Peb txoj Kev Txheeb Ze Vajtswv

Ib yam li Yauj nyob hauv Phau Qub, thaum ib txhia neeg raug txom nyem tej zaum lawv yuav xav tias Vajtswv tau tso lawv tseg. Vim peb paub tias Vajtswv muaj hwj chim kom pov hwm peb kom txhob raug kev txom nyem los sis muab tshem mus, tej zaum peb yuav raug ntxias kom yws yws yog Nws tsis ua li ntawd, tej zaum peb xav paub seb, “Yog Vajtswv tsis pab raws li kuv thov, kuv yuav ua li cas thiaj li ntseeg Nws?” Muaj ib lub sij hawm thaum Yauj raug txom nyem ntau heev, nws hais tias:

“Nej tsis paub hais tias Vajtswv yog tus ua tej no los? Vajtswv cuab hlua kom mag kuv.”

“Kuv cam qhov uas nws quab yuam kuv! Tiam sis tsis muaj leej twg mloog kuv hais; tsis muaj leej twg hnov kuv lub suab quaj thov kev ncaj ncees.”¹

Vajtswv teb Yauj hais tias, “Koj … hais tias kuv yog tus txhaum, koj tus tsis txhaum no los?”² Los yog hais tias, “Koj yuav hais tias kuv yog tus txhaum los? Koj rau txim rau kuv ua rau koj xav tias koj ncaj ncees los?”³ Yehauvas qhia Yauj txog Nws txoj kev muaj hwj chim tag nrho thiab txoj kev paub tag nrho, ces Yauj txo hwj chim lees hais tias Yauj tsis muaj ib yam dab tsi li cuag Vajtswv txoj kev txawj ntse, lub hwj chim, thiab kev ncaj ncees Yauj thiaj li tsis muaj cuab kav txiav txim rau tus Muaj Hwj Chim Tag Nrho.

Nws hais tias, “Kuv paub hais tias koj yog tus uas muaj hwj chim loj kawg nkaus; koj xav ua dab tsi, koj yeej ua tau huv tib si.

“… Kuv hais txog tej uas kuv tsis to taub, thiab tej yam xav tsis thoob uas kuv tsis tau paub dua li xwb. …

“Yog li ntawd kuv txaj muag kawg nkaus rau tej lus uas kuv hais, kuv thiaj mus zaum ntawm cub tshau thiab hauv av ris siab hlo tsis ua ntxiv li lawm.”⁴

Thaum kawg Yauj tau koob hmoov pom tus Tswv, thiab “tus Tswv foom koob hmoov rau Yauj lub neej zoo heev dua thaum chiv thawj.”⁵

Yeej tsis tsim nyog rau peb cov neeg txawj tuag cov uas tsis txawj pom deb kom xav tias peb muaj peev xwm txiav txim rau Vajtswv, los yog xav hais tias, “Kuv tsis zoo siab, yog li ntawd Vajtswv yeej ua ib yam dab tsi tsis yog lawm.” Rau peb, Nws cov me nyuam hauv ib lub ntiaj teb uas tau poob lawm, cov uas tsis paub pes tsawg txog yav tas los, lub caij nyoog no, thiab yav tom ntej, Nws hais tias, “Txhua yam no yeej nyob nrog kuv, vim kuv paub tej yam no txhua nrho.”⁶ Yakhauj ntuas hais tias: “Tsis txhob nrhiav kev ntuas tus Tswv, tiam sis txais lus ntuas los ntawm nws txhais tes. Vim saib seb, nej tus kheej twb paub hais tias nws ntuas nrog tswv yim, thiab nrog kev txim lij, thiab nrog kev hlub tshua uas ntau heev, thoob plaws tag nrho nws tej hauj lwm.”⁷

Ib txhia xav ua yuam kev hais tias Vajtswv tej lus cog tseg txhais tias kev mloog Nws lus yuav ua rau yus txais tau cov koob hmoov raws li lub sij hawm uas yus teem tseg. Lawv xav hais tias, “Yog kuv rau siab ua ib tug tub txib, Vajtswv yuav foom koob hmoov rau kuv kom yuav poj niam zoo thiab muaj me nyuam” los sis “Yog kuv tsis ua kuv cov ntawv thaum Hnub Caiv, Vajtswv yuav pab kuv kawm ntawv zoo” los sis “Yog kuv them ib feem kaum, Vajtswv yuav foom koob hmoov rau kuv kom kuv tau txoj hauj lwm kuv nyiam.” Yog tias lub neej tsis zoo li no los sis tsis yog raws li lub sij hawm uas lawv xav, ces tej zaum lawv yuav xav tias Vajtswv ntxeev siab rau lawv. Tiam sis Vajtswv cov koob hmoov yeej tsis zoo li no. Peb yuav tsum tsis txhob xav tias Vajtswv txoj hau kev yog zoo li ib lub tshuab yuav khoom peb thiaj li (1) xaiv ib txoj koob hmoov, (2) tso tej hauj lwm zoo haud, thiab (3) lub tshuab tso koob hmoov uas peb xav tau tawm los rau peb.⁸

