Ana Rau Kristo E Kamauna te Nano ni Kairiribai

Tariu ao mwaneu aika tangiraki, n tain te kamarurung n tuoan te korakai, e rikirake korakoran ana mwakuri te buro. Buroo ake a ti tau ibukin te nakonako a kona ni korakai ni karaoa te biri rake nakon are tabuki. N te aro aei, waakin tuoan te korakai a na kona ni kaotii aoraki ake aki noraki. Bwaai ake a nooraki a kona ngkanne ni bwainaorakiaki imwain ae na karekea te kangaanga n te maiu.

Butinakon te aoraki ae te COVID-19 e a tia n riki bwa te bwai ni karawawata n te aonaaba! Te tutuo e a tia ni kaotaki mwiina aika irengan. Iti n totoko aika mano man nakoraoi a tia ni karaoaki.¹ Taan rabakau n te o n aoraki, taan reirei, taan tararua, ao tabeman a tia n ninikoria ni mwakuri ma nanoia—ao n reitinako ni karaoia. A mwaiti aomata ake a tia ni kaoti mwakuri ni mwamwannano ao n akoi—ao n reitinako ni karaoia. Ma, baika a raba aika aki nakoraoi atia n noraki. Kurubu n aomata ake a kai rootaki a tia ni korakai—ao a reitinako n rootaki. Koraki ake a mwakuri ni buoka katokan bwaai aika raba n aki boraoi a na kaungaaki ao ni kaaitauaki.

Butinakon te aoraki bon te bwai ni kataaki naba n tamnei ibukin ana Ekaretia te Tia Kamaiu ma kaaina. Mwiina bon ti tebo ma a renganaki. Maiura a bon tia ni kakabwaiaki man te ibuobuoki n te “karietataaki ao te kawai ae mimitong,”² te Nakomai, Iriirai karikiram, ao ni boboto n te mweenga, boutokan reiakinan te euangkerio n te Ekaretia. A mwaiti ake a tia ni katauraoi mwakuri n nanoanga ao karaunano inanon taai ni kangaanga aikai ao n teimatoa ni karaoia.³

Ma, ni katooto tabeua, te karawawata n te maiu n tamnei man butinakon te aoraki e karika te itabaraara ao te kamaenakoaki mairouia tabeman. Aio te iango bwa ara mwakuri ti riai ni bitii nanora ao n riki ni katiteuanaaki n aron ana reirei ni koaua te Tia Kamaiu. Aio bon tiaki te kakaewenako ae boou, ma bon te bwai ae rang ni kakaawaki.⁴

Ngke e kawariia Nibwaite te Tia Kamaiu, E reirei, “E na akea te ikakaiwi i marenami. … Bwa ane iai irouna tamnein te kakauntaeka ao bon tiaki mai irou, ma bon mai iroun te riaboro, are taman te kakauntaeka, ao e kakiriweei nanoia aomata bwa a na itabaraaraa, i marenaia.”⁵ Ngkana ti kauntaeka ma temanna n te un, Tatan e kukurei ao te Atua e nanokawaki.⁶

Tatan e kukurei ao te Atua e nanokawaki iaan bukina aika uoua. Te Moan, te itabaraara e bon kamamarai aroarora ni kakoaua nakon te aonaaba ibukin Iesu Kristo ao te kamaiuaki are e roko rinanon “mwakuri aika raoiroi, … nanoanga, ao akoi.”⁷ E taku te Tia Kamaiu, “I anganingkami te tua nabangkai, Bwa kam na itangirtangiri imarenami. .… Ane a na ataingkami aomata ni kabaneia ba au reirei ngkami n aei, ngkana kam i tangitangiri ”⁸ Te maroro e bon koaua—e ataaki irouia aomata ae tiaki ngaira taan irira Iesu Kristo ngkana tiaki kaota ara tangira imarenara. Ana mwakuri n te Kaitira ni bong e na aki bebete ana waaki ngkana te itabaraara ke te kairiribai⁹ e roko ibuakoia Ana reirei.¹⁰ Te Kauoua, te itabaraara e bon aki tamaroa ibukin marurungin tamneira n tatabemaniira. Ti bon kakiriweaki man te rau, te kimwareirei, ao te motirawa, ao ara atatai n namakina te Tamnei bon ara rinerine.

Iesu Kristo e kabwarabwara bwa Ana reirei e aki “kakireweei nanoia aomata bwa a na un, i marenaia; ma [anne Ana] reirei [are] a na bon riai ni kaakeaki bwaai aikai.”¹¹ Ngkana I waekoa n iangoia ke ni kaeka nakon iango aika kaokoro man n un ke ni momotikitaeka, I “bwaka” n te bwai n tutuo n tamnei. Te bwaka man te tutuo aei tiaki nanona bwa I a bwarannano. Ma, e bon kaotia bwa N na riai ni bitaki. Ao anne e tamaroa n ataaki.

