Peb tus Cawm Seej Tau Ua Dab Tsi Pab Peb?
Yexus Khetos tau ua txhua yam uas yuav tsum ua rau peb hauv lub ntiaj teb no kom muaj raws li tej yam uas tau npaj nyob hauv peb Leej Txiv Saum Ntuj Ceeb Tsheej txoj hau kev.
Ntau xyoo tas los, muaj ib hmo Saturday nyob hauv ceg txheem ntseeg lub rooj sab laj, kuv tau ntsib ib tug poj niam uas hais tias nws cov phooj ywg tau thov nws rov qab los koom lub koom txoos tom qab ntau xyoo uas nws tsis tshua muab siab rau ntseeg, tiam sis nws xav tsis tawm ib yam dab tsi qhia tias vim li cas nws yuav xav ua li ntawd. Kuv xav txhawb nqa nws, kuv thiaj hais tias, “Thaum koj xav txog tag nrho tej yam uas tus Cawm Seej tau ua rau peb, muaj ntau yam qhia tias vim li cas tsim nyog koj rov qab los koom lub koom txoos teev tiam thiab pab ua hauj lwm rau Vajtswv.” Kuv xav tsis thoob thaum nws teb hais tias, “Nws tau ua dab tsi pab kuv?”
Yexus Khetos tau ua dab tsi pab peb txhua tus? Nws tau ua txhua yam uas yuav tsum ua rau peb hauv lub ntiaj teb no kom muaj raws li tej yam uas tau npaj nyob hauv peb Leej Txiv Saum Ntuj Ceeb Tsheej txoj hau kev. Kuv yuav hais txog plaub yam tseem ceeb ntawm txoj hau kev ntawd. Nyob hauv txhua yam no Nws Tib Leeg Tub, Yexus Khetos, yog tus tseem ceeb tshaj plaws. Qhov uas txhawb nqa txhua yam no yog “Vajtswv txoj kev hlub, uas nthuav kom dav rau txhua txhia qhov chaw nyob hauv noob neej lub siab; yog li ntawd, tsob ntoo ntawd yog yam uas neeg xav tau tshaj txhua txhia yam” (1 Nifais 11:22).
I.
Ua ntej Hnub Caiv Easter, yeej tsim nyog uas peb hais txog Yexus Khetos txoj Kev Sawv Rov Los. Qhov uas cov neeg tuag yuav sawv rov los yog ib qho uas nplij neeg lub siab hauv peb txoj kev ntseeg. Ua rau peb cov lus qhuab qhia muaj lub ntsiab, ua rau peb xav coj yam ntxwv zoo, thiab muaj kev cia siab rau yav tom ntej.
Vim peb ntseeg ob zaj nyob hauv Phau Vaj Lug Kub Npaivnpaum thiab Phau Ntawv Maumoos hais txog Yexus Khetos txoj Kev Sawv Rov Los, peb kuj ntseeg tej lus qhia hauv vaj lug kub uas qhia tias txhua tus neeg uas txawj tuag nyob hauv lub ntiaj teb no yuav sawv rov los ib yam thiab.1 Ib yam li Yexus qhia, “Nej yuav muaj txoj sia nyob, rau qhov kuv muaj txoj sia nyob” (Yauhas 14:19). Thiab Nws cov Thwj Tim qhia tias “cov uas tuag lawm yuav sawv hauv qhov tuag rov qab los” thiab “lub cev uas txawj ploj txawj tuag hloov ua lub uas tsis txawj ploj tsis txawj tuag lawm” (1 Kauleethaus 15:52, 54).
Tiam sis txoj Kev Sawv Rov Los ua rau peb txais kev nplij siab vim peb yuav nyob tas mus li. Ua rau peb hloov peb txoj kev saib lub neej hauv ntiaj teb no.
Txoj Kev Sawv Rov Los ua rau peb muaj ib lub zeem muag thiab lub zog kom nyiaj tej teeb meem hauv lub ntiaj teb uas peb thiab cov uas peb hlub raug. Txoj kev sawv rov los ua rau peb muaj lub zeem muag tshiab txog peb txoj kev tsis muaj peev xwm ntawm sab cev nqaij daim tawv, sab hlwb, los yog kev xav hauv siab ntsws uas peb muaj thaum peb yug los los sis peb raug nyob hauv lub neej hauv ntiaj teb no. Ua rau peb muaj zog nyiaj tej kev tu siab, kev poob siab, thiab kev nyuaj siab. Vim peb txhua tus yuav sawv rov los tiag tiag, peb paub tias tej yam uas peb tsis muaj peev xwm ua thiab tej yam uas tawm tsam peb hauv lub ntiaj teb no yeej yuav kav tsis ntev.
