Kawg Peb lub Siab

Ob peb hnub ua ntej Yexus Khetos tau txo Nws txoj sia pub rau peb, Nws nyob hauv lub tuam tsev hauv Yeluxalees, saib neeg uas tso nyiaj hauv lub txhab nyiaj. “Muaj cov neeg nplua nuj ntau leej tso nyiaj ntau ntau rau hauv lub phij xab,” tiam sis ib tug poj ntsuam los, “thiab [nws] muab ob lub txiaj toog tuaj tso rau hauv.” Yeej yog ib qho me me xwb, ntshe tsis tas hais dab tsi txog qhov no.

Daim Duab

Ib tug poj ntsuam muab ob lub txiaj toog

Tiam sis tus Cawm Seej twb pom tias lwm tus xav tias qhov no tsis tseem ceeb. Muaj tseeb tiag, qhov no tshoov Nws lub siab heev Nws thiaj li “hu nws cov thwj tim los cuag nws thiab hais rau lawv hais tias, Kuv qhia tseeb rau nej hais tias tus poj ntsuam uas pluag pluag ntawd tso nyiaj ntau dua lwm tus:

“Rau qhov lwm tus muab lawv tej nyiaj uas seem coj tuaj tso xwb, tiam sis tus poj ntsuam uas pluag pluag no, nws muab hlo ob lub txiaj toog uas nws muaj tuaj tso huv tib si.”¹

Tus Cawm Seej tau qhia tias nyob hauv Nws lub nceeg vaj Nws yuav ntsuas peb tej kev tiam li cas—thiab yeej tsis zoo ib yam li peb ib txwm ntsuas tej yam. Tus Tswv tsis ntsuas ib yam uas peb pub rau Nws raws li peb pub npaum li cas tiam sis Nws ntsuas seb qhov uas peb pub yam ntawd puas hloov peb lub siab.

Thaum tus Cawm Seej qhuas tus poj ntsuam rau siab ntseeg ntawd, nws qhia kom peb paub ntsuas peb txoj kev ua Nws cov thwj tim. Yexus tau qhia tias peb pub yam loj los sis yam me npaum li cas los, peb yuav tsum muaj siab dawb xav pub txhua yam.

Tus yaj saub Amalej hauv Phau Ntawv Maumoos tau qhia txog lub ntsiab cai no hais tias: “Nej cia li los cuag Khetos, tus uas yog Ixayees tus Dawb Huv, thiab los txais nws txoj kev cawm seej, thiab lub hwj chim ntawm nws txoj kev txhiv dim. “Muaj tseeb tiag, cia li los cuag nws, thiab muab tag nrho nej lub siab lub ntsws ua kev tiam pub rau nws.”²

Tiam sis yuav ua li cas kom ua tau li no? Peb feem coob xav tias ntshe muab tsis taus tag nrho peb lub siab lub ntsws li no. Twb muaj ntau yam uas peb yuav tsum ua lawm. Peb yuav ua li cas kom ua txhua yam hauv lub neej no thiab tseem muab tag nrho peb lub siab ntsws rau tus Tswv?

Tej zaum qhov uas nyuaj rau peb yog qhov uas peb xav tias peb yuav tsum muab peb lub sij hawm faib ua ob qho tseem ceeb no. Thaum peb xav li no, ces peb cov lus cog tseg rau Yexus Khetos yog ib yam uas peb yuav tsum nrhiav sij hawm ua. Tiam sis tej zaum peb yuav siv lwm txoj kev saib qhov no.

Kuv tus poj niam, Harriet, wb nyiam caij luv thij ua ke. Yeej yog ib txoj kev zoo kawg kom muaj zog exercise thaum siv sij hawm ua ke. Thaum wb caij luv thij, thiab kuv tsis txog siav, wb nyiam saib tej yam zoo nkauj nyob ib puag ncig thiab wb nyiam sib txuas lus. Wb tsis tshua soj qab saib kom wb tsis txhob vau thaum caij luv thij. Wb twb caij luv thij ntev los lawm wb thiaj li tsis tas xav txog qhov ntawd—wb txawj caij tsis ntshai vau.

