Kaoti Ami Ota
Au kakao n te tai aio e bebete: tataekina te euangkerio. Karaoa are bon ngkoe ao kaota am ota.
Ngke I toka n te waanikiba nako Peru tabeua te ririki n nako, I tekateka i rarikin te aomata ae taku bwa E aki kakoaua te Atua. E titirakinai bwa bukin tera I kakoauaa te Atua. N ara marooro ae kakukurei, I tuangnga bwa I kakoaua bukina bwa Iotebwa Timiti e Nooria—n raonakin ataakin te Atua irou e roko n au ataibwai, namakinan raoi te tamnei irou. I tibwa au koaua bwa “bwaai ni kabane a kaotia bwa iai te Atua”1 ao n titirakinna bwa e kanga ni kakoaua te aonnaba—te tabo ae nnen te maiu ae beti rikarawa—n riki ni iai rabwatana. E kaeka bwa, n ana taeka,“te bwai ae karina” e kona n riki n te tai ae e rangi ni maan. Ngke I kabwarabwara ai kangangara bwa e na kona ni burenibwai bwa te bwai “ae e karina n riki” e na rangi tamaroa ao ni barongaki raoi, e kainabwabu teutana man taku,“Akea au kaeka.” I butiia bwa e na wareka Ana Boki Moomon. E taku bwa e na wareware, ai ngaia are I kanakoa ana kaobi.
Tabeua te ririki i mwiina, e a manga reke raraou ae boou n te marae ni wanikiba i Lagos, Nigeria. Ti a uaia n ikikina ngke e tuoa au bwatiboti. I titirakinna ibukin ana koaua n ana aro, ao e kaota ana onimaki ae korakora iroun te Atua. I tibwaua kakukurein ao korakoran ana euangkerio Iesu Kristo ae kaokaki ao n titirakinna ngkana e kukurei n reireiaki irouia mitinare. E taku eng, e reireinaki, ao e a bwabetitoaki. Teuana ke uoua te ririki i mwiina, ngke I nakonako n te marae i Liberia, I ongo te bwana ae wetea arau. I rairaki, ao I nora te ataeinimwane naba aei ni bakarereai ma te moangare. Ti irabwati ni kukurei ao e kaongoai bwa e rang kakaonimaki n te Ekaretia ao e mwakuri ma mitinare n reireina raona te aine ae tangira ma ngaia.
N te tai aei, I aki ataia bwa raraou are kakea te Atua e a tia ni wareka Ana Boki Moomon ke ni kaaina te Ekaretia. Raraou are te kauoman e a tia. N rongorongon katabeau aika uoua2—au tai—bon tii te arona: kaotan otan te euangkerio—n tangira, n tibwatibwa, ao ni kaoakiia aomata nako n te aro n taneiai.3
Tariu ao mwaneu, I a tia ni karekei kakabwaia n tibwauan te euangkerio, ao a bon rang n tamaroa. Aikai tabeua baikai:
Tibwauan te Euangkerio e Uota te Kimwareirei ao te Kantaninga
Kam nooria, ngai ao ngkoe ti ataia bwa ti maeka ma Tamara are i Karawa i mwain rokora n te aonnaba aio4 ao bwa e karikaki te aonnaaba bwa aonga aomata n tatabemaniia ni karekea rabwataia, te ataibwai, te rabakau, ao n rikirake bwa aonga ni karekea te maiu ae akea tokina—are bon maiun te Atua.5 Tamara are i Karawa e ataia ae tina korakai ao ni bure iaon te aba, ngaia are E kanakoa Natina, are “maiuna ae akea n ai arona”6 ao ana angakarea ae akea tokina7 e kona ni karekea nakoira bwa e na kabwaraaki ara bure, kamaiuaki, ao ni kakororaoaki.8
Ataakin koaua aikai e bon bita te maiu! Ngkana E ataa bukin te maiu aei te aomata, E na ataia bwa Kristo E kabwarai aia bure mani buokiia naake a iriiria, ao n rineia n ira Kristo rinanon te bwabetito, ao E reke te bitaki nakon te tamaroa—e boni ngae ngke e teimatoa n iai kangaangan te maiu aei.
Te titita ae rang kukurei are I kaitibo ma ngaia i Onitsha, Nigeria, e tuangai bwa man te tai are e reiakinaki iai te euangkerio ao e bwabetitoaki (ao ngkai I kabonganai ana taeka neiei), “Bwai ni kabane a nakoraoi irou. I a rang kukurei. I a roko i karawa.”9 Tibwauakin te euangkerio e karekea te kukurei ma te kantaninga iroun te tia anga ao te tia karekea. E koaua, “a na mwaitira kukureim ae e na reke”10 ngkai ko tibwaua te euangkerio! Tibwauan te euangkerio bon te kukurei i aon te kukurei, te kantaninga iaon te kantaninga.11
Tibwauan te Euangkeriro E Uota Mwaakan te Atua inanon Maiura
Ngke ti bwabetitoaki, Ti karaoa te boraraoi12 ao te berita ae tabu ma te Atua bwa Ti “na beku i Bukina ma ni kawakin Ana tua nako,”13 nanona bon te “riki bwa taan kakoaua [Ibukina] n tainako ao ni bwaai nako, ao n taabo nako.”14 Ngkana ti “mena ” i Rouna ni kawakina te berita aio, mwaakan te Atua e na raanga i nanon maiura mairoun Kristo, n ai aron te mwaanga are karekea maiuna man te boto.15
Tibwauan te Euangkerio E Kataniira man te Kaririaki
E tua te Uea:
“Taui i eta ami taura bwa e na oota nakon te aonaaba. Nooria Ngai te oota are kam na taua i eta—are te bwai are kam a tia n noorai bwa I karaoia. …
“… I a tia n taekinna … kam na nakoiu, bwa kam na namakinna ao n noria; bwa are kam a tia ni karaoia nakoia aomata; ao are urua te tua aio e bon kariaia bwa e na rootaki n te kaririaki.”16
N rineia ni kaotaa otan te euangkerio ao ti mwaing nakon te roo, ao ti a kai irarang n te kariri. Ae kakaawaki riki, te bwai are taekinaki e bon koaua: rineakin kaotakin te ota n te euangkerio e kaniira nakon te oota anne ao ni katauraoa te otanga ni kaitara te kaririaki. Ai tamaroara te kakabwaia n te aonaaba ni boong aikai!
