Bwaai ake a Kaineti ma Tamneiu
Tera bwaai aika a boou aika ko iangoi? “Tera bwaai aika a rangi ni kakawaki iroum? “Tera bwaai aika a kaineti ma tamneim?
Tariu ao mwaaneu, ngkai I a manga tei n ara Tienta ni Maungatabu ae tangiraki, I kauringaki n ana taeka te Abotoro are Betero: “Te Uea, e raoiroi menara ikai.”1
Au iango n te bong aei a boboto iaon ana taeka te burabeti are Nibwaai, are e kawakin rongorongoia ana aomata imwiin maten Tamana ae Riaai. E koroboki Nibwaai, “Ao I korei iaoni baikai bwaai ake a kaineti ma tamneiu.”2
I taneiai n riaoanako te kibu aei, n iangoa bwa te taeka ae bwaai e aki anaa te nano ke n anga te tamnei, e aki tau ni kaineti ma “tamneiu.” Ma I reiakinaki bwa te taeka ae bwaai e kabonganaaki ni koroboki aika tabu 2,354 te tai.3 N aron te katoto, ni Mote: “Ngai te Moan ao te Toki, te Atua ae Moan te Mwaaka; mai iroun au Rikitemanna I kariki bwaai aikai.”4 Ana taeka Nibwaai: “Nooria, e kimwareirei tamneiu ni bwaai aika a kaineti ma te Uea; ao e teimatoa tamneiu n iangoi ma te karaurau bwaai ake I a ti n noori ma n ongo.”5
Ana taeka Nibwaai a kauekea te titiraki “Tera bwaai ake ko iangoi ma te karaurau?” “Tera bwaai aika a rangi ni kakawaki iroum?” “Tera bwaai aika a kaineti ma tamneim?”
Bwaai ake a kaineti ma tamneira a kabwarabwaraaki n taainako ao a nano man tabekan taian titiraki.
N tain te butinaoraki I kaitibo ma kairake ni kabuta te aonaaba inanon bootaki n taromauri, aika a mwaiti ao ni karako, rinanon te kanakobwana ao bwai ni karekerongorongo, ao ti maroroakin aia titiraki.
Iotebwa Timiti ae tebwi-ma aua-ana ririki iai ana titiraki mai inanona, ao e uotia nakon te Uea. E katuruturua Beretitenti Russell M. Nelson: “Uota am titiraki nakon te Uea ao nakoia ake a onimakinaki. Kamatebwai ma te nano ni kakoaua ao tiaki te kantaninga bwa ko na kunei kabwaka n aron maiun te burabeti ke kabwakan koroboki aika tabu. Katoka rikiraken am nanokokoraki n arom n reitaki ma aomata … aika taan kakaniko. Kariaia te Uea bwa e na kairiko iaon kawaim n am kukune ni maiun tamneim.”6
N taainako ao aki toki n titiraki kairake bwa tera ae I kakoaua ao bukin tera I kakoaua.
I uringnga ngke I marooro rinanon te intanete ma temanna te ataeinnaine ni mweengana. I titiraki ngkana aio ai tibwa te moantai ni kawaraki iroun te Abotoro ni mweengana. E waekoa ni moangare ao ni kaeka, “Eng.” Ana titiraki ibukiu e tamaroa: “Tera bwaai aika a rangi ni kakawaki aika I riai n atai?”
I kaeka ni bwaai ake a kaineti ma tamneiu,” bwaai ake a na katauraoai n ongo taian wirikiriki, are a na eutarake au taratara n riaon kawain te aonaaba, are e anga te kantaninga nakon au mwakuri n te euangkerio ao nakon raoi maiu.
N na tibwai tabeua bwaai ake a kaineti ma tamneiu? Bwaai aikai a kaineti nakoia ni kabane ake a ukoukora te riki bwa ana reirei ni koaua Iesu Kristo. Tebwina bon te nambwa, ae tamaroa. N te bong aei I anganingkami itiua ma te kantaninga bwa kam na katiaa are waniua, ruaiwa, ao tebwina man oin ami taneiai.
Te Moan, tangira te Atua te Tama ao Iesu Kristo, ara Tia Kamaiu.
E katea te moan tua ae korakora Iesu: “Ko na tangira Iehova ae Atuam n nanom ni kabanea, ao n tamnein kabanea, ao ni wanawanam ni kabanea.”7
Beretitenti Nelson e taekina nanomatoana nakon te Atua, Tamara ae Akea Tokina ao nakon Natina, Iesu Kristo, ngke e weteaki bwa e na kaira ana Ekaretia te Uea, e taku, “I Kinaiia, I Tangiriia, ao n tuea bwa N na beku Ibukiia—ao ngkami—ma nikiran ikeiken maiu.”8
Ngaia are te moan, tangira te Tama ao te Nati.
