Uringiia Am Aomata aika Itiaki n Rawawataia, O Atuara

Ana baire ni kakukurei Tamara are i Karawa bon karekean te taneiai n te maiu ae mamate ike natina ni kabane a na kataaki ao a na kaitarai taian kataaki.¹ Nimaua te ririki n nako ao e reke irou te kaentia. I a tia n namakina ao n teimatoa n namakina te maraki n rabwatau man taian korokoro, bwaai n aoraki ni korakoran mitin, ao mwin taian bwai n aoraki. I a tia n rinanon te korakai n te iango i nanon te kammaraki n aki mamatu n te bong. Tauan waare iaon bwaai n aoraki a kaotia bwa N na moantaai ni kitana te maiu aei nakon are I kantaningaia, ni katikuiia, ibukin te tai, au utu aika a rang kakaawaki irou.

N aki taraia bwa ko mena ia, te korakai n rabwata ke n namakin man aekan nako kangaanga ao mamaaran te rabwata e a tia n riki, e riki ngkai, ke n te tai teuana e na riki bwa irian maium.

Te korakai n te rabwata e kona n reke man rakan te ririki, aoraki aika aki kantaningaki, ao bon kabuanibwai aika karina, te baki ke akean te mweenga, ke te bwainikirinaki, mwakuri ni kakeru, ao te buaka.

Korakain te iango e kona n rikirake man te raraoma ke te nanokawaki; te ribuaka iroun te buu, te karo, ke te tia kairiiri ae e onimakinaki; te kamotirawaki man te mwakuri ke akean te karekemwane, te motibuaka irouia tabeman; aia rinerine raraom, natim, ke kaain am utu, te bwainikirinaki n aro aika a mwaiti, kanoanimi aika aki koro bukia n te mare ke irouia naati; te aoraki ae kakaiaki ke te moantaai ni mate irouia ake a tanigiraki; ke man aro riki tabeua.

Ko na kanga n tokanikai inanon te korakai ae e onoti are n tabetai e karika te mamaara are e roko iroura n tatabemaniira?

Teutana imwin teutana, te kantaninga e reke inanon ana euangkerio Iesu Kristo, ao te kantaninga e na kona naba n riki bwa mwakoron maium. N te bong aei N na tibwai aua reirei iaon te kantaninga are a reke man koroboki aika a tabu, aia reirei burabeti, mwakuri n ibuobuoki aika mwaiti, ao bon kataakiu ae waakinako inanon marurungiu. Reirei aikai aki tii kaineti nakoia aika a mwaiti ma a bon nano iroun temanna ma temanna.

Te moan, te karawawataaki tiaki nanona bwa te Atua e aki kukurei ni maium. Uoua tenga te ririki n nako, ana reirei Iesu a noora te aomata ae mataki n te tembora ao a titiraki, “Rabi, antai ae bure teuaei ke ana karo, ngkae e bungiaki ni mataki?”

Ana reirei taraan ae e kairua aia koaua, n ai aroia aomata aika a mwaiti ni bong aikai, bwa kangaanga ao karawawataaki ni kabane n te maiu boni mwiin te bure. Ma e kaeka te Tia Kamaiu, “E aki bure teuaei, ao aki naba ana karo ma e bungiaki ni mataki ba a aonga ni kaotaki ana mwakuri te Atua irouna.”²

Ana mwakuri te Atua e na karekea te aki mamate ao te maiu ae akea tokina ibukin te aomata.³ Ma e na kanga te kataaki ao te karawawata—riki te karawawataaki are e reke man ana rinerine ae bure te aomata temanna⁴—n tokin te tai e kawaaka rake ana mwakuri te Atua?

