Kev Cia Siab rau Khetos

Cov kwv tij thiab cov muam, nyob hauv lub caij Easter no peb tsom ntsoov rau peb tus Tswv thiab tus Cawm Seej, Yexus Khetos txoj Kev Sawv Rov Los. Peb nco txog Nws tej lus caw kom “nej cov uas sab sab vim nej ris nra hnyav, nej cia li los cuag kuv, kuv yuav cia nej so.

“Kuv yog tus muaj lub siab dawb siab zoo, nej cia li los kwv kuv tus quab thiab kawm tej uas kuv qhia, nej thiaj yuav tau so.

“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”¹

Tus Cawm Seej cov lus caw peb los cuag Nws yog cov lus caw rau txhua leej txhua tus kom los koom nrog Nws lub Koom Txoos.

Nyob hauv nqe ua ntej cov lus no, Yexus qhia tias yuav ua li cas thaum peb xav coj raws li Nws. Nws hais tias, “Tsis muaj leej twg paub Leej Tub, tsuas yog Leej Txiv thiaj paub xwb, thiab tsis muaj leej twg paub Leej Txiv, tsuas yog Leej Tub thiab cov uas Leej Tub pom zoo qhia rau thiaj paub xwb.”²

Yexus xav kom peb paub tias Vajtswv yog ib Leej Txiv Saum Ntuj Ceeb Tsheej uas hlub peb.

Qhov uas peb paub tias peb Leej Txiv Saum Ntuj Ceeb Tsheej hlub peb yuav pab peb paub tias peb yog leej twg thiab peb yeej nyob hauv Nws tsev neeg mus ib txhis li.

Qhov Mayo Clinic tau hais tias: “Qhov uas yus muaj neeg uas nrog yus sib koom siab yeej tseem ceeb heev. … Yuav luag txhua yam ntawm peb lub neej los nyob ntawm qhov uas muaj ib co neeg nrog peb sib koom siab.” Cov lus ceeb toom tias, “Peb yuav tsum tsis txhob muab qhov uas peb xav nrog lwm tus sib koom siab faib ntawm peb txoj kev nyob zoo ntawm sab cev nqaij daim tawv thiab sab paj hlwb”³—thiab kuv kuj xav hais tias peb txoj kev nyob zoo ntawm sab ntsuj plig.

Hmo ua ntej Nws raug txom nyem hauv lub Vaj Khexemanes thiab tuag saum ntoo khaub lig, tus Cawm Seej ntsib Nws cov thwj tim noj Plua Mov Kawg. Nws hais rau lawv tias, “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”⁴ Hnub tom qab ntawd, ua ntej hnub poob, Yexus Khetos twb tau raug txom nyem thiab “tuag [saum ntoo khaub lig] rau peb tej kev txhaum.”⁵

Kuv xav paub seb cov poj niam thiab cov txiv neej rau siab ntseeg Nws tau muaj kev kho siab npaum li cas thaum hnub poob lawm thiab kev tsaus ntuj thiab kev ntshai tau roos lawv.⁶

Ib yam li cov thwj tim puag thaum ub yuav luag 2,000 xyoos tas los, ntshe tej lub sij hawm nej feem coob yuav kho siab heev. Kuv twb tau paub txog kev kho siab no txij thaum kuv tus poj niam uas muaj nqis heev, Barbara, tau tas sim neej thaum ob xyoos thiab ib nrab tas los. Kuv paub tias nws zoo li cas thaum peb muaj tsev neeg, phooj ywg, thiab cov uas peb paub nyob ib puag ncig, tiam sis peb tseem kho siab heev—vim tus uas kuv hlub tshaj tsis nrog kuv nyob ntxiv.

Phaum mob COVID-19 twb tau ua rau tib neeg coob heev kho siab thiab nyob lawv ib leeg. Txawm peb muaj teeb meem hauv lub neej no, ib yam li thaum sawv ntxov Easter ntawd, peb yuav tsim los muaj ib lub neej tshiab los ntawm Khetos uas muaj txoj hmoov tshiab thiab tej yam zoo kawg nkaus thaum peb tig mus rau tus Tswv kom muaj kev cia siab thiab sib koom siab.

