Nakomai nakon Kristo ao Tai Roko n tii Ngkoe
Te kawai ae tamaroa ni bita te aonnaba bon katauraoan te aonaaba ibukin Kristo man kaoakiia aomata ni kabane bwa a na Iriiria
I a karekea au reta mai iroun te ataeinnaine ae ninikoria. E koreia, “I a bae. … I aki koaua bwa antai ngai, ma I namakinna bwa rokou ikai bon ibukin te bwai ae kakawaki.”
E a tia n rereke iroum te namakin n ae ko kakaaenako, n iangoia ngkana Tamam are i Karawa e bon kinako ao tao E kainnanoiko? Kairake aika kam tangiraki, ao bon ngkami ni kabane, I kakoaua bwa te kaeka eng! Iai Ana Babaire te Uea Ibukim E a tia te Atua ni katauraoiko ibukin te bong aio, te tai aio, n riki bwa te korakora ao te kairoro ae tamaroa ibukin Ana mwakuri ae korakora. Ti kainnanoiko! E na bon aki rangi ni kakawaki Ana mwakuri ngkana akea ngkoe!
Ara burabeti ae tangiraki, Beretitenti Russell M. Nelson, e kauringiira uoua koaua ae bon aan ni koaua te mwakuri ae kakawaki man mimitong.
I uringnga inanon tekatekau ma kaainabau, ara burabeti e katika ana kaintekateka nakoira, e a kaan ae a toma bubuan waera, ao n taraai ma matana ake a buruu. I aki koaua bwa e tata buroou ngke tao e a bon toki raoi ngke e a weteai bwa N na beku bwa te Beretitenti ni Kabuta Ibukiia Ataeinnaine. E titirakinai te titiraki ae bon tiku naba ngkai inanou, “Bonnie, tera te bwai ae moan te kakawaki ae a na riai n ataia [kairake]?”
I iangoia raoi teutana te tai ao man taku, A riai n ataia bwa antai raoi ngaiia
ENG!”, e kaeka, ao a riai n ataa te kaantaninga ibukiia.”
Kinaakira Iroun te Atua
Ngkoe bon natin te Atua ae tangiraki ao man nabeaki raoi. E kororaoi ana tangira nakoim n te aro are ea kanakoa Natina, Iesu Kristo, bwa e na karaoa te mwakuri ni kamaiu ibukim ao ibukiu.1 E aki bwabwaka ana tangira te Tia Kamaiu ibukira—e ngae ngke ti kabwaka! Akea te bwai ae kona ni karaureira nako mairoun te Atua.2 Uringnga te tangira aio e kona ni buokiko n totokoa ana kamangangao te aonaaba are e kataia ni kamamaara onimakinam ni kinaakim mairoun te Atua ao ni kamatakiiko n am konabwai.
N aia maungatabu kaain te FSY, I kaitibo ma uoman ataeinnaine aika a tia n rang ni kekeiaki. Ataeinnaine ni kauoman aikai a naa aia kakabwaia mairoun te tamanuea ao ni manga moan kunea ana tangira ao ana kairi te Uea ibukiia n tatabemaniia. Karekea am kakabwaia mairoun te tamanuea, taebubuia ngkana e riai, ma kamatebwaia n tainako. Ngkana akea iroum, karekea—n te tai ae waekoa. Tai kawaeremwea ni kakaea bwa tera ae tangiria te Uea ni kan tuangko n te tai aei bwa antai ngkoe.
Ara Kantaninga ae Akea Tokina
Ana kauoua ni koaua Beretitenti Nelson are e taekinna nakoira n te bong anne bwa ti na ataa te kantaninga ibukira. Aio ara mwakuri ae bubura man kakannato.
Inanon ririki aika nako, natiu ae Tanner ngke nimaua ana ririki e takakaro n te runga ni butibooro n ana moan tai E bon rangi ni kukurei!
