E Tabu bwa Ana Bwai Iehova
Te anga karea bon tiaki taekan te “anganga ni kabane ma e nanonaki riki bwa te “angaanga nakon te Uea.
N te ririki ae nako, ngke I beku bwa te Beretitentii n te Asia North Area, E tareboniai Berertitenti Russell M. Nelson bwa n na beku bwa te Kauoman ni Kauntira n te Bitiobiriki n Tararua. E kaoa naba kainnabau, Lori, bwa e na raoniira n ara marooro. Imwiin te tareboon, ti bon tiku n aki kakoaua ngke e titiraki kainnabau, “Tera ae a karaoia kaain te Bitiobiriki n Tararua?” Imwiin ara tai n iangoia, I kaeka, “I aki ataia raoi!”
Te ririki are imwiina—ao imwiin reken namakin n taotaonaki n nano ao ni kakaitau—I a ataa raoi kaekaan ana titiraki kaain abau. Irarikin bwaai aika mwaiti, te Bitiobiriki n Tararua e tararua aia warebea ao aia mwakuri n ibuobuoki te Ekaretia ibukin te botanaomata. Te mwakuri aei ngkai e a butanako n te aonaaba ao ni kakabwaiaia natin te Atua nakon are mai imwaina.
Ngkai ti a riki bwa kaain te Bitiobiriki n Tararua, ti buokaki irouia ana taan mwakuri te Ekaretia ao tabeman riki, n raonaki ma te Beretitentii n te Bootaki n Aine, are e raoniira ni mwakuri ma te komete n ana Warebea te Ekaretia ao te Tia Kakoroi Mooti n te Maiu n Toronibwai n te Ekaretia. Ngkai ti a riki bwa kaain te komete anne, e titirakinai te Moan Beretitentii—ma Titita Sharon Eubank, are e taetae nakoira ngke tairiki—n tibwauaia ma ngkami bitaki iaon ana mwakuri ni buoka te Ekaretia ibukin te botanaomata ae bwainaki ngkai. A butiira naba bwa ti na taekina aia kakaitau—ibukina, tariu ao mwaneu, boni ngkami aika kam a tia ni karaoi mwakuri ibukiia aomata aikanne.
Ti nooria ma te raraoma te kerikaki ni kaubwain te aba man te aoraki ae te COVID-19 ni kabuta te aonaaba, ti kona ni kantaninga te kerikaaki n te angabwai n te mwane are a kona n anga Aika Itiaki. Ibukin aei, a bon rootaki naba ara membwa n te kerikaaki man butanakon te aoraki aei. Iangoia bwa tera ara namakin ngkana ti karekea ae kaokoro! Te anganano ibukiia aomata n 2020 e nooraki bwa te mwaiti ae te kabanea n rietaata ae aki rereke—ao ni birirake riki n te ririki aei. Ibukin ami tangira ae korakora, e a tia te Ekaretia ni kakoroa nanon ana kaeka ae moan te korakora man te tai are e moan ni waaki iai te Angamwane ni Buoka ibukin te Botanaomata, ma te waaki n ibuobuoki ae raka iaon 1,500 COVID inanon aaba ae raka iaon 150. Ami anganano aikai, ake kamwa tia n anga ma nanomi ni koaua nakon te Uea, a tia ni bitaki nakon kateimatoaan te maiu n aron amwarake, oxygen, bwai n aoraki, taian iti ibukiia naake tao a tuai karekei bwaai aikanne.
Te angabwai n taian bwai bon kabonganakin te tai ao te korakora are a tia membwa n te Ekaretia n anga ibukin buokaia aomata. E ngae ngke e reitinako ni korakora te aoraki, urubekebeke n te aba, kauntaeka irouia aomata, ao aki nakoraoin kaubwain te aba e a tia n reitinako ao ni kairoroia mirion aomata bwa a na kitan mweengaia. E ribotinaki ngkai man te United Nations bwa e raka iaon 82 mirion aomata n te aonaaba aika a kairoroaki bwa a na kitan mweengaia.1 N raoniia ma mirion ake a rineia bwa a na birinako man te maiu ni kainnano ao te bwainikiriinaki ni kakaea maiuraoia ma natiia, ao mai ikanne are e a tabe ni uarereke otaia ni korakoran te kangaanga n te aonaaba aei.
I kukurei ni uota au kakaitau nakoia waorantiia n aia tai ao aia tarena aika mwaiti, te Ekaretia e karaoi tienta ibukiia ianena ake a roko ao taan birinako n taabo aika mwaiti n te United States ao Eurobe. Ao te kakaitau nakon ami angabwai, ti karekei amwarake, te mwane, ao waonrantiia ni buoki aekan burokuraem aikanne mairouia bootaki riki tabeua ni kabuta te aonaaba.
