Te Katauraoi ibukin Kauoaokin Kristo

N aron are e koreaki n Ana Boki Moomon, onoua te ririki imwain bungiakin Iesu Kristo, Tamuera, te Reimwanaite, e taetae ni burabeti nakoia ana aomata Nibwaai, ake a riki ngkai bwa aomata aika a kaitarai,¹ kanikina ake a kaoti n raona bungiakin ara Tia Kamaiu. Te kangaanga, angiia Nibwaite aki butimwaai kanikina akanne ibukina bwa “e bon aki riai bwa te aomata n aron Kristo e [na] roko.”²

Te kananokawaki, ni kaineti ma rekooti n koroboki aika a tabu, angiia Iutaia, n aron naba aei, aki kan butimwaea ae te mwaane ae arana Iesu, man te kaawa ae uarereke ni kawan Kariraia, bon te Mesia ae e a kaman kakantaningaaki.³ Iesu, are e bon roko ni kakoroa bukin taeka ni burabeti aika a mwaiti mairouia burabeti n Ebera, e aki butimwaeaki ao e tauraki bwa, n aron are e reirei te burabeti Iakobwa n ana Boki Moomon, Iutaia a “tarai bwaai aika akea manenaia.” N tokina, Iakobwa e taetae ni burabeti bwa “e a tia n anaa ana oota te Atua mai irouia, ao e a anganiia bwaai aika a mwaiti aika a aki kona n oota iai, ngkai bukina a tangiri. Ngkai a tangiri, ao e karaoia te Atua ngkai a tangiria, bwa aonga ni bwaka.”⁴

E kamiimii, bwa bon akea te reirei, akea te kakai, ao akea kaotiia aneran karawa, n aron are a nori Raman ao Remuera,⁵ ae e taraa ni iai mwaakana ni kairoroia tabeman aomata bwa a na bitii aia waaki, aia taratara, ke aia koaua n te bwai ae koaua. Anne te bwai ae ririki ngkana reirei ke kakai aki bootau ma wanawanan te aomata are irouna, baike e tangirii, ke ana iango.

Taiaoka nora te kaokoro inanon uoua koroboki aika a tabu, te moan mairoun te Abotoro Bauro n taekini boong aika kaitira, ni kabwarabwara aia kawai aomata, ao te kauoua mairoun Aramwa te burabeti are e taekinna bwa e kanga te Atua ni karaoa Ana mwakuri ibuakoia aomata. Te moan mairoun Bauro:

“Ma kona ata aei, ba ane a na roko tai aika kamamate ni boong aika kaitira.

“Ba ane a na riki aomata ba taan tangiria i bon i rouia, n tani kani manemane, tani kamoamoaia, tani kainikatonga, tani taetaebuaka te Atua, taan aki iri nanoia aia karo, taan bangaomata, taan aki itiaki,

“Tani babakaine, tani kainamatoa, tani winnanti, tan aki tau bangiia, tan tiritiri, tan riba te raoiroi,

“Tani kamwanea te aba, tan tautau aroia, tan nanorieta, tan tangira riki te mwaie nakon te Atua; …

“Aika aki toki n reirei, ao e bon aki kona naba n reke i rouia atakin te koaua.”⁶

Ao mai iroun Aramwa, e taekina aan ana reirei ana euangkerio Iesu Kristo: “Ao ngkanne tao ko na taku bwa iai te burababa irou; ma nooria I taku nakoim, bwa a riki bwaai aika a korakora man bwaai aika a uarereke man aki kaangaanga; ao bwaai aika a uarereke n angiin te tai a kaminoia aika a wanawana.”⁷

Ti maeka n te aonaaba n taai aika e kaonaki n te ataibwai ae korakora ao te konabwai. E ngae n anne, bwaai aikai aki toki ni kabuanakoa te koaua ae bon akea aaia ae nene are a kateaki iaona. Te kangaanga, bwa rabakau ao atatai aikai aki kairiira nakon te koaua ao nakon te Atua ao te mwaaka ni karekea te kaotioti, ni karekea te atatai n tamnei, ao ni karikirakea onimakinan Iesu Kristo are e kairiira nakon te kamaiuaki.⁸

Ti kauringaki n ana taeka te Uea nakon Tooma ao Abotoro ake tabeman n te tairiki are imwaain ae e anga Ngaia bwa te karea ni kamaiu: “E taku Iesu nako ina, Boni Ngai te kawai, ao te koaua, ao te maiu: akea ae nako n te Tama bwa ti I Rou.”⁹

Ibukiia naake iai mataia n noraba, taningaia n ongo, ao nanoia n namakin, riki nakon are mai imwaina, ti kantaningaaki bwa tina butimwaea te koaua are ti a rang uakaan ma Kauaokin Iesu Kristo. E koaua, e korakora te kangaanga ae na riki nakoia ake iaon te aonaaba n tain Kauaokina, ma n te aro aei, naake a kakaonimaki a riai n aki maaku.

