Txoj Hau Kev Puas Ua Hauj Lwm?

Txoj hau kev puas ua hauj lwm?

Tsis ntev tas los no kuv nrog ib tug tub hluas tiav nraug lawm uas tau mus ua tub txib ob peb xyoos dhau los thiab niaj hnub nim no nws ua hauj lwm. Hais dav dav nws lub neej mus zoo heev. Tiam sis nws txoj kev ntseeg ploj zuj zus. Nws tab tom pib ua xyem xyav txog tus Cawm Seej thiab Nws lub Koom Txoos. Nws piav hais tias nws tsis txais tej koob hmoov nws xav tau los ntawm txoj moo zoo uas txum tim rov qab los. Nws xav tias txoj kev zoo siab tsis ua hauj lwm zoo hauv nws lub neej.

Kuv cov lus hnub no yog rau tag nrho nej cov uas tej zaum xav ib yam li ntawd thiab. Kuv hais lus rau lawv cov ua muaj ib zaug “xav hu zaj nkauj txog txoj kev hlub uas txhiv dim” tiam sis nim no tsis “xav zoo li ntawd.”¹

Peb Leej Txiv Saum Ntuj Ceeb Tsheej tau npaj ib txoj hau kev zoo kawg nkaus rau peb txoj kev zoo siab nyob mus ib txhis li. Tiam sis thaum peb lub neej tsis mus zoo li peb xav los sis cia siab rau, zoo li Leej Txiv Saum Ntuj Ceeb Tsheej txoj hau kev tsis ua hauj lwm zoo.

Tej zaum peb xav zoo li Yexus cov thwj tim thaum lawv nyob hauv lub nkoj, “Cua ntsawj tom hauv ntej tuaj ua rau dej ntas tej niag twv tuaj ntaus lub nkoj.”²

Ces, thaum yav sawv ntxov:

“Yexus los ko taw saum nplaim dej los cuag cov thwj tim.

“Thaum lawv pom Yexus los ko taw saum nplaim dej, lawv ntshai kawg li, … thiab qw.

“Tam sim ntawd Yexus hais rau lawv hais tias, Nej tsis txhob poob siab! Yog kuv ntag, tsis txhob ntshai.

“Petus hais tias, Tus Tswv, yog hais tias yog koj tiag, thov koj hais kom kuv mus tau saum nplaim dej tuaj cuag koj.

“Yexus teb hais tias, Cia li tuaj. Petus txawm tawm hauv lub nkoj mus ko taw saum nplaim dej mus cuag Yexus.

“Tiam sis thaum Petus pom cua ntsawj hlob hlob nws ntshai kawg li, ces nws txawm tog zog rau hauv dej, nws hu nrov nrov hais tias, Tus Tswv, thov koj pab kuv!

“Tam sim ntawd Yexus txawm cev loo tes mus tuav nkaus Petus thiab hais tias, Ua li cas koj kev ntseeg yuav tsawg ua luaj li. Ua li cas koj tsis cia siab?”³

Nej puas kam kuv qhia peb txoj ntsiab cai uas kuv kawm ntawm Petus los? Kuv thov kom tej ntsiab cai yuav pab tau ib tug neeg twg uas xav hais tias txoj kev zoo siab tsis ua hauj lwm zoo hauv lawv lub neej.

Qhov thib ib, muab siab rau ntseeg Yexus Khetos.

Kuv xav tsis thoob txog Petus txoj kev ntseeg. Thaum Yexus caw nws “los,” nws cia li tawm ntawm lub nkoj los mus. Zoo li nws paub hais tias yog tias Yexus Khetos caw nws los ua dab tsi, ces nws yeej ua tau li.⁴ Petus tso siab rau tus Cawm Seej ntau tshaj nws tso siab rau nws lub nkoj. Thiab txoj kev ntseeg ntawd muab hwj chim rau nws ua siab loj thaum nws ntshai thiab nyuaj siab.

Petus txoj kev ntseeg ua rau kuv xav txog ib yam uas muaj los rau Txwj Laug José L. Alonso uas nws qhia kuv txog. Tsis ntev tom qab uas Txwj Laug Alonso tus tub tas sim neej, tseg nws ib tse neeg uas muaj me nyuam me, Txwj Laug Alonso hnov nws cov me nyuam xeeb ntxwv hais lus.

“Peb yuav ua li cas?” lawv nug.

Tus ntxhais xeeb ntxwv muaj cuaj xyoo teb hais tias, “Kuv txiv yeej OK. Nws tab tom qhia Yexus Khetos txoj moo zoo.”

