Ana Tangira te Atua: Te Kabanea ni Kakukurei nakon te Tamnei
E aki reke ana tangira te Atua ni baike a riki nanon maiura, ma i nanon maekana inanon maiura.
Tariu ao mwaaneu, kam ataia bwa mwaitira ana tangira te Atua, Tamara are i Karawa, ibukimi? Kam a tia n namakina Ana tangira i nanomi?
Ngkana kam ataia ao ni mataata bwa bwaninra tangirakim ngkai bon natin te Atua ngkami, e na bitii bwaai ni kabane. E bita aron am namakin n taraakin oin maium ngkana ko kairua. E bita am taratara ngkana iai kangaanga. E bita am taratara n ana tua te Atua. E bita am taratara nakoia aomata ao am konabwai ni karaoa te bitaki.
E reirei Unimwaane Jeffrey R. Holland: “Te moan tua ae moan te korakora ni kabane ae akea tokina bon tangiran te Atua ni kabane nanora ara iango, ao korakorara—anne te moan tua ae korakora Ma te moan koaua ae korakora ni kabane ae akea tokina bwa te Atua e tangiri ra ma Nanona ana iango, ao korakorana.”1
Ti na kanga n ataia i nanora bwa aio bon te koaua ae akea tokina?
E kaotaki nakon te burabeti ae Nibwaai rinanon te mii kakoaua ibukin ana tangira te Atua. Ngke e tabe n taraa te kai ni kamaiu, e bubuti Nibwaai bwa e kan ataa nanona. Ni kaekaana, te anera e kaota nakon Nibwaai te kaawa, te tina, ao natina. Ngke Nibwaai e taraa te kaawa ae Natareta ao te tina ae e itiaki ae Maria, are e tobwaa natina ae Iesu, e taku te anera “Nora ana tibutetei te Atua, eang, bon Natin te Tama ae Akea Tokina!”2
N te tai ae tabu aei, e ataia Nibwaai bwa bungiakin te Tia Kamaiu, bon kaotan ana tangira te Atua ae e itiaki. Ana tangira te Atua, e kakoaua Nibwaai “e rababa nako nako nanoia natiia aomata.”3
Ti kona n katamneia ana tangira te Atua bwa te oota man te kai ni kamaiu, are e ootanako nakon te aonaba nako nanoia natiia aomata. Ootan te Atua ao Ana tangira a ootanako man Ana karikibwai ni kabane.4
N tabetai e kairua ara iango are ti taku bwa e na tii kona n reke namakinan ana tangira te Atua imwiin iriirakin te kai te biti ao ni kana uaan te kai ni kamaiu. Ana tangira te Atua, e aki tii reke irouia naake a nakon te kai ni kamaiu ma bon te korakora are e kaungaira bwa ti na ukoukora te kai ni kamaiu anne.
Eng boni ngaia te bwai ae moamoa tangirana nakon tangiran bwaai ni kabane“,” e taku Nibwaai, ao e taku te anera, “Eng, ao bon te bwai ae moan baan te kakukurei nakon te tamnei.”5
Uabwi te ririki n nako, temanna kaain au utu e kitana te Ekaretia. E bati ana titiraki ae e aki reke kaekaaia. Kainnabana, te membwa ae boou, e teimatoa n ana onimaki. A mwakuri korakora bwa e na teimatoa aia mare i nanon waaki aika a kakaorkoro ake a kaoti.
N te ririki ae e nako e korei teniua ana titiraki ibukin te Ekaretia are e matoatoa bwa e na nanoraoi iai ao e kanakoi nakoia uataanga ake bon raoraona inanon tabeua te ririki. E kaoiia bwa a na karaua n iangoi titiraki aikai ao ni kawaria bwa a na katairiki ma ngaiia n tibwai aia iango i aona.
I mwin rokoia raoraona aikai, e nakon ana ruu bwa iai ana mwakuri ae e na karaoia. Taian marooro ao te tangira are e namakinna mai irouia raorana e tei n ana iango. E koreia imwiina bwa e kairoroaki bwa e na katoka ana mwakuri. E taku: “Te ota ae korakora e kaonrakea nanou. … I a tia ni kakarekea te aeka n namakin aei, ma n te tai aei ao e tabe n rikirake ao akea kabotauana ao e tiku irou i nanon tabeua te miniti. I karauai n tekateka ma au namakin aei, are I a oota iai bwa te namakin aei bon kaotan ana tangira te Atua i bukiu. … E roko irou te iango ae e tuangai bwa I kona n oki rikaki nakon te ekaretia ao ni kaota tangiran te Atua ni baike i karaoi ikekei.”