Te kauoua, “Tangira raom.”9
Tiaki tii anne te iango ae raoiroi; bon te kauoua n tua ae korakora. Kain rarikim bon kainabami ao ami utu, kaain te uoote, raom ni mwakuri, kaain am ruu, ake tiaki kaain ara aro, naake a kainnanoa te bai n ibuobuoki, ao, ni koauana, bon ni kabane. Kakawakin ae “Tangira Raom” e atongaki n te kuna “Kam na Itangitangiri.”10
E kauringiira Beretitenti Nelson, “Ngkana ti tangira te Atua ma nanora ni kabane, E bitii nanora nakon mweeraoia aomata.”11
Te kateniua, tangiriko i bon iroum.
Aio are a mwaiti ake a korakai iai. E aki kakan ongoraeana ae tangirara i bon iroura e waekoa karaoana nakon tangiraia aomata? Ma, e taku te Uea, “Ko na tangira raom n ai aron tangiram i bon i roum.”12 E ataa kakawakin rikira n te aro n atua ae mena inanora; ngaia ti bon riai. Ngkana ti karawawataki n taian kairua, uruakinnano, namakin n aki tau, nanokawaki, te un, ke te bure, mwaakan ana Mwakuri ni Kamaiu te Tia Kamaiu bon, te baire mai eta, teuana mai buakon bwaai ake a tabekarake tamneira.
Te kaaua, kawakin tuua.
E a tia ni kamatata te Uea: “Ngkana kam tangirai, ao kam na tou mwin au tua.”13 Kataia n riki n aron anne ni katoa bong ao ni karaoa ae tamaroa riki ao ni waakirake inanon te raoiroi.
Te kanimaua, ko riai n tau n taainako nakon te tembora.
I aranna bwa te kariaiakaki iroun te Uea. Ngkana ko kona n roko n te tembora ke ko aki, arom n tau ni karekea te beeba ni kariaia nakon te tembora e kateimatoa am taratara iaon bwaai aika a kakawaki, kawain te berita.
Te kaonoua, bwaina te kimwareirei ao te kukurei.
“Mangaia are, kukurei ao tai maaku,”14 e taku te Uea. Bukin tera? Ni kanga, ngkana ti a kaitaraaki n taian kanganga aika riki ni katoa tai? Ibukin te berita are e a tia ni karaoia Iesu Kristo: “Ngai te Uea I mena iroumi, ao n tei ibukimi.”15
Ao e kabwarabwara Beretitenti Nelson bwa te euangkerio ae kaokaki bon “te rongorongo ae kakimwareirei!”16 Ao e kabwarabwara, “Te kimwareirei ae ti namakinna e uarereke reitakina ma baike a riki inanon maiura ao bwaai ni kabane are ti kabotoi maiura nako iai.”17
Te kaitiua, iriira ana burabeti te Atua ae maiu.
Aio tao bon te kaitiua mai buakon baika I korei ni karinani, ma e mena imoan au iango n taraan kakawakina n te bong aei.
Iai ara burabeti iaon te aba n te bong aei! Tai kakea kakawakina bwa tera nanon anne iroum. Uringa te ataeinnaine are I taekinna mai moana. E kan ataia bwa tera bwaai aika a rangi ni kakawaki riki. Iriira te burabeti ae maiu,” I taekinna ngkekei ao I a manga katuruturua riki n te bong aei.
Ti kinaaki bwa te Ekaretia ae kairaki irouia burabeti, taan mamata, ao taan karekei kaotioti ake a weteaki iroun te Atua ibukin te tai aei. I berita bwa ngkana kam ongo ao n irii aia reirei, kam na bon aki tibanako man kawaimi. Kam na bon Aki!
Ti maiu inanon te tai are ngke ti “katiotioaki ma ni kamwaeieiaki,”18 ngke te maiu n tamnei, anua ae riai, te etieti, ao te karinerine a bane ni buakanaki. Ti riai ni karaoa ara rinerine. Ti karekea bwanaan te Uea rinanoia Ana burabeti ni katoki maakura ao n eutarake ara taratara, bwa ngke e taetae Beretitenti Nelson, e taetae ibukin te Uea.
Ti kakabwaiaki ma koroboki aika tabu ao reirei ake a kauringiira, “Ba tiaki nanomi nako nanou nako ao tiaki naba arou nako aromi nako, bon ana taeka Iehova.”19
Ngaia aron naba Naaman, te tia kaira ana tanganibuaka I-Turia, e rebera, are e tuangaki bwa te burabeti are Eritai e kona ni kamaurungnga. Eritai e kanakoa ana tia uarongorongo n tuanga Naaman bwa e na tebokia inanon te Karaanga are Ioretan itiua te tai ao e na itiaki. E kakaniko Naaman. Ni koauana iai te kaaranga ae korakora riki nakon Ioretan, ao bukin tera e kanakoa te toro ngke e bon kantaninga Eritai, te burabeti, bwa e na kamarurungnga? E boonako Naaman, ma n tokin te tai e kaumakaki irouia tooro: “Ngkana tao e tuangko te burabeti bwa ko na karaoa te bwai teuana ae abwabwaki ao ti aki ko bon karaoia?”20 N te kabane ao e a tebo Naaman itiua te tai inanon te karaanga are Ioretan ao e a marurung.
