Taian Kakai Man Ana Euangkerio Iesu Kristo
I ataia bwa Ana euangkerio e kona ni uota nakoira te kantaninga, te rau, ao te kimwareirei, tiaki tii ngkai, ma a na akea tokin kakabwaiakia tabeman inanon roro aika ana roko.
Mabuhay! I uota nakoimi te tangira ao moangareia ae abuee man tikauarereia aika Itiaki mai Biribin. Te ririki aio e bon koro raoi 60 te ririki ngke a moan roko taian mitinare n abamwakoron Biribin. N te bong aei, iai 23 te mition ao e raka iaon 800,000 membwa n te Ekaretia inanon 123 titeiki. Iai ngkai itiua Tembora aika a mwakuri, aika waaki karaoakiia, ke a tia n katanoataki. Aio bon te kakai ae koaua. Ti kakoauai koron bukin taetae ni burabeti n 2 Nibwaai 10:21: “Ma e korakora ana kakabwaia te Uea nakoia ake a mena iaon atimwakoron marawa.”
Te kakai aei are e kakoroaki nanona naba n taetae ni burabeti are e taekinaki inanon ana tataro Unimwaane Gordon B. Hinckley i Manila n te 1961. N te tataro anne, Unimwaane Hnickley e taekinna “Ti tabekarake Ana kakabwaia iaoia aomatan te aba aei, bwa ana iraorao ao ni mwamwannano ao n akoi ao n tatangira nakoia ake a roko ikai, ao ana mwaiti, eng, te Uea, ti tataro bwa ana rang [mwaiti,] ni mwaiti ngaa ake a karekea te rongorongo aei ao ibukin aei a na kakabwaiaki. Ana anganaki Ana kakabwaia ma ukin aia iango ao nanoia ae oota, ao ma te onimaki are ana karekea, ma te ninikoria ni maeka ma ana reirei te euangkerio” (American War Memorial Cemetery, Philippines, April 28, 1961).
E riaon mwaitin, ngaa ma ngaa aomata Aika Itiaki ni Boong aika Kaitira, te kakai man n te euangkerio e uota te bitaki ae tamaroa nakon te aba ao kaaina. Ngai te tia kakoaua ae maiu n aio. Onoua au ririki ngke au karo a kaaina te Ekaretia n atimwakoro ake i maiakin Mindanao. N taai akanne, bon tii teuana te mition n te aba ae bwanin, ao akea titeiki. Au kaitau ae akea tokina ibukin ninikoriaia au karo, ao aia taningamarau n ira te Tia Kamaiu. I karineia ao ni kabane taian bwaeoniia n te Ekaretia i Biribin. A tia ni karaoa te bwai ae tamaroa ibukiia rooro bwa ana kakabwaiaaki.
Te Uea ae Beniamina n Ana Boki Moomon e taku: “Ai moarara riki, I tangiria bwa kam na iangoa te kakabwaia ma te aro ni kukurei irouia ake a kaawakin ana tua te Atua. Bwa taraia, a kakabwaiaki ni bwaai ni kabane, n te maiu n rabwata ao n tamnei” (Motiaea 2:41).
Ngkai ti maiu ao n ongeaaba n reirein ao ana otenanti te euangkerio, ti kakabwaiaaki, bitaki, ao n rairaki n riki n ai aron Iesu Kristo. Anne kanga aron te euangkerio ni bita ao ni kakabwaiaia Aika Itiaki i Biribin, n reitaki ma au utu. Te euangkerio bon te kawai ae koaua nakon te kukurei, mwaitin te maiu.
Te moan tua n te euangkerio bon te onimaki iroun te Uea Iesu Kristo. A mwaiti kaain Biribin ake a reke aia koaua iroun te Atua. E bon beebete ibukira ni kakoaua Iesu Kristo ao n ataia are ti kona ni karekei kaekaakin ara tatato.
Te utu ae Obedoza bon te katooto ae korakora n aei. Te Tari Obedoza bon au beretitenti n au mwaanga ngke I ataeinimwaane. Te Tari ao Titita Obedoza ma nanoia ae korakora bon te kan kabaeaki nakoia aia utu n te Manila Tembora. A maeka i General Santoss n te Kaawa ae bubura, 1,000 te maaire (1,600 te kiromita) raroana mai Manila. Ibukiia ma ruaman aia utu, karaoakin te mwananga nakon te tembora e taraa ni kangaanga. Ma kanga ai aron te tia bobai are e nako ni kaboi nako ana bwa ni kabane ni kaboa teuana te momi ae bati boona (taraa Mataio 13:45–46), taanga aikai a baireia bwa a na kaboanakoa aia auti ibukin te mwananga. Titita Obedoza e raraoma ibukina a nang akea mweengaia are a na oki nako iai. Ma te Tari Obedoza e karaua nanon neiei bwa te Uea e na katauraoa te kawai ibukiia ni karekei kainnanoia.