Kuv yeej paub txoj kev mob uas cov tsis muaj leej twg nrog lawv sib koom siab hnov. Thaum kuv saib xov xwm hauv lub ntiaj teb no, kuv pom neeg coob uas kho siab heev li no. Kuv xav tias yog vim tej zaum lawv tsis paub tias Leej Txiv Saum Ntuj Ceeb Tsheej hlub lawv thiab peb sawv daws yog Nws tsev neeg mus ib txhis li. Qhov uas peb ntseeg tias Vajtswv hlub peb thiab peb yog Nws cov me nyuam yeej nplij peb lub siab heev.

Vim peb yog Vajtswv cov me nyuam ntsuj plig, txhua tus muaj Vajtswv txoj hmoov, keeb kwm, thiab cwj pwm. Peb sawv daws yog “ib tug ntsuj plig tub los sis ntxhais ntawm ib khub niam txiv saum ntuj ceeb tsheej.”⁷ Qhov no yog peb caj ceg! Peb yog Nws cov me nyuam tiag!

Peb haj yam to taub peb caj ceg ntawm sab ntsuj plig thaum peb kawm txog peb caj ceg hauv lub neej no, tsis hais los ntawm kab lig kev cai, haiv neeg, los sis lub teb chaws.

Qhov uas yus sib koom siab nrog yus caj ceg ntawm sab ntsuj plig, kab lig kev cai, thiab kev hlub yuav ua rau neeg muaj kev cia siab thiab hlub Yexus Khetos.

Kuv hais txog kev cia siab rau Khetos mas kuv tsis lam xav li no xwb. Tiam sis kuv hais txog kev cia siab hais tias nws yog ib yam uas nej yeej yuav txais tau. Yuav tsum muaj kev cia siab li no kom kov yeej tej kev sim siab, pab txhawb nqa yus txoj kev muaj zog ntawm sab ntsuj plig, thiab kom paub tias peb Leej Txiv Mus Ib Txhis Li hlub peb thiab peb yog Nws cov me nyuam uas koom nrog Nws tsev neeg.

Thaum peb cia siab rau Khetos, peb paub tias thaum peb ua raws li peb tej kev khi lus dawb ceev, ces Nws yuav ua kom muaj raws li tej yam uas peb xav tau ntau tshaj.

Pawg Kaum Ob tug Thwj Tim tau sib tham ua ke thiab thov Vajtswv vim peb xav to taub pab tag nrho cov uas kho siab los sis lawv xav tias lawv tsis koom siab nrog peb. Peb xav pab txhua leej txhua tus uas xav li no. Kuv xav hais txog, thov tseem ceeb, cov uas tsis tau yuav poj niam los yuav txiv.

Cov kwv tij thiab cov muam, ntau dua li ib nrab ntawm cov laus hauv lub Koom Txoos hnub no yog poj ntsuam yawg ntsuag, tau sib nrauj, los sis ib txwm tsis tau sib yuav. Ib txhia xav paub txog lawv tej cib fim thiab lawv lub ntsiab nyob hauv Vajtswv txoj hau kev thiab hauv lub Koom Txoos. Peb yuav tsum to taub tias txoj sia nyob mus ib txhis tsis nyob ntawm seb yus puas tau sib yuav xwb tiam sis yeej nyob ntawm seb yus yog ib tug thwj tim zoo li cas thiab yus puas “rau siab ua raws li tej lus tim khawv txog Yexus.”⁸ Tag nrho cov uas tsis tau sib yuav yeej muaj kev cia siab zoo ib yam li tag nrho cov mej zeej ntawm tus Tswv lub Koom Txoos—lawv cia siab lawv yuav txais tau Khetos txoj kev tshav ntuj dhau los ntawm “kev ua raws li tej kev cai thiab kab ke ntawm txoj Moo Zoo.”⁹

Kuv xav hais txog tej yam ntsiab cai tseem ceeb uas peb yuav tsum to taub.

