Te Aro n Tau Bon Tiaki ae A Na Akea Barekam

I kanakoa n te taina au rongorongo nakon natiu te aine ao buuna ni bwanaau iaon au tareboon. I taku, “Ei ngkami uoman. I rang n tangiri ngkami.” A karekea, “I ribai ngkami uoman. I riai n tangiri ngkami.” E aki kamimi beebeten te rongorongo ae ko kan taekinna ni kona ni kairiruaaki? Aio te bwai ae ririki n tabetai ma ana rongorongo te Atua iaon te rairannano ao arom n tau.

Tabeman a kairua ni karekea bwa te rairannano ao te bitaki aki kakaawaki. Ana rongorongo te Atua a bon kakaawaki.¹ Ma tiaki te Atua e tangiriira n aki tarai kabwakara? Eng! E tangiriira n te aro ae kororaoi. I tangiriia tibu, aika aki kororaoi, ma ti aki nanona bwa I aki tangiriia bwa a na rikirake ao ni karekei aroia ni kabane ake a kona ni karekei. Te Atua e tangiriira n ae boni ngaira, ma E rangi ni korakora ana tangiriira ibukira bwa E na katikuira n te aro aei.² Te rikirake inanon te Uea bon anne ae e nanonaki n te maiu ae mamate.³ Te bitaki bon anne aan ni kabane ana Mwakuri ni Kamaiu Kristo. Kristo e aki ti kona ni kautiko, kaitiakaki, karaunano, ao ni kamarurungiira, ma rinanon aikai ni kabane, E kona ni bitiira bwa ti na riki n Ai Arona.⁴

Tabeman a karekea te rongorongo bwa te rairannano bon te bwai ae karaoaki tii tetaina. Ana rongorongo te Atua, bon are e a tia n reiakina Beretitenti Russell M. Nelson, “Te rairannano … bon te bwai ae na reitinako karaoana.”⁵ Te rairannano e na anaa te tai ae maan ao te kekeiaki ae teimatoa,⁶ ngaia are kiitanan te bure⁷ ao karekean “te aro are akea te nano ni kan karaoa ae buakaka, ma n teimatoa ni karaoa ae raoiroi”⁸ bon baika ti uaiakin inanon maiura.⁹

Te maiu kanga ai aron te mwananga ae abwabwaki. Ti aki kona n roko n tokin kawaira iaon ti teuana te tangke ni bwaa. Ti riai ni kakanoa te tangke n taainako. Anaakin te toa bon aekakin te tei n te tabo ni bwaa. Ngkai ti rairi nanora ao ni kaboui ara berita aika a tabu, ti berita ma nanora bwa tina kawakin tua, ao te Atua ao Kristo a na kakabwaiaira ma te Tamnei ae Raoiroi.¹⁰ Ni kauarerekeana, ti berita bwa ti na waaki nako iaon kawaira, ao te Atua ao Kristo a berita bwa a na kakamwarakei tamneira.

Tabeman a kairua ni karekea te rongorongo are a aki tau n irii waakin nako te euangkerio ibukina bwa a tuai ni kabanei ni kanakoi anua aika a buakaka. Ana rongorongo te Atua bwa te kororaoi bon tiaki ae a na akea barekam.¹¹ Te kororaoi bon kakaraoan te kokoaua ao te kekeiaki. Ti riai ni kokoaua ma te Atua, taan kairiiri n te nakoanibonga, ao tabeman ake a tangiriira,¹² ao ti riai ni kataia ni kawakin ana tua te Atua ao n aki bwarannano ibukina bwa ti karaoi buure.¹³ Unimwaane Bruce C. Hafen e taku bwa karikirakean anuan Kristo “e kainnanoa te taotaonaki n nano ao te teimatoa riki nakon are e kainnanoia ae a na akea barekam.”¹⁴ E a tia n taekinna te Uea bwa te bwaintangira n te Tamnei e anganako “ibukin kabwaiaia naake a tangirai ao a kawakini au tua ni kabane, ao naake a ukoukoria ni karaoia.”¹⁵

