Aran te Ekaretia E Tiku n Aki Kona ni Bitaki
Ngkana ti tauraoi n ira ana reirei te Uea n aron ae kaotaki rinanon Ana burabeti ae maiu, riki ngkana e aki bootau ma are ti iangoia, e kantaninga te nano rinano ao te anganano, e na kakabwaiaira te Uea ma rakan korakoran tamneira.
N tain te marooro ma taan kareke rongorongo n Aokati 16, 2018, e taku Beretitenti Russell M. Nelson: “Te Uea e kaota nakoiu kakaawakin te ara are E anga ibukin Ana Ekaretia, are bon Ana Ekaretia Iesu Kristo ibukiia Aika Itiaki ni Boong aika Kaitira.1 Iai ara mwakuri ae i mwaira bwa ti na kaboraoa nanora ma Nanona.”2
Uoua te bong i mwiina, n Aokati 18, I raona Beretitenti Nelson i Montreal Canada. Imwiin ara bootaki ma membwa n te tabo ae kamimi i Palais de Congrés, Beretitenti Nelson e kaekai aia titiraki taan kareke rongorongo. E kakoauaa ae e na iai “kakaewenako ni [manga moan kamatoaan aran te Ekaretia ao] ni kaeta [te] katei ae bwainaki n te maan ae e raka iaon tebubua te ririki.” Ma e reitia, “aran te Ekaretia e tiku n aki kona ni bitaki.”3
Itiua te wiiki i mwiina, Beretitenti Nelson e taetae n te maungatabu ni kabuta:“Te Uea e kaota nakoiu kakaawakin te ara are E anga ibukin Ana Ekaretia, are bon Ana Ekaretia Iesu Kristo ibukiia Aika Itiaki ni Boong aika Kaitira. … Bon te Tia Kamaiu are e taku, ‘Anne ae e na aranaki iai au ekaretia.’” Ngkanne e a manga kaokia, “Aran te Ekaretia e tiku n aki kona ni bitaki.”4
Te Titiraki ae Tamaroa
E mwemwe te titiraki ae tamaroa: “E aera ngkai?” ngke i nanon tienture aika mwaiti ti a tia ni kariaia te ara ae “Moomon”? “Te Moomon Taebanako Kuaea,” te witeo ae e kaota “Ngai kaain te Moomon,” kunan te Moanrinan “Ngai bon te teinimwaane ae kaain te Moomon”?
Ana reirei Kristo e bon aki bibitaki ao akea tokina. Ma waaki aika a onoti n ana mwakuri te Tia Kamaiu a kaotaki n taia aika a riai. N te ingabong aei e taku Beretitenti Nelson, “Kaokan bwai tiaki te waaki, tiaki te bwai ae riki.”5 E taku te Uea, “Ma ni kabane bwaai a na koro bukiia n te tai ae riai.”6 Ngkai bon ara tai ni manga kaota aran te Ekaretia are e kaokaki.
Te kantaninga n Ana Ekaretia Iesu Kristo Ibukiia Aika Itiaki ni Boong aika Kaitira bwa ti na aranaki n Arana. Tabeua te bong n nako ao I mena i Kirtland, Ohio, ike te Burabeti Iotebwa Timiti, ma tabeman kaain te Ekaretia, e taetae ni burabeti “Te Ekaretia aei e na kaona Amerika Maiaki ao Meang—e na kaona te aonaaba.”7 Te Uea e kabwarabwara te mwakuri n te bong aei bwa “te mwakuri ae korakora ao e kamimi.”8 E taetae iaon te “berita [are e na] kakoroaki bukina ni boong aika kaitira,” ni kariai “ni kabane … te aonaaba [e] na kakabwaiaki.”9
Taeka n te maungatabu aio a rairaki nakon 55 taetae. N tokina, taeka aikai a na ongoraeaki ao ni warekaki n 98 taetae n taabo aika e raka i aon 220 aaba.
Ngkana e oki te Tia Kamaiu n te korakora ao te mimitong, kaain Ana Ekaretia Iesu Kristo ibukiia Aika Itiaki ni Boong aika Kaitira aika kakaonimaki a na bane n roko n aaba nako, aomata nako, reeti ni kabane, ao katein te aonaaba ni kabane.
Rikiraken ana Anainano te Ekaretia
Ana Ekaretia Iesu Kristo ae kaokaki e na aki tii namakinaki irouia naake kaain te Ekaretia. Ibukin taian kaotioti mai i karawa n ara bong aikai, ibukin booki aika a tabu aika a kaokaki nakon te aonaaba ao mwaakan ana bwai n tituaraoi te Tamnei ae Raoiroi, ti na riki bwa te ota i aon te maunga ngkai kakeaan kakoauaan Iesu Kristo e a karooa te aonaaba. E ngae ngkai a mwaiti aika a kariaia te aonaaba bwa e na kamabubui aia onimaki iroun te Tia Kabooira, ti na “aki kamwaingaki man [ara] tabo.”10 Kiritian ake tiaki kaain ara aro a na butimwaea tibwangara ao ara kakoaua raoi iroun Kristo. Koraki ni kiritian ake a tia n taraira bwa e kairua ara koaua a na rabwatiira bwa raoraora. Inanon boong aika a na roko, ti na weteaki n aran Iesu Kristo.
