Cov Lus Hais Ua Ntej
Peb hawm Vajtswv cov ntxhais hluas hauv tuas tshwj xeeb no thaum peb tsom ntsoov lawv thiab lawv tej koom haum tej kev txhawj xeeb.
Kuv cov muam uas kuv hlub, thaum peb pib tuas poj niam no ntawm lub tuam rooj sab laj no, uas yog ib tuas txawv lwm tuas, kuv zoo siab cev lus rau nej sawv daws los ntawm Thawj Pawg Thawj Tswj Hwm.
Tej tuas hnub Saturday peb tau coj ua sib txawv thiab hais rau cov ntseeg sib txawv nyob ntawm saib muaj lub ntsiab zoo li cas thaum ntawd. Hmo no peb yuav pib ua ib qho tshiab uas txawv yav tas los rau lub sij hawm yav tom ntej. Yexus Khetos txoj moo zoo tsis hloov hlo li. Tej qhuab qhia ntawm txoj moo zoo tsis hloov hlo li. Peb tej kev khi lus nrog Vajtswv tsis hloov hlo li. Tiam sis ib xyoos dhau ib xyoos tej kev sib ntsib sib sab laj uas peb muaj kom thiaj qhia peb tej lus qhuab qhia yeej hloov thiab yeej yuav hloov tom ntej mus thiab.
Hais txog tam sim no, tuas hnub Saturday yav tsaus ntuj no yog ib tuas ntawm lub tuam rooj sab laj, tsis yog ib tuas ntawm ib lub koom haum twg. Ib yam li txhua tuas ntawm lub tuam rooj sab laj, qhov kev npaj, cov hais lus, thiab cov nkauj yog Thawj Pawg Thawj Tswj Hwm saib xyuas thiab npaj.
Peb tau hais kom Thawj Tswj Hwm Jean B. Bingham, tus Tuam Thawj Tswj Hwm ntawm lub Koom Haum Niam Tsev, coj kav tuas no. Tej tuas hnub Saturday yav tsaus ntuj tej zaum yuav yog lwm tus Tuam Thawj Coj ntawm lub Koom Txoos coj kav, xws li cov mej zeej ntawm tej Pawg Tuam Thawj Tswj Hwm ntawm lub Koom Haum Niam Tsev, lub Koom Haum Ntxhais Hluas, thiab lub Koom Haum Me Nyuam Yaus, raws li Thawj Pawg Thawj Tswj Hwm teem tseg.
Hmo no tuas hnub Saturday yav tsaus ntuj ntawm lub tuam rooj sab laj no yuav tsom ntsoov cov poj niam hauv Hnub Nyoog Kawg tej kev txhawj xeeb. Nov yuav suav tej lus qhuab qhia ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg uas hais txog ib tsoom poj niam, thiab tej kev lav ris thiab tej hauj lwm ntawm tej koom haum uas muaj cov poj niam thiab cov ntxhais hluas ntawm lub Koom Txoos koom. Txawm tias peb tshaj tawm rau tib neeg thoob lub ntiaj teb ib yam li lwm tuas ntawm lub tuam rooj sab laj, peb tau caw cov poj niam thiab cov ntxhais hluas uas muaj hnub nyoog 12 xyoos rov saud nyob hauv lub Tsev rau Rooj Sab Laj rau tuas no. Yeej muaj ob peb tug thawj coj ntawm lub pov thawj hwj uas saib xyuas cov koom haum uas koom peb hmo no.
Qhov uas peb pib ntawm no yuav ntxiv zog rau tej kev sib txuas lus uas twb muaj lawm rau tus Tswv lub Koom Txoos tej thawj coj thiab tej mej zeej nyob thoob plaws lub ntiaj teb. Cov lus qhuab qhia ntawm Yexus Khetos txoj moo zoo yeej yog rau txhua tus neeg, ces ua li ntawd yog peb lub ntsiab thiab lub hom phiaj tshaj tawm. Peb hawm Vajtswv cov ntxhais hluas hauv tuas tshwj xeeb no thaum peb tsom ntsoov lawv thiab lawv tej koom haum tej kev txhawj xeeb.
Peb ua Vajtswv tsaug uas tej kev tshaj tawm pab lub Koom Txoos cov thawj coj muaj peev xwm cob qhia cov mej zeej nyob lwm lub teb chaws. Peb kuj zoo siab uas tej kev mus txawv teb chaws tab tom pib qhib zuj zus. Ua li no cia peb xa lub Koom Txoos cov thawj coj mus cob qhia cov ntseeg nyob lwm lub teb chaws.
Nov yog tus Tswv Yexus Khetos txoj hauj lwm. Peb yog Nws cov tub qhe, thiab Nws tus Vaj Ntsuj Plig Dawb Huv coj peb kev. Peb foom tus Tswv cov koob hmoov rau cov thawj coj hauv tej koom haum no thiab rau cov poj niam thiab ntxhais hluas rau siab ntseeg uas ua hauj lwm rau tus Tswv hauv tej lub koom haum no thiab nyob hauv lawv lub neej. Los ntawm Yexus Khetos lub npe, amees.