E Bon Tamaroa—Tamaroa man Bebete
Ti bia kawakina te euangkerio ni kabebetea n aron ae ngkai ti katokai iaora tabera ake a rineaki mairoun te Atua.
Kabwarabwaraana
I anga au kamauri nakoimi ni iran te maungatabu aei.
N te bong aei I tangiria ni kabwarabwarai uoua mwakoro n ana euangkerio Iesu Kristo ae kaokaki, n rimwiaki n aua rongorongo mairouia Aika Itiaki ni kabuta te aonaaba ni kaotan maiuakinan reirei aikai. Te moan mwakoro n te euangkerio ae kaokaki—ana mwakuri te Atua ibukin te kamaiuaki ao te karietataaki—e boboto iaon katabeaki aika bebete ake a rineaki mairoun te Atua. Te kauoua ni mwakoro e kauringiira bwa te euangkerio e mataata, kakawaki, ao ni beebete.
Taabe Aika Bebete Ake a Rineaki Mairoun te Atua
Karekean te maiu are akea tokina, ti riai “nakomai nakon Kristo, ao ni kakororaoaki irouna.”1 Ngkana ti nakon Kristo ao ni buokiia tabeman bwa a na karaoia naba, ti buoka Ana mwakuri Te Atua n te kamaiuaki ao te karietataaki, are e boboto iaon katabeaki aika bebete ake a rineaki mairoun te Atua.2 Katabeaki aikai a kaboraoaki ma kiingin te nakoanibonga are e kaokaki iroun Mote, Eritaia, ao Eria, are e koreaki n te ka 110 ni mwakoro n Reirei ao Berita aika Tabu,3 ao te kauoua n tua ae te kabanea ni korakora are e anganiira Iesu Kristo n tangiriia raora n ai aron tangirara i bon iroura.4 A kuneaki inanon te kauoua n iteraniba n te Aeniboki ni Kabuta, ae manga kaboouaki ae tauraoi ibukiia membwa ni kabane.
Ngkana kam ongoraai taeka aika “Aeniboki ni Kabuta” ke “taabe aika mairoun te Atua” e karika ae ko na ruru ni maaku ni kangaangan ke ni minotakim iai, ma tai maaku.Taabe aikai a beebete, a kairaki mairoun te tamnei, a kaunganano, ao a kona ni karaoaki. Bon aikai:
-
Maiuakinan ana euangkerio Iesu Kristo
-
Tararuakiia naake iai kainnanoia
-
Kaoakiia ni kabane bwa ana karekea te euangkerio
-
Katiteuanakiia utu n te maiu ae akea tokina
Kam na kona n norii n aron ae I norii: kanga ai aron maben te kawai n okira Tamara are i Karawa ae tatangira.
Te Euangkerio e Mataata, Kakawaki, ao ni Beebete
E a kaman taekinaki bwa ana euangkerio Iesu Kristo “e rangi n tamaroa ao ni beebete.”5 Te aonaaba e aki. E kamangaongao, e kangaanga, ao ni kaonaki n te kiriwe ao te kauntaeka. Ti kakabwaiaaki ngkai ti kamwakura te taratara raoi n aki kariaia te kangaanga, are e riiriki n te aonaaba, ni kamangaoa arora ni butimwaea ao ni maiuakina te euangkerio.
E taekinna Beretitenti Oaks: “Ti reireinaki ae mwaitin ni bwaai aika uarereke man beebete n ana euangkerio Iesu Kristo. Ti riai ni kauringaaki bwaai aikai ao inanon te tai ae maan, bwaai aika uarereke akanne a riki iai bwaai aika korakora.”6 Iesu Kristo e kabwarabwara bwa e aoraoi amona, ao e beebete uotana.7 Ti riai ni bane ni kataia ni kabebetea te euangkerio—inanon maiura, n ara utu, n ara kiraati ao kooram, ao n ara uoote ao n ara titeiki.
