Maungatabu ni Kabuta
Te Rau ae Onoti Nakon Temanna inanon Taai ni Kaangaanga
Okitobwa 2021 maungatabu ni kabuta

Te Rau ae Onoti Nakon Temanna inanon Taai ni Kaangaanga

Iroun Unimwaane Quentin L. Cook

Man te Kooram n Abotoro n te Tengaun ma Uoman

E bon tuai ni kakawaki ukoran te rau ae onoti i bon iroum.

I mwiokoaki n taaii aika a nako bwa N na katabua mwakoron rongorongon Nauvoo. Ni iteran mwiokoau, I kawara te Umwa ni Kaikain i Missouri. Ngke I taraa te umwa ni kaikain, I miiakin bwaai ake a karika mwakoron rongorongon te Ekaretia ae rangi ni kakawaki. A kakamaakaki Aika Itiaki mai imwiin ana ota ni kananako te kowana mai Missouri. N raonaki ma anne, te Burabeti ae Iotebwa Timiti ao tabeman raona a kabureaki ma te motibuaka n te Umwa ni Kaikain i Liberty. Teuana bukin te kakaitara ae kakeru nakoia ara membwa bwa angiina mairouia aki butimwaea te aro n tautoronaki.1 Bwainikirinan Iotebwa Timiti ae moan te korakora aei ma naake a iria e tei bwa te katoto ni karaoan te rinerine ae aki eti are e kona n rootia aomata aika raoiroi. E kaotaki bwa kaangaanga ake a riki inanon ana tai Iotebwa n te Umwa ni Kaikain i Liberty tiaki kakoauan ana riribai te Uea ke tao katokan Ana kakabwaia.

E riingaki nanou ngke I wareka te bwai are e kabwarabwara te Burabeti ngke e kabaeaki n te Umwa ni Kaikain i Liberty: O te Atua, ko mena iaa? Ao e ngaa te umwa ae rabuna te tabo ae ko karabako iai?”2 E titiraki Iotebwa a na maanra ana aomata te Uea n “rinanon bwainikirinaki aika a bure manaki eti n te tua.”3

Tamnei
Unimwaane Cook e kawara te Karabuti i Liberty

Ngke I tei n te Umwa ni Kaikain i Liberty, e rootaki nanou ngke I wareka ana kaeka te Uea: “Natiu, e na mena te rau n tamneim; am kaangaanga ao karawawatakim a na riki ma tii n te tai ae uarereke; ao ngkanne, ngkana ko teimatoa n rinanona n te aro ae raoiroi, te Atua e na karietako i eta.”4 E matata raoi bwa te kakaitara e kona ni kanakoraoira n akea tokina, tokin kawaira ae te tiretio.5

Ana taeka te Tia Kamaiu ae onoti “Natiu, e na mena te rau n tamneim”6 e matata irou ao iai kakawakina ibukin ara bong. A kauringai Ana reirei nakoia Ana reirei n ana tai ni mwakuri iaon te aba.

Imwaain karawawatakin Kristo n te Onaroka are Ketetemwane ao iaon te kaibangaki, E tuangiia Ana abotoro “kam na itangitangiri; n aron ae I tangiringkami”7 ao imwiina e kabebetei nanoia n taeka aikai: “I katuka te rau i roumi, I anganingkami au rau: I aki anganingkami n ai aron te aba, ngkana e anga. E na tai rawawata nanomi, ao a na tai maku.”8

Teuana nakoan ara Uea ao ara Tia Kamaiu, Iesu Kristo, ae tatangiriaki, bon “Te Uea n Raoi.”9 N te kabane e na kateaki Abanueana n ikotaki ma te rau ao te tangira.10 Ti ingainga nakon te tenga n ririki are e na tautaeka iai te Mesia.

N aki tara te tautaekanaki n te nonori aei n te tenga n ririki, ti ataia bwa te raoi ao te rau n te aonaaba aki maiuakinaki n ara bong.11 Ni maiu ae bwanin, I bon tuai man nooria aomata n ribuaka imarenaia. Ti kaikoakaki n te un, te itabaraara, mwakuri ake a na uruana te rau ao te mweeraoi.

