Te Kakaae n te Onimaki ae Kaniwanganaki
I kaoira ni kabane bwa ti na teimatoa ni karikirakei ara onimaki iroun Kristo, are e reitinako ni biti maiua ni kabane ake a Ukoukoria.
Ni moa man 1846, ngaa ma ngaa bwaeoniia aika mwane, aine, ao ataei a mwnananga nako maeaon Tion. Aia onimaki ae korakora e kakorakora nanoia. Tabeman, aikoa roko n aia tabo bwa a mate naba inanon kawaia. Tabeman, a rinanon te kataaki ae korakora, a kataia ni kan roko i moa n aia onimaki.
Man aia mwakuri, rooro ake imwiina, au utu a kakabwaiaki n ana euangkerio Iesu Kristo ae koaua.
N aron naba temanna te ataeinimwaane, are n na taekinna imwiina, te 14 au ririki ngke I moanna n titiraki ibukin te aro ao au onimaki. I kaea te taromauri n te aro teuana ae kaan ma au auti, ma iai nanou ni kan kawari aaro aika kakaokoro.
Te bwakantaai teuana, I noriia uoman ataeinimwaane ma kunnikaia aika roro ao aia kabaraki ae mainaina n rin inanon ana auti kaainrariku. Ataeinimwaane aikai a taraa—n onoti.
Te bong are imwiina I kaitibo ma kaain rariku, Leonor Lopez, ao n titirakinna ibukiia mwaane ake uoman. Leonor e kabwarabwara bwa mitinare man Ana Ekaretia Iesu Kristo Ibukiia Aika Itiaki ni Boong aika Kaitira. E taekinna nakoiu bwa a bwabetitoaki ana utu nakon te Ekaretia teuana te ririki imwaina. Ngke e ataia bwa I kan ongora, e kaoai bwa n na kaitibo ma mitinare ao n reirei taekan te Ekaretia.
Uoua te bong imwiina, I raoniia ana utu Lopez ni kaitibo ma mitinare. A kabwarabwaraia bwa Unimwaane John Messerly mai Ogden, Utah, ao Unimwaane Christopher Osorio mai Walnut Creek, California. I bon aki kona ni mwaninga taekaia.
Ma ngke 14 au ririki, Unimwaane Messerly e tangiria bwa n na nako ma mangaia nakon mweengau bwa e aonga tinau n ataia bwa tera te bwai ae a reireinai. Ikekei, e kabwarabwara bwa a roko bwa a na tibwaua rongorongon Iesu Kristo ao ni bubutia ibukin ana kariaia bwa a na reireinai. E kukurei tinau ao e raoniira ngke a reireinai.
Mitinare a tuanga Leonor bwa e na karaoa te tataro. Te tataro aei e roota nanou ibukina bwa e aki taekin taeka aika okioki aika e kamatenanoaki ma taeka aika a nako mai inanona. I namakinna ae kanga e bon taetae raoi ma Tamana are i Karawa.
Ngkanne mitinare a reireiniira taekan Iesu Kristo. A kaota Tamneina ae roota nanou ibukina bwa bon tamnein Kristo ae maiu, ae manga uti.
A teimatoa, n reireiniira bwa e kanga Iesu ni katea Ana Ekaretia n taai ake ngkoa, ma Ngaia ao Abotoro ake tengaun ma uoman. A reireiniira taekan Kitanan te koaua—e kanga te koaua ao ana kariaia Kristo n tia ni uotaki nako mai iaon te aba imwiin mateia Ana Abotoro.
A taekinna nakoira rongorongon te ataeinimwaane ae 14-ana-ririki Iotebwa Timiti are, ni moan 1800, e kawari aaro aika kakaokoro ni kakaea te koaua. Ngke e waaki nako te tai, ao e a moanna n aki koaua n ana iango Iotebwa. Imwiin warekana inanon te Baibara ae ti kona ni “butia te Atua”1 ibukin te wanawana, Iotebwa, e karaoia n te onimaki, e nakon te buakonikai n tataro ao n titiraki bwa tera te ekaretia ae na kaainna.
Temanna te mitinare e wareka ana rongorongo Iotebwa n te bwai ae riki ngke e tataro:
“I noora te boua ae te ota I etan raoi atu, e riaon otan taai, ae e karaurau n ruo ni karokoa e toka iaou.
“… Ngke e tiku te ota i aou I noriia uoman Aomata, ake raneaneaia ao mimitongiia e aki kona ni kabwarabwaraaki, n tei n taarere i etau. Temanna mai ibuakoia e taetae nakoiu, ni weteai n arau ao n taku, ni kotea are temanna—Natiu ae Tangiraki Teuaei. Ongo Irouna!”2
N tain te reirei anne, te Tamnei e kamatoai nakoiu koaua tabeua.