Txoj Kev Sawv Rov Los kuj ua rau peb muaj siab xav coj raws li Vajtswv cov lus txib nyob hauv peb lub neej hauv ntiaj teb no. Thaum peb sawv hauv qhov tuag rov qab los thiab raug Kev Txiav Txim Zaum Kawg, peb yuav xav ua neeg tsim nyog txais tau cov koob hmoov zoo tshaj plaws uas Vajtswv cog lus rau cov neeg uas sawv rov los.2
Tsis tas li ntawd, kev cog lus tias peb yuav muaj cib fim nrog peb tsev neeg nyob thaum peb sawv rov los—tus txiv, tus niam, cov me nyuam, cov niam cov txiv, thiab cov xeeb leej xeeb ntxwv—yog ib txoj kev txhawb nqa kom ua raws li peb tej kev lav ris rau peb tsev neeg nyob hauv lub neej no. Nws kuj pab peb nyob ua ke nrog kev sib hlub hauv lub neej no thiab nplij peb lub siab thaum ib tug uas peb hlub tas sim neej no. Peb paub tias kev sib ncaim hauv lub ntiaj teb no yeej muaj rau ib ntus xwb, thiab peb tos ntsoov rau tej kev rov qab sib ntsib thiab kev koom siab koom ntsws thaum yav tom ntej. Kev Sawv Rov Los ua rau peb muaj kev cia siab thiab lub dag zog ua siab ntev thaum peb tos ntsoov. Nws kuj npaj peb ua siab loj thiab muaj koob meej thaum peb yuav raug kev tuag—tsis hais thaum peb tuag ntxov dhau.
Tag nrho tej yam no uas los ntawm txoj Kev Sawv Rov Los yog ib feem ntawm txoj lus nug hais tias “Yexus Khetos tau ua dab tsi pab kuv?”
II.
Rau peb txhua tus, lub cib fim rau peb txais kev zam txim rau peb tej kev txhaum yog lub ntsiab tseem ceeb tshaj ntawm Yexus Khetos txoj Kev Theej Txhoj. Thaum peb teev tiam Vajtswv, peb hu nkauj li no:
Nws zoo siab cia nws cov ntshav ntws;
Nws txo nws txoj sia tseg,
Tshuav nws tib leeg tsis muaj txhaum xwb,
Nws thiaj cawm tau ntiaj teb.3
Peb tus Cawm Seej thiab tus Txhiv Dim raug kev txom nyem tshaj qhov txawj to taub xwv kom ua kev txi rau tag nrho tej kev txhaum ntawm txhua tus neeg uas yuav hloov siab lees txim. Txoj kev txi no muab qhov zoo tshaj plaws, tus yaj dawb huv uas tsis muaj ib qho phem hlo li, theej qhov phem tshaj plaws, kev txhaum ntawm tag nrho neeg ntiaj teb. Txoj kev theej txhoj no tau qhib qhov rooj rau peb txhua tus kom ntxuav peb tej kev txhaum tawm mus peb thiaj li yuav tsim nyog rov qab mus koom nrog Vajtswv, peb Leej Txiv Nyob Mus ib Txhis. Lub qhov rooj no yeej qhib rau tag nrho Vajtswv cov me nyuam. Thaum peb teev tiam Vajtswv peb hu nkauj li no:
Kuv zoo siab nws nqi los, nws tseg nws lub tsev saum ntuj
Los cawm ib tug neeg uas muaj txoj kev txhaum zoo li kuv,
Nws hlub kuv, nws theej kuv lub txhoj kom kuv muaj txoj sia.4
Tej yam zoo kawg nkaus uas los ntawm Yexus Khetos txoj Kev Theej Txhoj yeej yog los ntawm qhov uas Vajtswv hlub peb txhua tus. Qhov no qhia tias “tej ntsuj plig muaj nqis heev”—tsis hais txhua leej txhua tus—“rau Vajtswv” (Lus Qhuab Qhia thiab Kev Khi Lus 18:10). Nyob hauv phau Npaivnpaum, Yexus Khetos piav txog qhov no thaum Nws hais txog Leej Txiv Saum Ntuj Ceeb Tsheej txoj kev hlub: “Rau qhov Vajtswv hlub neeg ntiaj teb kawg li, nws thiaj li txib nws tib leeg Tub los rau hauv ntiaj teb. Tus uas ntseeg nws Leej Tub, ces yuav tsis tuag, tab sis yuav tau txoj sia nyob mus ib txhis” (Yauhas 3:16). Nyob hauv kev tshwm sim hauv lub caij nyoog no peb tus Txhiv Dim, Yexus Khetos, tshaj tawm hais tias Nws “hlub neeg ntiaj teb heev nws thiaj tau muab nws txoj sia theej lawv, kom tag nrho cov uas yuav ntseeg yuav los ua Vajtswv cov tub” (Lus Qhuab Qhia thiab Kev Khi Lus 34:3).