Te rau n te aonaaba akea kantaningaakina ke kamatoakina ni karokoa Manga Okin Iesu Kristo. Te Tia Kamaiu e tuangiia Ana Abotoro bwa Ana mwakuri iaon te aba e na aki karekea te rau ni kabuta te aonaaba. E reirei, “Tai taku i nanomi ba I roko ba N na uota te raoi nako aon te aba.”12 Te rau ni kabuta te aonaaba bon tiaki mwakoron ana mwakuri n rabwata te Tia Kamaiu. Te rau ni kabuta te aonaaba akea ni boong aikai.

E ngae n anne, te rau ae onoti e kona n reke n akean ongean te un, te itabaraara, ao te maenako are e nakobuaka ao ni kamangaoa ara aonaaba n te bong aei. E bon tuai ni kakawaki ukoran te rau ae onoti i bon iroum. Te kuna n taromauri ae rang tamaroa man tangiraki are e koreaki ni boong aikai ibukiia kairake iroun te Tari Nik Day ae atuunaki “Te Rau inanon Kristo” e katanoata, “Ngkana akea te rau iaon te aba, iai te rau inanon Kristo.”13 Ti kakabwaiaaki n reken te kuna aei iroura imwaain te buti n aoraki ae te COVID-19 ni kabuta te aonaaba.

Te kuna aei e kaota tamaroan te tokanikai ibukin te rau ao n riaina e katuruturua bwa te rau bon te angkaa inanon maiun ao ana mition Iesu Kristo. E kabwarabwara Beretitenti Joseph F. Smith, “E na bon aki roko nakon te aonaaba tamnein te rau ao te tangira … ni karokoa a karekea aomata ana koaua ma ana rongorongo te Atua … ao n ata mwaakana ao ana kariaia n te aro n atua.”14

Ngkai ti bon aki te roko n taenikai man ara kekeiaki ni karekea te rau ni kabuta te aonaaba, ti kakoaua bwa ti kona ni karekea te rau, ae onoti ngkai e reirei Kristo. Te reirei aei e koreaki n Reirei ao Berita aika Tabu: “Ma reiakinna bwa ane e karaoi mwakuri aika a raoiroi e na karekea kanuangana, ae te rau n te aonaaba aio, ao te maiu ae akea tokina n te aonaaba ae e na roko.”15

Tera tabeua “mwakuri aika raoiroi” are a na buokiira n nikoira man te kauntaeka ao ni kaurerekea te itabaraara ao ni kunea te rau n te aonaaba aei? Ana reirei ni kabane Kristo a kotea te kawai aei. N na taekin tabeua ake I kakoauai bwa a rangi ni kakawaki.

Te Moan: Tangira te Atua, Maiuakin Ana Tua, ao Kabwarai aia Bure Aomata nako

Beretitenti George Albert Smith e riki bwa te Beretitenti n te Ekaretia n 1945. E rangi ni kinaaki n ana ririki ngke e mwakuri bwa te Abotoro ao te tia kairiiri ae tatangira te rau. N ririki akana 15 imwaain are e riki bwa te Beretitenti, kaangaanga ao kakatai ake a riki man bwakan kaubwain te aba, n rimwiaki ma te mate ao te urubwai n ana Kauoua ni Buaka te Aonaaba, a tia n riki bwa taai aika rau.

Ni banen te Kauoua ni Buaka n te Aonaaba, n ana moan maungatabu ni kabuta ngke e Beretitenti n Okitobwa 1945, e kauringiia Aika Itiaki Beretitenti Smith n ana kakao te Tia Kamaiu n tangiriia raoraoia ao aia kairiribai ao imwiina e reirei, “Anne tamneia ni kabane Aika Itiaki a riai n ukeria ni bwaibwai iai ngkana a kantaningaia bwa n teuana te tai ao a na tei imatana ao ni butimwaeaki ni baina nakon mweengana ae mimitong.”16

Te kauoua: Ukoukora Uaan te Tamnei

N ana koroboki te Abotoro are Bauro nakoia I-Karatia e katei bwaai aika uoua aika kaokoro man kaitara imarenan mwakuri aika raoiraoi ake ti na kona n tau iai ni karekea uean te Atua ao mwakuri ake a kona, n akea te rairannano, are tina aki tau iai. Ibuakon bwaai akana ti tau iai bon uaan te Tamnei “te tangira, te kimwareirei, te rau, te taotaonaki n nano, te atataiaomata, te raoiroi, te kakaonimaki, te nimamanei, [ao] te taubang.”17 Bauro e kaairia naba ma uouotan rarawatan temanna ao a na tai toki nanora ni kakaraoa ae raoiroi.18 Ibuakon mwakuri akanne ake aki raoiroi e kaairia ma te riribai, te un, ao te kauntaeka.19