Ti kaitau ngkami ibukin am kekeiaki ae rine ni uotarake aran ni koaua te Ekaretia. N te maungatabu teniua te ririki n nako, e berita nakoira Beretitenti Nelson “bwa matoan nanora ni kaeta aran Ana Ekaretia te Tia Kamaiu … [e na uotia nakoira] te onimaki ae rikirake ao karekean te korakora n tamnei.”11
Te berita aio e a tia n namakinaki irouia taan iriira Kristo ni katobibia te aonaaba.12
Te tari Lauri Ahola mai Amerika Mainiku e taku bwa ngke n tabetai e betanga ni kabongana aran te Ekaretia. Ma ibukin ana reirei te burabeti, e taekinna. N te tai teuana, e kawara raoraona n te umwantabu ae kaain te koaua teuana. Aikai ana taeka:
“E titiraki temanna ae e kinaa, ‘Ngkoe kaain te Moomon?’
“‘Ngai bon kaain Ana Ekaretia Iesu Kristo ibukiia Aika Itiaki ni Boong aika Kaitira, eng,’ I taku. E waaki n tabeki titiraki tabeua, ni katoai titiraki e waaki man: “A kakoaua kaain te Moomon …?’ Ao ni katoa te tai, ngkana I waaki ni kaeka ma te kibuntaeka: “N ana Ekaretia [Iesu] Kristo are e kaokaki, ti kakoaua …’
“Ngke e a ataia bwa I aki butimwaea te ara ‘Moomon,’ e titiraki ni koteai, ‘Tiaki ngkoe kaain te Moomon?’
“Ngaia are I a titirakinna ngkana e kina bwa antai Moomon—e aki ataia. I tuangnga bwa Moomon bon te burabeti … [ao ngai] I rang kakatonga ngkai e irekereke ma [ngaia].
“‘Ma,’ I reitia, ‘Moomon e aki mate ibukin au bure. Moomon e aki … korakai i Keketemwane ke ni mate i aon te kaibangaki [ibukiu]. … Iesu Kristo bon Atuau ao Au Tia Kamaiu. … Ao bon man Arana ae I tangiria ni kinaaki iai. …’
Imwiin tabeua te teekan ni kainabwaabu, [e taku te aomata ae aki rangi ni kinaa], ngkoe te Kiritian!’”13
Uringa ana taeka Beretitenti Nelson? “I berita nakoimi bwa ngkana ti karaoa ara kabanea n tamaroa ni kaeta aran ana Ekaretia te Uea, Teuare bon ana Ekaretia aei E na karokoa Mwaakana ao ana kakabwaia iaoia Aika Itiaki, n te aro ae ti tuai n nooria mai mwaina.”14
Te Uea E Kauka te Kawai n Taainako
Te Uea e aki toki ni kakoroa nanon Ana berita te Uea. E aki toki ni kauka te kawai ibukira ngkai ti karaoa Ana mwakuri .
Inanon ririki aika mwaiti iai ara kantaninga bwa ti na karekei tenaan domain site n te intanete ae ChurchofJesusChrist.org ao ChurchofJesusChrist.com. Tiaite aika uoua aikai a bon aki kakaboaki. Tao n ana tai ni katanoata Beretitenti Nelson, a waekoa ni kaoti ngaia ni kauoman. Bon te kakai.15
Man korakoran te Uea e a tia naba ni karababaa ara kekeiaki n rinanon aara ake a tia n irekereke ma te Ekaretia.
Aran Te Moomon Tabanaeko Kuaea e bitaki nakon te Tabanaeko Kuaea n te Tembora Tikuea. Te webutiaite ae LDS.org, are e kakawaraki irouia ae e raka i aon 21 te mirion aomata ni katoa namwakaina, e a onikaki nakon ChurchofJesusChrist.org.16 Aran te LDS Business College e bitaki nakon Ensign College. Te webutiaite ae Mormon.org e a bitaki nakon ChurchofJesusChrist.org. Bwaai aika e raka iaon teuana te nga ake iai te ara iaona ae “Mormon” ke “LDS” n irekereke ma ngaia a tia ni bitaki. A tia Aika Itaki ni Boong aika Kaitira ni biti aia webutiate, rawebwana, ao aia akaunti n te Twitter.
Ti a tia ni karekea te kanikina ae boou ae boboto iroun Iesu Kristo.