Temanna te ataeinimwane are I a aranna bwa Damon e koroboki: “Ngke I rikirake, iai au kangaanga ni matakuakinan tamnei aika buakaka. N tainako I namakina te mama n te aro are I aki kona n ataa arou ae riai.” Ni katoa te tai are e kairua iai Damon, e namakina korakoran te bwarannano, n te aro are e motika taekana bwa e aki tau ibukin te nanoangaaki, kabwaraaki ana bure, ke n anganaki riki ana tai mairoun te Atua. E taku: “I baireia bwa I a bon butimwaea te namakin ae aki raoiroi ni katoa tai. Irou e a riribai te Atua ibukina bwa I aki tangiria ni mwakuri korakora n tokanikai iaon te kataaki aei n aki manga okiria. I kona ni waaki inano wiiki ao n tabetai inanon namwakaina, ma ngkanne I a manga kabwaka ao n iango, ‘I bon aki kona n tau, ngaia are tera bonganan ae N na kataia?’”

N te tai teuana ngke e bwara nanon, e taku Damon nakon ana tia kairiiri n te nakoanibonga: “Tao n nang aki manga roko n te taromauri. I a kua n riki bwa te bwaretaio.”

Ana tia kairiiri e kaeka: “Tiaki ngkoe te bwaretaio ibukina bwa iai anuam aika a buakaka aika ko kataia ni katoki karaoaia. Ko bwaretaio ngkana ko karabai, kewe ibukina, ke ko kataia n tuangko bwa te Ekaretia iai ana kangaanga ibukin kateimatoan te kainibaire ae rietata. Arom ni kokoaua ibukin am mwakuri ao n toua te mwaneka ni waaki nako tiaki te bwaritaio. Bon te riki bwa ana reirei.”¹⁶ Te tia kairiiri aei e taekin ana taeka Unimwaane Richard G. Scott, are e reirei: “Te Uea e tara te mamaara n ae kaokoro ma are E nooria n te kakaitara. … Ngkana e taekina te uea te mamaara, e airi n tainako ma te nanoanga.”¹⁷

Te taratara anne e angan Damon te ungannano. E a ataia bwa te Atua e aki mena ikekei ni kangai, “Damon e a manga kabwaka naba.” Irarikin anne, E bae ni kangai, “Taraia bwa tera ae e a tia ni karaoia Damon ibukin nakoraoin maiuna.” Te ataeinimwane aei n tokina e katoka tebobaraaki ma te mama ke ni kakaai aanga ni kamanoa ao ni kakataunaari. E tararake ibukin buokana mai karawa, ao e karekea.¹⁸

E taku Damon, “Ti teuana te tai ae I rairaki iai nakon te Atua n taai aika a nako bwa I bubuti kabwaraan au bure, ma ngkai I bubuti naba ibukin ana nanoanga— ‘Mwaakana ni kamarurung.’[Bible Dictionary, “Grace”]. I tuai kakaraoa anne mai imwaina. N te tai aei, I a aki kabanea au tai n riribai ibukin te bwai are I a tia ni karaoia ma iaon riki tangiran Iesu ibukin te bwai are e a tia ni karaoia.”

Ni iangoana bwa ai maanra Damon ni korakai, e aki rangi n ibuobuoki ao n riai irouia kaaro ao taan kairiiri ake a buokia ni kangai, “tai manga karaoia riki” n rangi ni waekoa ke ni katei kainibaire ake a na iangoaki bwa a “tau.” Irarikina, a waaki ma kouru aika uarereke, aika a kakai koro bukiia. A kakeai bwaai ake e kabwaka iai te aomata ao a taraa riki aron te rikirake ae teimatoa, are e a kona iai Damon ni kateitei iaon bwaai aika e nakoraoi iai ma tiaki kabwakana.¹⁹ Ngaia, n ai aroia ana aomata Rimwaai ake a tautoronaki, a reiakinna bwa a kona n “rikirake teutana imwiin teutana.”²⁰