Rongorongon Naaman e kauringiira te kabuanibwai n rinean ao n anaakin mwakoro n reirei ni burabeti are e bootau ma ara iango, kantaninga, ke bwaai ake a kakaraoaki n taai aikai. E teimatoa ara burabeti n tuangiira baika ti riai ni karaoi bwa ti aonga ni kamarurungaki.
Te kabanea ni kakawaki n taeka ake ti kona n ongo, n iangoi raoi, ao iriiri bon ake a kaotaki rinanoia ara burabeti aika a maiu. I kaota au koaua bwa I a tia n tekateka ni marooro ma Beretitenti Nelson ni maroroakin bwaain te Ekaretia aika kakawaki ao bwain te aonaaba, ao I a tia n noora te kaotioti ae raanga mairouna. E ataa te Uea, e atai Kawaina, ao e tangiria bwa natin te Atua ni kabane a na ongo Irouna, te Uea Iesu Kristo.
Inanon ririki aika a mwaiti ti ongora mairoun te burabeti uatai n te ririki n te maungatabu ni kabuta. Ma kanganga aika kakaokoro n ara bong, e taetae Beretitenti Nelson n angin te tai n taian bootaki ni kaongoraa,21 bwai ni karekerongorongo,22 bootaki n taromauri,23 ao kamataata iaon kaongoraa.24 I a tia n nooria ni katauraoi ao n anga rongorongo aika nano man te kaotioti are e kaunga te kakaitau, ni karikirakea aki katinanikuaia tarira ao mwaanera ni kabane ake iaon te aba, ao ni karikirakea te rau, kantaninga, kimwareirei, maurira, ao kamarurungara ni maiura aika onoti.
Beretitenti Nelson bon te tia reitaki ae rangi n rabakau, ma ae kakawaki riki, bon ana burabeti te Atua. Anne e taraa n rangi ni mwait ngkana ko iangoia, ma e kakawaki ataakina bwa ana kairiiri e na kamanoira man waaki ni mwamwanai, aonikai, ao ana kawai n aonaaba ake a rikirake n te aonaaba ni boong aikai.25
Kariaiakan ao mwiokoan te burabeti bon ibukin te kaotioti. “Kaokan Bwaninin ana Euangkerio Iesu Kristo: Te Katanoata n te Kauabubua n Ririki nakon te Aonaaba,” are e kanakoaki n te maungatabu ni kabuta n Eberi 2020, e katuruturua bwa te Uea e bon kaira ana mwakuri. N te katanoata aei, te Moan Beretitentii ao te Kooram n Abotoro n te Tengaun ma Uoman a taku: “Ti kukurei ni katanoata bwa Kaokan Bwaai ake a tia n taekinaki n te berita ae a bon waaki nako rinanon kaotioti aika a teimatoa. E aki kona te aonaaba ni manga titebo, ngkai te Atua e na “boti bwaai ni kabane i nanoni Kristo” (I-Ebeto 1:10).”26
“Bwaai ni kabane i nanon Kristo”27 ao “bwaai aika a kaineti ma tamneiu”28 bon baika e boboto iaona te Ekaretia, te euangkerio aei, ao aomata.
I kainna ma te kakao nakoimi ni kabane n iangoi itiua “bwaai aika a kaineti ma tamneiu” ake I tibwai n te bong aei: tangira te Atua ao Iesu Kristo, ara Tia Kamaiu; tangira raom; tangiriko i bon iroum; kawakin tua; ko na tau n taainako ibukin te beeba ni kariaia nakon te tembora; kimwareirei ao kukurei; ao iriira ana burabeti te Atua ae maiu. I kaoingkami bwa kam na kinaa ao ni katiaa are waniua, ruaiwa, ao tebwina. Iangoi kawai ake ko na tibwai “bwaai” ma tabeman ake ko namakini inanom ao kaungaia bwa a na tataro, iangoi raoi, ao n ukora ana kairi te Uea.
Te “bwai ake a kaineti ma tamneiu” a rangi ni kakawaki irou n aron kakawakin akana iroumi. Bwaai aikai a kakorakora ara mwakuri n ibuobuoki n te Ekaretia inanon waaki ni maiu ni kabane. A motiki nanora nakon Iesu Kristo, a kauringiira ibukin ara berita aika tabu, ao a buokira n namakina te kamanoaki ni bain te Uea. I kakoaua bwa E tangiria bwa “a na bon aki manga oki ni baki ke n taka tamneira, ma a na bon nuai.”29 n Ana tangira ngkai ti ukora te riki bwa Ana reirei aika koaua, n riki bwa teuana ma Ngaia n aron ae Ngaia ma te Tama. N aran Iesu Kristo, amen.