Tiam sis thaum twg kuv saib ib tug xyaum caij luv thij thawj thawj zaug, ua rau kuv nco qab tias yeej tsis yooj yim ua kom txhob vau ntawm lub luv thij uas muaj ob lub log xwb. Yuav tsum siv sij hawm. Yuav tsum xyaum. Yuav tsum ua siab ntev. Ntshe yuav tsum vau ob peb zaug thiab.

Qhov tseem ceeb tshaj, cov uas txawj kawm caij luv thij tau kawm tej yam no:

Tsis txhob ntsia ko taw.

Saib tom hauv ntej.

Saib txoj kev uas nyob nej tom hauv ntej. Tsom ntsoov rau qhov chaw nej xav mus. Ces pib tuam lub luv thij. Yus yuav tsis vau thaum yus mus tom ntej xwb.

Tej ntsiab cai ib yam li tej no yeej muaj nqis thaum peb xav txawj ua peb lub neej raws li Yexus Khetos cov thwj tim yuav tsum ua. Nyias muaj nyias txoj kev siv sij hawm thiab siv zog ua txhua yam tseem ceeb nyob ntawm nej xav li cas thiab nej laus npaum li cas. Tiam sis peb txhua tus lub hom phiaj uas zoo ib yam yog txoj kev coj raws li peb tus Xib Hwb, Yexus Khetos, txoj Kev, thiab kom peb rov qab mus cuag peb Leej Txiv Saum Ntuj Ceeb Tsheej. Peb yuav tsum tsom ntsoov rau lub hom phiaj no tsis tu tsis tseg, tsis hais peb yog leej twg thiab muaj dab tsi tshwm sim hauv peb lub neej los yog.³

Nim no, nej cov uas nyiam caij luv thij ntau, qhov uas kuv muab kev ua ib tug thwj tim piv rau kev caij luv thij los nyaj yog ib zaj lus piv txwv zoo rau nej. Rau nej cov uas tsis nyiam ua li ntawd, txhob txhawj. Kuv muaj ib zaj lus piv txwv uas nyaj txhua tus txiv neej, poj niam, thiab me nyuam txawj to taub.

Kev ua ib tug thwj tim, ib yam li lwm yam hauv lub neej no, yeej piv rau kev tsav ib lub nyab hoom.

Nej puas tau xav tias yog vim li cas ib lub nyab hoom loj loj uas thauj neeg mus ya taus? Muaj dab tsi uas pab tej nyab hoom ya mus ya los kom hla tej thooj av teb chaws thiab tej dej hiav txwv?

Ib lub nyab hoom ya taus tsuas yog thaum uas cov cua tshuab saum ob sab tis. Qhov uas cov cua mus li ntawd ua rau lub nyab hoom thiaj li nce taus. Tiam sis yuav ua li cas kom cov cua tshuab saum ob sab tis txaus kom nce taus? Yuav tsum khiav ceev mus tom ntej.

Lub nyab hoom yeej nce tsis taus yog tias nyob ntawm txoj kev tshav nyab hoom xwb. Txawm cua hlob heev los, lub nyab hoom tsuas nce taus yog tias nws mus tom ntej, khiav ceev txaus kom dhau tej yam uas tab kaum.

Ib yam li yuav tsum khiav ceev txaus kom caij luv thij zoo, qhov uas lub nyab hoom khiav ceev mus tom ntej pab kom kov yeej qhov rub rau hauv av thiab kev sib txhuam.

