Akea te Baam i Kireata?

Tabeua te tai imwin au mition, ngke ataein te reirei ngai n te Brigham Young University, I karekea te tareboon mairoun tamau. E tuangai bwa e reke irouna te kaentia n ana baenikuriti ao e ngae ngke e aki raoiroi angan reken buokana, e bon kamatoa bwa e na bon kamaiuki ao n okira aron waakin maiuna. Rokon te tareboon bon te tai ae I rootaki iai. Tamau e a tia n riki bwa au bitiobi, raoraou, ao au aetuwatia. Tinau, tariu ma mwaneu, ao Ngai ti iangoa kanoan taai aika a na roko, ao e taraa n akea te kantaninga iai. Tariu ae uarereke Dave, e mwakuri ni mitinare i New York ao E reita te marooro aei man ana tabo ae raroa iaon te kangaanga ae riki aei.

Te tia mwakuri n te onaoraki n te tai anne e anga ana iango bwa e riai te korokoro ni katoka butinakon te kaentia. Ara utu a karaoa te aki mamatam ni koaua, ibukin te kakai. I namakinna bwa e mwaiti ara onimaki bwa tamau e na bon kamaiuaki. Imwain te korokoro, tariu ae ikawai, Norm, ao ngai ti angan tamara te kakabwaia. Ma ara onimaki are ti ikoti, ti tataro bwa e na bon kamaiuaki.

Te korokoro e baireaki bwa e na anaa te aoa ae mwaitina, ma imwin te tai ae uarereke, e roko te taokita bwa e na marooro ma ara utu n te tabo n tataninga. E tuangiira bwa ngke e moanaki te korokoro, a kona n nooria bwa te kaentia e a maenako rinanon rabwatan tamara. N aron aia katautau, tamau ai bon tii tabeua ana namwakaina ni maiu. Ti bon taonaki n te rawawata.

Ngke e a uti tamau imwin te korokoro, e ingainga ni kan ataia ngkana e nakoraoi waakin te korokoro. Ti tibwaia ma ngaia te rongorongo ae kakuba.

Ti reitinako n aki mamatam ao n tataro ibukin te kakai. Ngke e waekoa ni keerikaki marurungin tamau, ti moana ara tataro bwa e na akea marakina. E ngae ngke, e aki raoiroi marurungina, ti bubutia te Uea bwa e na waekoa n anaaki. Tabeua namwakaina imwiin te korokoro, n aron kaman tuangakira iroun te tia korokoro, e a motirawa tamau.

Kaain te uoote ao ara utu ma raoraora a kaota te tangira ae bati ao tabeakinaia ara utu. Ara taunimate e rang tamaroa ni karineakin maiun tamau. Ngke e waakinako te tai, ao ngkai, au utu ao ngai ti moana n rinanon te maraki n akean tamau, ao I moanna n iango bwa bukin tera e aki kamaiuaki. I iangoia ngkana e aki bati n tau au onimaki. Bukin tera tabeua utu a karekea te kakai, ma ara utu e aki? I a tia n reiakinna n au mition bwa na rairaki nakon koroboki aika tabu ibukin te kaeka, ngaia are I a moana au kakae ni koroboki aika a tabu.

Te O Tetemanti e reirei iaon te baa ae renganaki ke te kabirate ae kabonganaki ni kamaoan te ikoaki, are e karaoaki man te aroka are e maiu i Kireata. N tain te O Tetemanti, te baa aei e kinaaki bwa te “baam mai Kireata.”¹ Te burabeti ae Ieremia e rotaki n te rawawata iaon kangaanga ake e nooria ibukoia ana aomata ao e kantaninga ibukin te kamaiuaki. E titiraki Ieremia, “Akea te baam i Kireata; akea te tia katoki aoraki iai?”² Rinanon reirei, katangitang, ao te korobanna, te Tia Kamaiu Iesu Kristo e aki toki n taetae iaon te Baam mai Kireata ibukin raoiroin mwaakana ni kamaiu. Ai aron Ieremia, I bon iangoia, “Akea te baam i Kireata ibukin ana utu Nielson?”

