias: “Saib seb kuv twb muab kuv txoj moo zoo rau nej, thiab nov yog txoj moo zoo uas kuv tau muab rau nej—hais tias kuv los rau hauv lub ntiaj teb los ua li kuv Txiv lub siab nyiam, vim kuv Txiv txib kuv los.”⁸

Daim Duab

Yexus Khetos hauv lub Vaj Khexemanes

Thaum kuv xav txog peb tus yaj saub ua rau kuv xav txog Thawj Tswj Hwm Nelson cov lus nug rau peb nyob hauv lub tuam rooj sab laj tas los. Thawj Tswj Hwm Nelson nug hais tias: “Nej puas txaus siab cia Vajtswv yeej hauv nej lub neej? Nej puas txaus siab cia Vajtswv ua tus tseem ceeb tshaj plaws hauv nej lub neej? … Nej puas yuav cia Nws lub suab … ua ntej nej ua lwm yam? Nej puas txaus siab cia nej lub siab nyiam ywj rau Nws li?”⁹ Kuv niam yuav teb tias nws txaus siab thiab lwm tus mej zeej hauv lub Koom Txoos nyob thoob plaws lub ntiaj teb kuj yuav teb tias lawv txaus siab. Thawj Tswj Hwm Nelson, ua koj tsaug vim koj tshoov peb lub siab thiab txhawb nqa peb thaum koj nug peb tej yam no.

Tsis ntev tas los, kuv tau sib tham nrog ib tug npisov nyob hauv Pretoria, South Africa, uas muab nws tus poj niam thiab nws tus ntxhais hlob faus vim nkawd tas sim neej no nyob rau tib hnub. Phaum mob coronavirus ua rau nkawd tso lub ntiaj teb no tseg. Kuv nug seb nws nyob li cas. Npisov Teddy Thabethe cov lus teb twb txhawb kuv txoj kev xav ua raws li tus Tswv cov yaj saub, cov pom tau, thiab cov txais kev tshwm sim tej lus ntuas. Npisov Thabethe teb tias yeej muaj kev cia siab thiab kev nplij siab thaum yus paub tias tus Cawm Seej tau ris Nws cov neeg tej kev mob, Nws thiaj yuav paub pab peb.¹⁰ Nrog kev ntseeg nws tau ua tim khawv tias, “Kuv zoo siab rau txoj hau kev cawm seej, txoj hau kev zoo siab.” Ces nws nug kuv hais tias: “Tus yaj saub yeej tau qhia peb li no hauv lub tuam rooj sab laj tas los puas yog?”

Txawm yog peb txhua tus yuav raug teeb meem hauv lub neej no, thov kom peb tsom ntsoov rau lub hom phiaj uas yog kev “khiav ncaj nraim mus rau tus ciam tom kawg,” uas yog “nqi zog uas Vajtswv khaws cia rau saum ntuj ceeb tsheej tos peb cov uas ntseeg Yexus Khetos.”¹¹

Kuv txo hwj chim caw peb txhua tus kom txhob tso tseg! Vajtswv hu peb kom “peb cia li muab txhua yam uas thaiv peb kev thiab tej kev txhaum uas khi peb tso pov tseg, thiab peb cia li sib tw khiav ncaj nraim mus kom txog tus ciam tom kawg, [kom peb] … ntsia ntsoov Yexus tus uas yog peb lub hauv paus kev ntseeg thiab ua kom peb kev ntseeg tiav.”¹²

Qhov uas peb raug dab tsi hauv lub neej no los tsis ua li cas, qhov tseem ceeb yog qhov uas peb hloov los ua neeg zoo li cas. Yeej muaj kev xyiv fab thaum peb khiav ncaj nraim mus rau tus ciam tom kawg. Kuv ua tim khawv tias tus uas tau kov yeej txhua yam yuav pab peb thaum peb ntsia ntsoov Nws. Los ntawm Yexus Khetos lub npe, amees.