Te Koaua ae Itiaki, Te Reirei ae Itiaki, ao Te Kaotioti ae Itiaki

Tariu ao mwaneu aika kam tangiraki, ti butimwaai ngkami nakon te maungatabu ni kabuta! E kakukurei te mena ibuakomi! Kam a tia n tiku n au iango n tainako inanon onoua namwakaina aika a nako. I a ti ni iangoi ngkami ao n tataro ibukimi. Ni wiiki aika a tibwa nako I a tia n tataro mwaaka bwa te maungatabu aei e na riki bwa te tai ni kaotioti ao n ururing ibukiia ake a ukori kakabwaia akanne.

Ti rangi ni kukurei ngkai ti a manga taetae nakoimi man te Tienta ni Maungatabu. Angiin kaintekateka a tiku n akea kaaia, ma raonakira irouia tabeman kaain te Taebanaeko Kuaea bon te mwanekarake ae tamaroa. Ti butimwaai ngkami nakon te maungatabu ae bubura aei rinanon te intaneta, man te tabo are ko mena iai.

Ae ti bon rinanon naba urubwain te COVID-19 ao aoraki ae aekakina. Ti kaitau ngkami ibukin iran ara baire ao aia taeka ni kauring taan rabakau man te kuakua ao tautaeka n ami komiunite.

Ti booi taian maungatabu ni kabuta n aron are e tua te Uea.¹ Tein wakinana iai te kaokoro iai inano ririki. Ngke kanga I kairake, te maungatabu e anaa te maan ae tenua ke aua te bong. Imwiina, e a kakerikaakaki te maungatabu nakon uoua te bong. Taian rongorongo—ngkekei ao ngkai—bon imwiin te botumwaaka n tataro ao te katauraoi n te maiu n tamnei ae korakora.

Mataniwii ni Kabuta ao Aobitia ni Kabuta n te Ekaretia ake a na taetae a na kabotoa aia marooro iaon ara Tia Kamaiu, Iesu Kristo, Ana akoi, ao mwaakan kaboakira ae akea tokina. Bon akea tetaina n rongorongon te aonaaba ngke ataakin ara Tia Kamaiu e a rangi ni kakawaki nakon temanna ao ni kaineti nakon tamneia aomata nako. Iangoa aron baitiin te urubwai n te kakaiangatoa ni kabutaa te aonaaba—ao naake ti bon kinaia ni maiura—a na kona ni katokaki ngkana ti bane n rineia n iriira Iesu Kristo ao n ongo Ana reirei.

N te namakin anne, I kaoko bwa ko na ongora nakon tenua bwaai n te maungatabu aei: te koaua ae itiaki, ana reirein ae itiaki Kristo, ao te kaotioti ae itiaki. Kaitarakin aia nano kokoraki tabeman, bon iai te bwai ae eti ao ae bure. Bon iai te koaua ae kororaoi—te koaua ae akea tokina. Teuana te kangaanga n ara bong aikai bwa e karako mwaitiia aomata ae ataia bwa a na tan nakea ni karekea te koaua.² I kona n taekinna raoi nakoimi bwa baike ko na ongo n te bong aei ao ningabong iai inanon koaua aika itiaki.

Ana reirei ae itiaki Kristo e mwaaka. E bitii maiuia naake a mataata nako iai ao n ukoria ni karaoia inanon maiuia. Ana reirei Kristo e buokiira ni kunea ao n tiku iaon kawain te berita. Te tiku iaon te kawai ae irariki man mataata e na anganiira te kona n tau ni karekei ana bwai ni kabane te Atua.³ Akea ae materaoi riki nakon ni kabane are iroun te Tama!

Ni kabaneana, te kaotioti ae itiaki ibukin te titiraki are inanom e na karika te maungatabu bwa e na materaoi ao n aki mwanuokinaki. Ngkana ko tuai n ukoukora ana mwakuri te Tamnei ae Raoiroi bwa e na buokiko n ongo bwa tera ae tangiria te Uea bwa ko na ongo inanon boong aika uoua aikai, I kaoko bwa ko na karaoia ngkai. Taiaoka karika te maungatabu aei bwa te tai ni baka iaon rongorongo mai iroun te Uea rinanoia Ana toro. Reiakinna bwa ko na kanga ni karaoi inanon maium.

Aio bon Ana Ekaretia Iesu Kristo ibukiia Aika Itiaki ni Boong aika Kaitira. Boni ngaira Ana aomata ni berita. Te Uea e taekinna, bwa E na kawaekoa Ana mwakuri n taina.⁴ ao E karaoia n rangi ni kawaekoaa. Ti rang kakabwaiaaki n ira waakin Ana mwakuri ae tabu.

I taekina te kakabwaia iaoia ni kabane ake a ukora te ota ae korakora, te ataibwai, ao te koaua. I kaota au tangira ibukimi n tatabemanii ngkami n aran Iesu Kristo ae tabu, amen.