Ces qhov no qhia tias Yexus Khetos cov thwj tim yuav tsum ua li cas? Qhov no qhia tias yog peb xav muaj lub neej ruaj khov, thiab yog peb xav kom tus Cawm Seej coj peb mus saum ntuj, ces peb txoj kev tso siab plhuav rau Nws thiab Nws txoj moo zoo los yeej yuav tsum tsis txhob tso tseg los sis lam ua. Ib yam li tus poj ntsuam nyob hauv Yeluxalees, peb yuav tsum muab tag nrho peb lub siab ntsws rau Nws. Txhua yam peb muab rau Nws los peb yuav tsum muab tej yam los ntawm peb lub siab lub ntsws rau Nws.

Kev ua Yexus Khetos ib tug thwj tim tsis yog ib yam peb ua xwb. Tus Cawm Seej yog tus uas ua kom peb mob siab ua tag nrho txhua yam peb ua. Nws tsis nyob ntawm ib qho chaw ntawm txoj kev cia peb so xwb. Nws tsis nyob ntawm ib qho chaw zoo nkauj los sis qhov chaw uas muaj keeb kwm zoo xwb. Nws yog “txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm [Yexus Khetos] mus xwb thiaj tau.”⁴ Nov yog Txoj Kev uas peb yeej xav taug mus kom txog qhov kawg.

Peb txawj ua thiab nce tau thaum peb “txiv mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus.”⁵

Thiab yuav ua li cas kom ua tau txhua yam hauj lwm thiab tej kev lav ris uas ua rau peb lub neej maj heev? Yog tias yuav siv sij hawm nrog cov uas peb hlub, mus kawm ntawv los sis kawm ua hauj lwm, ua ib txoj hauj lwm, tu peb tsev neeg, ua hauj lwm pab hauv zej zog—ces yuav ua li cas kom ua txhua yam no? Tus Cawm Seej tau nplij peb lub siab hais tias:

“Nej Leej Txiv Saum Ntuj Ceeb Tsheej paub tias nej yuav tsum muaj tag nrho txhua yam no.

“Tiam sis nej cia li xub nrhiav Vajtswv lub nceeg vaj thiab nws txoj kev ncaj ncees tso, thiab yuav muab tag nrho tej no ntxiv rau nej.”⁶

Tiam sis qhov no yeej tsis yooj yim.⁷ Yuav tsum ua kev txi thiab yuav tsum muab yus lub siab fij rau Vajtswv.

Muaj tej yam uas yus yuav tsum tso tseg thiab muaj lwm yam uas yuav tsum ua kom loj tuaj.

Kev txi thiab kev fij siab yeej yog ob txoj kev cai saum ntuj ceeb tsheej uas peb khi lus kom mloog Vajtswv lus hauv lub tuam tsev dawb huv. Ob txoj kev cai yeej zoo ib yam tiam sis tsis zoo ib yam. Kev txi txhais tias yus tso ib yam tseg kom thiaj li txais tau ib yam uas muaj nqis tshaj. Puag thaum ub, Vajtswv cov neeg tau muab thawj tug me nyuam ntawm lawv pab yaj txi kom nco txog tus Mexiyas uas yuav tuaj. Txij puag thaum ub los, Haiv Neeg Ntseeg uas rau siab ntseeg twb tau muab lawv tej kev xav,tej kev txaus siab, thiab lawv lub neej txi pub rau tus Cawm Seej.

Peb muaj txhua yam, tsis hais tej yam loj thiab me los yog, uas peb yuav tsum txi kom coj raws li Yexus Khetos tag nrho.⁸ Tej yam uas peb muab txi qhia tias peb saib tej yam twg rau nqi. Tus Tswv yeej saib tej kev txi no yog tej yam dawb huv.⁹

Kev fij siab txawv ntawm kev txi. Thaum peb muab dab tsi fij tseg, peb tsis tso rau ntawm ib lub thaj. Tiam sis, peb siv kom pab ua tus Tswv txoj hauj lwm. Peb muab fij rau Nws thiab Nws tej lub hom phiaj dawb huv.¹⁰ Peb txais tej txuj ci uas tus Tswv tau foom pub rau peb thiab ua kom muaj ntau ntxiv, peb thiaj li pab tau kom txhim tsa tus Tswv lub nceeg vaj ntxiv.¹¹

Yuav thov peb tsawg tsawg leej xwb kom muab peb lub neej txi rau tus Cawm Seej. Tiam sis Nws caw peb txhua tus muab peb lub neej fij rau Nws.