Vajtswv yeej yuav ua raws li Nws tej kev khi lus thiab tej lus cog tseg rau peb txhua tus. Peb tsis tas txhawj txog qhov ntawd.⁹ Yexus Khetos txoj kev theej txhoj—tus uas tau nqis mus qis tshaj txhua yam ces nce puag saum ntuj¹⁰ thiab tus uas muaj tag nrho lub hwj chim nyob saum ntuj thiab hauv lub ntiaj teb¹¹—Nws yeej ua kom Vajtswv yuav ua tau raws li Nws tau cog lus tseg lawm. Peb yuav tsum hwm thiab ua raws li Nws tej kev cai, tiam sis tsis yog txhua txoj koob hmoov uas peb tau vim peb ua raws li Vajtswv tej kev cai¹² yuav los zoo li peb xav. Peb yuav tsum ua zoo tiam sis cia Nws tswj hwm cov koob hmoov, tsis hais ntawm sab cev nqaij daim tawv thiab sab ntsuj plig los yog.

Thawj Tswj Hwm Brigham Young piav tias nws txoj kev ntseeg yeej tsis nyob ntawm tej uas yuav muaj tom qab ntawd los sis cov koob hmoov tiam sis yog vim nws sib raug zoo nrog Yexus Khetos. Nws hais tias, “Kuv txoj kev ntseeg tsis nyob ntawm tus Tswv tej hauj lwm hauv tej pov txwv hauv haiv txwv, nws txoj kev coj cov neeg nyob no, … thiab tsis nyob ntawm tej koob hmoov uas nws foom pub rau cov neeg no los yog cov neeg tod, thiab tsis nyob ntawm qhov uas peb tau koob hmoov los sis tsis tau koob hmoov, tiam sis kuv txoj kev ntseeg yeej nyob ntawm tus Tswv Yexus Khetos, thiab tej yam uas Nws tau qhia kuv.”¹³

Peb txoj kev hloov siab lees txim thiab kev mloog lus, peb tej kev pab lwm tus thiab peb tej kev txi yeej muaj nqis. Peb xav koom nrog cov uas Ethaws piav tias lawv “ua tej yam uas zoo tas mus li.”¹⁴ Tiam sis tsis yog vim tias muaj neeg sau txhua yam peb ua hauv tej phau ntawv xilethi-aus. Tej yam no muaj nqis vim tias ua rau peb koom tes ua Vajtswv tej hauj lwm thiab los ntawm qhov no peb thiaj li koom siab nrog Nws pab peb txoj kev hloov los ua ib tug neeg ntseeg.¹⁵ Qhov uas Leej Txiv Saum Ntuj Ceeb Tsheej muab rau peb yog Nws tus kheej thiab Nws Leej Tub, yog txoj kev sib raug zoo nrog Nkawd dhau los ntawm Yexus Khetos, peb tus Txhiv Dim, txoj kev tshav ntuj thiab txoj kev pab.

Peb yog Vajtswv cov me nyuam, uas muaj tau kev tsis txawj tuag thiab txoj sia nyob mus ib txhis. Peb txoj hmoov yog kom txais Nws tej qub txeeg qub teb, “peb yuav tau nrog Yexus Khetos txais tej uas Vajtswv npaj tseg.”¹⁶ Peb Leej Txiv txaus siab coj peb txhua tus ua raws li Nws tej kev khi lus vim Nws kho txhua kab ke kom muaj raws li peb xav tau thiab muaj raws li Nws txoj hau kev kom peb thiaj li zoo siab kawg nkaus nrog Nws nyob. Peb yuav haj yam tso siab thiab ntseeg Leej Txiv thiab Leej Tub, paub ntxiv txog Nkawd txoj kev hlub, thiab tus Vaj Ntsuj Plig Dawb Huv txoj kev nplij siab thiab txoj kev coj kev.

Txawm li ntawd los, txoj kev no yeej yuav tsis yooj yim rau peb txhua tus. Muaj ntau dhau uas yuav tsum kho hauv peb tus kheej thiaj li yuav tsis yooj yim. Yexus hais tias:

“Kuv yog tsob tseem txiv hmab, thiab kuv Txiv yog tus uas tu.

