Te Auti ae Baireaki Raoi

Inanon au mwakuri ao nakoau inanon te Ekaretia, I a tia ni karaoa aio te ngaa te tai—tiaki ti imwaia te 15 mwaane aika tekateka ni kaitaraai mai bukiu. I namakina ami tataro ao ngaiia.

Tariu ao mwaneu, Ngai kaain te Aba ae Tonga n te Betebeke Maiaki ma I ikawairake i Amerika Meang. Te buti n aoraki aei e tuuka okiia tebubua, tao teuana te ngaa mitinare mai Tonga aika beku ni kabuta te aonaaba n okiri mweengaia aika tangiraki ibukin kainan tian te aba. Tabeman mitinare mwaane aika kaain Tonga a tiku n aia mition inanon te maan ae teniua te ririki ao mitinare aine e riaon uoua te ririki! A tiku n tataninga ma te taotaonaki n nano ma te onimaki are a bon kinaaki iai ara aomata. N te tai aei, tai kubanako ngkana iai tabeman ae a beku n ami uoote ao titeiki ao a taraa n rikirake n ai arou—ni kara ao n iaia iran atuu. Ti kakaitau ibukiia mitinare n taabo nako ibukin aia kakaonimaki ni mwakuri, e ngae ngke e abwabwaki aia tai ke e uarereke nakon are a kantaningaia man te buti n aoraki aei.

Te Tabati teuana ngke te riikan Ngai, I mena n te tabo n tataninga ma te turee n ran ni kabuta te toa ngke e a nakonako te aine inanon te kateitei are I mena iai. Ni karaoan tibwangau, I kawaria ao n anganna te turee. E katoua atuuna, ma ni moangare, ao e anaa te mwangko n ran. E rang rimwi ao e aaki ooa butimwaean te kariki. N te tai ae waekoa imwiin te taneiai aei, au tia reirei n te mweenga, Ned Brimley, e reireinai bwa mwaitin aekan nako bannan ao kakabwaia n ana euangekrio Iesu Kristo ti anganaki n ae baireaki raoi.

Imwiin riki te wiiki anne, Ned ma toana a roko ni mweengara ma te reirei ae aki kona ni mwanuokinaki. E kauringiira Ned bwa iai te baire n aron karikan te aonaaba iroun te Atua. E kamamata raoi te Uea nakon Mote te baire are E karika iai te aonaaba. Te moan, E waaki man karaurean te ota man te ro, ngkanne te ran man aontano ae mwauteretere. E karini aroka aika maiu ao maan imwaain kabwarabwaraan te buraneti ae e a tibwa karikaki Ana karikibwai ae moan te korakora: aomata, ni moa mairoun Atam ao Ewa.

“Ao te Atua E karika te aomata ba katootongana; E karikia ni katotonga arona; E karikia ba te m’ane ao te aine. …

“Ao te Atua E nori b’ai ni kabane aika E karaoi, ao noria, moan te raoiroi” (Karikani Bwai 1:27, 31).

E kukurei te Uea. Ao e motirawa n te kaitiua ni bong.

N ae baireaki raoi are e karikaki iai te aonaaba e anganiira te taratara tiaki ti man baika moan te kakawaki nakon te Atua, ma ibukin teraa ao antai ae E karika te aonaaba ibukina.

Ned Brimley e tiribwarea ana reirei n ana kairi te tamnei ma te rongorongo ae bebete: “Vai, ana auti te Atua bon teuana ae baireaki raoi. E kantaningaiko bwa ko na maiuakina maium ae baireaki raoi. Ae baireaki raoi. E tangiriko bwa ko na karaoa am mwakuri ni mitinare imwaain ae ko mare.” N te iango aei, taan kariiri n te Ekaretia a reirei ngkai naba bwa “te Uea e kantaningaia ataeinimwaane n tatabemaniia aika konabwai bwa a na katauraoiia n nako ni beku. … Ataeinnaine … ake iai nanoia ni kan beku a riai naba ni katauraoiia” (Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 24.0, ChurchofJesusChrist.org). E reitia te Tari Brimley: “E tangiria te Atua bwa ko na mare imwaain ae a reke natim. Ao E tangiriko bwa ko na teimatoa ni karikirakei am taarena ngkai ko uaiakina te reirei.” Ngkana ko rineia bwa ko na maiuna maium n ae e aki baireaki raoi, ko na kunea bwa e na kaangaanga riki te maiu ao ni mangaongao.