A kabaeaki ma aia utu ibukin ngkai ao akea tokina inanon te tembora 1985. Inanon te tembora a kunea te kimwareirei ae akea kabotauana—aia momi akea boona. Ao te koaua nakon ana taeka te Tari Obedoza, e katauraoi bwaai te Uea. N okiia mai Manila, te akoi mairouia rao ake anganiia aia tabo ni maeka, ao e ngae n anne a bon karekea oin aia auti. Te Uea e tabeakinia koraki ake a kaota aia onimaki Irouna.
“Te kauoua n reirei n te euangkerio bon te rairannano. Te rairannano bon kararoaan te bure ao te rairaki nakon te Atua ibukin kabwaran buure. Bon bitakin te iango ao te nano. Beretitenti Russell M. Nelson e reirei, e bon “kona ni karaoaki ae tamaroa ni katoabong” (“Ti Kona ni Karaoa ae Tamaroa ao ni Katamaroaki Riki,” Riaona, Meei 2019, 67).
Te rairannano bon ti te arona ma te toobu. Ngkai te intinia n te kemikoro ae kairake, I mwakuri n te tabo ni karao toobu i Biribin. I reiakina aron karaoan te toobu ao karaoakina bwa e kanga ni mwakuri. Ngkana ko rengana te oera ma te alkali ao n ikotia ma te antibacteral, e na karika korakorana ni bwaai akanne are konaa ni kamaunai maan aoraki aika aki noraki ao manin aoraki. N aron te toobu, te rairannano bon te bwai ni kaitiaki. E anganiira ara tai ni kanakoi arora n aki itiaki ao ara bure ngkoa ao kaairuara, n te aro are ti na tau ni mena irarikin te Atua, ngkai akea te bwai ae “bareka ae kona ni karekea abanuean te [Atua]” (Aramwa 11:37
Rinanon te rairannano ti kabongana te kaitiakaki, ao ni kariaia mwaakan Iesu Kristo. Bon te kiing ni mwakoron waakin te rairaki. Aio te bwai ae riki nakoia tenaan Aentaai-Nibwaai-Riaai n Ana Boki Moomon. Ngaiia bon Reimwanaite ake a bon rairaki ni koaua a “aki manga bwaka“ (taraa Aramwa 23:6–8). A taunii aia bwai ni buaka iaan te tano ao a aki manga kabonganai ni buaka riki. A na mate moa nakon uruakan te berita anne. Ao a kariaia anne. Ti ataia bwa aia anganano e uota taian kakai, ngaa ake a kaitaraiia ni buaka a katukui aia bwai ni buaka iaontano ao a rairaki. Ririki imwina natiia mwaane, ake ti ataiia bwa taan buaka ake a korakora, a kamanoaki n tain te aitara ni buaka ae e kamiimi arona!
Au utu ao mwaitiia i Biribin Aika Itiaki a rinanon naba aei mwakurian te rairaki. Ngke ti kariaia ana euangkerio Iesu Kristo ao ni kaaina te Ekaretia, ti bitii ara kawai ao ara katei ni kaboraoira ma te euangkerio. Ti kanakoi katein rimoa ake a bure. I noora aio iroun tamau ngke e reiakina te euangkerio ao e rairananona. E bon rangin korakora mokona, ma e karenakoa ana tikareti ao e aki manga taua riki teuana. Ibukin ana babaire ni bitaki, aua te roro mai imwiina a tia ni kakabwaiaaki.
Te rairannano e kairiira bwa ti na karaoi ao ni kawakin berita rinanon otenanti aika tabu. Te moan otenanti ni kamaiu ao ni karietataaki bon te bwabetito ni kateboaki ian te ran ibukin kamaunaan buure. Te bwabetito e kariaia bwa ti na karekea ana bwaintangira te Tamnei ae Raoiroi ao n rin inanon te berita ae tabu ma te Uea. Ti kona ni kabooua te berita n te bwabetito ni katoa wiiki ngkana ti anaa te toa. Aio naba bon te kakai!
Tariu ao mwaneu, I kaoingkami bwa kam na karekea te kakai aei inanon maiumi. Nakomai nakon Iesu Kristo ao rineia ni kamwakura am onimaki Irouna rairananom ao karaoi man kawakin berita aika tabu ake a kuneaki inanon otenanti ni kamaiu ma te karietataaki. Aio are e na kabaeko ma Kristo ao ni karekea mwaakan ao kakabwaia n te aro n atua (taraa Reirei ao Berita aika Tabu 84:20
I Kakoaua bwa Iesu Kristo e bon koaua ao E maiu ao E tangiriira n tatabemanira nako. I ataia bwa Ana euangkerio e kona ni uota nakoira te kantaninga, te rau, ao te kimwareirei, tiaki tii ngkai, ma e na akea tokin kakabwaiakia aika Itiaki inanon roro aika ana roko. Anne bon bukin tikiraoin ao moangareia kaain te aro aika Itiaki i Biribin. Bon iai te kakai n ana euangkerio ao ana reirei Kristo. I kakoaua aei n arana ae tabu Iesu Kristo, amen.