Vajtswv txoj Kev Hlub Nyob hauv Leej Txiv txoj Hau Kev

Ib qho uas tib neeg xav yuam kev txog kev txiav txim tom qab lub neej no yog qhov uas tib neeg zoo mus rau lub ntuj ceeb tsheej thiab tib neeg phem mus rau ib qho chaw hu ua ntuj txiag teb tsaus. Qhov xav yuam kev no uas qhia tias tsuas muaj ob qho chaw no thaum kawg qhia tias cov uas tsis ua raws li tag nrho cov lus txib kom nkag tau mus rau hauv lub ntuj ceeb tsheej yuav tsum mus rau ntuj txiag teb tsaus xwb.

Leej Txiv Saum Ntuj Ceeb Tsheej uas hlub peb yeej muaj ib txoj hau kev zoo dua rau Nws cov me nyuam. Cov lus qhuab qhia ntawm Yexus Khetos lub Koom Txoos qhia tias tag nrho Vajtswv cov me nyuam—tshuav ib txhia uas tsawg tsawg xwb—thaum kawg lawv yuav txais tau ib lub nceeg vaj uas muaj yeeb koob.² Yexus qhia hais tias, “Hauv kuv Txiv lub tsev muaj ntau chav.”³ Los ntawm kev tshwm sim hauv hnub nyoog no peb paub tias ntau chav nws hais txog yog peb lub nceeg vaj uas muaj yeeb koob. Nyob hauv txoj Kev Txiav Txim Kawg tus Tswv yuav txiav txim rau peb raws li tej yam peb ua thiab tej kev xav hauv peb lub siab.⁴ Ua ntej ntawd, peb yuav tsum raug txom nyem rau tej kev txhaum yog peb tseem tsis tau hloov siab lees txim. Cov vaj lug kub qhia meej txog qhov ntawd.⁵ Ces tus Txiav Txim ncaj ncees yuav cia peb mus nyob hauv ib lub nceeg vaj uas muaj yeeb koob. Yog li ntawd, ib yam li peb paub los ntawm kev tshwm sim, txhua tus “yuav raug txiav txim … , thiab txhua tus neeg yuav tau txais raws li tej yam uas nws tus kheej tau ua, nws tus kheej txoj kev kav, nyob rau tej chaw nyob uas tau npaj lawm.”⁶

Tus Tswv tsis tau qhia ntau pes tsawg txog ob lub nceeg vaj uas muaj yeeb koob. Tiam sis, tus Tswv tau qhia ntau yam txog lub nceeg vaj siab tshaj plaws, uas phau Npaivnpaum piav tias muaj “yeeb koob ntawm lub hnub.”⁷

Nyob hauv yeeb koob “xilethi-aus”⁸ muaj peb theem.⁹ Theem siab tshaj plaws yog kev tsa nto nyob hauv lub nceeg vaj xilethi-aus, nyob ntawd peb yuav hloov los ua neeg zoo li peb Leej Txiv thiab Nws Leej Tub, Yexus Khetos. Xwv kom pab peb coj cwj pwm zoo li Vajtswv thiab hloov peb lub siab lub ntsws kom thiaj li ua neeg zoo li Nws, tus Tswv tau qhia txog cov lus qhuab qhia thiab tau tsa cov lus txib raws li tej kev cai uas nyob mus ib txhis. Nov yog tej yam uas peb qhia hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg vim lub hom phiaj ntawm cov lus qhuab qhia thiab tej tsab cai ntawm lub Koom Txoos no yog kom npaj Vajtswv cov me nyuam rau kev cawm seej nyob hauv lub yeeb koob xilethi-aus, thiab, qhov tseem ceeb, kev tsa nto nyob hauv theem siab tshaj plaws.