Teuana te reirei ae moan te korakora n te O Tetemanti e irekereke ma te Karo ae Aberaam. Aberaam ao Rota, ai natina te mwaane, a kaubwai ma a kunea bwa a aki kona ni uaia ni maeka. Ni katoka te kauntaeka, Aberaam e kariaia Rota bwa e na rinea te aba are e tangiria. Rota e rinea te tabo ae aoraoi i Ioretan, are e uaia n aomwaimwai ao n rangi n tamaroa. Aberaam e anaa te tabo ae aoraoi i Mamere ae aki rang maiu tanona. E warekaki ni koroboki aika tabu bwa Aberaam e katea umwana n tekateka ao e katea “te bao ni karea nakon Iehova.”20 Rota, n te anga teuana, “e kateitea umwana n tekateka ao e toki i Totom.”21 Ni karekean raun te iraorao, te reirei e mataata ao ti riai n tauraoi n ota ao ni katoka te kauntaeka n te karinerine nakon bwaai ake aki kairekerekea te raoiroi. N aron ae reirei te Uea ae Beniamina, “Ao e na aki reke te nano ni kan kaikoaka temanna, ma ti te kan maeka i nanon te rau.”22 Ma n anuara n irekereke ma te raoiroi ao reirei aika ti riai ni karekei, ti riai n teimatoa ao n nene.

Ngkana ti kan karekea te rau are bon kanuangan mwakuri aika a raoiroi, ti na aki katei umwara ni maeka ni kaineta te aonaaba. Ti na katei umwara n rianna ni kaineta te tembora.

Te kateniua: Kamwakura te Inaomata n Rinea te Raoiroi

Te rau ao te inaomata a irekereke bwa bwaai aika a kakawaki ibukin te babaire ni kamaiu. N aron are e kabwarabwaraaki n Atuun taekan te Euangkerio iaon “Te rinerine ao te Bukintaeka,” “Te rinerine bon te konabwai ao te tibwanga are e anganiira te Atua n rinerine ao ni mwakuri i bon ibukira.”23 N aron aei, te inaomata n rinerine bon te bwai ae kakawaki n rikiraken te aomata ao te taneiai are e kakabwaiaira ngkai ti iriira te Tia Kamaiu.24

Te rinerine bon oin te rongorongo n te “Boowi ni Kauntira i Karawa n te maiu imwain te maiu aei” ao te bobuaka imarenaia naake a rineia bwa a na iriira Kristo ao taan iriira Tatan.25 Katokan te kainikatonga ao ttauaninne ao rinean te Tia Kamaiu e na kariaia karekean Otana ao Ana rau. Ma te rau ae onoti e na taraa ni kaangaanga ngkana aomata a kamwakura inaomataia ni kawai aika a kaikoaki ao ni kamaraki.

I onimaki bwa kakoauan te rau are ti namakinna inanora e kakorakoraaki man te wanawana are ti karekea mairoun te Tia Kamaiu te aonaaba e na kakoroa nanona ibukira. Aio e kamatataki inanon Preach My Gospel: “Ngkai ti onimakina ana Mwakuri ni Kamaiu Iesu Kristo, E kona ni buokiira n teimatoa inanon kataakira, aorakira, ao marakira. Ti kona ni kaonaki n te kimwareirei, te rau, ao te raunnano. Bwaai ni kabane aike a katanginano ibukin te maiu a kona ni kaetaki rinanon Ana Mwakuri ni Kamaiu Iesu Kristo.”26

Te kaua: Katea Tion Inanora ao ni Mweengara

Bon natin te Atua ngaira ao mwakoron Ana utu. Ngaira bon mwakoron te utu are ti bungiaki nako iai. Katean te utu bon aan te kukurei ao te rau. E reireiniira Beretitenti Russell M. Nelson—ao n tain te buti n aoraki aei ti reiakinaki—bwa karaoan taromaurini mweenga, e kona ni “kaotinakoa mwaakan te utu … ni bitii mweenga[ra] na[ko] nakon te tabo ibukin katanan ara onimaki.”27 Ngkana ti karaoi taromauri inanon mweengara, ti na karekea ana rau te Tia Kamaiu.28 Ti ataia bwa angiina mai ibuakomi aki reke ami tai ni kakabwaiaki ni mweengami ao te un ni katoa tai irouia naake a rinea te buakaka. Te Tia Kamaiu e kona ni katauraoa te kamanomano ao te rau ni kaiririko n te kabane nakon te kamanoaki ao te katantan man angibuakan te maiu.