Unimwaane D. Todd Christofferson e reirei: “Ni kaitaraan bwaai aika a [rang] bubura, ti riai ni mwakuriia n ae uarereke, teutana ni katoabongiia. … Kai irekerekean anua aika a boou ke te tokanikai iaon anua aika bubuaka ke anua aika kareke [n angiin te tai] e nanonaki bwa te kekeiaki n te bong aei n rimwiaki n teuana riki ningabong ao are imwiina, tao ibukin boong aika a mwaiti, ao bon namwakaina ma ririki. … Ma ti kona ni karaoia ibukina bwa ti kona ni bubuti nakon te Atua … ibukin te ibuobuoki are ti kainnanoia ni katoa bong.”²¹

N te tai aei, tariu ao mwaneu, te butinaoraki n te COVID-19 tiaki te bwai ae beebete irouia aomata nako, ma te kaokoroaki n irekereke ma matoan te tauraroa e a tia n rang kangaanga ni maiuia naake a ininimaki ma anua aika buakaka. Uringnga e kona n reke te bitaki, te rairannano bon te mwakuri ae reitinako, ao te kororaoi tiaki ae a na akea barekam. Ae kakaawaki riki, uringnga bwa te Atua ao Kristo a rang tatauraoi n buokiira n te tai ae waekoa.²²

Tabeman a kairua ni karekean te rongorongo are te Atua e tataninga ni ibuobuoki imwiin are ti rairi nanora. Ana rongorongo te Atua bwa E na buokiira ngkai ti rairi nanora. Ana akoi e tauraoi ibukira ni kabane “n aki taraia bwa ti mena iaa ni kawain te ongeaba.”²³ Unimwaane Dieter F. Uchtdorf e taekinna: “Te Atua e aki kainnanoia aomata aika akea barekaia. E ukoukoriia naake a anga ‘nanoia ao aia ingo ae tatauraoi’ [Reirei ao Berita aika Tabu 64:34], ao E na ‘kakororaoia inanon Kristo’ [Moronaai 10:32–33].”²⁴

A rang mwaiti aika a tia ni maraki man uruakin ao kaiangatoa n aia reitaki are e a kangaanga irouia bwa a na kakoaua ana nanoanga te Atua ao ana taotaonakinnano. Iai aia kanganga n noora te Atua n arona—ae te Karo ae tangira are e katoki kainnanora²⁵ ao e ata aron te “anga bwaai aika a raoiroi nakoia ake a bubutiia.”²⁶ Ana akoi tiaki te kanuanga ibukiia aika a tau. Bon te “ibuobuoki mai karawa” ae E anga are e na buokiira ni kona n tau. Bon tiaki te kanuanga nakoia aika raraoi. Bon te “korakoran n te entaumente” are E anga are e buokiira ni kona n raoiroi.²⁷ Ti aki ti nakonako ni kaineta te Atua ao Kristo. Ti nakonako ma Ngaiia.²⁸

Ni kabuta te Ekaretia, aomata aika kairake a tataekina aia Botoniango Ataeinnaine ao te Kooram n te Nakoanibonga ae te Aaron. Mai New Zealand nako Spain nako Ethiopia nako Japan, ataeinnaine a kangai, “I kawakina te bwaintituaraoi ibukin te rairannano.” Mai Chile nako Guatemala nako Moroni, Utah, ataeinimwaane a kangai, “Ngkai I kekeiaki ni beku, ni kamwakura te onimaki, n rairannano, ao n rikirake ni katoa bong, N na kona n tau ni karekei kakabwaia n te tembora ao te kimwareirei n teimatoa n te euangkerio.”

I berita bwa kakabwaia ao kimwareirei akanne a koaua e kona n reke irouia naake a kawakin tuua ni kabane ao “naake a ukoukoria ni karaoia.”²⁹ Ngkana ko namakinna bwa ko kabwaka n taai aika mwaiti n am kekeiaki, uringa Ana Mwakuri ni Kamaiu Kristo ao ana akoi a karikia bwa ko bon konabwai.³⁰ “Baina ao [ana] nanoanga a aroraki nako imi.”^{” 31} Kam tangiraki—n te bong aei, inanon 20 te ririki, ao n aki toki. N aran Iesu Kristo, amen.