Imwin kawaraia kaain America iroun Te Tia Kamaiu, aomata a katiteuanaaki; “bon akea te itabaraara n te aba ni kabuta.”¹² N am iango a katiteuanaki aomata ibukina bwa ti tebo aroia, ke ibukina bwa akea kaokoron aia iango? I nanououa iai. N onean mwiina, te itabaraara ao te kairiribai a bua ibukina bwa a karimoa aia kakaonimaki iroun te Tia Kamaiu iaon bwaai ni kabane. Kakaokoroia e taraa n aki kakaawaki ngkana a kabotaua tibwaan aia tangira ibukin te Tia Kamaiu, ao a na katiteuanaaki ni “bwaibwai n abanuean te Atua.”¹³ Mwiin anne bwa “bon akea riki te botanaomata n ai aroia ae a kukurei ibuakoia aomata … nako ake a karikaki ni bain te Atua.”¹⁴

Te katiteuanaaki e kainnanoa karaoana.¹⁵ E rikirake ngkana ti ribanaia ma tangiran te Atua inanora¹⁶ ao ti katuruturua ara iango iaon tokin kawaira ae akea tokina.¹⁷ Ti bon katiteuanaaki man moan kinaakira ae kabuta riki ngkai ngaira natin te Atua¹⁸ ao ara motinnano nakon koauan te euangkerio ae kaokaki. N tokina, tangiran te Atua ao ara kakaonimaki iroun Iesu Kristo e kamwakura ara tabeaianga ae koaua ibukiia tabeman. Ti kakaei tamaroaia ni kabotaui kaokoron anuaia aomata nakon mwaitin karaia ao teia ao bibitakin bannaia, aia noonori, ao aia tarena.¹⁹ Ngkana ti aki katuka ara kakaonimaki iroun Iesu Kristo iaon riki nanora ao ara taratara, ti riai ni manga kamatoai baika a moan kakaawaki ao ni bitii.

E na bae n kairaki ara iango n taekina aio, “E koaua ti kona ni karekea te katiteuanaaki—ngkana kam a boraoi naba ni iango ma ngai!” Te waaki ae tamaroa bon te titiraki, “Tera I kona ni karaoia ni karikirakea te katiteuanaaki? N na kanga ni kaeka ni buoka te aomata aei ni kaaniia nakon Kristo? Tera ae N na karaoia ni kauarerekea te itabaraara ao ni katea te nanoanga ao tabeakinan te komunite n te Ekaretia?”

Ngkana ana tangira Kristo e riki bwa te bwai ae moan te kakaawaki inanon maiura,²⁰ ti na butimwaea te aki boraoi n nano ma te nimamannei, te taotaonaki n nano ao te akoi.²¹ E na karako raraomara iaon kakai rotakira ao e na raka riki iaon kakai rotakiia kaan rarikira. Ti na ukora te raunnano ao ni katiteuanaaki.”²² Ti aki kabaeki n “baike a nanokokoraki,” ni motiki taekaia koraki ake ti aki boraoi ni iango ma ngaiia, ke ni kataia ni karikia bwa a na bwaka.²³ N onea mwiina, ti ataia bwa koraki ake ti taku bwa aki boraoi a karaoi aia kabanea n tamaroa are a konaa ma te taneiai inanon maiuia.

Kaainabau bon te rooia inanon 20 te ririki Ngkai te rooia ngaia, e aki toki ni mwakuri ma tabeman ake a na taetae iaon bwaai ake a na uotakirake ni kaitara. Ma e reiakinna n aki boraoi ma a na akea te moakakung ke n un. E na kona ni marooro ni kauntaeka n ana itera te kaitara, “I kona n nooria bwa ti aki boraoi iaon te tabeka aio. I tangiriko. I kariaia am iango. Au kantaninga bwa ko kona n anganai butimwaena ae rau ae ti te arona.” N tainako aio e kariaia ibukin marooro ni karinerine ao riki te iraorao n aki tabe ma te kakaokoro.

Kairiribai ngkoa a konaa n riki ni katiteuanaaki inanon te riki bwa ana reirei te Tia Kamaiu.²⁴ N 2006, I kaea katabuan te Helsinki Finland Tembora n anga au karinerine nakon Tamau ao tibu ake a kaman rairaki nakon te Ekaretia i Finland. Kain Finland, n ikotaki ma tamau, a kaman tangira tein te tembora i Finland bwii n ririki nako. N te tai anne, mwakoron te tembora e na ikotiia Finland, Estonia, Latvia, Lithuania, Belarus, ao Ruutia.