Ni Mareko mwakoro 2 n te Nu Tetemanti, ti noria bwa e mena te Tia Kamaiu i Kaberenaum. E butanako mwaakan ana kamaiu te Tia Kamaiu ni kabutaa te aba, ao a mwaiti aomata ake a mwananga nako Kaberenaum ni kan kamaiuaki iroun te Tia Kamaiu. A rang mwaiti ake a ikotaki itinanikun te auti are e mena iai te Tia Kamaiu bwa e a aki tau te tabo ibukiia ni kabane. Aman mwaane a uota te mwaane ae nakibaina ni kan kamaiuaki iroun te Tia Kamaiu. E aki reke kawaia rinanoia te koraki, ngaia are a ieta raun te auti ike e mena iaana te Tia Kamaiu ao ni karuao rikaaki te mwaane arei nako aontano.

Ngke I wareka te rongorongo aei, I bon miimi man te bwai ae taekinna te Tia Kamaiu ngke e kaitibo ma te mwaane aei: “Natiu a kabwaraki am bure. ”³ I taku bwa ngke ngai temanna mai irouia aman mwaane ake a uota te mwaane aei, N na bon taetae nakon te Tia Kamaiu, “Ni koauana ti uota teuaei bwa e na kamaiuaki.” I taku bwa te Tia Kamaiu e na bon kaeka, “I a tia ni kamaiua.” Tao e reke ae I aki rangi ni mataata—bwa mwaakan Ana kamaiu te Tia Kamaiu bon tiaki ti konabwaina ni kamarurunga te rabwata ma, ae tao e kakawaki riki, Ana konabwai ni kamarurunga nanora ao uruakin nanoia au utu?

Te Tia Kamaiu e anga te reirei ae kakawakin rinanon te taneiai aei ngkai E bon kamarurunga rabwatan te mwaane aei. E mataata irou are Ana rongorongo E bon konaa n riingi mataia koraki ake a mataki ao a na nooraba. E konaa n riingi taningaia ake a bonotaninga ao a na ongo. E kona n riingi waeiia ake aki kona n nakonako ao a na nakonako. E konaa ni kamarurungi matara ao taningara ao waera, ma ae kakawaki riki iaon bwaai ni kabane, E konaa ni kamarurungi nanora ngkai E kaitiakiira man ara bure ao ni buokiira n kekeiaki inanon kangaangan kataakira.

Ngke te Tia Kamaiu e kaoti nakoia aomata n Ana Boki Moomon imwin Mangautina. E a manga taetae iaon Mwaakana ni kamaiu. Nibwaite a ongo Bwanaana mai karawa n taku, “Kam aki okirai ngkai, ma n rairinanomi man ami bure, ma n rairaki, bwa I aonga ni kamarurungngkami?”⁴ Imwiina, te Tia Kamaiu e reirei, “Ma kam na aki toki n ibuobuoki nakon ae aekan aei; bwa kam aki ataa te tai are ana rairaki iai man rairananoia, ma ni kawarai ma nanoia ni kabane, ao N na katoka aorakiia.”⁵ Te Tia Kamaiu e aki taekina te kamaiu n rabwata ma bon kamaiuan tamneia.

Moroni e uota reitan te oota ngke e tibwauai ana taeka tamana, ae Moomon. Imwiin taekinan taian kakai, Moomon e kabwarabwara, “Ao e a tia n taku Kristo: Ngkana iai onimakinau iroumi ao e na reke iroumi te mwaaka ni karaoa te bwai are kam tangiria iroou.”⁶ I reiakinna are oin au onimaki bon Iesu Kristo, ao I riai ni kariaia bwa tera ae riai Ibukina ngkai I kamwakura au onimaki Irouna. I oota are motirawan tamau e bon riai n ana baire te Atua. Ngkai, ngke I katokai baiu iaon atuun temanna ni kakabwaia, au onimaki bon iroun Iesu Kristo, n oota bwa te aomata anne e konaa ao e na kamarurungaki n rabwata, ngkana e bon riai iroun Kristo.