Qhov thib ib, cov vaj lug kub thiab cov yaj saub hauv hnub nyoog kawg no qhia tias txhua tus uas rau siab ntseeg ua raws li txoj moo zoo tej kev khi lus yuav muaj cib fim txais kev tsa nto. Thawj Tswj Hwm Russell M. Nelson qhia tias: “Raws li tus Tswv txoj kev thiab lub sij hawm, yeej yuav pub txhua yam koob hmoov rau Nws Haiv Neeg Ntseeg uas rau siab ntseeg. Tus Tswv yuav txiav txim thiab muab nqi zog rau txhua tus raws li lawv lub siab xav thiab tej yam lawv ua.”¹⁰

Qhov thib ob, lub sij hawm thiab txoj kev peb yuav txais tau cov koob hmoov ntawm kev tsa nto los tsis tau muab tshwm sim lawm, tiam sis peb yeej paub tias peb yuav txais.¹¹ Thawj Tswj Hwm Dallin H. Oaks tau piav tias ib txhia ntawm tej xwm txheej “hauv lub neej no los yuav raug kho kom zoo nyob hauv lub caij Milenias, uas yog ib lub sij hawm kom muaj raws li tag nrho txhua yam uas tseem tsis tau muaj los ntawm txoj hau kev zoo siab rau tag nrho peb Leej Txiv cov me nyuam uas tsim nyog.”¹²

Qhov no tsis txhais hais tias yuav tsum tos txog lub caij Milenias kom tau txhua yam koom hmoov; ib txhia los twb txais tau lawm thiab lwm yam los yuav txais mus txog hnub ntawd.¹³

Qhov thib peb, kev tos ntsoov tus Tswv yog kev mloog lus thiab kev vam meej ntawm sab ntsuj plig kom mus cuag Nws. Kev tos ntsoov tus Tswv tsis txhais tias yus tos nkim sij hawm xwb. Nej yuav tsum tsis txhob xav tias nej nyob hauv ib chav tos ntsoov.

Kev cia siab tos ntsoov tus Tswv txhais tias yus siv zog ua tej yam. Kuv tau kawm hais tias peb txoj kev cia siab rau Yexus Khetos yuav loj tuaj thaum peb pab lwm tus. Thaum peb pab lwm tus ib yam li Yexus pab, peb txoj kev cia siab Nws yeej yuav loj tuaj.

Tej yam yus kawm tau thaum yus tseem cia siab tos ntsoov tus Tswv thiab Nws tej lus cog tseg yeej yog ib qho dawb ceev uas muaj nqis ntawm Nws txoj hau kev rau peb txhua tus. Tej yam uas nej ua tau tam sim no kom pab txhawb nqa lub Koom Txoos hauv lub ntiaj teb no thiab muab Ixayees sau los ua ke mas peb xav tau heev. Qhov uas yus twb sib yuav los tsis tau sib yuav mas tsis ua li cas rau yus txoj kev muaj peev xwm pab lwm tus. Tus Tswv hwm cov uas ua hauj lwm thiab cia siab tos ntsoov Nws los ntawm kev ua siab ntev thiab kev ntseeg.¹⁴

Qhov thib plaub, Vajtswv xav muab txoj sia nyob mus ib txhis rau tag nrho Nws cov me nyuam. Txhua tus uas lees txais tus Cawm Seej lub txiaj ntsim uas yog kev hloov siab lees txim thiab ua neej raws li Nws cov lus txib yuav txais tau txoj sia nyob mus ib txhis, txawm yog lawv tsis hloov cwj pwm thiab ua neeg zoo tag nrho nyob hauv lub neej no. Cov uas hloov siab lees txim yuav paub txog tus Tswv txoj kev npaj saib zam txim rau peb zoo li Nws tau qhia, “Muaj tseeb tiag, thiab txhua zaus uas kuv cov neeg yuav hloov siab lees txim kuv yuav zam txim rau lawv tej kev txhaum uas lawv ua txhaum rau kuv.”¹⁵

Thaum kawg, ib tug neeg rab peev xwm, tej kev xav, thiab tej cib fim hais txog kev ywj siab thiab kev xaiv, tsis hais kev tsim nyog txais cov koob hmoov mus ib txhis, yeej yog tej yam uas tus Tswv txawj txiav txim xwb.

