I Akoaki Iroun te Uea n Au Bong ni Kabane
Ti na kanga ni mwakuri nakon karawawataakira? Iai namakinan te kakaitau ibukina bwa ti kabanea riki ara tai n tarai kakabwaiakira nakon ara kangaanga?
Butin te aoraki ae COVID-19 bon teuana mai buakon kangaanga ao kakaewenako are a kaitara ma ngaai natin te Atua n te aonaba aei. Ni moan te ririki aei, Ngai ao au utu ae tangiraki ti rotaki n te rawaawata ae bati. Te buti n aoraki aei e uota te mate ao te rawaawata nakon au utu ibukin buan maiuia kaain ara utu aika a tangiraki. E boni ngae ngke iai te bwai n aoraki, te aki mamatam, te tataro, te bwai ae riki i nanon nimaua te wiiki bwa a bua maiuia tariu Charly, mwaaneu Susy, ao butikau Jimmy n roko nakon iteran te roki.
N tabetai I titiraki bwa bukin tera e tang te Tia Kamaiu ngke e nora Maria ni korakai ibukin maten mwanena are, Rataro, riki ngke E bon ataia ae iai mwaakana ni kauta Rataro ao E na bon kabongana mwakaana ni kamaiua raoraona aei man te mate.1 I miimi n ana tangira ao ana nanoanga te Tia Kamaiu ibukin Maria; E ataa aron te maraki ae akea kabotauana are e namakinna Maria ngke e mate mwanena ae, Rataro.
Aio naba te namakin ae ti namakinna ngkai ti aikoa manga noria ara koraki aika bati n tangiraki iroura i nanon tabeua te tai. E korakora ana tangira te Tia Kamaiu i bukira. E aki kabuakakaira ibukin memeeren ara-taratara, ke aki taun ara atatai i aon te babaire ni kamaiu. Ma, E nanoangaira i nanon ara tai n nanokawaki ao n rawaawata.
Tamara are i Karawa ma Natina, Iesu Kristo, a tangiria bwa ti na karekea te kimwareirei.2 E reirei Beretitenti Nelson: “Te kimwareirei ae ti namakinna e aki reke man ara kangaanga ma e reke ibukina bwa e abwaabwaki ara taratara. Ngkana ti kabotoi maiura n ana babaire ni kamaiu te Atua, … ti kona n namakina te kukurei n aki tara tera are e riki—ke e aki riki—ni maiura.”3
Ngke I mitinare n au tai ni kairake, I uringa te mitinare ae tamaroa ma ni kakateke bwa e karekea te rongorongo ae kananokawaki. E mate tinana ao tarina ae uarereke n te kurati ae kananokawaki. E tuangaki iroun ana mataniwi bwa e kona n okira mwengana ibukin te taunimate. Ma, i mwin ana marooro ma tamana n te tareboon, e motikia te mitinare aei bwa e na tiku ni kabanea ana tai.
Tabeua te tai i mwina, ngke ti mwakuri n te aono ae tii teuana, ngai ma toau ti tareboniaki bwa; iai taan iraa aika a kimoaa ana bwatika te mitinare naba aei ao a kaikoakia n te biti. E mwananga ma toana nakon te o n aoraki are e uakaan, ao ngai ma toau ti nako ni kawariia. I nanon kawaira nakon te o n aoraki, I rangi n nanoanga te mitinare aei. Iangoia irou bwa e nang bwara nanona ao man te bwai are e rinanona aei, e nang bae n tangiria ni kan okira mwengana.
Ma, ngke ti roko n te o n aoraki, I nora te mitinare aei ae wene i aon te kainiwene, ao e tataninga rinna n te tabo ni korokoro—ao e moangare. I taku n au iango, “E kanga n riki ae e moangare ngkai e ikoaki?” Ngke e tiku ni kamarurungaki n te o n aoraki, e rangi ni marurung n anga boki aika uarereke ao Ana Boki Moomon nakoia tenaan taokita, neeti, ao tabeman aoraki. E ngae ngke e kataaki, e aki kan okira mwengana. Ao, e tiku ni beku ni karokoa ae e bane ana tai, ma te onimaki, te korakora, te marurung, ao te bekumwaaka.
I nanon Ana Boki Moomon, e taku Nibwaai, “I a tia n noori rawaawata aika a mwaiti i nanon au bong, e ngae n anne, e a tia n reke akoakiu ae bati iroun te Uea n au bong ni kabane.”4
I tarai kataakin Nibwaai aika a mwaiti, e bati ae e bon koreia n ana koroboki. Kataakina e katerea nakoira bwa ti bane n iai ara bong aika rang ni kangaanga. Teuana mai buakon kataaki aikai ngke Nibwaai e tuangaki bwa e na oki nako Ierutarem n anai bwaatua buraati are e mena i nanon bain Rabwan. Iai tarin Nibwaai aika a uarereke aia onimaki, iai naba te tai are a orea Nibwaai n te kai. Teuana naba kataakin Nibwaai ngke e mwaoto ana kai ni katebe ao e aki kona n reke kanaia ana utu. Imwin, ngke Nibwaai e a manga tuangaki bwa e na kabaa te kaibuke, a waningareia tarina ao a rawa ni buokia. N aki ongean aikai ao kataakina aika mwaiti are e kaitarai i nanon maiuna, E aki mwaninga Nibwaai ae e akoi te Atua.