I kakoaua bwa te kimwareirei, te tangira, ao kororaoin te tangira inanon utu aika raoiroi a kaai ni karekea te rau ao te kukurei. Te tangira ao te akoi a boboto ni karekean Tiaon inanora ao inanon mweengara.29

Te kanimaua: Iriira aia Kauring Ara Burabeti aika Ngkai

Ara rau e kanakoraoaki ao ni korakoraaki ngkana ti iriira ana burabeti te Uea, Beretitenti Russell M. Nelson. Teutana riki ao tina ongora mairouna. E a kaman tauraoi man moan katean te aonaaba ibukin te wewete aei. Ana katauraoi e bon rangi n rianako.30

E reireiniira bwa ti kona n “namakina te rau ao te kimwareirei ae teimatoa ao n taai aika kamangaongao,” ngkai ti kataia n riki n ai aron ara Tia kamaiu, Iesu Kristo.31 E reireiniira bwa ti na “rairinanora ni katoa bong” ni karekea ana “kaitiaki te Uea, kamaiu, ao mwaakana ni kakorakoraira.”32 Ngai te tia kakoaua bwa a tia n reke kaotioti ao a reitinako ni karekeaki mai karawa iroun ara burabeti ae tangiraki.

Ngkai ti karinea ao ni kamatoa bwa ara burabeti, ti taromauriia Tamara are i Karawa ao ara Tia Kamaiu, Iesu Kristo. Ti buokaki iroun te Tamnei ae Raoiroi.

I kakoaua ao ni katauraoa au kakoaua ae onoti ngkai te abotoro bwa Iesu Kristo, te Tia Kamaiu ao te Tia Kabooa te aonaaba. Maiuna ao ana mwakuri ni kamaiu bon oin te rau ni koaua. Ngaia bon te “Uea n Raoi. I kaota au kakoaua ae koaua man tabu bwa E maiu. N aran Iesu Kristo, amen.

Bwaai aika a na taraaki

  1. “Aomata i Independence aki tangiria bwa aika Itiaki a na kabwarabwara nakoia Indian ao n aki kariaia te toronaki (Saints: The Story of the Church of Jesus Christ in the Latter Days, vol. 1, The Standard of Truth, 1815–1846 [2018], 172).

  2. Reirei ao Berita aika Tabu 121:1.

  3. Reirei ao Berita aika Tabu 121:3.

  4. Reirei ao Berita aika Tabu 121:7–8.

  5. Taraa 2 Nibwaai 2:11–15.

  6. Reirei ao Berita aika Tabu 121:7.

  7. Ioane 13:34.

  8. Ioane 14:27.

  9. Itaia 9:6; 2 Nibwaai 19:6. N ana Kabwarabwara te Tia Kamaiu iaon te maunga e reirei naba aei, “A kabaia tan raoi ba a na atongaki ba natin te Atua.”(Mataio 5:9).

  10. “Ma te motikitaeka ao te motiraoi … n aki toki” (see Isaiah 9:6–7; 2 Nephi 19:6–7; see also Galatians 5:22).

  11. Taraa Reirei ao Berita aika Tabu 1:35. Beretitenti Wilford Woodruff e katanoata aio n1894 ao ni kaokia riki n1896 (taraa The Discourses of Wilford Woodruff, sel. G. Homer Durham [1946], 251–52; see also Marion G. Romney, in Conference Report, Apr. 1967, 79–82; Ezra Taft Benson, “The Power of the Word,” Ensign, May 1986, 79–80; Dallin H. Oaks, “Preparation for the Second Coming,” Liahona, May 2004, 9).