Ngke ti roko n te kaboo, ti nooria bwa ana tiim a kaboongana te kouru ae bon taneiai te aba ni kakabongaaki-tiaki te tiaiti ibukiia tenimaua n ririki ma e bon nang taraa ni bubura ibukiia ataei.
Te takakaro e kabonganai mwakoron tabeua katei ni kawai ngke I a noora Tanner bwa e mena ni nnen te kouru. I bon rangi n kubanako. E bon oota raoi tibwangana ngkai e na kawakina te kouru?
E a tang te biira, ao ti a rang rekenako n te takakaro ao ti a mwaninga taekan Tanner. N te tai ae tawe temanna kaain te tiim are aiaia e reke irouna te booro ao e butiboroia ni kaineta Tanner. I taraa ana tabo Tanner ni kakoaua bwa e tauraoi n tei n ana tabo ni kawakina te kouru. I a noora te bwai ae I aki kantaningaia.
Inanon tain te takakaro, e mwaninga nako Tanner ao e a karaua n niira baina te maing inanon bwangabwangan te nete. Ngkanne e a manga karaoia nakon baina are te angatai. N are imwiina, waena te angamaing. Ao ni bon tokina, waena naba are te atai. E a bon baeruarua Tanner inanon te nete. E mwaninga te kaantaninga ibukina ao te bwai are e a tia ni berita iai nakoia kaain ana tiim.
E aki tiku ni maan Tanner bwa te tia butibooro, ao I aki kona ni mwaninga te reirei are e reke nakoina n te bong anne. N taai tabetai ti kona n mwaninga nako ao n kabanei korakorara n taabo riki tabeua. Teuana mai buakon ana bwai ni buaka Tatan ae moan te korakora bwa e na katabetabeira ni baika ao mwakuri aika a raraoi, inanon taai ni kainnano, e na kamatakiira ao ni kabaeira nako man te mwakuri raoi are ti weteaki nako iai n te aonaaba aei.3
Te kantaninga ibukira ae akea tokina bwa ti na nakon Kristo ao ni kakaonimaki n raonna n Ana mwakuri ae moan te kakannato. “E bon rang beebete n aron karaoan te bwai are e reireiniira Beretitenti Nelson: “N te tai are ti karaoi iai bwaai are e na buokaki iai temanna … ni karaoi ao ni kawakin aia berita ma te Atua, ti ibuobuoki n ikota Iteraera.”4 Ao ngkana ti bane ni karaoa Ana mwakuri, ti na karekea ataakina ao n rangi n tangiria riki.
Ti teimatoa n ukoura kaaniara nakon te Tia Kamaiu rinanon te onimaki, tangiran te rairannano, ao kawakinan tuua. Ngkai ti kabaeira nakoina rinanon berita ao otenanti aika tabu, a kaonaki maiura ma rikiraken ara onimaki,5 kamanoaki,6 ao te kimwareirei ae nano n akea tokina.7
Ngkai ti nakoiNa, ti kona n nooria tabemwaang rinanon Ana taratara.8 Nakomai Nakon Kristo. Nakomai ngkai, ma tai roko n tii ngkoe!9
Ana euangkerio Iesu Kristo e aki tii tamaroa; ma e kakawaki ibukira ni kabane. “Akea riki te kawai ke te anga are [ti] kona ni kamaiuaki iai, ma ti rinanon Iesu Kristo.”7 Ti kainnanoa Iesu Kristo! Te aonaaba e kainnanoa Iesu Kristo.11
Uringa, te kawai ae tamaroa n ibita te aonnaba bon katauraoan te aonaaba ibukin Kristo man kaoakiia aomata ni kabane bwa a na Iriiria
Iai te karaki ae korakora n ana Boki Moomon ike te Kristo are e a mangauti e kabanea ana tai ma Nibwaite. Ko kona n iangoia bwa e na aekara aron anne?
Ngkai e katanoata Kristo bwa e riai n oki nakon Tamana, “e taratara nako riki.”12 E noori rannimataia aomata, E atai nanoia bwa a kaman kariairia ni kan nooria.