Ao e karaua n iangoi ana titiraki. Te namakinna are e roko irouna bwa te Atua e karinei ana titiraki, ao aki reken kamaatata ni kaekaan titiraki e aki tukia man karaon are imwiina.6 E riai ni tibaua ana tangira te Atua nakoia aomata i nanon ana tai ni iango. Ngke e karaoa nanon te wirikiriki aei, e namakina te reitaki ae onoti nakon Iotebwa Timiti, are e taku i mwin te Moan Kaotioti, “E onrake tamneiu n te tangira, ao i nanon bong aika a mwaiti e korakora kimwareireiu.”7
E kakukurei, bwa tabeua te namwakaina i mwina, e karekea te nakoa are e a tia n taua 20 te ririki n nako. Ngke e moan karekea te nakoa aei, e karaoi tibwangana n ai aron te membwa ae e kakaonimaki. Ma n te tai aei ao e a bitaki te titiraki ae kangai “N na kanga ni kaokaonimaki i nanon tibwangau?” nakon “N na kanga ni kaota ana tangira te Atua i nanon au mwakuri?” N te biri ae boou aei, e namakina iai te kimwareirei,te uaana, ao te bongana i nanon karaoan tibwangana.
Mwaneu ao tariu, ti na kangaa ni karekea mwaakan Ana tangira ni bitaki te Atua? E kaoira te burabeti Moomon bwa ti na, “tataro nakon te Tama ma korakoran nanora ni kabane, bwa ti na kaonaki n te tangira aio, are e a tia ni katoka i aoia ni kabane ake taan irira Natina, are Iesu Kristo.”8 E aki ti kaoira Moomon bwa ti na tataro bwa ti aonga n namakina ana tangira te Atua ibukia aomata ma ti na tataro bwa ti aonga n ataa ana tangira ae e itiaki te Atua ibukira9
Ngkai ti karekea ana tangira, ti kunea te kimwareirei ae korakora ngkai ti kekeiaki n tangira ao ni beku n aron are E karaoia, n riki bwa “taan iriira Natina, Iesu Kristo.”10
E aki reke ana tangira te Atua ni baike a riki i nanon maiura, ma i nanon maekana i nanon maiura. Ti ataa Ana tangira ngkana ti karekea te korakora ae riaon are mai iroura ao ngkana Tanmeira e uota te rau, te mweeraoi, ao kairakira. Iai tabetai ae e kangaanga namakinan Ana tangira. Ti kona n tataro bwa a na kaukaki matara n nora Baina inanon maiura ao n nora Ana tangira n tamaroan Ana karikibwai.
Ngkai ti karaua n iangoa kamaiun te Tia Kamaiu ao Ana anga karea ae akea tiana, ti na nora Ana tangira ibukira. Ti anenea are e koreia Eliza R. Snow: “E wawanako rarana; E anga maiuna.”11 Ana nanorinano i nanon te karawawata ibukira e ruo nakon tamneira, e kauki nanora bwa ti na ukora kabwaran ara bure mai Irouna ao e anganira te nano ni karaoa are E karaoia.12
E taku Beretitenti Nelson, “Kabatian ara kakamwakuri n maiuna aron Maiuna, e na karekea riki itiakin ao tabun riki ara tangira.”13
E taekinna natira te mwaane: “Ngke 11 au ririki, ngai ma raoraou ti motikia bwa ti na karabaira mairoun ara tia reirei n aki ira iteran ara kiraati n te buraimwari. Ngke ti a roko n tokina ikekei, ni mimiira, e kamaurira te tia reirei ma te moangare. Ao e karaoa ana tataro are e kaota iai ana kakaitau nakon te Uea ngkai ti a tia ni kabongana inaomatara n rinerine bwa ti nang kaea ara kiraati n te bong anne n oin nanora I aki uringa bwa tera te reirei ke antai aran ara tia reirei n te tai anne, ma tenibwi te ririki i mwina, I teimatoa n namakina te tangira ae kororaoi are e kaotia nakoiu n te bong anne.”
Nimaua te ririki n nako, I nora bannan te tangira ae tabu aei ngke I kawara te buraimwari i Rutia. I nora te aine ae kakaonimaki bwa e katorobubua i mataia uoman ataei ao ni kaota ana koaua nakoia bwa e boni ngae ngke tao tii ngaiia ni maiun te aonaba, e na bon mate naba Iesu ibukiia.
I kaota au koaua bwa ara Uea ma ara Tia Kamaiu e bon mate ibukira n tatabemanira. Bon kaotan Ana tangira ae akea tiana ibukira ao ibukin Tamana are i Karawa.
“I ataia bwa e maiu au Tia Kamaiu. O ti na boni kukurei! … E maiu bwa e na [kakabwaiaira] n Ana tangira.”14
Ti bia kaukii nanora ni butimwaea te tangira ae kororaoi are e katauraoia te Atua ibukira ao n tibwa nako te tangira anne ni baike ti karaoi. N aran Iesu Kristo ae tabu, amen.