Tej Kev Khi Lus nrog Vajtswv Ua rau Peb Muaj Zog, Tiv Thaiv Peb, thiab Npaj Peb Txais Tau Yeeb Koob Mus Ib Txhis Li

Cov viv ncaus, kuv zoo siab kawg vim peb cov viv ncaus nyob thob plaws lub ntiaj teb no tau koom ua ke. Vim peb yog cov poj niam uas ua raws li peb tej kev khi lus uas peb tua khi nrog Vajtswv, peb sab ntsuj plig thiaj li koom ua ke kom pab peb kov yeej tej teeb meem uas peb raug txhua hnub thiab npaj rau Yexus Khetos txoj Kev Los Zaum Ob. Thiab qhov uas peb ua raws li tej kev khi lus ntawd ua rau peb ua cov poj niam uas muaj hwj huam pab lwm tus los cuag tus Cawm Seej.

Cov uas tau ua kev cai raus dej tau khi lus tias lawv yuav ris Yexus Khetos lub npe, nco ntsoov txog Nws, ua raws li Nws cov lus txib, thiab ua hauj lwm rau Nws kom txog thaum kawg. Thaum peb ua tej yam no, Leej Txiv Saum Ntuj Ceeb Tsheej cog lus tias Nws yuav zam txim rau peb tej kev txhaum thiab muab tus Vaj Ntsuj Plig Dawb Huv nrog nraim peb nyob. Cov koob hmoov no qhib ib txoj kev rau peb taug, thiab yog tias peb txiv mus tom hauv ntej thiab nyiaj mus kom txog thaum kawg, ces peb yuav nrog Vajtswv thiab Nws Leej Tub nyob hauv lub nceeg vaj xilethi-aus. Txhua tus neeg uas tau ua kev cai raus dej yuav txais tej txiaj ntsim no yog tias lawv ua raws li txoj kev khi lus uas lawv tau khi hnub tshwj xeeb ntawd.

Cov uas ua kev khi lus ntxiv hauv lub tuam tsev txais tej lus cog tseg tias yuav tau koob hmoov yog tias lawv rau siab ntseeg. Peb cog lus tias peb yuav ua raws li Vajtswv cov lus txib, ua raws li Yexus Khetos txoj moo zoo, ua neeg tsim txiaj, thiab muab peb lub sij hawm thiab tej txuj ci fij rau tus Tswv. Ces Vajtswv cog lus tias peb yuav txais cov koob hmoov hauv lub neej no thiab yuav muaj cib fim kom rov qab los nrog Nws nyob.¹ Thaum ua li no, ces Vajtswv muab vaj txiaj ntsim, los yog lub hwj chim rau peb kom paub qhov tseeb thiab qhov cuav, paub qhov zoo thiab qhov phem, thaum muaj tej lub suab nyob ib puag ncig uas ntxhov hnyo thiab hais lus phem. Yeej yog ib lub txiaj ntsim uas muaj hwj chim heev!

Kom npaj rau thawj zaug uas kuv yuav mus rau lub tuam tsev, kuv niam thiab cov viv ncaus hauv lub Koom Haum Niam Tsev tau pab kuv xaiv tej yam uas kuv xav tau, xws li cov tsoos tsho zoo nkauj ua kab ke. Tiam sis txoj kev npaj tseem ceeb tshaj plaws twb yog ua ntej kuv paub tias kuv yuav hnav dab tsi. Tom qab nws xam phaj kuv kom seb kuv puas tsim nyog, kuv tus npisov tau piav txog tej kev khi lus uas kuv yuav khi. Nws txoj kev piav txog qhov no ua rau kuv muaj sij hawm xav txog thiab npaj ua tej kev khi lus ntawd.

Thaum txog hnub ntawd, kuv ris Vajtswv txiaj thiab muaj kev tswm seeb hauv kuv lub siab. Txawm yog kuv tsis tau paub tag nrho txog tej kev khi lus uas kuv tau khi, kuv twb paub tias tej kev khi lus ntawd tau muab kuv khi rau Vajtswv thiab kuv yuav txais cov koob hmoov zoo tshaj qhov kuv to taub yog tias kuv ua raws li kuv tej kev khi lus. Txij thaum thawj zaug kuv mus hauv tus Tswv lub tsev ntawd los, kuv pheej kawm hais tias qhov uas peb ua raws li peb tej kev khi lus uas peb khi nrog Vajtswv yuav cia peb siv tus Cawm Seej lub hwj chim, peb thiaj li muaj zog kom kov yeej tej kev sim siab, muaj kev pov hwm kom txhob raug tus yeeb ncuab tej kev ntxias, thiab npaj peb muaj yeeb koob mus ib txhis li.

