Tam Sim No Yog lub Sij Hawm Yog
Tam sim no yog lub sij hawm uas peb kawm tau. Tam sim no yog lub sij hawm uas peb muaj kom hloov siab lees txim. Tam sim no yog lub sij hawm uas peb yuav foom koob hmoov rau lwm tus.
Kuv cov kwv tij thiab cov muam, lub rooj sab laj no tshwj xeeb heev. Peb tau koob hmoov los ntawm tej zaj lus thov, tej zaj lus hais, thiab tej kev hu nkauj. Tus Tswv cov tub qhe tau tshoov peb lub siab.
Peb tau txais tej lus tseem ceeb rau yav tom ntej. Kuv cia siab tias tus Ntsuj Plig tau hais lus rau nej txog tej yam uas tus Tswv xav kom nej ua.
Peb ib txwm tsis paub tseeb yav tom ntej yuav zoo li cas. Huab cua pheej hloov. Twv tsis taus txog nyiaj txiag. Tej xwm txheej hauv lub ntiaj teb thiab kev raug mob hloov yus lub neej sai heev. Tej xwm no los peb kav tsis taus. Tiam sis muaj tej yam uas peb kav taus, xws li peb yuav siv sij hawm ua dab tsi txhua hnub.
Kuv nyiam zaj paj lug uas Henry Van Dyke sau nyob rau ntawm ib hom twj qhia caij nyoog nyob ntawm Wells College hauv New York. Nws sau hais tias:
Kuv tus ntiv tes ua duab ntxoov ntxoo
Muab yav tom ntej cais yav tas los:
Yav tom ntej, ib teev tseem tsis tau yug
Tsis muaj nqis nyob hauv qhov tsaus ntuj:
Ntawm txoj kab sab tod muaj yav tas los
Teev sij hawm twb dhau lawm, tsis txawj siv hlo:
Tsuas muaj ib teev xwb hauv koj txhais tes,—
Yog TAM SIM NO xwb, duab ntxoov ntxoo taw tes.1
Peb yeej yuav tsum kawm los ntawm yav tas los, thiab peb yeej yuav tsum npaj rau yav tom ntej. Tiam sis tsuas yog tam sim no xwb peb thiaj li ua tau dab tsi. Tam sim no yog lub sij hawm uas peb kawm tau. Tam sim no yog lub sij hawm uas peb muaj kom hloov siab lees txim. Tam sim no yog lub sij hawm uas peb yuav foom koob hmoov rau lwm tus thiab “tsa tej txhais tes uas tsaug lawm.”2 Ib yam li Maumoos hais rau nws tus tub Maulaunais, “Cia peb rau siab ntso ua hauj lwm; … vim peb muaj ib txoj hauj lwm ua thaum tseem nyob hauv lub cev av no, xwv kom peb yuav kov yeej tus yeeb ncuab ntawm tag nrho kev ncaj ncees, thiab peb tus ntsuj plig tau so nyob hauv Vajtswv lub nceeg vaj.”3
Tus yeeb ncuab yeej tsis tsaug zog. Yeej yuav muaj neeg uas tawm tsam qhov tseeb. Kuv rov qab hais kuv tej lus ntuas nej tag kis no kom ua tej yam uas ua rau nej sab ntsuj plig muaj zog zuj zus tuaj, qhov uas ua rau peb nce siab uas Txwj Laug Dieter F. Uchtdorf hais txog, kom mus tom ntej dhau tej teeb meem thiab tej cib fim uas los.
Peb sab ntsuj plig yuav muaj zog zuj zus tuaj thaum peb hawm Vajtswv nyob hauv lub tuam tsev thiab to taub txog tag nrho cov koob hmoov uas peb txais tau nyob haud. Kuv thov kom nej tawm tsam tej yam ntawm lub ntiaj teb thaum nej tsom ntsoov rau cov koob hmoov ntawm lub tuam tsev uas nyob mus ib txhis li. Thaum nej siv sij hawm nyob ntawd ces nej yuav tau koob hmoov mus ib txhis li.
Thaum lub Koom Txoos loj zuj zus tuaj, peb siv zog kom ua cov tuam tsev ntxiv. Tam sim no peb ua plaub caug plaub lub tuam tsev. Muaj ntxiv uas kho kom rov qab zoo. Kuv thov Vajtswv pab cov neeg uas muaj txuj ci ua hauj lwm ua cov tuam tsev no nyob thoob plaws lub ntiaj teb.
Zoo siab ua Vajtswv tsaug, kuv zoo siab kawg tshaj tawm peb txoj kev npaj ua cov tuam tsev tshiab nyob ze tej qhov chaw no: Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; thiab Modesto, California.
17 lub tuam tsev no yeej yuav foom koob hmoov rau cov neeg coob nyob ob sab ntawm daim ntaub thaiv. Kuv hlub nej, cov kwv tij thiab cov muam. Qhov tseem ceeb tshaj, tus Tswv hlub nej. Nws yog nej tus Cawm Seej thiab nej tus Txhiv Dim. Nws yog tus uas coj thiab kav Nws lub Koom Txoos. Thov kom peb yuav ua tus Tswv cov neeg uas tsim nyog vim Nws hais tias, “Lawv yuav ua kuv haiv neeg, thiab kuv yuav ua lawv tus Vajtswv.”4
Kuv thov kom muaj li no los ntawm Yexus Khetos lub npe dawb ceev, amees.