“Ko Tangirai Riki Nakoia Uakai?”

Inanon Nobembwa 2019, ngai ao raoraou ti kawara te Aba ae Tabu. N ara tai ikekei, ti wareka ma ni kamatebwai kiibu ake a taekina maiun Kristo. N te ingabong teuana ti tei i meangmainikun naman Kariraia are bon te tabo are e kaitibo iai Iesu ma Ana reirei imwin Mangautina.

Imwin Mangautin Iesu, ngke ti warekia i nanon Ioane mwakoro 21, Betero ao raona n abotoro a aki kona n te tairiki anne.¹ Ngke e ingabong, a noora te mwaane ae tei i mataniwin te aba ao n tuangia bwa a na kabwaka aia karaun n iteran te booti. A bon rangi ni mimi, bwa e onrake aia karaun n te aro ni kakai.²

A waetata ni kinaa te mwaane aei bwa bon te Uea, ao a kawaekoa n nako ni kamauria.

Ngke a aea aia karaun nako mataniwin te aba, e taku Iesu “Nakomai ao ti a amwarake.”³ E taku Ioane “ngke a tabe n amwarake, E taetae Iesu nakon Timon Betero, Timon, natin Iona, ko tangirai riki nakoia uakai?”⁴

Ngke I tei i mataniwin te aba aei, I noria bwa ana titiraki te Tia Kamaiu bon teuana te titiraki ae rangi ni kakawaki are tao E na titirakinai n taai rake aikai. Kanga ai aron ae I ongo bwanaana nakoiu, “Russell, ko tangirai riki nakoia uakai?”

Ko titiraki bwa tera ae nanonna Iesu n ana titiraki nakon Betero ae “Ko tangirai riki nakoia uakai?”

Ngkana ti kauaea te titiraki aei nakoira ni boong aikai, tao e na titirakinira te Uea bwa mwaitira taben nanora ni baika a tamaroa ao aika a aki ake a anai nanora ao ara tai. Tao e na titirakinira bwa ti tangiria riki nakon bwain te aonaba aei. Tao te titiraki aei e kaeineti ma te bwai ae e kakawaki iroura n te maiu aei, antai ae ti iriria, ao arora n ara reitaki ma ara utu ao kaain rarikira. Ke tao E tuangira bwa tera ae e anganira te kimwareirei ma te kukurei.

Tao a anganira te kimwareirei bwain nako te aonnaba aei, te kukurei, ao te rau are e anga te Tia Kamaiu nakoia Ana reirei ao are E anga nakoira? Bon tii Ngaia ae kona n anganira te kimwareirei, te kukurei, ao te rau rinanon kaotan ara tangira nako Ina ao iriiran Ana reirei.

Tera ara kaeka nakon te titiraki aei “Ko tangirai riki nakon uakai?”

Ngkana e rababa riki ara atatai n te titiraki aei, ti na karekea te tamaroa nakoia kaain ara utu, kaain rarikira, aomata, kaain te Ekaretia, ao natin te Atua mwaane ma aiine.

N rorou aei, I a tia ni kaei taunimate aika a bati. I ataia bwa e bati iroumi ae e nora te bwai ae I noria. Ngkana ti uringa maiun ara koraki ke raoraora are e motirawa, e aki kakaraoaki ae te tia maroro e na taekina buburan ana auti, mwaitin ana kaa, ke mwaitin ana mwane. A aki naba taekin baike ko katokai n te intanete. N angin taunimate, a boboto maroro n aia reitaki, aia ibuobuoki nakoia aomata, aia atatai ma baike a rinanoi, ao aia tangira ibukin Iesu Kristo.

E na tai bure am koaua n aei. I aki kangai bwa e bure karekean te auti ae tamaroa ke te kaa ae kan ke kabonganan te intanete. Te bwai ae I taekinna bwa n tokin te tai, bwaai aikai e uarereke manenaia nakon are tangiran te Tia Kamaiu.

Ngkana ti tangiria man iriria te Tia Kamaiu, ti kaotia bwa ti onimakinna. Ti raira nanora. Ti ira Ana katooto ma ni bwabetitoaki ao ni karekea ana bwai n tituaraoi te Tamnei ae Raoiroi. Ti teimatoa ni karokoa te toki ao ti teimatoa n te euangkerio. Ti kabwarai aia bure ara koraki ao kaain rarikira ao ni kamauna te nano ni kairiribai are ti tautaui. Ti karaoa ara kabanea n tamaroa ni kawakin Ana tua te Atua. Ti uaiakina te ongeaba. Ti karaoi ma ni kawakin ara berita aika tabu. Ti karineia tamara ma tinara. Ti katikui bwain te aonaba aika a bubuaka. Ti katauraoira i mwain Kauaokina.

Inanon “Te Kristo Ae Maiu: Aia Koaua Abotoro,” ti wareka ae kangai: “[Iesu]e na manga oki nakon te aonnaba. … E na tautaeka bwa aia Toka Tooka ao n tautaeka bwa Ueaia Ueea, ao a na boboraki ni kabane bubuanwae ao neewe ni kabane a na taetae n nebonebo nako Ina. Ngaira n tatabemanira e na motikaki taekara i Rouna ni kaeineti ma ara mwakuri ao nanora.”⁵

Ngkai ngai naba te Abotoro are e tiaaina “Te Kristo ae Maiu”, I kona ni kangai bwa Iesu “bon te oota, te maiu, ao te tia kamaiua te aonnaba”⁶ e kakorakora nanou n tangiria ni katoa bong.