E reireiniira naba te Tari Brimley bwa rinanon Ana karea ni kamaiu, te Tia Kamaiu e buokiira ni kaoka ao ni bairea maiura ake a riki ni mangao ke man ae tiaki aron teina man oin ara rinerine ke aia rinerine ae aki raoiroi tabeman.

Man te tai anne ni karokoa ngkai, I karekea te nano ni kan “baireai raoi.” I karikirakea te katei n tarai anua aika a barongaaki n te maiu ao n te euangkerio.

E reireiniira te reirei aei Unimwaane David A. Bednar: “Ngkai ti kamatebwai, reirei, ao ni maiuakina ana euangkerio Iesu Kristo, te aro ni baronga e manena n taainako. Iangoia, n aron te katoto, reirei ake ti reiakin ni moanibwaian te maiu n tamnei n aron barongaakin baika a riki aika moan te kakawaki ake a riki bwa bwaninin ana euangkerio te Tia Kamaiu ae kaokaki ni boong aika kaitira.”

Unimwaane Bednar e karinana te Moan Mii ni Burabeti ao moan kaotin Moronaai nakon Iotebwa Timiti ngke e moan reireina te burabeti n rorobuaka n ataei, rikin ao katein te Atua, n rimwiaki ma ana mwakuri ana Boki Moomon ao Eria ni bobotakiia Iteraera n iteran te rabuna aika uoua ni koron boong.

E motikia Unimwaane Bednar: “Te aro ae baireaki ae kaunganano ma ni bongana ibukin bwaai n te maiu n tamnei bon moanibwai aika kabanea n rietaata nakon te Atua” (“The Hearts of the Children Shall Turn,” Riaona, Nob. 2011, 24).

Teuana te kukune are I karaoia bwa “te aro ae baireaki raoi” bon ana kawai te Uea ae korakora ma ni bebete, teina raoi, ao n nakoraoi ibukin te Uea bwa e na kona n reireniira, ngaira aika Natina, reirei aika kakawaki.

Ti roko nakon te aonaaba aio n reiakinaki ao ni karekei ara atatai ngke tao ngkana aki kona n reke iroura. Rikirakera e bon onoti nakoira n tatabemaniira ao te bwai ae kakawaki n ana babaire ni kamaiu Tamara are i Karawa. Rikirakera n rabwata ao n tamnei e moanaki n taian mwaneka ao a karaurau n rikirake ngkai ti karekei ara atatai n te aro ae baireaki raoi.

Aramwa e anga ana kabwarabwara ae mwaakaroiroi iaon te onimaki—e kabongana te taetae ni kaikonaki iaon te koraa, are, ngkana iai raoi nanom nako iai man ribanaia raoi, e na bwebwerake, man ni maiuraoi, te aroka ae ikawairake are e kariki uaa aika kangkang (taraa Aramwa 32:28–43). Te reirei e kangai bwa e na rikirake am onimaki ngkana ko karekea n nena ao n ribanaa raoi te koraa —ke ana taeka te Atua—inanom. E na rikirake am onimaki ngkai ana taeka te Atua e moanna “n rikirake inanom” (kibu 28). Bwa e “rikirake, ao ni bwebwerake ma ni moanna ni maiu” (kibu 30) a uaia n nooraki ao n rangi ni manena. E baireaki raoi naba.

E reireiniira te Uea n tatabemaniira ni kaineti ma ara konabwai n reirei ao arora n reiakinna. Rikirakera e bon katan iaon ara tatauraoi, nanora ni kan atatai, tein ara onimaki, ao wanawanara.

E reiakinaki Nibwaai te bwai are e na reiakinna Iotebwa Timiti i Kirtland, Ohio, ae riaon 2,300 te ririki imwiina: “Bwa taraia, e kangai ana taeka te Uea ae te Atua: Nna anganiia natiia aomata teutana i mwiin teutana; te reirei teuana i mwin teuana; ao a na kakabwaiaki akana a ongotaeka nakon au reirei, ao ni kauki taningaia nakon au taeka n reirei, bwa e na reke irouia te wanawana” (2 Nibwaai 28:30).