Lub neej no yeej muaj kev zoo siab thiab kev nyuaj siab, muaj kev txom nyem thiab muaj yeeb koob. Txhua yam hauv lub neej no pab peb to taub ntxiv txog peb Leej Txiv txoj kev hlub thiab peb txoj kev txawj hloov vim muaj tus Cawm Seej txoj kev tshav ntuj. Kev ua raws li peb tej kev khi lus cia tus Cawm Seej lub hwj chim ntxuav peb kom huv thaum peb kawm los ntawm lub neej no—txawm yog kev txiav txim yuam kev los sis ib qho txhaum loj heev. Peb tus Txhiv Dim nyob ntawd txais peb thaum peb poob tsuas yog peb yuav tig mus rau Nws.

Daim Duab

Tuav hlua nqis lub pob tsuas

Nej puas tau sawv ntawm lub npoo pob tsuas siab siab heev es nej lub nraub qaum tig mus rau qhov tob tob heev? Thaum tuav hlua nqis, txawm yog yus paub tias twb muab yus khi rau ib txoj hlua ruaj thiab muaj tej khoom uas pab tau yus muaj kev nyab xeeb, thaum yus sawv puag saum lub pob tsuas ces ua rau yus poob plig. Thaum yus mus ib ruam thaub qab poob lub pob tsuas ces pib ua viav vias nyob siab siab heev ces yuav tsum tso siab rau tus tswg uas tau muab txhos rau ntawm ib qho uas yuav tsis txav mus hlo li. Yuav tsum tso siab rau tus neeg uas yuav rub txoj hlua kom ruaj pab nej nqis mus. Thiab txawm yog tej khoom ua rau yus tswj tau qhov uas nej nqis mus sai npaum li cas, yuav tsum ntseeg tus khub uas pab yus kom yus tsis txhob poob mus.

Daim Duab

Tus tswv uas siv thaum tuav hlua nqis

Daim Duab

Tus ntxhais hluas tuav hlua nqis mus

Kuv nco qab ntsoov thaum kuv nrog ib cov ntxhais hluas mus tuav hlua nqis mus. Kuv yog thawj tug uas tau mus. Thaum kuv thaub qab ntawm lub pob tsuas mus, kuv pib poob mus es kuv ua tsis taus dab tsi. Zoo siab uas txoj hlua cia li nruj lawm ces kuv tsis tau poob ntxiv. Thaum kuv dai viav vias ntawm lub pob tsuas siab siab ntawd, kuv tau thov Vajtswv kom pab tus neeg los sis qhov uas ua rau kuv thiaj li tsis poob mus rau saum cov pob zeb puag haud.

Tom qab ntawd, kuv tau kawm tias tus tswg tsis tau muab txhos khov kho, ces thaum kuv mus ib ruam ntawm lub npoo pob tsuas, ua rau tus neeg uas tuav nkaus txoj hlua vau thaub qab thiab rub nws mus rau lub npoo pob tsuas ntawd. Xyov ua cas nws ho muab nws ob txhais ko taw tso hauv tej lub pob zeb loj kom zawm. Vim nws nyob khov kho li ntawd, nws siv zog muab kuv dauv mus tso txoj hlua ib teg dhau ib teg. Txawm kuv pom tsis taus nws, kuv paub tias nws twb siv tag nrho nws lub dag zog kom cawm kuv dim xwm txheej phem. Muaj ib tug phooj ywg ntxiv nyob puag hauv qab lub pob tsuas, nws npaj txais kuv yog tias txoj hlua tu. Thaum nws ncav cuag kuv, nws ncav tes tuav kuv tej hlua pav thiab pab muab kuv dauv mus txog rau ntawm qhov av.

Vim Yexus Khetos yog qhov txhos thiab tus khub uas zoo tag nrho, peb paub tias Nws yuav muab dag zog rau peb thaum peb raug sim siab thiab tham kawg Nws yuav cawm peb dim. Ib yam li Thawj Tswj Hwm M. Russell Ballard qhia: “Kev ntseeg Vajtswv thiab Nws Leej Tub, tus Twv Yexus Khetos, yog … qhov txhos uas peb yuav tsum muaj hauv peb lub neej peb thiaj li yuav nyob ruaj nrees thaum raug xwm txheej thiab tej yam phem. … Peb txoj kev ntseeg … yuav tsum tsom ntsoov rau Yexus Khetos, nws lub neej thiab nws txoj kev theej txhoj, thiab nws txoj moo zoo.”²