“[Leej Txiv] muab txhua ceg hmab uas tsis txi txiv ntshua tawm ntawm kuv mus pov tseg. Txhua ceg hmab uas txi txiv nws muab tav kom haj yam txi txiv ncw.”¹⁷

Tej lub sij hawm tus txheej txheem uas Vajtswv coj peb kom hloov peb ua neeg dawb huv, yeej yuav nyuaj thiab ua rau peb lub siab mob heev. Ib yam li Povlauj hais tias, peb “txais Vajtswv qub txeeg qub teg thiab koom nrog Yexus txais; [yog] peb … raug kev txom nyem ib yam li Yexus Khetos raug, peb yeej yuav tau Vajtswv lub yeeb koob uas ci ntsa iab ib yam li Yexus Khetos tau thiab.”¹⁸

Yog li ntawd, thaum peb raug hluav taws kub kom peb thiaj li dawb huv, peb tsis tas npau taws rau Vajtswv, yuav tsum nyob ze Nws xwb. Thov Leej Txiv los ntawm Leej Tub lub npe. Nrog Nkawd taug kev los ntawm tus Ntsuj Plig, ib hnub dhau ib hnub. Cia Nkawd muab Nkawd tus kheej tshwm sim rau nej. Los paub Nkawd tiag tiag thiab paub nej tus kheej tiag tiag.¹⁹ Cia Vajtswv yeej.²⁰ Tus Cawm Seej tau nplij peb lub siab hais tias:

“Mloog tus uas yog tus sawv cev uas daws nej zaj thov Leej Txiv, tus tab tom thov nws txog nej zaj—

“Hais tias: Txiv, thov saib tej kev txom nyem thiab kev tuag ntawm tus tsis tau ua txhaum, tus uas ua rau koj zoo siab heev; thov saib cov ntshav ntawm koj Leej Tub uas tau nrog, cov ntshav ntawm tus uas koj tau muab txi kom koj tus kheej yuav tau yeeb koob.

“Yog li ntawd, Leej Txiv, thov tseg kuv cov kwv tij no uas ntseeg kuv lub npe, xwv kom lawv yuav los cuag kuv thiab tau txoj sia uas kav ib txhis.”²¹

Cia li xav txog ib co txiv neej thiab cov poj niam uas rau siab ntseeg coj yam ntxwv txog kev tso siab rau Vajtswv, vim lawv ntseeg tias Nws cov koob hmoov yuav los txawm lawv ciaj los sis tuag los yog. Lawv txoj kev ntseeg yeej tsis nyob ntawm qhov uas Vajtswv tau ua los sis tsis tau ua thaum ib lub sij hawm xwb tiam sis lawv txoj kev ntseeg nyob ntawm qhov uas lawv paub tias Vajtswv yog lawv Leej Txiv uas hlub lawv thiab Yexus Khetos yog lawv tus Txhiv Dim.

Thaum tus pov thawj Iyiv uas teev tiam Ekanas tab tom yuav muab Anplaham txi, Anplaham tau thov Vajtswv cawm nws dim, thiab Vajtswv twb ua li ntawd.²² Anplaham tau los ua leej txiv rau cov neeg rau siab ntseeg uas los ntawm nws cov noob neej txhua tsev neeg hauv lub ntiaj teb yuav tau koob hmoov.²³ Tiam sis, ua ntej, nyob saum tib lub thaj ntawd, tus pov thawj tau muab peb tug ntxhais nkauj xwb tua txi “vim yog lawv txoj kev tsim txiaj … lawv tsis kam txhos caug teev tiam tej vaj tswv uas yog ntoo los yog pob zeb.”²⁴ Lawv tuag vim yog lawv txoj kev ntseeg.

Yauxej uas nyob puag thaum ub, tus uas nws cov tij laug tau muab nws muag ua ib tug qhev, nws muaj ib lub neej uas raug txom nyem. Nws twb muaj koob muaj npe nyob hauv nws tus tswv lub tsev hauv Iyiv ces txhua yam ploj tas lawm vim tias Pautifas tus poj niam liam nws txog ib yam nws tsis tau ua. Nyaj tsim nyog uas Yauxej xav tias, “Kuv raug kaw vim tias kuv ua raws li txoj kev cai coj dawb huv.” Tiam sis nws tau tig mus rau Vajtswv thiab tau vam meej nyob hauv lub tsev kaw thiab. Yauxej poob siab ntxiv thaum tus neeg raug txim tsis nco qab txog nws tom qab tau muab nws tso dim thiab ua hauj lwm hauv Falaus lub nceeg vaj, txawm yog tus neeg raug txim tau cog lus tias nws yuav pab Yauxej. Thaum kawg, tus Tswv tau pab kom Yauxej muaj chaw siab tshaj txhua tus uas muaj hwj chim tshuav Falaus xwb, ua rau Yauxej cawm tau tsev neeg Ixayees. Yauxej txawj qhia tawm tias “txawm yog peb tau zoo thiab txom nyem los Vajtswv yuav ua kom tej ntawd muaj nqis rau … cov uas hlub Vajtswv.”²⁵