E titiraki, “Iai i buakomi ae aoraki? Uotiia mai. Iai ibuakomi ae mwauku, ke e mataki, … bonotaninga, ke a karawawataki n aekaia nako? Kairiia mai ao N na katoka aorakiia.”13
Reken te nanoanga ae moan te korakora, akea te tia ae e katei ibukiia aomata ni kabane “are a karawawataki n aekaia nako.” I rangi n tangira ae akea te bwai ae e bubura ke ae nang uarereke n ana waaki n katoki aoraki.
E atai rawawatara ao korakaira ao e wewete bwa a na kairaki nakoina ake a raraoma, nanokawaki, a kua, ake a kamoamoa ao n aki ota te aba irouia, ake a maroaa, ke “ake a karawawataki n aekaia nako.”
A bane aomata “ni mwananga … ; ao e boni katoka aorakiia ni kabane. …
“…A boni bane ni kabane, ake a katokaki aorakiia ao ake a marurung, ni bobaraaki i waena, man taromauriia.”14
Ni katoa tai ngkana I wareka aei, I titirakinai i bon irou: Antai ae N na kairia nakon Kristo? Antai ae kona kairia?
Ti kona n taratara nako riki, n aron ae karaoia Iesu, Arona, ni kakoaua raoi bwa akea ae e katukaki ao ni kaoiia aomata nako bwa a na roko ni Kinaa?
N na tibwaua te katooto n aron bebetena. Raraou ae te kairake ae Peyton, 15 ana ririki, iai ana bwa e na wareka nimaua te kibu man koroboki aika a tabu ni katoa ingabong, ma e aki karaoia n tii ngaia. Tarakina, Peyton e kaoiia ana karo ao tarina, ao bon mwanena ae nimaua ana ririki bwa a na raonna ni karaoia. Te mwakuri ae taraa ni uarereke aio bon ana reirei Kristo ngke e kakao, “Kairiia nakomai”
Te kakao mai iroun te Uea aio e bon reitinako naba nakon te bong aio. Ataeinnaine ao Ataeinimwaane, waaki ngkai, ni mweengaami. Ko kukurei n tataro ao n titirakina Tamam are i Karawa bwa ko na kanga ngkoe ni boutokaia am karo ngkai a reitinako n nakomai nakon Kristo? A kainnanoiko n aron naba ae ko kainnanoiia.
Ngkanne manga taraiia riki tarim, raoraom, ao kaain rarikim. Antai ae kona kairia nakon Kristo?
Te Tia Kamaiu e taekinna, “Nooria Ngai te oota; I a tia ni katea te banna ni katooto ibukimi.”15 Ti na bon namakina ana tangira ao ana rau Te Tia Kamaiu ngkai ti reitia n kamaiuia Ana utu te Atua, bwa e a tia ni berita, “Ane irirai ao e na bon aki nakonako n te ro, ma e na karekea te oota ni kamaiu.”16
Ai mimitongira te tai are tina mwakuri iai ibukin Kristo!
Eng, kam mena ikai ibukin te bwai ae kakaawaki. I reita are iroun Beretitenti Nelson, are e taku, Te Atua e kainnanoiko bwa kona bita te aonnaba. Ngkai ko butimwaia ao n iriira Ana kantaninga ibukim, ko na konaa n katiai bwaai aika a bon kangaanga aron karaoaiai!”14
I kakoaua bwa te Uea e ataia bwa antai ngkami ao E tangiri ngkami! Tina uaia, n kakoroa bukin Ana kaantaninga ni karokoa te bong are Kristo e na okira te aonaaba ao e na weteira n tatabemaniira bwa tina “nakoina.” Tina bootiira ma te kukurei, kioina ngke ngaira ake ti roko nakon Kristo, ao tiaki roko n tii ngaira. N aran Iesu Kristo, amen.