Tej khoom ntawm sab ntsuj plig uas ceev peb cia kom txhob poob rau cov pob zeb ntawm tej teeb meem hauv lub neej no yog peb zaj lus tim khawv txog Yexus Khetos thiab tej kev khi lus uas peb ua. Peb yeej tso siab rau tej yam no txhawb nqa peb thiab coj peb mus rau kev nyab xeeb los tau. Vim nws txaus siab nrog peb nyob, tus Cawm Seej yeej yuav tsis cia peb poob mus kom dhau qhov Nws ncav tau. Txawm yog peb raug txom nyem thiab kev nyuaj siab, Nws nyob kom ris peb thiab txhawb nqa peb. Nws lub hwj chim pab peb rov qab zoo tom qab luag tej xaiv ua tej yam phem. Tiam sis, peb yuav tsum muab hlua pav thiab ua tib zoo kom muab hlua sib khi ua tej pob caus. Peb yuav tsum cia tus Cawm Seej ua peb qhov txhos, vim peb khi rawv Nws los ntawm peb tej kev khi lus.³

Peb yuav ua li cas kom txoj kev sib khi ntawd muaj zog? Peb txo hwj chim thov Vajtswv, kawm thiab xav txog vaj lug kub, txais lub cim nco txog thiab xav hloov siab lees txim thiab muaj siab xav ua zoo, siv zog ua raws li cov lus txib, thiab ua raws li tus yaj saub tej lus ntuas. Thaum peb ua tej yam txhua hnub raws li txoj kev “siab thiab dawb huv ntxiv,”⁴ ces yuav muab peb sib txuas rau tus Cawm Seej thiab pab lwm tus los cuag Nws.

Txoj kev “siab thiab dawb huv ntxiv” zoo li cas? Peb sim ua raws li txoj moo zoo txhua lub sij hawm peb nrog lwm tus tham. Peb tu cov uas xav tau thaum peb txhawb pab lawv, qhia tias peb hlub lawv los ntawm peb txoj kev pab. Peb qhia txoj moo zoo rau cov uas xav nyob kaj siab lug thiab xav tau dag zog thiab lawv “tsis paub mus nrhiav … qhov twg.”⁵ Peb ua hauj lwm kom tej tsev neeg nyob mus ib txhis nyob ob sab ntawm daim ntaub thaiv. Thiab rau cov uas tau ua tej kev khi lus hauv tus Tswv lub tsev, raws li Thawj Tswj Hwm Russell M. Nelson tau piav tias, “Txhua tus neeg laus uas mus rau lub tuam tsev yuav hnav cev tsoos tsho ntawm lub pov thawj hwj, [uas] … ua rau peb nco qab … taug txoj kev ua raws li kev khi lus txhua hnub raws li ib txoj kev siab thiab dawb huv ntxiv.”⁶ Tej yam no yeej tsis yog tej uas peb lam ua tej lub sij hawm xwb, peb yuav tsum ua txhua hnub kom thiaj li zoo siab—thiab muaj kev xyiv fab mus ib txhis li.

Tsis muaj ib yam dab tsi tseem ceeb tshaj rau peb txoj kev vam meej mus ib txhis li tsuas yog kev ua raws li peb tej kev khi lus nrog Vajtswv. Thaum peb ua raws nraim li peb tej kev khi lus ntawm lub tuam tsev, peb yuav cia siab tias peb yuav rov qab koom ua ke nrog cov uas peb hlub nyob ntawm daim ntaub thaiv sab tod. Tus me nyuam los yog tus khub uas tau tso lub ntiaj teb no tseg lawm cia siab xav kom nej ua raws nraim li tej kev khi lus uas khi nej ua ke. Yog peb tso peb tej kev khi lus tseg los sis saib tsis tau peb tej kev khi lus nrog Vajtswv, ces ntshe tej kev khi cov txheeb ze rau peb yuav tu. Tam sim no yog lub sij hawm hloov siab lees txim, kho peb tus kheej, thiab rov qab sim ua dua.

Kev zoo siab yeej tsis muaj nqis yog tias peb muab cov koob hmoov ntawm kev xyiv fab mus ib txhis li pauv kom tau zoo rau ib me pliag xwb. Peb laus npaum li cas los, qhov no muaj tseeb tiag: yog peb xav zoo siab kav ntev ces yuav tsum ua raws li Yexus Khetos txoj moo zoo thiab ua raws li peb tej kev khi lus. Peb tus yaj saub, Thawj Tswj Hwm Nelson, tau hais tias, “peb txoj kev nyab xeeb thiab peb txoj kev zoo siab uas kav ntev yeej nyob ntawm qhov uas peb tuav rawv tus nqaj hlau uas yog Yexus Khetos txoj moo zoo, nrog rau tej kev khi lus thiab cov kab ke. Thaum peb ua li ntawd, peb yuav muaj peev xwm mus dhau tej dej nphau nphwv vim tias peb siv tau Vajtswv lub hwj chim.”⁷