“I nukan te kanikinaa bon katotongan Kristo ae karaoaki n te mabora ae kaaraki iroun Thorvaldsen Christus. E kaota te Uea ae e a tia ni manga uti ae, maiu are arora baina ni inga ma koraki ni kabane ake a kan nako Ina.
“N te kanikina anne, e tei Iesu Kristo iaan te kamron [ni kauringiira] mangautin te Tia Kamaiu n otinako man te rua ni mate.”17
E a tia Ana Ekaretia Iesu Kristo ibukiia Aika Itiaki ni Boong aika Kaitira ni bita tein te korobanna nakon ae e riaon 50 te taetae. Aran te tabo ae boou a tia ni bwainaki ni kabuta te aonaaba.
Te Kakaitau ibukin Aia Ibuobuoki Tabeman Aomata
Ti kaitauia aomata aika a tamaroa man akoi ake a tia ni karinea nanora bwa ti na weteaki n arara ae eti. I wareka teuana te rongorongo n ana taeka temanna te tama n te Katorika nakoia “Aika Itiaki ni Boong Aika Kaitira.”18 Ngke I kawara te tia kairiiri n te aro ni Kiritian n te namwakaina ae e nako n te aono n Amerika mainiku, e taekina aran te Ekaretia n ana moan taetae ni bwaninin aran te Ekaretia, ao ni manga ruamwina ma “Ana Ekaretia Iesu Kristo.”
Ti noria bwa karinan riki onoua te taeka nakon arara e na bon aki nakoraoi ibukiia taan kareke rongorongo, ma n aron are e taekina Beretitenti Nelson, “taan kareke rongorogo ake iai nanoia n reitaki a na butimwaea ara bubuti.”19 Kam rabwa n anganakira te aeka ni karinerine are kam anga nakoia aaba, taan takakaro, kaain te tautaeka ke bootaki n te komiunite ni kabongana te ara are ti tangiria.
E na iai tabeman ake, a na tangiria ni kamwinibaea ke ni kamemerea kakawakin ara mition, a na teimatoa ni weteira bwa kaain te “Moomon.” Ma te karinerine, ti a manga bubuti nanoia taan kareke rongorongo ae aki tabeitera bwa a karinea nanora ni weteaki n te ara are bon arara n ae kaniia 200 te ririki.
Aia Ninikoria Aika Itiaki
Iai ngaa ma ngaa Aomata aika a itiaki ni Boong aika Kaitira aika a ninikoria n tataekina aran te Ekaretia. Ngkai ti karaoa bukinara, tabeman a na manga katotongiira. E bwaka nanou n te karaki teuana mai Tahiti.
Iriura Jean ae tebwina-ana-ririki e motikia bwa e na ira ana reirei Beretitenti Nelson.
“N ana reirei a maroroakina kanoan aia wikente … ao Iriura e taetae iaon … te ekaretia.
“Ana tia reirei, Vaite Pifao, e taku, ‘Oo, ngkoe kaain te Moomon?’
“E kamatoa n taekina Iriura” ‘Tiaki … ngai kaain ana Ekaretia Iesu Kristo ibukiia Aika Itiaki ni Boong aika Kaitira!’
“E kaeka ana tia reirei ‘Eng, … ngkoe kaain te Moomon.’
“E teimatoa Iriura n taku, ‘te tia reirei tiaki, Ngai kaain ana Ekaretia Iesu Kristo ibukiia Aika Itiaki ni Boong aika Kaitira!’
“E mimi Ms. Pifao ni matoan nanon Iriura ao e iango bwa bukin tera e rang imanono ni kabongana [te] ara ae abwabwaki ibukin ana ekaretia. [E baireia bwa e na reirei riki taekan te Ekaretia.]
“[Imwiina, ngke Titita] Vaite Pifao e bwabetitoaki [e kaota ana kakaitau] ngkai Iriura e ongo nakon ana reirei Beretitenti Nelson.”20
“Aran te Ekaretia e tiku n aki bitaki.” Ti na waakirake inanon te onimaki. Ngkana ti tauraoi n ira ana reirei te Uea n aron ae kaotaki rinanon Ana burabeti ae maiu, ai moarara riki ngkana e bootau ma ara iango, ni kantaninga te nano ni mamannei ao te anganano, e na kakabwaiaira te Uea ma rakan korakoran tamneira ao ni kanakoia Ana anera ni boutokaira ao ni mena irarikira.21 Ti karekea ana kamatoa te Uea ao Ana kariaia.
Ngai te tia kakoaua nakon te mwaaka mai karawa are e mena iaon ara burabeti ae tangiraki, Beretitenti Russell M. Nelson. Nanona ae mamate nanona iai bon tii kakukureian te Uea ao kakabwaiakia natin Tamara are i Karawa. Man ana atatai, ae tabu, I kakoaua ana tangira te Uea ibukina. Bon ana burabeti te Atua.
I kakoaua bwa Iesu bon te Kristo, Natin te Atua. N aran Iesu Kristo, amen.