Te Uea e tuangia ana aomata ni berita, “I a tia ni kaitiakiko …; I a tia n rineiko ma i nanon ain te karawawataaki.”⁵ Ana tera ae karekea karawawataam, Tamam are i Karawa ae tatangira e kona ni karaoia bwa e na kaitiaka tamneim.⁶ Tamnei aika a itiaki a kona n uota rawawataia aomata ma te nanoanga ao te nanokawaki.⁷ Tamnei aika a itiaki are a “nako mai buakon te rawawata are korakora” a tauraoi ni maeka ma te kimwareirei ma te Atua n aki toki, ao “te Atua E na kaoi rannimataia ni kabane mai mataia.”⁸

Te kauoua, Tamara are i Karawa e ataa raoi aron rawawataam. Inanon te kangaanga, ti kona ni kairua n iangoia bwa te Atua e raroanako ao e aki tabe ma marakira. Te Burabeti naba Iotebwa Timiti e kaota te namakin aei ngke e rinanon te kangaanga inanon maiuna. Ngke e matawariki n te Karabuti ae Liberty ao nga ma nga aomata Aika Itiaki ni Boong aika Kaitira aika a kakionakoaki man aia auti, Iotebwa e ukoukora te atatai rinanon te tataro: “O te Atua, ko mena ia? Ao e ngaa te umwa ae rabuna te tabo ae ko karabako iai?” E kaina ma ana bubuti aei: “Uringiia am aomata aika itiaki n rawawataia, O Atuara.”⁹

Ana kaeka te Uea e manga kakoaua Iotebwa ao ni kabane ake a taonaki n te rawawata:

“Natiu, e na mena te rau n tamneim; am kangaanga ao karawawatakim a na riki ma tii n te tai ae uarereke;

“Ao ngkanne, ngkana ko teimatoa n rinanona n te aro ae raoiroi, te Atua e na karietako i eta.”¹⁰

A mwaiti aomata aika Itiaki aika a karawawataaki ake a tia n tibwaia nakoiu namakinan ana tangira te Atua inanon karawawatakiia. I uringa raoi te bwai ae I rinanona n te tai teuana n ikakorakora ma te kaentia ngke taokita a tuai ni konaa n ata te bwai are e karika marakiu ae korakora. I tekateka ma kainnabau, bwa ti na kakabwaia ara katawanou n aron are ti kakaraoia. Ma, e aki nako au tataro bwa e waanai te tang, “Tamara are i Karawa, taiaoka buokai. I a rang aoraki.” I nanon 20 ke 30 te teekan, I ramwaneaki n Ana tangira. Akea te kukune bwa tera oin rikin aorakiu,, e aki kaotaki bwa tera ae e na riki, ao akea kabebetean te maraki. I bon tii namakina Ana tangira ae itiaki, ao e rangi n tau anne.

I kakoaua bwa Tamara are i Karawa, are e ataa bwakan temanna te tibaro, e ataa naba korakaim.¹¹

Te kateniua, Iesu Kristo e anga mwaakana ni kamaiu ni buokiko ni karekea korakoram bwa ko na konaa uotam i nanon karawawataam. Te mwaaka ni kamaiu aei e kona n reke rinanon Ana Mwakuri ni Kamaiu.¹² I tabeaianga bwa a rang mwaiti kaain te Ekaretia ake a taku bwa ngkana e keerake korakoraia, a kona n rinanon te karawawataaki i bon irouia. E matoatoa te aeka ni maiu aei. Korakoram n te tai ae uarereke ae kai bua e aki kona ni kabotauaki ma korakoran mwaakan te Tia Kamaiu ni kakorakora tamneim.¹³

Ana Boki Moomon e reirei bwa Iesu Kristo e na “katoka i aona” marakira, aorakira, ao mamaarara bwa E na buokira.¹⁴ Ko na kanga ni karekea te korakora are e anga Iesu Kristo ni buokiko ao ni kakorakorako n taai ni karawawata? E reke mani kabaeakim nakon te Tia Kamaiu mani kawakinan berita aika a tabu ake ko karaoi ma Ngaia. Ti karaoi berita aikai tabu ngkai ti karekei taian otenanti n te nakoanibonga.¹⁵

