COVID-19 thiab cov Tuam Tsev
Cia li nco ntsoov txog tej kev khi lus thiab cov koob hmoov uas los ntawm lub tuam tsev. Ua raws nraim li tej kev khi lus uas nej tau khi tseg lawm.
Kuv cov kwv tij thiab cov muam, peb twb tau txais kev tshoov siab heev. Kuv zoo siab rau tag nrho tej lus thov Vajtswv, zaj lus, thiab cov nkauj hauv lub tuam rooj sab laj no. Ua ntej tsaug vim nej koom nrog peb, txawm nej nyob qhov twg los xij.
Xyoo tas los no, vim muaj phaum mob COVID-19 thiab vim peb xav ua cov pej xeem zoo hauv lub ntiaj teb no, peb twb txiav txim siab peb yuav muab tag nrho cov tuam tsev kaw tau ib ntus. Ob peb hlis tom qab ntawd, peb tau txais kev tshoov siab kom rov qab qhib cov tuam tsev zuj zus tuaj los ntawm ib tug txheej txheem xyuam xim heev. Tam sim no peb siv plaub theem muab cov tuam tsev qhib, es peb ua raws nraim li lub tseem fwv hauv zej zog tej kev cai nyab xeeb.
Hais txog cov tuam tsev hauv theem 1, tej khub niam txiv uas tau txais nkawd vaj txiaj ntsim lawm ua tau kev cai sib khi ua ib tug txiv thiab ib tug poj niam.
Hais txog cov tuam tsev hauv theem 2, peb ua tag nrho cov kab ke rau cov neeg ciaj, tsis hais tus uas txais nws vaj txiaj ntsim, kev muab tus txiv thiab tus poj niam ua kev cai sib khi, thiab khi cov me nyuam rau lawv niam lawv txiv. Peb tau hloov tej kev cai ntawm theem 2 es tam sim no peb cia peb cov tub hluas ntxhais hluas, cov mej zeej tshiab, thiab lwm tus uas muaj ib daim ntawv tso cai nkag tuam tsev uas siv qee zaus xwb mas peb cia lawv ua kev cai raus dej sawv cev rau lawv cov poj koob yawm txwv.
Hais txog cov tuam tsev hauv theem 3, cov uas tau teem sij hawm lawm ua tau cov kab ke rau cov neeg ciaj tiam sis kuj ua tau cov kab ke sawv cev rau cov poj koob yawm txwv uas tas sim neej lawm.
Theem 4 yog kev rov qab qhib cov tuam tsev tag nrho li qub.
Peb ua nej tsaug vim nej ua siab ntev thiab rau siab ua hauj lwm pab thaum hauv lub caij nyoog nyuaj no. Kuv thov kom nej yuav xav teev tiam Vajtswv thiab ua hauj lwm hauv lub tuam tsev ntxiv.
Tej zaum nej xav paub seb thaum twg nej yuav rov qab mus rau lub tuam tsev thaum twg. Lus teb yog li no: Nej lub tuam tsev yuav qhib thaum twg nej tseem fwv tso cai ua li ntawd. Thaum muaj COVID-19 hauv nej cheeb tsam tsawg txaus kom nyab xeeb, nej lub tuam tsev yuav rov qab qhib. Cia li ua txhua yam nej ua tau kom muaj COVID tsawg xwb nyob hauv cheeb tsam nej thiaj li yuav muaj cib fim mus rau lub tuam tsev.
Thaum nej ua li ntawd, cia li nco ntsoov txog tej kev khi lus thiab cov koob hmoov uas los ntawm lub tuam tsev. Ua raws nraim li tej kev khi lus uas nej tau khi tseg lawm.
Peb ua cov tuam tsev tam sim no kom npaj rau yav tom ntej! Tam sim no peb ua los sis kho plaub caug ib lub tuam tsev. Xyoo tas los, thaum muaj phaum mob no, twb dig av rau 21 lub tuam tsev tshiab!
Peb xav ua kom tus Tswv lub tsev yuav nyob ze peb cov mej zeej, xwv kom lawv yuav muaj cib fim mus rau hauv lub tuam tsev ntau npaum li lawv mus tau.
Tam sim no thaum kuv tshaj tawm txog peb txoj kev npaj ua 20 lub tuam tsev tshiab, kuv nco txog thiab qhuas cov pioneer—yav tas los thiab tam sim no—lawv lub neej uas lawv muab fij rau Vajtswv tau pab peb ua li no niaj hnub no. Yuav ua ib lub tuam tsev tshiab nyob hauv tej qhov chaw no: Oslo, Norway; Brussels, Belgium; Vienna, Austria; Kumasi, Ghana; Beira, Mozambique; Cape Town, South Africa; Singapore, Republic of Singapore; Belo Horizonte, Brazil; Cali, Colombia; Querétaro, Mexico; Torreón, Mexico; Helena, Montana; Casper, Wyoming; Grand Junction, Colorado; Farmington, New Mexico; Burley, Idaho; Eugene, Oregon; Elko, Nevada; Yorba Linda, California; thiab Smithfield, Utah.
Kev ua hauj lwm hauv lub tuam tsev yeej yog ib qho tseem ceeb ntawm kev muab Yexus Khetos txoj moo zoo Txum Tim Rov Qab Los. Cov kab ke ntawm lub tuam tsev ua rau peb lub neej muaj hwj chim thiab muaj dag zog es tsis muaj lwm txoj kev rau peb tau tej yam ntawd. Peb ua Vajtswv tsaug rau cov koob hmoov ntawd.
Thaum peb xaus lub rooj sab laj, peb rov qab hais rau nej tias peb hlub nej. Peb thov Vajtswv tias Nws yuav muab Nws cov koob hmoov thiab saib xyuas nej txhua tus. Nyob ua ke peb ua Nws tej hauj lwm dawb huv. Thov kom peb sib zog ua tus Tswv tes num uas muaj yeeb koob! Kuv thov li no los ntawm Yexus Khetos lub npe dawb ceev, amees.