Te Onimaki ni Bubuti ao Ngkanne Karaoana

Tariu ao mwaaneu aika kam tangiraki, I kakaitau ngkai I kona n taetae nakoimi n te tetere n te maungatabu ni kabuta n tairikin te Kaonobong aei. N ana kabwarabwara n te maungatabu n te moaningabong aei, Beretitenti Russell M. Nelson e taku bwa “te kaotioti ae itiaki ibukin am titiraki inanomi e na karika te maungatabu aei bwa e na rang manena ao n aki kona ni mwanuokinaki. Ngkana ko tuai n ukoukora ana mwakuri te Tamnei ae Raoiroi bwa e na buokiko n ongo bwa tera ae tangiria te Uea bwa ko na ongo inanon boong aika uoua aikai, I kaoko bwa ko na karaoia ngkai.”¹ I a tia ni ukoukori kakabaia ngkai I katauraoi ni karekei kaotioti ibukin raonakimi. Au tataro n onon bwa kam na karekei kaotioti mairoun te Atua.

Aron karekean te kaotioti mairoun te Atua e tuai ni bitaki man ana bong Atam ao Ewa. E teimatoa n titebo ibukiia ni kabane ana toro te Uea ake a weteaki man te moan tai ni karokoa boong aikai. Bon titebo ibukimii ao ibukiu. E karaoaki n tainako man kamwakuran te onimaki.²

Te kairae ae Iotebwa Timiti e karekea te onimaki ae tau n titirakina te Atua, ni kakoaua bwa te Atua e na kaekai kainnanona ake a nako mai nanona. Te kaeka are e roko e bita te aonaaba. E tangiria n ataia bwa te ekaretia raa ae e na kainna bwa e na kaitiakaki iai man ana bure. Te kaeka are e karekea e kaunga bwa e na teimatoa ni bubuti titiraki aika tamaroa riki ao ni mwakuri iaon taian kaotioti aika a reitanako n reke ake a waaki n roko.³

Am taneiai ae ko na karekei a kona naba n reke n te maungatabu aei. Iai ami titiraki aika kam kakaei kaekaia. Iai ami onimaki ae tau ni kantaningaia bwa kam na karekei kaeka mairoun te Uea rinanoia Ana toro.⁴ E na bon aki reke am tai n titiraki ni kabaibati ibukin karekean kaeka mairouia taan taetae, ma kam kona n titirakina Tamami ae tatangira inanon te tataro.

I ataia man te bwai are I rinanona bwa kaeka a na roko ni bootau ma kainnanom ao am katauraoi n te maiu n tamnei. Ngkana ko kainnanoa te kaeka ae kakaawaki ibukin maium ae akea tokina ke ibukiia tabeman, te kaeka e na bon roko. Ma, imwiina riki, kona bon karekea—n ai aron Iotebwa Timiti—te kaeka ni kona bwaina te taotaonaki n nano.⁵

Ngkana am onimaki iroun Iesu Kristo e a tia ni karika kamarauan nanom rinanon Ana Mwakuri ni Kamaiu, ko na kona riki n namakina ana wirikiriki te Tamnei ni kaekaan am tataro. Au taneiai ibon irou bwa te bwana ae marara—ae bon koau—ae itiaki e oota raoi n au iango ngkana I namakina te mabu inanou ao te antaeka nakon ana kantaninga te Uea. Te namakin n nanorinano anne e kona ni kabwarabwaraaki raoi n “Akea au taeka ma e na tauaki am taeka.”⁶

Karekean te kaotioti aei bon ngaia bukina ae kam na ongora aia reirei taan taetae n te maungatabu aei te bwai are e aranaki bwa ana reirei Kristo.⁷ Te kaotioti e roko nakoira ni kaineti nakon mwaitin are ti tauraoi ni karina i nanora n ana reirei Kristo ao ni waakina karaoana inanon maiura.

Ko uringnga man Ana Boki Moomon are e reireiniira Nibwaai bwa te onimaki iroun Iesu Kristo bon te king ni karekean koauan kaotioti ao king ibukin karekean koaua bwa ti iriira ana kaetieti te Tia Kamaiu. Nibwaai e koreii taeka aikai tebubua te ririki imwain bungiakin Iesu Kristo n te maiu ae mamate:

“A taetae anera ni mwaakan te Tamnei ae Raoiroi; ngaia ae a taekin ana taeka Kristo. Mangaia ae I taekina aei nakoimi, kanuaingkami n ana taeka Kristo; bwa taraia, a na tuangko ana taeka Kristo bwaai ni kabane aika ko riai ni karaoi.