Qhov thib tsib, qhov uas peb ntseeg tej yam no yeej nyob ntawm peb txoj kev ntseeg Yexus Khetos tus uas tau muab kev tshav ntuj rau peb kho txhua yam hauv lub neej no kom zoo.¹⁶ Nws yog tus uas ua rau peb txais tau txhua yam koob hmoov, los ntawm Nws txoj Kev Theej Txhoj, “nqis qis tshaj txhua yam”¹⁷ thiab tau “kov yeej lub ntiaj teb.”¹⁸ Nws “tau mus zaum ntawm Vajtswv sab tes xis, mus aws ntawm Leej Txiv nws tej cai muaj kev hlub tshua uas nws muaj rau noob neej … ; yog li ntawd nws hais daws noob neej zaj.”¹⁹ Thaum kawg “haiv neeg ntseeg yuav muaj nws lub yeeb koob puv npo, thiab txais lawv qub txeeg qub teg”²⁰ vim lawv “koom nrog Yexus txais.”²¹

Peb xav kom tej ntsiab cai no yuav pab txhua tus kom lawv muaj kev cia siab Khetos ntxiv thiab sib koom siab nrog peb.

Cia li nco ntsoov tias nej yog Vajtswv cov me nyuam, peb Leej Txiv Mus Ib Txhis, tam sim no thiab tas mus li. Nws hlub nej, thiab lub Koom Txoos no xav tau nej. Yog mas, peb xav tau nej! Peb xav tau nej lub suab, tej txuj ci, txoj kev zoo, thiab txoj kev ncaj ncees.

Rau ntau xyoo, peb tau hais txog “cov hluas uas tsis tseem tsis tau yuav poj niam los yuav txiv.” Ntshe tej lub sij hawm tej lus no pab peb ua hauj lwm tuav dej num, tiam sis kuj hloov peb txoj kev saib lwm tus.

Puas mua ib txoj kev kom tsis txhob xav li neeg xav txog qhov no kom peb tsis sib koom siab?

Thawj Tswj Hwm Nelson tau hais kom peb hu peb tus kheej tias peb yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Hais li ntawd ces yeej hais txog peb txhua tus, puas yog?

Yexus Khetos txoj moo zoo muaj hwj chim pab peb sib koom siab. Peb txhua tus feem ntau yeej yuav luag sib xws thiab tsis sib txawv ntau. Vim peb yog cov mej zeej hauv Vajtswv tsev neeg, peb yeej yog cov kwv tij thiab cov muam. Povlauj hais tias, “Vajtswv tsim txhua haiv neeg tawm hauv tib tug neeg li roj ntsha los xwb, thiab kom lawv mus nyob thoob plaws hauv lub ntiaj teb.”²²

Hais rau nej ceg txheem ntseeg cov thawj tswj hwm, cov npisov, thiab pawg thiab cov muam cov thawj coj, kuv thov kom nej xav txog txhua tus mej zeej hauv nej ceg txheem ntseeg, pawg ntseeg, pawg, los sis lub koom haum zoo li lawv yog cov mej zeej uas txawj ua hauj lwm thiab koom tes pab ua ntau yam.

Txhua tus mej zeej hauv peb tej pawg, lub koom haum, pawg ntseeg, thiab ceg txheem ntseeg muaj txiaj ntsim los ntawm Vajtswv los thiab muaj txuj ci uas pab txhim tsa Vajtswv lub nceeg vaj tam sim no.

Cia peb hu peb cov mej zeej uas tsis tau sib yuav kom lawv ua hauj lwm, qhia, thiab txhawb nqa lwm tus. Tso tej lub tswv yim qub tseg uas tej lub sij hawm tau ua rau lawv kho siab los sis xav tias lawv tsis koom siab nrog peb los sis lawv ua tsis taus hauj lwm pab.

Kuv ua tim khawv thaum lub caij Easter no txog peb tus Cawm Seej Yexus Khetos thiab kev cia siab mus ib txhis li uas Nws pub rau peb thiab tag nrho cov uas ntseeg Nws lub npe. Kuv txo hwj chim ua tim khawv li no los ntawm Nws lub npe dawb ceev, Yexus Khetos, amees.