Tibwauan te Euangkerio e Uota te Kamaiuaki
Titita Tiffany Myloan e butimwaea te kakao ni boutokaia mitinare n aki tarai rawawatana, n raonaki ma titiraki ibukin ana onimaki. E tuangai bwa e a tia boutokaaia mitinare ni kabooua ana onimaki ao arona. N ana taeka neiei, “Te mwakuri ni mitinare e karekea te kamarurungaki”17
Kimwareirei. Kantaninga. Te mwaaka ni Kamatoa mairoun te Atua. Kamanoaki man te kariri. Te kamaiu. Baikai ni kabane—ao e mwaiti riki (n raonaki ma kabwarakin buure)18—a ruo nako aora mai karawa ngkai ti tataekina te euangkerio.
Ngkai, N Tarai Tibwangara aika Korakora
Tariu ao mwaneu, “e mwaiti … mai buakoia ni kabane … koraki, [aaro aika kakaokoro] ao Aaro ni Kiritian … ake e tuai reke irouia te koaua ibukina bwa a aki ataia bwa e na reke ia.”19 Kainanoan kaotaan otan ana euangkerio ae e a tia ni kaokaki e bon rangi ni korakora n taai aikai. Ao te koaua e a kaman tauraoi.
Jimmy Ton, are boni kaain te aro ni Budda, e rangi n rootaki nanona iroun te utu aika a taekina maiuia iaon te YouTube. Ngke e ataia ae kaain Ana Ekaretia Iesu Kristo ibukiia Aika Itiaki ni Boong aika Kaitira, e a kamatebwaia te euangkerio n te aon rain, e wareka Ana Boki Moomon ao e bwabetitoaki i mwiin kaitibona ma mitinare n te kuura n reirei ae rietata.20 Elder Ton e karaoa ana mwakuri ni mitinare ae bwanin taina ngkai.
Ngaia ma raona ni mitinare n te aonnaaba bon ana taanga ni buaka te Uea—n taekina are e taekinna ara burabeti.21 Mitinare aikai ae e okoro aia biri ma te aonaba: ngkai e taekinaki n te ribooti bwa kairake n taai aikai a kitana te Atua,22 ara taan buaka aikai23 kairake ni mitinare mwaane ao aine a rairiia aomata nakon te Atua. Ao rikiraken mwaitiia kain te Ekaretia a katiteuanaaki ma mitinare n tibwauan te euangkerio, ni buokiia ae mwaiti riki raoraoia n nakon Kristo ao Ana Ekaretia.
A tia Aomata aika Itiaki i Liberia ni buokiia 507 aomata n nako nanon te ran ni bwabetito i nanon te 10 namwakaina are akea iai mitinare i abaia. Ngke E ongo temanna te beretitenti ae tamaroa n te titeiki i Liberia bwa a kona ni manga roko mitinare, e taku: “O ai kakukureira, a kona ni buokiira n ara mwakuri.”
E eti are taekinna: ikotakiia kain Iteraera—te mwakuri ae korakora iaon te aba24bon tibwangan ara berita. Ao bon aio ara tai! Au rongorongo n te tai aio e bebete: tataekina te euangkerio. Karaoa are bon ngkoe ao kaota am ota. Tataro ibukin te ibuobuoki mai karawa ao iira ana wirikiriki te Tamnei ae Raoiroi. Tibwaua rongorongom, ao kaoa riki temanna te aomata bwa e na roko ao n noria, e na roko ao n ibuobuoki, ao e na roko ao n tiku.25 Ao ngkanne Kam na kukurei ngkai a reke kakabwaia iroumi.
I ataia bwa inanon Kristo bwaai aika raoiroi a taekinaki nakoia aika a nimamanei, inanon Kristo a karauaki nanoia aika a uruaki, inanon Kristo a kainaomataki aika a kabureaki, ao inanon Kristo, ti inanon Kristo ae a karekei kakabwaia man rawawataia.26 Ngaia are, e korakora kainnanoan katabangakan baikai!27
I kakoaua bwa Iesu Kristo bon te tia karika ao ni karokoa ara onimaki n te toki.28 E na katia, E na kabwanina, ara mwakuri n onimaki—e ngae n aki kororaoi—inanon katean otan te euangkerio. E na karaoi kakai i nanon maiura ao ni maiuia aomata ake E ikotiia, i bukina bwa bon Atuan taian kakai.29 N aran Iesu Kristo ae kamimi, amen.