Ngkai kam ongora ni karaki aika N na tibwai nakoimi, a ataaki bwa a tia ni karauaki n rineaki bwa a na kaunga te nano ao n reireiniia aomata. Aia mwakuri Aika Itiaki a riki bwa katoto ibukira n tatabemaniira, ni maiuakina te eungkerio n te kawai ae mataata, kakawaki ao ni beebete inanon kakoroan nanon teuana mai buakon taabe aika mairoun te Atua ae e kabwarabwaraki.
Maiuakinan Ana Euangkerio Iesu Kristo
Te moan, maiuakinan ana euangkerio Iesu Kristo. Jens ae kaain Denmark e tataro ni katoa bong bwa e na maiuakina te euangkerio ao ni kinai ana wirikiriki te Tamnei ae Raoiroi. E reiakinna bwa e na waekoa ni karaoia ngkana e namakina ana kairi te Tamnei.
Jens e tibwaa ane imwiina:
“Ti maeka n te auti ae uarereke ae karaoaki man te kai ma rauna te uteute inuukan te kawa ae uarereke ma ni kamwengaraoi, ae uakaan ma nein te kaawa.
“N te tairiki aei ae te kabanea n nakoraoi ni bong n tain te kabuebue iaon Danish, a ukinako mataroa ao winto, e bung te ariki ao a rau bwaai ni kabane. Ibukina bwa te tairiki aei e rianako tamaroana n tain te kabuebue I aki rangi ni ienikuri ni bita wiikin te taura are e aki ura inanon ara ruu ni bwai.
“N te tai ae waekoa I karekea te namakin ae moan te korakora bwa I riai ni bitia ngkainaba! N te tai naba anne, I ongo bwanaan buu, ae Mariann, ae weteai ma natira bwa ti na teboki baira ibukina bwa e a tauraoi te katairiki!
“I a maan ni mare ao n ataia bwa aei tiaki te tai ni waakina karaoan te bwai teuana nakon ae N na teboki baiu, ma I ongo bwanaau n tuanga Mariann bwa N na tii nako n te titoa ni kaboa wiikin te taura ae boou. I namakina ae I kaumakaki bwa I riai n nako ngkainaba.
“E mena te titoa n iteran te nei are te iterana. Ti taneiai n rianna, ma n te bong aei I anaa au bwaatika. Inanon butiu irarikin te nei, I a noora te ataei ae te mwaane ae uoua ana ririki, ae rianna n tii ngaia irarikin mangeen te nei, e a rang uakaan ma te ran—n te tai ae waekoa e a bwaka inanona! Teuana te miniti e mena ikekei—ao n are imwiina ao ai akea!
“Akea temanna ae noora te bwai ae riki aei ma bon tii ngai. I karenakoa au bwaatika iaontano, ni biri, ao ni kibara nanon te nei are e toki tiana iaon koreau. Aon te ran e waekoa n onrake n taian uteute aika a beibeiti iaona, are e a karika kangaangan noran aan te ran. Ngkanne I namakina te kakamwakuri n te itera are teuana. I a kateboa baiu inanon te ran, I taua te karinano, ao ni katikarake te ataeinimwaane ae uarereke aei. E moanna n ikerake, e bekobeko, ao e tang. N te tai ae waekoa imwiina ao e a kaitibo te ataeinimwaane aei ma ana karo.”
Ngkai e tataro te Tari Jens ni katoa ingabong koraki ni kinai ana wirikiriki te Tamnei ae Raoiroi, e ngae ngke te bwai ae aki bomaongina n aron bitakin wiikin te taura, e tataro naba bwa e na kamanenaki bwa te bwai ni mwakuri ni kakabwaiakiia natin te Atua. E maiuakina te euangkerio Jens man ukoran kaetieti mairoun te Atua ni katoa bong, ni kataia n tau, ni karaoa ana kabanea n tamaroa n ira te kaetieti anne ngkana e kaoti.
