Xav Tsis Thoob txog Khetos thiab Nws Txoj Moo Zoo

Kuv muaj ib tug phooj ywg zoo uas txawj ntse, nws yog ib tug xib hwb qhia ntawv qib siab uas twb so hauj lwm lawm, nws tau sau ntau phau ntawv, thiab qhov tseem ceeb, nws yeej yog ib tug neeg ntseeg Yexus Khetos. Nws tau mus xyuas Thaj Av Dawb Huv ntau zaus mus koom tej rooj sab laj, ua kev kawm ntaub kawm ntawv, thiab coj tib neeg mus xyuas. Tam li nws hais mas, txhua zaus nws mus xyuas thaj av uas Yexus taug kev ntawd, nws xav tsis thoob vim nws yeej kawm ib yam dab tsi tshiab, ib yam tseem ceeb txog tus Cawm Seej, Nws txoj kev qhuab qhia tib neeg, thiab Nws thaj teb ntawd. Kuv tus phooj ywg txoj kev xav tsis thoob txog tej yam uas nws kawm txog Thaj Av Dawb Huv kuj ua rau sawv daws xav tsis thoob, thiab txoj kev xav tsis thoob no yeej yog nws tej hauj lwm thiab tej kev kawm ntawv hauv nws lub neej.

Thaum kuv mloog nws tej zaj lus thiab hnov nws txoj kev zoo siab, kuv tau xav ntau heev txog sab ntsuj plig, uas peb muaj peev xwm thiab yuav tsum hnov txog txoj moo zoo uas Yexus Khetos qhia thiab qhov ntawd pauv tau peb txoj kev ntseeg li cas thiab yuav coj tau peb txoj hau kev mus rau txoj sia nyob mus ib txhis. Txoj kev xav tsis thoob uas kuv tham txog yog ib txoj kev xav, los sis kev xav tsis thoob uas neeg feem coob muaj thaum lawv rau siab ntso ua neej nyob muaj tus Cawm Seej thiab Nws cov lus qhia nruab hauv plawv lawv lub neej thiab cov uas txo hwj chim lees paub tias Nws yeej nyob hauv lawv lub neej. Txoj kev xav tsis thoob li no, uas los ntawm tus Vaj Ntsuj Plig Dawb Huv kev tshoov siab, ua rau peb muaj lub siab xav ua raws li Yexus cov lus qhuab qhia.¹

Cov vaj lug kub muaj ntau qhov piv txwv txog tej kev xav zoo li no. Piv xam hais tias, tus yaj saub Yaxayas, qhia nws txoj kev ris txiaj rau tus Tswv thaum nws muaj kev zoo siab txog Nws.² Cov uas hnov Yexus qhuab qhia hauv lub tsev teev ntuj hauv lub zos Kapena-us xav tsis thoob txog Nws cov lus qhuab qhia thiab qhov uas Nws muaj hwj chim qhia tej lus ntawd.³ Twb yog tib txoj kev xav ntawd uas tog mus hauv Joseph Smith lub siab thaum nws nyeem hauv Phau Vaj Lug Kub Npaivnpaum hauv Yakaunpaus tshooj ib, nws thiaj tawm mus nrhiav Vajtswv tej tswv yim.⁴

Kuv cov kwv tij thiab cov muam, thaum peb xav tsis thoob txog Yexus Khetos thiab Nws txoj moo zoo, peb haj yam muaj kev zoo siab, peb haj yam mob siab ua Vajtswv tej hauj lwm, thiab peb lees paub tus Tswv txhais tes hauv txhua yam tsav. Tsis tas li ntawd xwb, peb haj yam kawm tau Vajtswv cov lus; peb haj yam mob siab thov Vajtswv; peb haj yam hwm thaum peb teev tiam; peb haj yam rau siab ntso ua tej hauj lwm hauv Vajtswv lub nceeg vaj. Txhua yam no pab peb haj yam hnov tau tus Vaj Ntsuj Plig Dawb Huv lub hwj huam hauv peb lub neej.⁵ Yog li ntawd, peb zaj lus tim khawv txog tus Cawm Seej thiab Nws txoj moo zoo yuav haj yam muaj zog, peb yuav khaws Yexus hauv peb lub siab,⁶ peb yuav ua neej nyob “ruaj khov thiab txhim tsa rau ntawm nws, thiab muaj kev ntseeg, … nrog rau txoj kev ris txiaj heev.”⁷ Thaum peb ua neej nyob li no, peb sab ntsuj plig yuav muaj hwj chim thiab yuav tiv thaiv peb sab ntsuj plig kom tsis txhob poob qab.