Ngke a borau ana utu i taari ni bakatekea te aba ni berita, iai tarin Nibwaai ake a karaoa aia “waaki ni kakukurei n tain te mwananga,” a taetae n aki akaaka, a mwaninga are bon mwaakan te Uea are e a tia ni kawakiniia. Ngke e boaiia Nibwaai, a un irouna ngaia are a kabaea n te roobu n te aro are e a aki kona ni mwaing. E taekinaki n Ana Boki Moomon bwa tarina aikai a “karaoi mwakuri n iowaawa [nakoina]”; toun baina ma nimoimoin waena “a tibutaua, ao e rangi n korakora marakiia.”5 E rawaawata nanon Nibwaai ibukin matoatoan nanoia tarina’ ao n tabetai e taonnaki n te rawaawata.6 “E ngae n anne,” aio ana taeka, “I tararake nakon Atuau, ao I kabanea te bong n neboia; ao I aki ngurengure nakon te Uea ibukin au kangaanga.”7
Tariu ao mwaaneu, tera arora nakon karawawatakira? Ti ngurengure nakon te Uea ibukin rawawatara? Ke, ti ira bannan Nibwaai ao raou ni mitinare ngkoa, iai iroura te kakaitau n ara taetae, ara iango, ma ara mwakuri ibukina bwa ti kabanea riki ara tai n tarai kakabwaiakira nakon ara kangaanga?
Ara Tia Kamaiu, ae Iesu Kristo, e anga te banna ae tamaroa ngke e mena i aon te aba. N taai ake ti boo ma kangaanga ma kataaki, te bwai ae e na anganira te rau ao te raunnano bon te beku ibukiia raora. E koreaki n ana boki Mataio rongorongon te Tia Kamaiu ngke e kaongoaki bwa ai tarina ae Ioane te tia bwabetito e tiringaki iroun te uea ae Erote bwa kaekan ana bubuti te natinuea ae Eroria:
“Ao ngke a roko ana reirei, a tabeka nako rabwata, ao a taunna, ao a nako n tuanga Iesu.
“Ngke e ongo Iesu, e nako maiai n te boti nakon te rereua ni kaokoroa: ao ngke a ongo aomata, ao a rimwina n rieta mani kaawa.
“Ao E kaoti Iesu, ao E noriia aomata aika uanao, ao E nanoangaiia ao e kamaiuia aia aoraki.
“Ao ngke e a tanimaeao taai, ao a nako Ina ana reirei, ao a taku, Te rereua te aba aei, ao e a bwaka nako te aua; ko na kanakoia aomata bwa a na nako ni kaawa ni kabo kanaia iai.
Ao E taku Iesu nakoia, A tau bwa a nang aki nako, kam na angania kanaia ngkami.”8
E katerea Iesu Kristo bwa i nanon te kataaki ke te kangaanga, ti na kona n nori aia kangaanga tabemwang. Ti riai n tabenanoia ao ni kabebeeteia aomata ibukina bwa iai iroura te nano n tangira. Ngkana ti karaoa aei, ti na onrake n te kukurei ibukin ara mwakuri ae tamaroa. E taku Beretitenti Gordon B. Hickley: “Te bwai n aoraki ae mwakaroiroi bon te mwakuri. Te bwai n aroraki ibukin te bwara n nano bon te ibuobuoki. Te bwai n aoraki ibukin te korakai bon buokan te aomata ae e bati riki korakaina.”9
I nanon ana Ekaretia Iesu Kristo, E reke au tai ae mwaiti n tabenanoia ma ni buokiia aomata. Ngkana I karaoa aei ao I namakinna bwa e mwakuri Tamau are i Karawa ni kabebetea rawaawatau. Beretitenti Russell. M. Nelson bon ana burabeti te Atua i aon te aba; boni ngaia ara katooto n aron te mwakuri n ibuobuoki nakoia aomata i nanon taai ni kataaki. I reitai ma aika Itiaki au koaua, bwa te Atua bon Tamara are i Karawa ae tatangira. I a tia n namakina Ana tangira ae akea tiana i nanon au bong ni kataaki. Ara Tia Kamaiu, ae Iesu Kristo, e atai marakira ao rawaawatara. E kani kabeebetei uotara ao ni karaui nanora. Ti riai n toua mwin Ana banna ni katoto ni karaoan te beku ao te ibuobuoki nakoia ake a bati riki rawaawataia nakoira. N aran Iesu Kristo, amen.