Tararuakiia Naake Iai Kainnanoia
Aio te katooto ibukin tararuakiia naake iai kainnanoia. Te bong teuana ao e nako te tia kairiiri n te Cucuta Titeiki i Colombia ma te beretitenti irouia Ataeinnaine ni kawariia uoman ana ataeinnaine—ao mwaaneia ae ikawai ae tebwi tabun ana ririki—are a rootaki n taian kangaanga. N te tai ae aki maan nako ao e mate tamaia, ao tinaia e mate teuana te ririki mai imwaaina. Ataei aika teniman aikai a bon tiku n tii ngaia ni mweengaia ae uarereke, man mangori. E karaoaki oon te auti man te kai ae rainiaki n te buraetitiki baeki, ao taubukina te kaabwa ae tii kaonotaki n te tabo are a matu iai.
Imwiin kawarakiia, a ataia taan kairiiri aikai bwa a kainnanoa te buoka. Rinanon te babaire n te kauntira ni uoote, a moanna ni buokaki. Taan kairiiri n te uoote ao n titeiki—Bootaki n Aine, kaain te kooram n unimwaane, Bootaki n Ataeinimwaane, Bootaki n Aataeinnaine, ao utu aika a mwaiti—a karaoi tibwangaia ibukin kakabwaiakiia te utu aei.
Ana bootaki te uoote a reitaki ma tabeman kaain te uoote ake a mwakuri bwa taan kateitei. Tabeman a ibuobuoki n katamaroan nanon te auti, tabeman a anga aia tai ao ni mwakuri, tabeman a karaoa te amwarake, ao tabeman a teimatoa n anga baike a kainnanoaki.
Ngke e a tia te auti ae uarereke, bon te bong ae rangi ni kakukurei ibukiia naake a ibuobuoki ao ibukiia teniman kairake ake kaain te uoote. Ataei aika a tia ni mate aia karo a namakina te rau ao te reitaki ae koaua mairouia utu man aia uoote n ataia bwa a aki maroaa bwa te Atua e memena irarikiia n taainako. Koraki ake a karaoa te kakawaraki a namakina ana tangira te Tia Kamaiui a namakina ana tangira te Tia Kamaiu ibukin te utu aei ao n riki bwa Baina ni mwakuri ni beku ibukiia.
Kaoakiia ni Kabane Bwa Ana Karekea te Euangkerio
I taku bwa kam na kukurei n te katooto aei ni kaoia aomata nako bwa a na butimwaea te euangkerio. Cleiton ae tebwai ma itiua ana ririki ae kaain Cape Verde e aki kantaningaa te bwai ae e na riki imwiin rinnakona n te tieminari kiraati n ana uoote te bong teuana. Ma maiuna ao maiuia tabeman a na bitaki n aki toki bukina ngkai e karaoia.
Cleiton, n raonaki ma tinana ao tarina ae ikawai, a tia ni bwabetitoaki nakon te Ekaretia tabeua te tai mai imwaaina, ma e a toki naba rorokoia te utu aei. Tii man n iriiran te tieminari e kakoauaki ae riki mai iai te bitaki n anaakin nanoia te utu aei.
Kairake ake tabeman n te tieminari a akoi man butimwaai raoi. E namakina te mweengaraoi Cleiton irouia ao a kaungaa bwa e na ira te waaki ni kakukurei are teuana. E bon karaoia, ao n te tai ae waekoa e moanna n iriiri ana bobootaki te Ekaretia. Te bitiobi ae wanawana e noora ana konabwai n tamnei Cleiton ao e kaoia bwa e na riki bwa ana tia ibuobuoki. “Man te tai anne,” e taku Bitiobi Pina, “e a riki Cleiton bwa te katooto ao te kakairi nakoia kairake ake tabeman.”
Te moan aomata are kaoa Cleiton ni kaokia nakon te aro bon tinana, imwiina tarina are e ikawai. Imwiina ao e kaoiia aomata aika a mwaiti ma raoraona nakon te aro. Temanna mai buakoia raoraona bon te ataeinmwaane ae bon ana roro, ae Wilson. N ana moantai raoi ni kaitibo ma mitinare, e kaota nanona bwa e kan bwabetitoaki. A kukurei mitinare ao ni miimi n aron mwaitin baike e a tia n tibwai Cleiton nakon Wilson.