Ces tsis tas xav tsis thoob vim Phau Ntawv Maumoos, “Ib zaj Tim Khawv Ntxiv txog Yexus Khetos” xaus lus qhia tias yog peb yuav los ua neeg “zoo tag nrho” thiab ua rau peb “hloov los ua dawb huv los ntawm Khetos” peb yuav tsum “hlub Vajtswv kawg [peb] lub siab thiab lub dag lub zog?” (Maulaunais 10:32–33). Yeej yuav tsum txais Nws txoj kev hlub nrog rau yus txoj kev hlub.
III.
Peb tus Cawm Seej Yexus Khetos tau ua dab tsi ntxiv rau peb? Los ntawm Nws cov yaj saub thiab dhau los ntawm Nws txoj hauj lwm qhuab qhia, Yexus tau qhia txoj hau kev cawm seej rau peb. Txoj hau kev no qhia txog kev Tsim lub Ntiaj Teb, vim li cas muaj lub neej no, qhov uas yuav tsum muaj kev fab ntxeev, thiab lub txiaj ntsim kev ywj siab xaiv. Nws kuj qhia peb txog cov lus txib thiab tej kev khi lus uas peb yuav tsum mloog thiab cov kab ke uas peb yuav tsum txais kom peb thiaj li yuav rov qab mus nrog peb leej niam leej txiv saum ntuj ceeb tsheej.
Nyob hauv phau Npaivnpaum peb nyeem txog Nws tej lus qhia, “Kuv yog qhov kaj rau neeg ntiaj teb. Tus uas raws kuv qab yuav tsis taug txoj kev uas tsaus ntuj nti, tiam sis nws yuav tau lub neej tshav ntuj nrig” (Yauhas 8:12). Thiab nyob hauv kev tshwm sim hauv lub caij nyoog no, peb nyeem hais tias, “Saib seb, kuv yog Yexus Khetos, … uas yog qhov kaj uas muab nraim tsis tau nyob hauv qhov tsaus ntuj” (Lus Qhuab Qhia thiab Kev Khi Lus 14:9). Yog peb ua raws li Nws tej lus qhia, Nws ci ci rau peb txoj kev hauv lub neej thiab npaj peb txoj hmoov nyob hauv lub neej to ntej.
Vim Nws hlub peb, Nws hais kom peb tsom ntsoov rau Nws es tsis txhob tsom ntsoov rau tej yam ntawm lub ntiaj teb no. Nyob hauv Nws zaj lus qhia txog cov mov mog uas cawm neeg txoj sia, Yexus qhia peb tias peb yuav tsum tsis txhob koom nrog cov uas nyiam tej yam ntawm lub ntiaj teb no tshaj plaws—tej yam uas txhawb nqa yus lub neej hauv lub ntiaj teb no tiam sis tsis pab yus txais tau txoj sia nyob mus ib txhis.5 Thiab Yexus tau hais ntaus zaus rau peb hais tias, “Los nrog kuv mus.”6
IV.
Qhov kawg, Phau Ntawv Maumoos qhia tias ib feem ntawm Yexus Khetos txoj Kev Theej Txhoj yog qhov uas Nws “raug tej kev mob thiab tej kev txom nyem thiab tej kev ntxias txhua yam; thiab ua li no xwv kom yuav muaj raws li txoj lus uas hais tias nws yuav ris nws cov neeg tej kev mob thiab tej kev nkeeg” (Amas 7:11).