Txoj kev poob qab ntawd yog thaum peb maj mam tsis muaj siab xav rau siab ntso ua raws li tus Tswv txoj moo zoo. Feem ntau pib muaj li no thaum peb xav tias peb paub thiab tau txais tag nrho cov koob hmoov lawm kokm peb thiaj li muaj kev zoo siab hauv lub neej no. Txoj kev tsis tso siab no, ua rau peb saib tej khoom plig hauv txoj moo zoo tsis tshua muaj nqi, ces txij li ntawd mus, peb tsis tshua nco qab xav txog tej yam tseem ceeb hauv Yexus Khetos txoj moo zoo⁸ thiab tej kev khi lus uas peb tau khi tseg. Ua li ces, peb thiaj maj mam txav mus deb ntawm tus Tswv, peb tsis tshua muaj peev xwm “mloog Nws hais,”⁹ es thiaj li rais los mus ua neeg uas tsis mob siab rau los sis tsis tshua ntseeg Nws tej hauj lwm zoo. Tej zaum kev ua xyem xyav txog tej qhov tseeb hauv peb zaj lus tim khawv yeej nkag mus hauv peb nruab siab, peb thiaj raug tau tus yeeb ncuab tej kev haub ntxias.¹⁰

Xib Hwb Aiden Wilson Tozer, ib tug kws sau ntawv thiab neeg ntseeg Yexus, sau hais tias, “Txoj kev tsis muaj lub siab xav yeej yog qhov uas ua rau peb sab ntsuj plig tuag mus.”¹¹ Puas yog muaj li no rau Nifais cov neeg tsis ntev tom qab Yexus yug los? Lawv “pib muab tej cim los sis tej kev xav tsis thoob uas los saum ntuj los saib tsis tshua muaj nuj nqis zuj zus, [tsis tshua] ntseeg tag nrho tej uas lawv tau hnov thiab tau pom.” Yog li ntawd Dab Ntxwg Nyoog “thiaj ua rau lawv qhov muag dig thiab coj lawv mus ntseeg tias Khetos txoj lus qhuab qhia yog ib yam uas ruam thiab tsis muaj qab hau.”¹²

Kuv cov kwv tij thiab cov muam es, vim tus Cawm Seej muaj kev hlub puv npo thiab paub tias peb yog neeg zoo li cas,¹³ Nws thiaj tau tsa ib txoj kev rau peb tau khiav ntawm txoj kev uas peb sab ntsuj plig tsis muaj lub siab xav loj hlob tuaj ntxiv. Tus Cawm Seej txoj kev caw li no pab peb pom kev dav dua li qub, uas yog ib qho tseem ceeb vim peb nyob hauv lub ntiaj teb uas nyuaj rau peb to taub: “Kawm los ntawm kuv, thiab mloog kuv tej lus; taug kev raws kuv tus Ntsuj Plig txoj kev siab mos siab muag, ces koj yeej yuav muaj kev kaj siab lug vim yog los ntawm kuv.”¹⁴ Thaum peb ua raws li tus Cawm Seej caw peb, peb thiaj txo hwj chim, peb thiaj qhia tias peb xav kawm, thiab qhia tias peb cia siab hais tias peb yuav rais los mus ua neeg zoo li Nws.¹⁵ Tus Cawm Seej kuj caw peb ua hauj lwm rau Nws thiab pab Vajtswv cov me nyuam “kawg [peb] lub siab lub ntsws thiab lub dag lub zog”.¹⁶ Nyob hauv nruab plawv qhov no yeej yog, ob lo lus txib tseem ceeb tshaj: kom hlub tus Tswv peb Vajtswv thiab kom hlub peb cov neeg zej zog ib yam li peb hlub peb tus kheej.¹⁷