I kan anga te kakaitau nakoia Aika Itiaki aika a tia n nako ni kamwarakeia, kunnikaiia, ao n iraorao ma taan birinako aikai ao ni buokiia ni katei aroia ao n toronibwai i bon irouia.
N tairikin ngkoananoa, Titita Eubank e tibwaia ma ngkami aia kekeiaki tabeman aomata Aika Itiaki n te mwakuri aei. Ngke I tabe n iangoi mwakuri aikai, ao au iango e nako n tainako nakon reirei n te anganano ao reitakin te reirei aei nakon uoua tuua n tangiran te Atua ao tangiraia kain rarikira.
Kabonganakina n taai aikai, te taeka anganano e nanonaki n ae te iango “n anganako” bwaai ibukin te Uea ao Abanueana. Ma, ni boong ake ngkoa, nanon te taeka ae te karea e irekereke riki ma taeka aika uoua aika taetae n Ratine: sacer, nanona “tabu” ke “mimitong,” ao facere, nanona “ni karaoia.”2 Ngaia are, nanon te karea ngkoa e nanonaki bwa karaoan te bwai ke anganakin temanna bwa e na mimitong.”3 N iangoia n aron aei, te anga karea bon te waaki ibukin karekean te mimitong ao kinaakin riki te Atua, bon tiaki te bukamaru ke te katei ae kakaraoaki “te angaanga” bwaai ibukin te Uea.
E taku te Uea, “I tangiria bwa e na iai iroumi te [tangira ae kororaoi] riki ao tiaki te angabwai; ao ana atatai te Atua nakon kabuekan karea.”4 Te Uea e tangiriira bwa ti na itiaki,5 ao ni kaonaki n te tangira ae kororaoi,6 ao waaki nako bwa ti aonga ni Kinaa.7 N aron are e reireiniira Bauro, “Ao ngkana tao I kabanei au bwai nako ni kamwarakeia akana aki kaubwai, ao ngkana tao ianga rabwatau bwa e na kabuokaki, ao n akea te tangira ae kororaoi, ao akea rakau iai.”8 Ni kabaneana, e tangira nanora te Uea; E tangiriira bwa ti na riki bwa aomata aika boou inanon Kristo.9 N aron are e tuangiia tenaan Nibwaite, “Ao kam na anga bwa ami karea nakoiu te nano ae uruaki ao te tamnei ae raraoma.”10
Te anga karea bon tiaki taekan te “anganga ni kabane” ma e nanonaki riki te “angaanga nakon” te Uea. E koreaki iaon te tabo n rinnako n ara tembora nako te taeka ae kangai “E tabu bwa a na bwai te Uea: ana Auti te Uea.” Ngkana ti noori ara bertia ake ti karaoi rinanon ara anga karea, ao ti kamimitongaki rinanon ana tangira Iesu Kristo, ao iaon bao ni karea ake inanon te tembora ae tabu, ma nanora aika uruaki ao tamneira aika raraoma, ti anga mimitongira nakon te Uea. Unimwaane Neal A. Maxwell e reirei: “Kanakoan ana kantaninga temanna [ke nanona11] bon tii ngaia te bwai ae okoro iroura are ti kona ni kawenea iaon ana bao ni karea te Atua. … Ma, ngkana ti anga nako ngaira, man kariaia nanora bwa e na anaaki nakon ana kantaninga te Atua, ao ikanne are ti bon angaanga raoi nako Ina!”12
Ngkana ara anga karea ibukiia tabeman e taraaki man te itera are ko “anga ni kabane,” ao ti na kona n taraia bwa te karawawata ao ni kabwara nano ngkana ara karea aikoa kinaaki ke n reke kaniwangaia. Ma, ngkana a nooraki man te itera are te “angaanga nakon” te Uea, ara karea a na kona n riki bwa bwain tituaraoi, ao e na riki kakukurein te mwakuri n akoi bwa kaniwangana. Kainaomatakira man kainnanoan te tangira, te butimwaeaki, ke te kakaitau mai irouia tabeman, e na kona ni karika ara anga karea bwa kaotan nanora ae itiaki ao man nano nakon ara Tia Kamaiu ao raora nako. Aanga nako n anga karea n raonaki ma te kainikatonga e na bon kangaraoa arora bwa ti na kona n namakina te kakaitauaki, te nano n akoi, te kimarimari, ao te kukurei.13