Thaum peb siv zog kom ua neej dawb huv thiab ntsia ntsoov Yexus Khetos nrog txhua txoj kev xav,¹² ces txhua yam yuav koom ua ke kom pab tau peb. Peb yuav tsis xav tias lub neej no tsuas yog txoj kev ua ntau yam uas tawg tau yooj yim.

Thaum sij hawm dhau mus, txhua yam no yeej yog ib txoj hauj lwm xwb.

Ib txoj kev xyiv fab.

Ib lub hom phiaj dawb huv.

Yog txoj hauj lwm ntawm kev hlub thiab kev ua hauj lwm rau Vajtswv. Yog kev hlub thiab ua hauj lwm pab Vajtswv cov me nyuam.¹³

Thaum peb saib peb lub neej thiab pom ib puas tsav yam peb yuav tsum ua, ua rau peb txhawj dhau. Thaum peb tsuas pom ib qho xwb—qhov uas peb yuav tsum ua ntau yam kom hlub thiab ua hauj lwm rau Vajtswv thiab Nws cov me nyuam—ces peb txawj muaj kev xyiv fab tsom ntsoov rau tej yam ntawd.

Peb muab tag nrho peb lub siab lub ntsws li no—peb muab ib yam dab tsi uas tab kaum peb txi thiab peb fij siab rau tus Tswv thiab Nws tej lub hom phiaj.

Kuv cov kwv tij thiab cov muam thiab kuv cov phooj ywg zoo, yuav muaj tej lub sij hawm thaum nej yuav xav xav ua ntxiv. Nej Leej Txiv Saum Ntuj Ceeb Tsheej paub nej lub siab. Nws paub tias nej ua tsis taus txhua yam uas nej lub siab xav ua. Tiam sis nej tseem muaj peev xwm hlub thiab ua hauj lwm rau Nws. Nej ua tau zoo npaum li nej ua tau kom coj raws li Nws cov lus txib. Nej muaj peev xwm hlub thiab ua hauj lwm pab Nws cov me nyuam. Thiab tej yam nej siv zog ua no yuav pab nej lub siab hloov ua dawb huv thiab npaj nej rau yav tom ntej uas muaj yeeb koob.

Tus poj ntsuam nyob ntawm lub tuam tsev lub txhab ceev nyiaj twb to taub qhov no. Nws paub tseeb tias qhov uas nws muab yeej yuav tsis pab Ixayees muaj nyiaj ntau, tiam sis yeej yuav hloov nws lub siab thiab foom koob hmoov rau nws—vim tias, txawm nws muab me ntsis xwb, yeej yog tag nrho nws muaj huv tib si.

Yog li ntawd, kuv cov phooj ywg zoo thiab cov uas koom nrog kuv ua Yexus Khetos cov thwj tim, cia peb “tsis txhob nkees ua tej yam zoo, vim [peb] tab tom teeb lub hauv paus ntawm ib txoj hauj lwm loj.” Thiab los ntawm tej yam me yuav muaj “tej yam uas loj tawm los.”¹⁴

Kuv ua tim khawv tias qhov no muaj tseeb, thiab kuv kuj ua tim khawv tias Yexus Khetos yog peb tus Xib Hwb, peb tus Txhiv Dim, thiab Tib tug uas npaj taus ib txoj kev kom peb rov qab mus cuag peb Leej Txiv Saum Ntuj Ceeb Tsheej uas peb hlub. Los ntawm Yexus Khetos lub npe dawb ceev, amees.