Te Moan, e kakauongo te Atua nakoia Natina ni kabane nakon aia tataro, ao e kaukaki karawa nakoia ni kabane—tiaki ti nakoia tabeman.
Te Kauoua, te Atua te Tama, Iesu Kristo, ao te Tamnei ae Raoiroi bon teniman n aomata aika kakaokoro, aika a katiteuanaki n Aia kaantaninga “ni karekea te aki mamate ao te maiu ae akea tokina ibukin te aomata.”3
Te Kateniua, ti karaoaki ni katotongan te Atua. Tamara are i Karawa ao Natina, Iesu Kristo, iai rabwataia are te iriko ao te rii n ai arora, ma A mimitong ao a kororaoi, ao te Tamnei ae Raoiroi bon rabwatan te tamnei.4
Te Kaua, rinanon Iotebwa Timiti, Iesu Kristo e kaoka Ana euangkerio ao te Ekaretia ae koaua nakon te aonaaba. Te kariaiakaki n te nakoanibonga are anganaki ana Abotoro Kristo 2,000 te ririki n nako bon ti tebo ma te nakoanibonga are e angnaki Iotebwa Timiti ao Oliver Cowdery iroun Betero, Iakobwa, ao Ioane.5
Kabaneana, ti reiakina te kakoaua riki teuana iroun Iesu Kristo: ana Boki Moomon. Ae koreaki irouia burabeti n taai ake ngkoa, e taekin rongorongoia aomata ake a maeka n aban Amerika imwain, n tain, ao imwin bungiakin Iesu. Ti reiakinna mai iai aroia n ata, n tangira, ao n neboa Kristo, are e kaoti nakoia bwa te Tia Kamaiu ae mangauti.
E kamwaingai te Tamnei n ae korakora ngke I reirei ana katanoata te Tia Kamaiu nakoia: “Nooria, bon Iesu Kristo Ngai, are a kakoaua ibukina burabeti bwa e na roko nakon te aonaba.”6
Mitinare anganiira ana Boki Moomon bwa ara boki. Ti wareka ao ti kariaia te kakao ae kuneaki ni banen ana Boki Moomon, are e kangai taekana:
“Ao ngkana a reke bwaai aikai iroumi, kaungai nanomi bwa kam na butia te Atua, te Tama ae akea Tokina, n aran Kristo, ngkana arona bwa a koaua bwaai aikai; ao ngkana kam bubuti ma te nano ae koaua ma nanomi raoi, ao te onimaki iroun Kristo, e na bon kaota te koaua nakoimi, ni mwaakan te Tamnei ae Raoiroi.
“Ao ma ni mwaakan te Tamnei are e Raoiroi ao kam na kona n atai koauan bwaai ni kabane.”7
E a kaan ngkai 45 te ririki man te tai are ngke tinau ao ngai ti moana atakin kakukurein ao mwaakan reken te onimaki iroun Kristo. Bon ibukin aia onimaki iroun Kristo are a tibwaua iai aia onimaki ae boou ana utu Lopez ma ngai. Bon ibukin aia onimaki iroun Kristo are a kitana iai mweengaia mitinare aika uoman aikai n te United States ni kakaea tinau ao ngai. Bon aia onimaki raoraou aika tangiraki aikai ae a unika uaan te mwakeke n te onimaki inanora are e a tia n rikirake bwa te kai ae korakora ni kakabwaiaia aika akea tokiia.
Inanon ririki ni kakabwaia aikai, ae ti ataia, n aron are e taekinna Beretitenti Russell M. Nelson: “Bwaai aika tamaroa n te maiu aei—kakabwaia ake a kona n reke—a moanaki man te onimaki. Kariaiakan te Atua bwa e na moanibwai inanon maiura e moanaki n te onimaki are E tauraoi n anganiira. E moanaki te rairannano ni koaua n te onimaki bwa iai mwaakan Iesu Kristo ni kaitiakiira, kamarurungiira, ao ni kakorakoraira.8
I kaoira ni kabane bwa ti na teimatoa ni karikirakei ara onimaki iroun Kristo, are e a tia ni biti maiun tinau ae tangiraki ao ngai ao a reitinako ni biti maiuia ni kabane ake a Ukoukoria. I ataia bwa Iotebwa Timiti bon te BurabetiI ibukin Kaokan Bwaai, bwa Beretitenti Nelson bon ara burabeti n te bong aei, bwa Iesu bon te Kristo ae maiu ao te Tia Kabooi Maiura, ao bwa e maiu Tamara ae i Karawa ao e kaekai aia tataro Natina ni kabane. I kakoauai koaua aikai n aran Iesu Kristo ae tabu, amen.