Te bwai ae karaoaki bwa e na mimitong—e kona n ae maiura, kaubwaira, ara tai, ngke ara tarena—tiaki man ara angaanga ni kababanea ma bon man katabuakina14 nakon te Uea. Ana mwakuri n ibuobuoki nakon a na botanaomata te Ekaretia bon te bwai n tituaraoi. Bon kanoan aia karikoriko, aia angabwai aomata Aika Itiaki, bon kaotan ara tangira ibukin te Atua ao Natina.15
Steve ao Anita Canfield bon taan tei Ibukiia Aika Itiaki ni Boong aika Kaitira ni kabuta te aonaaba ake a tia n rinanona ma kakabwaia ake a reke man te angaanga nakon te Uea. Ngkai bon mitinare ngaiia ibukin mwengaraoia ao katoronibwaiaia aomata, ao a tuangaki tenaan Canfields bwa a na katauraoi buoka ibukiia koraki ake a birinako mai abaia ao ni maeka n taabo iaon Eurobe. Inanon maiuna ni mwakuri, ao e a tia Titita Canfield n riki bwa te tia katamaroa inanon auti ma ana tamnei aika kinaaki n te aonaaba, ike e a kabooaki iai irouia kaubwai bwa e na katamaroai aia auti. Ma e aki kantaningaia bwa e na kamenaaki ibuakoia aomata aika kaitaraan raoi are e taneiai iai, ngke e beku ibukiia aomata aika kuri bane n akea kaubwaia. N ana taeka, ao e kaota te okoro “kawai aika maabora a oneaki nakon kawai aika bareka,” ao ni karaoan aikai ao a noora te mwakuri ae akea kabotauana, ngke taangaia a karaoa aia reitaki n iraorao—ma te tangira ao te mwamwannano—ma te koraki ake a mena iaan aia tararua.
A nooria tenaan Canfields, “Ti aki namakinna ae titebo bwa akea te ‘bwai ae ti a tia n anga’ ibukin ara mwakuri ibukin te Uea. Te bwai ae ti tangiria bwa ti na ‘anga nako’ Ina ara tai ma korakorara ni kakabwaiaia Natina n te kawai are e taku te Uea bwa a riai. Inanon ara tai ni mwakuri ma tarira ao mwanera, tein tarakira aika kakaokoro—rongorongora aika kakaokoro ke kaubwaira—e tarairiaoaki, ma tia noori ake I nanora n tatabemaniira nako. Bon akea mwaitin ara konabwai ke kaubwaira ae kona ni kabotauaki ma bwaai ake ti taneiai mangaai, te beku ibuakoia natin te Atua aika tenaan kabanea n nanorinano, e a anganiira te korakora.”
E a tia n riki karakinaia tenaan Canfields ao tabeman riki aika titebo ma aekakiia bwa buokau ni kakaitau nakon manewen teuana kunaia ataein te Moanrinan:
“Anga” e taku te raanga n ran,
Ngkai e tabe n ruo rikaaki man te tabuki;
“I ataia, bwa I uarereke, ma n taabo ake I nako iai
Ao a maiu tenaan tawaana.”
Eng, ti uarereke ngaira ni kabane, ma ngkana ti kawaekoaira n anga ngaira nakon te Atua ma raora ni kabane, n taabo ake ti nako iai ao tenaan maiu a na kaonaki ao ni kakabwaiakaki.
Kateniuan kibun te anene aei e aki rangi n aneneneaki ma e motikaki ma te kairoro ae aanaki n te tangira ae kanga:
Anga, n ai aron, ae anga Iesu;
Iai te bwai ae ti bane ni kona n anga.
Karaoia n ai aron ae a karaoia tenaan raanga n ran ma tenaan uee:
Bwa bukina bwa e maiu te Atua ao tabemwaang.16
Tariu ma Mwaneu aika tangiraki, ngkai ti maiu ibukin te Atua ao tabemwaang man ara angaanga rinanon, ara tai, ao eng, ao bon ngaira, ti tabe n anga te maiu nakon te aonaaba, n anga te kukurei nakoia natin te Atua, ao inanon te tai, e rikirake arora n tabu.
Ngke e kakabwaiai ngkami n ae mwaiti te Uea ibukin ami anga nano aika kam a tia n anga nako Ina ae akea tiana.
I ataia bwa E maiu te Atua. “Te Aomata ae Tabu bon arana.”17 Iesu Kristo bon Natina, ao te tia angaanga bwain tituaraoi Ngaia aika raraoi.18 Ao ti na karikaki bwa aomata aika tabu man Ana tangira ao man kawakinan ara berita ao n teimatoa n angaanga ara tangira ao tabura nakon te Uea.19 N aran Iesu Kristo ae tabu, amen.