Nov yog ib qho ntawm tus Cawm Seej tus cwj pwm thiab yus pom tej no hauv txhua yam Nws ua thaum Nws ua neej nyob hauv ntiaj teb no.¹⁸ Yog li ntawd, thaum peb txhob txwm rau siab ntso saib Nws thiab kawm los ntawm Nws tus yam ntxwv zoo tshaj plaws,¹⁹ peb yuav haj yam paub Nws zoo dua. Thaum peb haj yam mob siab thiab xav kho peb lub neej kom zoo li nws lub, peb yuav ua yam ntxwv zoo dua, thiab yuav ua raws li cov lus txib. Peb kuj to taub ntxiv, kawm kev txawj ntse, pauv peb tus cwj pwm, thiab muaj kev hlub tshua rau Vajtswv thiab peb cov neeg zej zog.²⁰ Kuv qhia tau tseeb rau nej paub tias peb yuav haj yam hnov tau tus Cawm Seej txoj kev tshoov siab thiab kev hlub hauv peb lub neej, yuav ntxiv zog rau peb txoj kev ntseeg, ua rau peb xav ua ncaj ncees, thiab txhib kom peb ua hauj lwm pab Nws thiab lwm tus neeg.²¹ Tsis tas li ntawd xwb, peb txoj kev ris txiaj rau peb tej koob hmoov thiab tej teeb meem hauv ntiaj teb no yuav los ua ib qho ntawm peb txoj kev teev tiam.²²

Kuv cov phooj ywg es, txhua yam no ntxiv zog rau peb sab ntsuj plig txoj kev xav tsis thoob txog txoj moo zoo thiab ua rau peb muaj kev zoo siab xav ua raws li peb tej kev khi lus nrog tus Tswv—tab txawm peb tab tom raug kev cov nyom thiab teeb meem li cas los xij. Tiag tiag mas, yog yuav muaj li no, peb yuav tsum mob siab ua raws li tus Cawm Seej cov lus qhia,²³ sim pauv peb tus cwj pwm kom ua zoo li Nws.²⁴ Tsis tas li ntawd xwb, peb yuav tsum txav mus ze Nws dhau ntawm peb txoj kev hloov siab lees txim,²⁵, nrhiav kom tau Nws txoj kev zam txim thiab Nws txoj kev cawm dim hauv peb lub neej thiab ua raws li Nws cov lus txib. Tus Tswv kiag cog lus hais tias Nws yuav coj peb kev yog tias peb tso siab plhuav rau Nws, lees paub Nws hauv txhua yam tsav thiab tsis txhob vam peb tej kev txawj ntse.²⁶

Daim Duab

Txwj Laug Jones nrog Wes

Tsis ntev tas los no kuv tau ntsib ib tug txiv neej hu ua Wes uas koom lub rooj sab laj no hnub no, es nws kam ua li Yexus txoj kev caw los kawm txog Nws thiab Nws txoj moo zoo thiab tau peb xav tsis thoob txog Nws txoj kev hlub txawm tus txiv neej no twb khiav deb ntawm txoj kev sib khi lus rau 27 xyoo lawm. Nws qhia kuv tias muaj ib hnub ib tug tub txib hu ua Txwj Laug Jones tiv tauj rau nws hauv Facebook, tus tub txib nyob hauv Wes cheeb tsam rau ib ntus ua ntej yuav mus ua tub txib nram Panama teb. Thaum Txwj Laug Jones saib Wes phab ntawv, tsis paub hais tias Wes twb yog ib tug mej zeej hauv lub Koom Txoos lawm, nws hnov tus Vaj Ntsuj Plig Dawb Huv kev tshoov siab thiab paub hais tias nws yuav tsum tiv tauj mus rau Wes sai li sai tau. Nws txawm ua raws li kev tshoov siab ntawd. Wes xav tsis thoob vim nws tiv tauj rau nws thiab pib lees paub hais tias tus Tswv paub txog nws tab txawm nws khiav deb ntawm txoj kev khi lus.