“Mangaia ae ngkai I a tia n taekin taeka aikai, ngkana kam aki oota n nanoia, ao bon ibukin ae ko aki titiraki, man aki karebwerebwe; mangaia ae ko na aki uotaki nakon te oota, ma ko na mate i nanon te roo.

“Bwa taraia, N na manga tuangko riki bwa ngkana ko rin n te kawai aio, ma ni karekea te Tamnei ae Raoiroi, ao e na kaoti nakoim bwaai ni kabane aika ko riai ni karaoi.

“Taraia, aio ana reirei Kristo, ao a na akea te reirei riki teuana ae kam na anganaki ni karokoa te tai are e na kaoti iai nakoimi n te rabwata. Ao n te tai are e kaoti iai nakoimi n te rabwata ao kam na karaoi bwaai ake e taekin nakoimi.”⁸

Te Uea e na taekini bwaai rinanoia Ana toro nakoim ao nakoiu ni boong aikai ao inanon boong aika imwaira. E na tuangiira bwaai aika ti riai ni karaoi.⁹ Te Tia Kamaiu e na bon aki takaruai tua nakoimi ao nakoiu. Ngke E reirei Eria:

“Ao E taku, Otinako, ao tei iaon te maunga I matan Iehova. E katabwenai maunga te ang ae baibati ae korakora, ao e ibeibei bwa ake ae rietata I matan Iehova; ma E aki mena Iehova I nanon te ang; ao I mwini te ang ao e mwaiei aontano, ma E aki mena Iehova I nanoni mwaiein te aba:

“Ao imwina te mwaiei te ai; ao I mwin te ai te bwana ae marara n rau.”¹⁰

Ongo te bwana e roko man ara onimaki irouna. Ma te onimaki ae tau, ti na butiia ibukin kairara ma te nano ni kan nako ni karaoi bwaai ake E tuangiira.¹¹ Ti na karikirakea te onimaki n ataia bwa te bwai are e taekinna a na bon kakabwaiaaki iai tabeman ao bwa ti na kona ni kaitiakaki ni karaoana man Ana tangira ibukira.

Ngkai ara onimaki iroun Iesu Kristo e na kairiira bwa tina butiia te Tama ibukin kaekaan ara titiraki, te onimaki anne e na uota naba te Tia Kamaiu ni kamaraui nanora bwa tina ongo Ana kaetieti ao n nanomatoa ao ni kukurei n ongeaba. Imwiina tina anenei taekan te kuna ma te kimwareirei, riki ngkana e matoa te mwakuri: “Ai raoiroira Ana mwakuri.”¹²

Mwaitin ana reirei Kristo are ti karekea inanon maiura ao inanora, mwaitin naba are tina namakina n ana tangira ae korakora ao ana nanoanga nakoia ake a tuai ni karekei kakabwaia n onimakinan Iesu Kristo ke naake a korakai ni kateimatoaa. E matoa kawakinan ana tua te Uea n akean te onimaki n onimakinna. Ngkai tabeman a bua aia onimaki iroun te Tia Kamaiu, a kona naba ni kaitarai Ana reirei, n arana te buakaka bwa te raoiroi ao te raoiroi bwa te buakaka.¹³ N totokoa te kairua aei, e kakaawaki bwa oin am kaotioti ake ti karekei a booraoi ma ana reirei te Uea ao Ana burabeti.

Tariu ao mwaneu, e kainnanoa te onimaki te ongotaeka nakon Ana tua te Uea. E kainnanoa onimakinan Iesu Kristo bwa kona beku ibukiia tabeman ibukina. E kainnanoa te onimaki n otinako n tataekina ana euangkerio nakoia aomata ake a aki kona n namakina bwanaan te Tamnei ke ni kakewea koauan te rongorongo. Ma ngkai ti kamwakuri ara onimaki iroun Kristo—ao n iriira Ana burabeti ae maiu—te onimaki e na rikirake ni kabuta te aonaaba. Ibukin rabakau aika boou, tao a na mwaiti riki natin te Atua aika a na ongo ao ni kina ana taeka te Atua n te wiikente aei nakon boong ake uoua n te rongorongo.