Ana Mwakuri ni Kamaiu te Tia Kamaiu, are e kangaraoi mwaaka aika uoua ni kaboakira ao mwaakana n anga te konabwai, bon te kabanea n rietaata ni kakabwaia are e anga Iesu Kristo nakoia aomata ni kabane. Ngkana ti rairinanora ma nanora ae bwanin, te Tia Kamaiu e kaitiakiira man ara bure. Ngkana ti kukurei ni uota ara kantaninga nakon te Tama, riki inanon kangaangan ni baika a riki, te Tia Kamaiu e na tabekii rawawatara ni kabebetei.⁷

Ma aio bon te reirei ae korakora ae I reiakinna. I a tia ni kaairua ni kakoaua are mwaakan ana kamaiu te Tia Kamaiu e aki mwakuri ibukin au utu. Ngkai I a tia tanrikaaki ma matau aika mwaatai, I nooria are mwaakan ana kamaiu te Tia Kamaiu bon te kakoaua inanon maiuiia au utu n tatabemaniia. I bon tii taratara iaon te kamaiu n rabwata are I a kabwaka iai n tarai taian kakai ake a riki. Te Uea e kakorakora ao n angan tinau rakan ana konabwai are e na karekea i bon irouna rinanon kangaangan te kataaki, ao e anganaki abwakin ao rikiraken maiuna. E karekea te reitaki ae tamaroan iaoia natina ao tibuna. Te Uea e kakabwaiaai ao tariu ma mwaneu ma te tangira, katiteuanaaki, onimaki, ao ni kona ni kai oki are e a riki bwa mwakoron maiura ae kakawaki ao n reitinako n te bong aei.

Ma teraa aron tamau? N aroia ake a rairananona, e na kamaiuaki n tamneina ngkai e ukora ao ni karekea te kakabwaia ake a tauraoi nakoia ni kabane man Ana Mwakuri ni Kamaiu te Tia Kamaiu. E karekea kabwaraan anabure ao ngkai e a tataningaa te kakai n te Mangauti. E reirei te Abotoro Bauro, “Ba aroia aomata ngkai a bane ni mate iroun Atam, ao ai aroia naba ba a na bane ni kamaiuaki iroun Kristo.”⁸ Ko nooria, I taku nakon te Tia Kamaiu, “Ti uota tamau Nakoim bwa e na kamaiuaki,” ao e a mataata ngkai irou bwa te Tia Kamaiu e kamaiua. Te baam mai Kireata e a tia ni buokiia te utu ae Nielson—tiaki n te kawai are ti kantaningaia, ma n te kawai riki ae raka kakawakina are ti a tia ni kakabwaiaaki ao n reitinako ni kakabwaiai maiura.

N Ioane mwakoro 6 n te Nu Tetemanti, te Tia Kamaiu e karaoi moan kamiimi n te kakai. N tii tabeua ika ao tabeua kariki te Tia Kamaiu e kamwarakeia 5,000 aomata. I a tia ni wareka te rongorongo anne ni mwaitin te tai, ma iai mwakoron te taneiai anne ae I riaoia are ngkai iai nanona irou ae korakora. Imwiina ngke te Tia Kamaiu e a tia ni kamwarekeia 5,000, E tuangiia Ana reirei n ikotii nikiran mwakorokoro ake a nikirana, ake a kaona 12 batiketi. I miimi bwa bukin tera te Tia Kamaiu e karaoa anne. E a tia n riki ni mataata irou bwa teuana te reirei are ti na konaa n reiakinna man te tai anne bon aei: E kona ni kamwarakeia 5,000 ao iai nikiraia. “E tau au akoi ibukiia aomata ni kabane.”⁹ Mwaakan te kabomwi ao ana mwakur ni kamaiu te Tia Kamaiu e kona ni kaitiaki buure, ikoaki, ke kataaki—n aki taraaki bwa buburara ao kangaangara—ao a na bon iai nikiraia. E tau Ana akoi.

Ma te atatai anne, ti a kona ni waaki rake ma te onimaki, n ataakina bwa ngkana e roko taai ni kangaanga—ao ana bon roko—ke ngkana te bure e ramwanei maiura, te Tia Kamaiu e tei ma “te kamaiu ni baina ni kiba,”¹⁰ ni kaoira bwa ti na Nakoina.

I kaota au kakoaua nakoimi n te baam mai Kireata, te Tia Kamaiu Iesu Kristo, ara Tia Kabooira, ao Mwaakana ni kamaiu ae raka tamaroana. I kaota au kakoaua ni Kukurein nanona ni kamaiuko. N aran Iesu Kristo, amen.