N tain te katabu, I reiakina te bwai teuana ae kakubanako. Moa ni bongin te mwakuri ae kabuta e a tia ni kaokoroaki ibukiia kaain Ruutia ni karaoan taian otenanti n te tembora. E bon kangaanga kabwarabwaraana bwa e kanga ni kakubanako. Ruutia ao Finland a tia ni bubuaka inanon tienture aika bati. Tamau e aki onimakiniia ao e aki tangiriia tiaki ti Ruutia ma bon kaain Ruutia ni kabane. E a tia ni kabwarabwara ana namakin ae korakora, ao ana namakin e bon tiku aekan ana riribai Finland nakon Ruutia. E matenikuna karaki aika abwabwaki ni karakinan te aitara ni buaka n te ka19 n tienture imarenan Finns ao Ruutia. Ana taneiai inanon te Kauoua ni Buaka, ngke a manga aianaki riki kaain Finland irouia I-Ruutia, akea te bwai ae e na bita ana iango.

Teuana te ririki imwain katabuan te Helsinki Finland Tembora, kometen te tembora, ake membwa bon tii taian Finnnish, a bowi ni maroroakin babaire ibukin te katabu. Inanon te boowi, temanna e taraia bwa Aika Itiaki mai Ruutia a na bon mwananga tabeua te bong ni ira te katabu ao a kantaningaia bwa a na karekea aia kakabwaia n te tembora imwain manga okiia. Te tia babaire n te komete, te Tari Sven Eklund e tabekia bwa kaain Finns a kona n tataninga teutana, bwa membwa mai Ruutia a riai moa ni karaoi taian otenanti n te tembora. Ni kabane komete a bane ni kariaia. Taan kakaonimaki aika Itiaki mai Finns a taona moa aia kakabwaia man te tembora ni kariniia moa Aika Itiaki mai Ruutia.

Te Beretitenti n te Aono are e mena n tain aia boowi kometen te tembora, Unimwaane Dennis B.Neuenschwander e koreia imwina: “I tuai ni kamoamoa irouia kaain Finns nakon ae e a riki nakoiu n te tai aei. Rongorongon ana kangaanga Finland ma kaain rarikina mai mainiku … ao kukureia bwa e a kateaki [te tembora] iaon abaia a katukaki moa taekaia. Anganakiia kaain Ruutia bwa a na rin moa n te tembora [bon] te rongorongo n tangira ao n anganano.”²⁵

Ngke I kaongoa tamau aron te akoi aei, nanona e bitaki ao e tang, bon te I Finn ngaia ae kangaanga tangina. Man te tai anne ni karokoa matena teniua te ririki imwina, e aki manga taekina kabuakakan Ruutia. E kaungaaki man aia katooto raraona ae kaain Finns, tamau e rineia n riki bwa ana reirei Iesu Kristo iaon bwaai ni kabane ake e iangoi. Taian Finns ai bon tiaki kaain Finnish, kaain Ruutia ai bon tiaki I Ruutia, kurubu aikai a kitan kateiia, rongorongoia, ke aia taneiai ni kabuaa te kairiribai. A aki manga kainnanoia. N onea mwiina, aia moan iango a rineia bwa a na riki bwa ana reirei Iesu Kristo.²⁶

Ngkana a kona ni karaoia, ngaira naba ti kona. Ti kona ni uoti taneiai mairouia ara bakatibu, kateira, ao taneiai nakon Ana Ekaretia Iesu Kristo. Tamuera e aki maama man rikina ngkai te Reimwanaite ngaia,²⁷ n aron naba Moomon e aki maama ngkai ngaia te Nibwaite.²⁸ Ma ngaiia n tatabemaniia a karimoaia n riki bwa ana reirei Iesu Kristo.

Ngkana kam aki katiteuanaaki, tiaki au bwai ngkami.²⁹ Au kakao bwa ti na riki n ninikoria n katuka ara tangira iroun te Atua ao n riki bwa ana reirei Iesu Kristo iaon bwaai ni kabane n ara iango.³⁰ Ti na kamatoa te berita ake a bon riai inanon ara reirei—te berita ae te riki n ti teuana.

Ti a ira aia katooto Aika Itiaki ni katobibia te aonaaba ake a bon tia n tokanikai man riki bwa ana reirei Kristo. Ti kona ni katine iroun Iesu Kristo, are “bon ara rau, are … e tia n urua rikaaki nukan te o imarenara; n tia ni kamaunai inanon ana [anganano ni kamaiu] te kairiribai.”³¹ Ara kakoaua iroun Iesu Kristo nakon te aonaaba e na kakorakoraki, ao e na teimatoa ni marurung maiura n tamnei.³² I kakoaua bwa ngkai ti “katuka te un” ao n riki “ni katotonga nanon te Ue n te tangira ao te katiteuanaaki ma ngaia inanon te onimaki,” Ana rau e na riki bwa ara rau.³³ N aran Iesu Kristo, amen.