N te tai aei N a taekina are man te Church Gospel Topics iaan atuna ae “Kauaokin Iesu Kristo”:

“Ngkana e manga oki te Tia Kamaiu, E na roko inanon te mwaaka ao te mimitong n tautaeka n te aonaaba bwa Abanueana. Kauouan Okina e na mwakena moan waakin te Mereniam.

“Te Kauaoki e na kakamaaku, kananokawaki irouia ake a buakaka, ma e na riki bwa te bong n rau irouia aika raoiroi. E katanoata te Uea:

“‘Bwa naake a wanawana ao n tia ni karekea te koaua, ao n tia n anaa te Tamnei ae Tabu ibukin kairaia, ao n tuai ni mwamwanaaki—e koaua ae I tuangkami, a na bon aki koreaki ao n teweaki nako nanon te ai, ma a na maiu n te bong anne.

“‘Ao a na anganaki te aonaba bwa a na bwaibwai iai; ao a na kariki ma ni korakora, ao a na ikawai rake natiia n akea aia bure ibukin te kamaiuaki.

“‘Bwa e na mena i buakoia te Uea, ao e na mena mimitongina i aoia, ao e na riki bwa aia uea ao aia tia anga tua’ (Reirei ao Berita aika Tabu 45:57–59).”¹⁰

Inanon ara katauraoi ibukin Kauaokin Iesu Kristo, I karekea te koroboki ae kakaawaki, karaunano ibukiia aika a kakaonimaki are e anaaki mairoun te burabeti n te O-Tetemanti ae Amota: “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti.”¹¹

N te namakin aei, ana burabeti te Uea ni boong aikai nakon te aonaaba, Beretitenti Russell M. Nelson, e a tia n anganiira te reirei ae kairaki n te tamnei: “Ana euangkerio Iesu Kristo bon te euangkerio n rairannano. Ibukin Ana Mwakuri ni Kamaiu te Tia Kamaiu, e kaoira Ana euangkerio bwa ti na teimatoa ni bitaki, n rikirake, ao n itiaki riki. Bon te euangkerio n te kantaninga, ni kamaiu, ao n rikirake. Ngaia are, te euangkerio bon te rongorongo ae kakukurei! A kukurei tamneira n touan mwaneka aika uarereke ni waaki rake.”¹²

I taekina ma te koaua bwa e bon koaua ae iai te Atua ao iai kakai aika riki inanon maiuia aomata aika rietaata ke n rinano nakoaia. E koaua, a mwaiti taneiai aika a tabu aika aki bati n tataekinaki, bwa tao ibukina bwa a roko mai ieta ao e na kona n reke bwa te kakaniko irouia tabeman aika aki rang n atatai.

Ni kaineti ma aio, te kabanea ni burabeti man Ana boki Moomon, Moronaai, e kauringiira:

“Ao riki I taetae nakoimi aika kam kakewei ana kaotioti te Atua, ma n taku bwa a toki, bwa akea riki kaotioti, ke taeka ni burabeti, ke bwai n tangira, ke te katoki aoraki, ke te taetae n neewe, ke rairan neewe;

“Nooria, I kangai nakoimi, ane e kakewei bwaai aikai e aki ata ana euangkerio Kristo; eng, e bon tuai ni wareki koroboki aika tabu; ngkana e a tia ao e bon aki oota iai.

“Bwa tiaki bwa ti warekia bwa te Atua titebo ngkoananoa, ngkai, ao n aki toki, ao akea te kakaokoroaki ke te bibitaki irouna?”¹³

I kaina au maroro ma ana katanoata n taetae ni burabeti ae riinga te nano te Burabeti Iotebwa Timiti, are e anga n uakaan ma banen ana mwakuri ngke e ingainga nakon Kauaokin Iesu Kristo: “Tiaki ti na waaki nako inanon te mwakuri ae korakora aei? Waaki rake ao tiaki rikaaki. Ninikoria, tariu [ao N na kariniia, mwaaneu]; ao waaki, waaki nakon te tokanika! E riai nanomi ni kimwareirei, ao n rangi ni kukurei.”¹⁴ Are I kakoaua n aran Iesu Kristo, amen.