Ma rikiraken te onimaki bwa aio Ana Ekaretia te Uea ao abanueana iaon te aba, a na mwaiti riki kain te aro aika a na kabwaka aia kabwianibwai ao anganano ni buokiia naake a kainnano, riki nakoia membwa ake a kaitarai kanganga ibon irouia. Ma te onimaki bwa a weteaki iroun Iesu Kristo, mitinare ni kabuta te aonaaba a tia ni kunei kawai n tokanikai iaon kakaewenako ake a riki man te butinaoraki ni karaoia ma te ninikoria ao te ungannano. Ao rakan aia kekeiaki, aia onimaki e a tia n rikirake ni korakora.

Kakaitara ao kataaki a tia n riki bwa karikirakean te onimaki. A koaua n tainako, riki man moan Kaokan Bwaai ao kawenean aan ana Ekaretia te Uea.¹⁴

Te bwai are e taekinna Beretitenti George Q. Cannon n ririki aika a nako a bon koaua ni boong aikai ao a teimatoa ni karokoa rokon te Tia Kamaiu ni kaira Ana Ekaretia ao Ana botanaomata: “Te ongotaeka nakon te Euangkerio e uotiia [aomata] ni kaniia ao n reitaki ma te Uea. E karekea te reitaki ae kaan imarenaia aomata iaon te aba ao ara Tia Karikibwai i karawa. E uotia nakon aia iango aomata te namakin ae e bon kororaoi aia onimaki iroun te Atua ae Mwaaka ao n Ana tatauraoi n ongo ao ni kaekai aia bubuti naake a onimakinna. N taai ni kataaki ao ni kanganga te onimaki irouna aei e riaon boona. Kangaanga a kona n roko iaon temanna ma temanna ke iaoia aomata, kabuanibwai a kona n urui aia kantaninga aomata, ma ngkan [aomata] a ongeaba nakon are e uotia te Euangkerio, a karekea te tabo n tei ae matoa, waeia a mena iaon te atibu are e aki kona ni kamwaingaki.”¹⁵

Bon au kakoaua bwa te atibu are ti tei iaona bon ara kakoau bwa Iesu bon te Kristo; bwa aio bon Ana Ekaretia, are E kairia; ao bwa Beretitenti Russell M. Nelson bon Ana burabeti ae maiu ni boong aikai.

Beretitenti Nelson e ukoukori ao e karekei kairiiri mairoun te Uea. Ngaia te banna ni katoto nakoiu ni ukoukoran te kairiiri ma te nanomatoa n iririi. Te nanomatoa n ongeaba aei nakon ana kaetieti te Uea bon anuaia aomata ake a tia n taetae ao ake a na taetae, ake a na tataro, ke n anene n te maungatabu ni kabuta n Ana Ekaretia.

I tataro bwa naake ni kabuta te aonaaba ake a mataku ke n ongora nakon te maungatabu aei a na karekea namakinan ana tangira te Uea ibukiia. Tamara are i Karawa e a tia ni kaekai au tataro are I kona n namakinna iai mwakoron ana tangira te Tia Kamaiu ibukim ao Ana tangira ibukin Tamana are i Karawa, are ngaia Tamara i Karawa.

I ataia bwa e maiu Iesu Kristo. Bon ara Tia Kamaiu ao te tia Kabooira. Aio Ana Ekaretia. Ngaia are e kairia. Ngaia, ma Tamara are i Karawa, a kaoti n aomata nakon Iotebwa Timiti n te buakonikai i New York. Ana euangkerio Iesu Kristo ao Ana nakoanibonga a kaokaki rinanon te tia uarongorongo mai karawa.¹⁶ Man mwaakan te Tamnei ae Tabu, I ataia bwa e bon koaua.

I tataro bwa kam na karekea naba te kakoaua anne. I tataro bwa kam na tuanga Tamara arei Karawa ibukin te onimaki iroun Iesu Kristo are ko kainnanoia ni karaoi ao ni kawakin berita aika a tabu are e na kariaia te Tamnei ae Raoiroi bwa e na riki bwa raom n tainako. I katuka au tangira ao au kakoaua iroumi n aran Iesu Kristo, amen.