Ib yam li Petus, tus me ntxhais no pom dhau nws tej kev cov nyom thiab tso siab rau Yexus Khetos thiab Nws txoj Kev Theej Txhoj. Txoj kev ntseeg tus Cawm Seej coj kev kaj siab lug los rau yus thiab pab yus muaj zog mus lawm tom ntej.

Yog tias nej rov qab saib nej lub neej, kuv ntseeg tias nej yuav pom tias nej tau muaj siab ntseeg ntau zaus hauv nej lub neej. Kev koom lub Koom Txoos yog ib yam uas ua vim yog txoj kev ntseeg. Thov txog Leej Txiv Saum Ntuj Ceeb Tsheej yog ib yam uas ua vim yog txoj kev ntseeg. Nyeem vaj lug kub yog ib yam uas ua vim yog txoj kev ntseeg. Mloog tej lus hais hauv lub tuam rooj sab laj no yog ib yam uas ua vim yog txoj kev ntseeg. Raws li Thawj Tswj Hwm Russell M. Nelson tau hais tias, “Tsis txhob xav tias txoj kev ntseeg uas nej muaj lawm tsis tseem ceeb.”⁵

Muaj dua ib yam uas kuv kawm los ntawm Petus yog:

Thaum muaj teeb meem dab tsi, tig mus rau Yexus Khetos tam sim ntawd.

Thaum nws los ko taw mus rau tus Cawm Seej, Petus ntshai cov cua, thiab nws pib tog. Tiam sis thaum Petus pom tias nws tog, nws tsis sim ntab saum nplaim dej nws tus kheej los sis ua luam dej rov qab mus rau lub nkoj. Nws tsis tso nws txoj kev ntseeg Khetos tseg, nws tuav rawv, thiab hu tias, “Tus Tswv es, cawm kuv.”

“Tam sim ntawd Yexus txawm cev loo nws tes mus tuav nkaus Petus.”⁶

Peb txhua tus raug tej cua daj cua dub uas yuav ua tau rau peb txoj kev ntseeg ua zog koog thiab ua rau peb tog. Thaum muaj li no, thov nco qab ntsoov hais tias Leej Txiv Saum Ntuj Ceeb Tsheej txoj hau kev zoo siab muaj dua ib lub npe—txoj hau kev txhiv dim. Txoj hau kev tsis yog cia peb swb mus hauv peb lub neej, tsis dawm, tsis tog, es luag nyuj nyav tsis muaj kev nyuaj siab. Leej Txiv Saum Ntuj Ceeb Tsheej paub hais tias peb yuav xav tau kev txhiv dim. Yog vim li ntawd Nws thiaj npaj txoj hau kev txhiv dim.⁷ Yog vim li ntawd Nws xa ib tug Txhiv Dim rau peb. Thaum peb tsis khov—txawm yog vim li cas—qhov ntawd tsis txhais hais tias txoj hau kev tsis ua hauj lwm. Yog thaum ntawd peb thiaj xav tau txoj hau kev ntau tshaj plaws!

Thaum tej lub sij hawm ntawd, ua raws li Petus tus yam ntxwv. Tig mus rau tus Cawm Seej tam sim ntawd.

“Tam sim no yog lub sij hawm thiab yog hnub ntawm nej txoj kev cawm seej. … Tsis txhob laug nej lub sij hawm hloov siab lees txim.”⁸

Txawm tias peb nyob qhov twg los yog tau ua dab tsi, txoj kev hloov siab lees txim yog txoj kev mus lawm tom ntej. Thawj Tswj Hwm Nelson tau qhia hais tias:

“Tsis muaj ib yam dab tsi uas pab yus dim txim, pab yus ua zoo, los yog tseem ceeb rau peb txoj kev vam meej npaum li kev hloov siab lees txim txhua hnub. …

“Txawm yog nej rau siab ua raws li nej tej kev khi lus, los sis nej tsis tshua ua raws li nej tej kev khi lus, los yog nej tsis ua raws li nej tej kev khi lus hlo li los, kuv thov kom nej hloov siab lees txim. Cia li txais tau lub hwj chim uas ntxiv dag zog rau nej los ntawm kev hloov siab lees txim txhua hnub—ua zoo dua thiab ua neeg zoo dua txhua hnub.”⁹

Kev los cuag Khetos yeej ntau tshaj qhov uas xav txog Nws los sis hais lus txog Nws los sis hlub Nws. Txhais tias ua raws li Nws hais. Txhais tias peb ua neej raws Nws qhia kom peb ua. Thiab rau peb txhua tus, qhov ntawd txhais tau tias hloov siab lees txim, tsis txhob laug hlo li.