Bwa ti reiakinaki “teutana i mwiin teutana, te reirei teuana i mwin teuana, teutana ikai ao teutana ikanne” ao anne ae e baireaki raoi naba.

Iangoi kibuntaeka akana imwiina ake ti aki toki n ongongo inanon maiura: “Bwaai aika riai moa n nako” ke “Kamooiia moa n te rannimamma imwain te amarake.” Ao e uara “Ti riai n nakonako imwaain ae ti biri”? Tatabeua taeka n rabakau akanne e kabwarabwara te bwai ae e baireaki raoi.

A mwakuri taian kakai ni kaineti ma aron baireakia raoi. A kaoti kakai ngkana ti kamwakura moa ara onimaki. E roko moa te onimaki imwaain te kakai.

Kairake n ataeinimwaane a katabuaki naba nakon te nakoa n te Nakoanibonga ae te Aaron n ae baireaki raoi, ni kaineti nakon ana ririki te aomata are e katabuaki iai: te riikan, te tia reirei, ao ngkanne te ibonga.

Otenanti ibukin te kamaiuaki ao te karietataaki a baireaki naba raoi aron teia. Ti bwabetitoaki imwain karekean ana bwaintituaraoi te Tamnei ae Raoiroi. Otenanti n te tembora a bon baireaki raoi. E koaua, n aron are e reireinai raoraou ae Ned Brimley ma te wanawana, te toa e bon barongaaki naba—e moanaki man te kariki, n rimwiaki n te ran.

“Ao ngke a tabe n amwarake, Iesu e ana te kariki ao e kakabwaia, ao e tatabeutaia, ao e anganiia, ao e taku, Anaia, ao kanna; rabatau aei.

“Ao E anaa te mwangko ao e tataro ni katituaraoi, ao e angania, ao e kangai,“Kam na bane ni mooi n aei;

“Ba rarau aei, ae raraan te berita nabangkai, ae kawawaeaki i bukia aomata aika bati ba baini kabaran aia bure” (Mataio 26:26–28).

I Ierutarem ao i Amerika, e tabeutaa te toa te Tia Kamaiu n aroia ae ti te arona.

“Nooria, au auti bon te auti ae baireaki raoi, e taku te Uea ae te Atua, ao tiaki te auti ni kamangaongao” (Reirei ao Berita aika Tabu 132:8).

Te rairannano e baireaki raoi. E moanaki man onimakinan Iesu Kristo, e ngae ngke te bwai ae uarereke. Te onimaki e kainnanoa te nanorinano, are bon te bwai ae kakawaki n reken “te nano ae uruaki ao te tamnei ae raraoma.” (2 Nephi 2:7).

E bon koaua, moan tuan te euangkerio aika aua a baireaki raoi. “Ti kakoaua bwa moan tuua ao otenanti n te Euangkerio bon: te moan, Onimaki iroun te Uea Iesu Kristo; kauouoa, Rairannano; katenua, Bwabetito rinanon te ran ibukin kamaunaan te bure; kaaua, Katoka bai ibukin ana bwaintituaraoi te Tamnei ae Raoiroi” (Taekan te Onimaki 1:4).

Te Uea ae Beniamina e reireiniia ana aomata te koaua aei: “Ao taraia bwa a na karaoaki bwaai aikai ni kabane n te wanawana ao n te tangira; bwa e aki katauaki bwa e na kabirimwaka riki te aomata nakon are riaon korakorana. Ao riki, e riai bwa e na botumwaaka, bwa e aonga ni kona n reke irouna te kanuanga; mangaia are, a riai ni karaoaki bwaai ni kabane n aroia” (Motiaea 4:27).

Ti bia maiuni maiura n ae baireaki raoi ao n ukora teina are e baireia te Uea ibukira. Ti na kakabwaiaki ngkai ti taraa ao n ira te banna aei n teina are e reireia te Uea bwa tera ae moan kakawaki Nakoina. N aran Iesu Kristo ae tabu, amen.