E aki toki ana konabwai Cleiton ikanne. E buoka kaokakiia kaain te aro ake aki kakaonimaki, n raonaki ma tibwauaan te euangkerio ma raoraona man aro tabeua. N te bong aei iai 35 kairake aika a kakaonimaki n te uoote, ma ana burokuraem te tieminari ae rangi ni maiu, te kakaitau ae moan te bati nakon ana kekeiaki Cleiton n tangira, n tibwatibwa, ao ni kakao. Cleiton, n aronaki ma tarina are e ikawai, ae Cléber, a uaia ni katauraoi ibukin aia mwakuri ni mitinare ae bwanin taina.
Katiteuanaakiia Utu ibukin te Maiu ae akea Tokina
N te kabane, N na tibwaa te katooto ae tamaroa ni katiteuanakiia utu ibukin te maiu ae akea tokina. Lydia mai Kharkiv, Ukraine, e moan reiakina taekan te tembora mairouia mitinare. Ngkekei naba, e korakora nanon Lydia ni kan nako n te tembora, ao imwiin ana bwabetito, e a moana ana katauraoi ibukin reken ana beeba ni kariaia nakon te tembora.
E nako Lydia nakon Freiberg Germany Tembora ni karekea ana entaumente ao imwiina e kabanea tabeua te bong ni karaoi otenanti n te tembora ibukiia ana bakatibu. Imwiin katabuan Kyiv Ukraine Tembora, e a mwaiti riki nanakon Lydia nakon te tembora. Ngaia ma buuna, ae Anatoly, a tia ni kabaeaki n akea tokina ao imwiina a weteaki bwa a beku bwa mitinare ibukin te tembora. A uaia ni kunea te mwaiti ae riaon 15,000 araia aia bakatibu ao a mwakuri ni katauraoi taian otenanti ibukiia.
Ngke e titirakinaki ibukin ana namakin ni kaineti ma te mwakuri n te tembora, e taku Lydia,“Tera ae I karekea n te tembora? I a tia ni karaoi au berita aika tabu ma te Atua. E kakorakoraaki au onimaki. I reiakinaki aron reken am kaotioti i bon iroum. I a kona ni karaoi taian otenanti ni kamaiu ibukiia au bakatibu ake a tia ni mate. Ao I kona n tangiriia ao ni beku ibukiia aomata tabeman.” E kainna ma te kibuntaeka ae koaua aei: “Te Uea e tangiria bwa ti nanako n te tembora ni katoa tai.”
Kabaneana
E anaaki nanou man tamaroaia Aomata aika Itiaki, ngaiia n tatabemaniia ma aroia aika rangi kaokoro man bitaki are a boboto iaon karaki aika aua aikai. E mwaiti ae na kona n reiakinaki mai mwiin kamiimin baika a riki ake a roko rinanon beebeten maiuakinan reirein te euangkerio. Aikai ni kabane ti bon bane ni kona ni karekei.
Ti bia kabebetea te euangkerio ngkai ti katoka iaora taabe aika mairoun te Atua: ni maiuakina ana euangkerio Iesu Kristo ni kainamakini wirikiriki n aron ae e karaoia Jens mai Denmark. N tararuakiia naake iai kainnanoian aron ae kaotaki irouia kaain te Cucuta Titeiki i Colombia ni katauraoi taabo ni katantan ibukiia kaain te uoote ake a mate aia karo. Ni kaoakiia ni kabane bwa ana karekea te euangkerio, n te anga are e karaoia Cleiton man aban Aberika i Cape Verde ma raoraona ao ana utu. Te kabane, ni katiteuanaakiia utu ibukin te maiu ae akea tokina, n aron ae kaotaki iroun Titita Lydia mai Ukraine, rinanon oin ana otenanti n te tembora, ana mwakuri n rongorongoia ana utu, ao ana mwakuri n te tembora.
Karaoan aei e na bon uota te kimwareirei ao te rau. Ibukin aei I berita ao ni kakoaua—ao ibukin Iesu Kristo bwa ara Tia Kamaiu ao te tia Kaboira—n aran Iesu Kristo, amen.