  12. Mataio 10:34.

  13. Nik Day, “Peace in Christ,” 2018 Mutual theme song, Liahona, Jan. 2018, 54–55; New Era, Jan. 2018, 24–25. Te anene n taromauri “Peace in Christ:

    Ngkana ti maiu ni Maiuna,

    Te rau Iroun Kristo.

    E anga te kantaninga

    Ngke bua te kantaninga.

    E anganiira te korakora

    Ngkana tiaki konaa ni waaki.

    E anganiira katanakira

    N tain te kangaanga n te maiu.

    Ngke akea te rau iaon te aba,

    Iai te rau Iroun Kristo.

  14. Aia Anga reirei Beretitenti n te Ekaretia: Joseph F. Smith (1998), 400.

  15. Reirei ao Berita aika Tabu 59:23.

  16. Taraa George Albert Smith, in Conference Report, Okitobwa 1945, 169–70.

  17. I-Karatia 5:22–23.

  18. Taraa I-Karatia 6:2, 9.

  19. Taraa I-Karatia 5:20.

  20. Karikan bwaai 13:18.

  21. Karikan bwaai 13:12.

  22. Motiaea 4:13.

  23. Atuun te Euangkerio, “Agency and Accountability,” topics.ChurchofJesusChrist.org.

  24. Ti “inaomata n rinea te inaomata ao te maiu ae akea tokina, rinanon te Tia Raoi ae korakora ibukiia aomata ni kabane.”(2 Nephi 2:27). Te inaomata n rinerine e kariaia aia rinerine aomata aika buakaka ao man urubwai are e karika te maraki ao te karawawataaki ao n tabetai bon te mate. E kamatataki ni koroboki aika tabu bwa te Uea ae te Atua e anga te inaomata n rinerine bwa aonga aomata n rinea te raoiroi ke te buakaka.(see 2 Nephi 2:16).

  25. See Gospel Topics, “Agency and Accountability,” topics.ChurchofJesusChrist.org.

  26. Taetaekina Au Euangkeriol: Te Kairi Nakon Aia Mwakuri Mitinare (2019), 52, ChurchofJesusChrist.org; emphasis added.

  27. Russell M. Nelson, “Becoming Exemplary Latter-day Saints,” Liahona, Nov. 2018, 113.

  28. Taraa Reirei ao Berita aika Tabu 19:23.

  29. I kakabwaiaki n ikawairake n te mweenga ae tautaekanaki n te rau. E riki aei man ana anainano tinara, are bon te membwa ae rangi ni kakaonimaki n te Ekaretia. Tamau e rianako arona n anga nako ma e aki bati ni kakaonimaki. Tinau e karinea tamara ao e totokoa te itabaraara. E reireiniira ngaira aika nati bwa ti na tataro ao n roroko n taromauri. E reireiniira naba bwa ti na itangitangiri ao ni ibuobuoki imarenara (taraa Motiaea 4:14–15). N ikawairake inanon te mweenga ae rau e a riki bwa te kakabwaia inanon maiu.

  30. E bane ana reirei Russell M. Nelson man te Iuniwetiri ae Utah te Reirei ibukin te Bwainaoraki e tokanikai n ana kiraati n ana ririki ae 22. E korakora nanona ni kan riki bwa te tia korokoro ao e karekei kataneiai aika rianako mani bootaki n reirei ibukin bwainaoraki. E kakaonimaki nakon ana motinnano n te tanganibuaka i Korea ao i Tiabaan. N ririki aika a mwaiti bon te bwaeoniia ngaia ni karaoan te korokoro iaon te buroo ao e kinaaki ni kabuta te aonaaba. Ni kamimiin te katauraoi aei bon ibukin kakabwaiakiia aomata n te aonaaba ae bwanin ma rabakauna ibukin bwainaoraki. Ana katauraoi Beretitenti Nelson n te maiu n tamnei e rangi ni kakawaki riki. Boni ngaia te karo n te utu ae mwaiti kaaina irouia nati, tiibu, ao tibutoru. E kakaonimaki ni beku ibukiia ana utu ao te Ekaretia ni maiuna ae bwanin.

  31. Taraa Russell M. Nelson, “Opening Message,” Liahona, May 2020, 6; taraa naba Russell M. Nelson, “Joy and Spiritual Survival,” Liahona, Nov. 2016, 81–84.

  32. Russell M. Nelson, “Opening Message,” 6.