I kakoaua bwa e maiu Tamara are i Karawa ao Iesu Kristo. I kakoaua bwa A tangirira. E taku koroboki aika a tabu “Ba E tangiria aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”⁷ E taku naba koroboki aika a tabu bwa Iesu “e rangi n tangira te aonaba n te aro are E anga oin maiuna, bwa aonga aomata ake a kakoaua n riki bwa natin te Atua.”⁸

E rangi n tangirira Tamara are i Karawa n te aro are E katauraoa Ana babaire ni kamaiu ao te Tia Kamaiu bon botona. Ao e rangi n tangirira Iesu n te aro are n te Kauntira i Karawa, ngke E titiraki Tamara are i Karawa, “Antai ae N na kanakoa?” Iesu Kristo bon te Moan Buangiaki ibuakoia natin Tamara are i Karawa aika naati n tamnei, e kaeka “Aio ngai, kanakoai.”⁹ E taku, “Tamau, e na karaoaki nanom, ao am bwai te mimitong n aki toki.”¹⁰ E anga nanona Iesu bwa e na riki bwa ara Tia Kamaiu ao te Tia Kabooiora bwa ti aonga ni kona n riki n ai Aroia ao n Okiria.

Kiibu aika uoua aikai a reirei naba nakoira bwa ngkana ti kan okiria ti ria ni kakoaua. Ti riai ni kakoaua Iesu ao ana babaire ni kakukurei te Atua. Te aro n kakoaua bon tangiran ao iriran ara Tia Kamaiu ao kawakina tuua, i nanon te kataaki ma te kangaanga.

E mangaongao te aonaba ni bong aikai. Iai kananokawaki, bobuaka, karawawata, ao kariri.

Beretitenti Dallin H. Oaks, ngke e taetae n 2017, e taku: “E matoa taai aikai, e kaonaki n te raraoma: taiani buaka ma ananga ni buaka, butin te aoraki ae ewewe, te mautakataka, te ieka, ao te kabuebue n te aonnaba.”¹¹

Ti riai n aki kakea ara tangira ma ara onimaki iroun Iesu, e boni ngae ngke e taraa ni matoatoa. A bon aki kona ni mwaninga taekara Tamara are i Karawa ao Iesu. A tangirira.

N Okitobwa ae nako, Beretitenti Russell M. Nelson e reirei nakoira kakawakin moanibwaian Tamara are i Karawa ao Iesu Kristo inanon maiura. E reirei nakoira Beretitenti Nelson bwa nanon te taeka ae Iteraera bon “katokanikaian te Atua.”¹²

E anga titiraki aikai: “Ko tauraoi ni katokanikaia te Atua inanon maiu? Ko tauraoi ngkoe ni kariaia te Atua bwa temanna ae te kabanea ni kakawaki n anaa nanom inanon maium? Ko kariaia Ana taeka, Ana tua, ao Ana berita bwa e na anainanomi ni baike kam karaoi ni katoa bong? Ko kona ni kariaia bwanaana bwa te moanibwai iaon bwaai riki tabeua? Ko tauraoi ni kariaia baike E kainnanoi bwa ko na karaoi bwa a kakawaki riki nakon iango riki tabeua? Ko tauraoi ni moanibwaia Nanona nakon oin nanom?”¹³

Ti riai n uringnga n tainako bwa te kukurei ni koaua e reke man ara reitaki ma te Atua, ao Iesu Kristo, ao boni marenara.

Teuana te kawai are ti kaota iai ara tangira man reitakira ma ara koraki, raoraora, ao kaain rarikira ni karaoi baika a uarereke n ibuobuoki imarenara. Karaoi bwaai ake a na karaoiroa riki te aonnaba.

Tera bwaai ae ko kona ni karaoi inanon maium ni kaotia bwa e moanbwai tangiran te Atua iroum?

Ngkana ti kabanea ara tai irouia kaain rarikira n aron are E tangiria, ti na bon tangiria kaain rarikira.¹⁴

N na titiraki kaua, tera am kaeka nakon te titiraki aei “Ko tangirai riki nakoia uakai?”

Ngkai ko karaua n iango te titiraki aei n ai arou, au tataro bwa ko na kaeka n ai aron Betero “Eng, te Uea; ko bon ataia ae I tangiriko”¹⁵ ao ko kaota aei man tangirakin ao te beku iroun te Atua ao kaain rarikim.

I kakoaua bwa ti kakabwaiaki ngkai ti karekea ana euangkeiro Iesu Kristo are e na kairira aron maiura ao arora ibon imarenara. Irouna, ti noria bwa ni kabane natin te Atua aiine ma mwaane a kakaawaki irouna.

I kakoaua bwa Iesu Kristo bon ara Tia Kamaiu ae bati n tangiraki. Boni Ngaia ana Rikitemanna te Atua. Ao I a atong bwaai aikai ma te nanorianano n aran Iesu Kristo, amen.