Vim li cas peb tus Cawm Seej tau raug “txhua yam” teeb meem no? Amas piav hais tias, “Thiab nws yuav ris lawv tej kev qaug dag qaug zog, xwv kom nws lub siab thiaj li yuav muaj kev hlub tshua puv nkaus, ntawm sab cev nqaij daim tawv, xwv kom nws yuav paub pab nws cov neeg ntawm sab cev nqaij daim tawv raws li lawv tej kev qaug dag qaug zog” (Amas 7:12).
Peb tus Cawm Seej paub peb tej kev ntxias, tej yam uas nyuaj rau peb, peb txoj kev mob hauv lub siab, thiab peb tej kev txom nyem, vim Nws txaus siab raug tag nrho tej ntawd nyob hauv Nws txoj Kev Theej Txhoj. Lwm nqe vaj lug kub qhia txog qhov no. Phau Tshiab hais tias, “Nim no Yexus paub pab cov neeg uas raug kev sim siab, rau qhov nws twb raug kev sim siab thiab kev tsim txom los lawm” (Henplais 2:18). Yaxayas qhia tias, “Nej tsis txhob ntshai, rau qhov kuv nrog nraim nej, … kuv yuav pab nej thiab txhawb kom nej muaj zog” (Yaxayas 41:10). Txhua tus uas raug tej kev txom nyem twg hauv lub ntiaj teb no yuav tsum nco ntsoov tias peb tus Cawm Seej twb raug kev txom nyem ib yam li ntawd, thiab dhau los ntawm Nws txoj Kev Theej Txhoj Nws muab dag zog rau peb txaus ris taus.
Tus Yaj Saub Joseph Smith tau hais ntsiab lus txog tag nrho tej yam no nyob hauv peb nqe kev ntseeg thib peb: “Peb ntseeg tias los ntawm Khetos txoj Kev Theej Txhoj, tag nrho tib neeg txhua tus txais tau kev cawm dim, los ntawm kev ua raws li tej kev cai thiab kab ke ntawm txoj Moo Zoo.”
“Yexus Khetos tau ua dab tsi pab kuv?” tus muam ntawd nug. Raws li peb Leej Txiv Saum Ntuj Ceeb Tsheej txoj hau kev, Nws tau “tsim lub ntuj thiab lub ntiaj teb” (Lus Qhuab Qhia thiab Kev Khi Lus 14:9) xwv kom peb yuav ua neej li peb txhua tus yuav tsum ua kom txais tau peb txoj hmoov nyob saum ntuj. Ib feem ntawm Leej Txiv txoj hau kev, Yexus Khetos txoj Kev Sawv Rov Los tau kov yeej kev tuag xwv kom peb txhua tus yuav tsis txawj tuag. Yexus Khetos txoj kev theej txhoj ua rau peb txhua tus muaj cib fim hloov siab lees txim thiab rov qab los ua neeg huv thaum peb rov qab mus rau peb tsev neeg saum ntuj ceeb tsheej. Nws tej lus txib thiab tej kev khi lus qhia txoj kev rau peb, thiab Nws lub pov thawj hwj muab txoj cai rau peb ua cov kab ke uas yuav tsum ua kom thiaj li muaj txoj hmoov ntawd. Thiab peb tus Cawm Seej txaus siab raug tag nrho tej kev mob thiab kev txom nyem xwv kom Nws yuav paub txhawb nqa peb thaum peb raug kev txom nyem.
Yexus Khetos tau ua txhua yam no vim Nws hlub tag nrho Vajtswv cov me nyuam. Kev hlub yog lub hauv paus ntawm txhua yam no, ib yam li txij thaum chiv keeb los. Vajtswv tau qhia peb nyob hauv kev tshwm sim tias “nws tau tsim … txiv neej thiab poj niam, raws li nws tus kheej tus yam ntxwv … thiab muab tej lus txib rau nkawd kom nkawd yuav tsum hlub nws thiab ua hauj lwm rau nws” (Lus Qhuab Qhia thiab Kev Khi Lus 20:18–19).
Kuv ua tim khawv txog tag nrho tej yam no thiab thov Vajtswv tias peb txhua tus yuav nco txog tej yam uas tus Cawm Seej tau ua rau peb sawv daws thiab peb yuav hlub thiab ua hauj lwm pab Nws, los ntawm Yexus Khetos lub npe, amees.