Peb feem coob raug tej dej nphau nphwv. Thaum peb raug tej yam nyuaj uas ua rau peb tsis pom kev vim peb los kua muag ntau dhau, tej zaum peb yuav tsis paub peb yuav tsum mus qhov twg. Tej zaum peb xav tias peb tsis muaj zog txaus kom mus dhau tej yam nyuaj ntawd. Kev nco ntsoov nej yog leej twg—Vajtswv ib tug me nyuam uas Nws hlub—vim li cas nej nyob hauv lub ntiaj teb, thiab nej lub hom phiaj xav nrog Vajtswv thiab cov uas nej hlub los yeej pab tau nej pom kev meej thiab taw tes rau nej mus rau qhov chaw yog. Txawm yog muaj cua daj cua dub los, muaj ib lub teeb ci ntsa iab uas qhia kev rau peb. Yexus hais tias, “Kuv yog txoj kev kaj uas ci nyob hauv qhov tsaus.”⁸ Tus Tswv cog lus tias peb yuav nyab xeeb thaum peb saib Nws txoj kev kaj thiab ua raws nraim li peb tej kev khi lus.

Kuv tau koob hmoov vim kuv ntsib cov poj niam uas ua raws li lawv tej kev khi lus thiab nyias muaj nyias tej xwm txheej. Txhua hnub, lawv ntsia ntsoov tus Tswv thiab Nws cov yaj saub kom coj lawv kev, es tsis saib tej qhauj tawm uas txhua tus saib. Txawm yog nyias muaj nyias tej teeb meem thiab neeg ntiaj teb muaj ntau lub tswv yim kom ntxias lawv tsis ua raws li lawv tej kev khi lus los, lawv rau siab taug raws nraim txoj kev ua raws li lawv tej kev khi lus. Lawv ntseeg txoj kev cog lus tias lawv yuav txais “tag nrho tej uas [Leej] Txiv muaj.”⁹ Thiab nej muaj hnub nyoog li cas, nej txhua tus poj niam uas tau khi lus nrog Vajtswv yeej muaj peev xwm tsa tus Tswv lub teeb kom ci thiab coj lwm tus tuaj rau Nws.¹⁰ Thaum nej ua raws li nej tej kev khi lus, Nws yuav pub Nws lub hwj chim pov thawj hwj rau nej thiab ua rau nej muaj hwj huam pab txhua tus uas nej ntsib. Ib yam li Thawj Tswj Hwm Nelson hais tias, nej yog cov poj niam uas yuav ua kom muaj raws li cov yaj saub puag thaum ub tau hais lawm!¹¹

Cov viv ncaus, qhov tseem ceeb tshaj plaws, taug kev ua raws nraim li nej tej kev khi lus kom mus cuag Yexus Khetos! Nej twb tau koob hmoov vim nej los rau hauv lub ntiaj teb thaum cov tuam tsev nyob thoob plaws lub ntiaj teb. Txhua tus mej zeej uas tsim nyog hauv lub Koom Txoos muaj cib fim khi lus thiab ua raws li lawv tej kev khi lus. Cov tub hluas ntxhais hluas, txhob tos kom sib yuav los sis mus ua tub txib ua ntej nej yuav ua tej kev khi lus dawb ceev ntawd. Nej cov ntxhais hluas npaj tau tam sim no nej thiaj li yuav txais tau kev pov hwm thiab lub zog uas los ntawm tej kev khi lus ntawm lub tuam tsev tom qab nej muaj 18 xyoo yog tias nej npaj siab lawm thiab xav txais thiab ua raws li tej kev khi lus ntawm lub tuam tsev ntawd.¹² Rau nej cov uas twb txais cov koob hmoov ntawm lub tuam tsev lawm, tsis txhob cia cov neeg los sis lwm yam ntxias nej kom nej ncaim tej lus tseeb mus ib txhis li no. Kawm ntawv thiab thov cov neeg uas nej tso siab rau kom to taub ntxiv txog lub ntsiab dawb huv ntawm tej kev khi lus uas nej tau khi lawm. Mus rau lub tuam tsev ntau npaum li nej ua tau thiab mloog tus Ntsuj Plig lus. Nej yuav paub tseeb tias nej taug tus Tswv txoj kev. Nej yuav ua siab loj mus ntxiv kom mus tom ntej thiab coj lwm tus nrog nej mus.

Kuv ua tim khawv tias thaum pev xaiv nrog Leej Txiv Saum Ntuj Ceeb Tsheej khi lus thiab siv tus Cawm Seej lub hwj chim kom ua raws li tej kev khi lus ntawd, ces peb yuav tau koob hmoov kom muaj kev zoo siab hauv lub neej no tshaj qhov peb xav thiab txoj sia nyob mus ib txhis thaum yav tom ntej.¹³ Los ntawm Yexus Khetos lub npe, amees.