Ana aomata Aramwa a rin inanon te berita ae tabu n te bwabetito. Imwina a karawawataaki n te tautaekanaki ao a tabuaki bwa a na nebonebo ibuakoia te koraki ke n tataro ni kabaibati. E ngae n anne a bon kawakin naba aia berita n aia kabanea n tamaroa n tataro ni kainabwaabu inanoia. N tokina, e roko mwaakan karawa. “E kakorakoraiia te Uea bwa a na kona n uota uotaia ma te beebete.”¹⁶

Inanon ara bong, te Tia Kamaiu e kaoira, “Tanimai nakoiu n ami iango n taai nako; tai nanououa, tai maaku.”¹⁷ Ngkana ti kawakini ara berita n te toa n uringnga n tainako, E berita bwa e na memena Tamneina iroura. Te Tamnei e anganiira te korakora n teimatoa inanon te kataaki ao ni karaoi bwaai ake ti aki kona ni karaoi i bon iroura. Te Tamnei e kona ni kamarurungiira, n aron are e reirei Beretitenti James E. Faust, “Tabeua man kamarurung a kona n riki n te aonaaba teuana.”¹⁸

Ti kakabwaiaki naba ni berita aika tabu ao otenanti n te tembora, are “e kaotaki iai te mwaaka n atua.”¹⁹ I kawara te aine ae e bua natina n te kabuanibwai, imwiina e a manga motirawa kainnabana n te kaentia. I titiraki bwa e kanga n teimatoa n te bua ao te karawawataaki are e rinanona. E kaeka bwa e reke korakorana man te koaua ae karaunano bwa akea tokin ana utu are e karekea man ana nebonebo n te tembora. N aron are e taekinaki n te berita, taian otenanti n ana auti te Uea a tia n otanganna ni mwaakan te Atua.²⁰

Te kaua, rineia bwa ko na karekea te kimwareirei ni katoabong. Naake a korakai n angiin te tai a namakinna bwa e reitinako te tairiki, ao akea ootan te ngaina. E bon RAOIROI te tang.²¹ Ma, ngkana ko kunea bwa ko mena n roon te karawawataaki, man rineakin te onimaki ko konaa ni uti ni kimwareirei n ootan te ingabong.²²

Te katooto, I kawara te tina ae te kairake ngke e bwainaoraki ibukin te kaentia, e moangare iaon ana kaintekateka e ngae ngke e maraki ao akea irana. I kaitibo ma taanga aika a kani kara bwa a beku ma te kukurei bwa taan kairiiri irouia te roronrikirake e ngae ngke a tuai mani kariki. I tekateka ma te aine ae tangiraki—te tibu ae ataei, te tina, ao te kainnaba—ae e nang mate inanon tabebong; ma ibuakon te rannimata bon te ngare ao te kukurei.

Korakaia Aika Itiaki aikai a kaota te bwai are e a tia n reirei iaona Beretitenti Russell M. Nelson:

“Te kimwareirei ae ti namakinna e uarereke nakon karaoana ma aroaron maiura ao bwaai ni kabane are e na karaoaki ma tarakin raoi maiura.

“Ngkana e kaineti maiura iaon ana babaire ni kamaiu te Atua … ao Iesu Kristo ao Ana Euangkerio, ti kona n namakina te kimwareirei n aki tabe ma bwai aika a na riki—ke akea ae riki—inanon maiura.”²³

I kakoaua²⁴ Tamara are i Karawa e uringiia ana aomata Aika Itiaki n rawawataia, e tangiri ngkami ao e atai korakaimi. Ara Tia Kamaiu e atai ami namakin. “E koaua bwa e a tia ni korakai ibukin kairuara, ma n uouoti rawawatara.”²⁵ I ataia—ngkai I karekea ni katoabong²⁶—bwa kawakinan berita aika a tabu boni kingin karekean mwaakan ana mwakuri ni kamaiu Iesu Kristo ni karekea te korakora ao te kimwareirei nakoia ake a karawawataaki.

Ibukimi aomata ni kabane ake kam karawawataaki, Au tataro, “Ke e anganingkami te Atua kabebetean uotami, rinanon ana kimwareirei Natina.”²⁷ N aran Iesu Kristo, amen.