Txij thaum ntawd los, Wes thiab cov tub txib tau sib tiv tauj heev. Txwj Laug Jones thiab nws tus khub tau ua hauj lwm pab nws thiab xa tej zaj xov ntawm sab ntsuj plig rau nws txhua lub lim tiam es Wes thiaj li pib xav tsis thoob txog tus Cawm Seej thiab Nws txoj moo zoo dua. Nws txawm rov qab muaj ib zag lus tim khawv ntxiv txog qhov tseeb thiab txog tus Cawm Seej txoj kev hlub rau nws. Wes tau hnov kev kev thaj yeeb uas los ntawm tus Nplij Siab thiab tau txais dag zog uas nws xav tau thiaj rov qab mus koom ib pawg ntseeg. Nws qhia kuv tias qhov no tau ua rau nws sab ntsuj plig thiab siab ntsws rov muaj sia nyob dua thiab pab nws tshem tej kev xav tsis zoo uas nws muaj tau ntau xyoo no vim nws raug tej kev nyuaj siab.

Ib yam li kuv tus phooj ywg uas ua xib hwb hais, yeej muaj tej yam zoo kawg thiab xav tsis thoob uas peb kawm tau txog Yexus Khetos thiab Nws txoj moo zoo.²⁷ Tus Tswv twb cog lus zoo zoo rau lawv sawv daws, thiab rau peb, hais tias cov uas sim kawm txog Nws thiab muab Nws tej lus qhia nruab rau hauv lawv lub neej. Nws hais rau Enauj hais tias, “Saib seb kuv tus Ntsuj Plig [yuav] nrog koj, yog li ntawd kuv yuav txhawb tag nrho koj tej lus; thiab tej roob yuav khiav ntawm koj xub ntiag mus, thiab tej dej yuav lem ntawm txoj kev uas tej dej ntws; thiab koj yuav ua neej nrog kuv, thiab kuv nrog koj.”²⁸ Dhau ntawm Nws tus tub qhev Vaj Ntxwv Npeyamis, Nws tshaj tawm hais tias, “Yuav muab nej hu ua Khetos cov me nyuam, nws cov tub, thiab nws cov ntxhais; vim saib seb, hnub no nws los ua nej leej txiv ntawm sab ntsuj plig; vim nej hais tias nej lub siab tau hloov los ntawm kev ntseeg nws lub npe; yog li ntawd, nej thiaj yug los ntawm nws thiab tau peem tsheej los ua nws cov tub thiab nws cov ntxhais.”²⁹

Yog li ntawd, thaum peb mob siab kawm txog tus Cawm Seej tsis tu tsis tseg thiab ua raws li Nws tus yam ntxwv, kuv cog lus rau nej, hauv Nws lub npe, hais tias Nws tej cwj pwm yuav nyob rau hauv peb lub siab lub ntsws,³⁰ tias peb yuav rais los mus ua neeg zoo li Nws, thiab peb yuav nrog Nws taug kev.³¹

Kuv cov kwv tij thiab cov muam, kuv thov kom peb yuav xav tsis thoob txog Yexus Khetos thiab Nws txoj kev hlub uas zoo tag nrho tas mus ib txhis li. Thov kom peb yuav nco qab ntsoov txog tej yam uas peb qhov muag pom lawm, thiab tej uas peb lub siab twb hnov thaum peb xav tsis thoob txog peb tus Cawm Seej txoj kev txi, uas yuav kho tau peb sab ntsuj plig thiab sab paj hlwb thiab yuav pab peb txav mus nyob ze Nws. Thov kom peb yuav xav tsis thoob txog Leej Txiv tej kev cog lus uas Nws cog tseg thiab tej uas Nws tau npaj tseg rau cov uas rau siab ntseeg:

“Lub nceeg vaj yog nej li thiab tej koob hmoov uas nyob haud yog nej li, thiab tej kev nplua nuj nyob mus ib txhis yog nej li.

“Thiab tus uas txais txhua yam nrog txoj kev ua tsaug los tus Tswv yuav ua kom tus ntawd muaj yeeb koob.”³²

Yexus yog tus Cawm Dim rau lub ntiaj teb, thiab nov yog Nws lub Koom Txoos. Kuv hais lus tim khawv txog tej lus tseeb no es xav tsis thoob, hwm thiab saib tau peb tus Cawm Seej, Yexus Khetos, lub npe amees.