Anpinadais mob siab ua raws nraim li Vajtswv txib nws. Nws hais tias, “Kuv qhia kom tas kuv zaj xov; thiab tom qab ntawd kuv [raug dab tsi] los tsis tseem ceeb, tsuas yog hais tias kuv txais kev cawm dim.”²⁶ Yeej tsis tau cawm nws dim kev tuag, tiam sis nws yeej tau txais kev cawm seej nyob hauv Vajtswv lub nceeg vaj, thiab tib tug neeg uas hloov siab los ntseeg, Amas, tau hloov tag nrho cov Neeg Nifais zaj keeb kwm mus txog thaum Khetos tau los.

Amas thiab Amulej tau dim ib lub nkuaj nyob hauv Amoonaihas raws li nkawd thov, thiab cov neeg uas tsim txom nkawd tau tuag.²⁷ Tiam sis ua ntej, cov neeg tsim txom no tau muab cov poj niam thiab me nyuam uas ntseeg pov rau hauv hluav taws. Amas, uas pom qhov phem kawg nkaus no, xav “cawm kom lawv dim ntawm tej nplaim taws,”²⁸ tiam sis tus Ntsuj Plig tau qhia kom nws tsis txhob siv Vajtswv lub hwj chim kom Vajtswv yuav txais lawv mus rau nws tus kheej, nyob rau hauv yeeb koob.²⁹

Tus Yaj Saub Joseph Smith poob siab nyob hauv lub tsev kaw hauv Liberty, Missouri, nws tsis muaj hwj chim pab Haiv Neeg Ntseeg thaum lawv raug ntiab tawm ntawm lawv tej tsev hauv lub caij no no heev. “Auj Vajtswv, koj nyob qhov twg?” Joseph qw. “Koj txhais tes yuav nkaum ntev npaum li cas?”³⁰ Tus Tswv cog lus tias: “Koj tej kev nyuaj siab thiab koj tej kev txom nyem yuav muaj nyob ib nyuag ntus xwb; thiab tom qab ntawd, yog koj ua tib zoo nyiaj mus, Vajtswv yuav tsa koj mus nto ntuj. … Koj twb tsis tau zoo li Yauj.”³¹

Thaum kawg, Joseph paub hais ib yam li Yauj tias, “Txawm tias [Vajtswv tua kuv], los kuv tseem yuav tso siab rau nws.”³²

Txwj Laug Brook P. Hales tau hais ib zaj dab neeg txog Muam Patricia Parkinson uas txawj pom kev txij thaum nws yug los tiam sis thaum txog nws muaj 11 xyoos nws dig muag lawm.

Txwj Laug Hales hais tias: “Kuv paub Pat tau ntau xyoo thiab tsis ntev tas los kuv qhia nws tias kuv nyiam qhov uas nws yeej zoo siab thiab xav zoo xwb. Nws teb hais tias, ‘Es, koj tsis nrog kuv nyob hauv tsev, yom? Muaj tej lub sij hawm kuv tsis zoo li ntawd. Kuv muaj kev nyuaj siab heev, thiab kuv twb quaj ntau.’ Tiam sis, nws hais tias, ‘Txij thaum kuv pib tsis txawj pom kev, xyov ua cas, tiam sis kuv paub tias Leej Txiv Saum Ntuj Ceeb Tsheej thiab tus Cawm Seej nrog kuv tsev neeg thiab kuv nyob. … Cov uas nug kuv tias kuv puas npau taws vim kuv dig muag, kuv hais rau cov ntawd hais tias, ‘Kuv yuav npau taws rau leej twg? Leej Txiv Saum Ntuj Ceeb Tsheej nrog nraim kuv nyob; kuv tsis nyob kuv ib leeg. Nws nrog kuv nyob txhua lub sij hawm.’”³³

Peb yeej ib txwm xav tau koob hmoov uas yog kev sib raug zoo nrog Leej Txiv thiab Leej Tub. Qhov no yeej yog qhov uas pab peb ntau tshaj thiab muaj nqis tshaj plaws. Peb yuav ua tim khawv nrog Povlauj “hais tias txoj kev txom nyem uas tam sim no peb raug yeej piv tsis tau lub hwj chim ci ntsa iab uas Vajtswv yuav pub rau peb yav tom ntej no.”³⁴ Kuv ua tim khawv tias txawm yog peb lub neej hauv lub ntiaj teb no zoo li cas los, tsim nyog uas peb tso siab rau Vajtswv thiab muaj kev xyiv fab dhau los ntawm Nws.

“Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse.

Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txoj kev uas yog txoj tseeb.”³⁵

Los ntawm Yexus Khetos lub npe, amees.