Yav dhau los kuv ib tug ntxhais tau ua hauj lwm ntawm qhov chaw cob qhia cov tub txib. Nws qhia kuv txog ib tug txwj laug uas nws qhia uas tau hais rau nws tias nws tsis paub tseeb tias Phau Ntawv Maumoos muaj tseeb. Nws thov Vajtswv ntau kom tau ib zaj lus ua tim khawv ntawm sab ntsuj plig, tiam sis nws tsis txais lus teb.

Kuv tus ntxhais thov Vajtswv pab nws paub saib nws yuav tsum ua li cas thiaj pab tau tus tub txib no. Tus ntsuj plig tshoov nws lub siab hais tias cov vaj lug kub tsis yog muab rau peb kom peb thiaj nyeem tau thiab tau ib zaj lus tim khawv xwb; peb muaj cov vaj lug kub vim cov ntawd qhia peb kom coj raws li Vajtswv cov lus txib thiab. Kuv tus ntxhais tau qhia lub tswv yim no rau tus tub txib.

Tsis ntev tom qab ntawd, nws pom tus tub txib dua ib zaug ntxiv, es nws zoo siab heev. Nws qhia kuv tus ntxhais hais tias thaum kawg nws txais ib zaj lus tim khawv tias Phau Ntawv Maumoos muaj tseeb. Nws paub tias zaj lus tim khawv no los vim nws rau rau siab ua tej yam Phau Ntawv Maumoos hais.

Cia peb ua raws li Petus tus yam ntxwv es tig los mus rau tus Cawm Seej thaum peb ntsib kev cov nyom. Ua li raws Yexus Khetos hais tsis vam khom yus lub tswv yim thiab lub dag zog. Txawm tias nej sim ua luam dej ntau npaum li cas tsis muaj Nws, yeej tsis lig cev tes rau Nws. Txoj hau kev ua hauj lwm tiag!

Ib txoj ntsiab cai thib peb uas kuv kawm los ntawm Petus los yog li no:

Txo hwj chim rau tus Tswv, thiab Nws yuav coj nej mus ua tej yam tseem ceeb heev.

Petus muaj siab ntseeg, txawm tias yog los ko taw saum nplaim dej los yog thaum nws cev tes mus rau tus Cawm Seej thaum nws xav tau kev pab. Txawm yog li ntawd, tus Cawm Seej pom tias Petus muaj peev xwm ua ntau yam ntxiv. Yexus hais tias, “Ua li cas koj kev ntseeg yuav tsawg ua luaj li? Ua li cas koj tsis cia siab?”¹⁰

Tej zaum Petus yuav tsis nyiam cov lus ntuas no. Tiam sis nws txo hwj chim thiab txais cov lus ntuas ntawd. Nws yeej meem nrhiav kom tau kev ntseeg rau ntawm Yexus Khetos ntau dua. Dhau los ntawm ntau yam uas muaj los rau nws uas ua rau nws—tej qhov yog nyuaj heev tiag tiag—thaum kawg Petus rais los mus ua tus thawj coj uas tus Tswv xav kom nws ua. Nws ncav tau tej yam zoo kawg ua hauj lwm pab tus Tswv.

Tus Tswv xav kom nej ua tej yam zoo kawg dab tsi? Nyob hauv Nws lub Koom Txoos thiab nws lub nceeg vaj, muaj cib tim ntau kom ua hauj lwm pab lwm tus neeg ib yam li tus Cawm Seej. Nws xav kom nej ua ib feem ntawm Nws txoj hauj lwm loj. Txoj kev zoo siab yuav haj yam muaj tseeb rau nej thaum nej pab lwm tus neeg ua neej raws li.

Cov lus no los ntawm Amas pab kuv txoj kev ntseeg loj hlob tuaj: “Lawv cov uas txo lawv tej hwj chim uas tsis yog tau raug yuam kom txo hwj chim [tau koob hmoov]”¹¹ Cia peb txo peb lub hwj chim kom cia Yexus tsa peb, coj peb, thiab pab peb ua taus raws li peb rab peev xwm.¹²

Kuv ua tim khawv tias txoj hau kev zoo siab ua hauj lwm. Yog Leej Txiv Saum Ntuj Ceeb Tsheej tsim, thiab Nws hlub nej. Txoj hau kev no ua hauj lwm vim Yexus Khetos tau kov yeej kev txhaum thiab kev tuag dhau los ntawm Nws txoj Kev Theej Txhoj. Los cuag Nws, ua raws li Nws hais, thiab “tsis ntev ces txoj kev txhiv dim yuav raug coj los rau nej.”¹³ Los ntawm Yexus Khetos lub npe, amees.