Tej kev khi lus thiab cov koob hmoov uas Vajtswv cog lus rau cov neeg rau siab ntseeg hauv cov tuam tsev yeej yog tej yam tseem ceeb. Yog vim li no peb thiaj li ua cov tuam tsev thoob plaws lub ntiaj teb, qhov uas pawg hu nkauj tau hu tej zaj nkauj zoo kawg nkaus. Ib txhia xav tsis thoob txog qhov no, vim lawv tsis to taub tias tej kev khi lus thiab cov kab ke hauv lub tuam tsev pab peb txais tau kev tsa nto. Yeej yuav to taub qhov no tsuas yog yus paub qhov tseeb txog peb theem yeeb koob. Vim peb Leej Txiv Saum Ntuj Ceeb Tsheej hlub tag nrho Nws cov me nyuam, Nws tau tsim lwm lub nceeg vaj—zoo li Txwj Laug Quentin L. Cook tau piav txog—es tag nrho yeej zoo tshaj qhov peb txawj to taub.¹⁰

Yexus Khetos txoj Kev Theej Txhoj ua kom muaj txhua yam no. Nws tau qhia tias Nws “muab yeeb koob rau Leej Txiv, thiab txhiv tag nrho tej yam nws ob txhais tes tau ua.”¹¹ Peb txais tau txoj kev cawm seej ntawd nyob hauv peb lub nceeg vaj uas muaj yeeb koob. Peb paub los ntawm kev tshwm sim tias “Vajtswv muab ib txoj kev cai rau txhua lub nceeg vaj.”¹² Qhov no txhais hais tias:

“Tus uas tsis muaj peev xwm coj raws li txoj kev cai ntawm lub nceeg vaj xilethi-aus yuav tsis muaj peev xwm thev taus lub yeeb koob xilethi-aus.

“Thiab tus uas tsis muaj peev xwm coj raws li txoj kev cai ntawm lub nceeg vaj thawlethi-aus yuav tsis muaj peev xwm thev taus lub yeeb koob thawlethi-aus.

“Tus uas tsis muaj peev xwm coj raws li txoj kev cai ntawm lub nceeg vaj thilethi-aus ces tsis muaj peev xwm thev taus lub yeeb koob thilethi-aus.”¹³

Los yog hais tias, lub nceeg vaj muaj yeeb koob uas peb txais nyob hauv Kev Txiav Txim Zaum Kawg yeej nyob ntawm seb peb xaiv ua raws li tej kev cai twg raws li peb Leej Txiv Saum Ntuj Ceeb Tsheej txoj hau kev. Raws li Nws txoj hau kev muaj peb lub nceeg vaj Nws cov me nyuam thiaj li yuav “nyob” hauv ib lub nceeg vaj uas tsim nyog rau lawv.

Lub Koom Txoos uas tus Tswv tau muab txum tim rov qab los yeej siv tej lus tseeb mus ib txhis li no kom qhia thiab tsim tej tsab cai uas tib neeg yuav to taub tsuas yog thaum lawv paub txog peb Leej Txiv Saum Ntuj Ceeb Tsheej txoj hau kev rau tag nrho Nws cov me nyuam.

Yog li ntawd, peb saib txoj kev ywj siab xaiv rau nqi heev. Nej feem coob paub txog lub Koom Txoos no txoj kev siv zog txhawb nqa kev ywj siab ntseeg ntuj. Txhua yam no yeej pab txhawb nqa Leej Txiv Saum Ntuj Ceeb Tsheej txoj hau kev. Peb xav pab tag nrho Nws cov me nyuam—tsis yog peb cov mej zeej xwb—muaj kev ywj siab xaiv.

Qee zaum tib neeg noog peb saib yog vim li cas peb muab cov tub txib xa mus rau ntau lub teb chaws, suav cov teb chaws uas twb ntseeg Khetos lawm thiab. Lawv kuj noog peb saib yog vim li cas peb muab nyiaj ntau pab cov neeg uas tsis yog mej zeej ntawm peb lub Koom Txoos es peb tsis siv cov nyiaj pab no kom ntxias lwm tus neeg los koom peb lub Koom Txoos. Peb ua li no vim tus Tswv tau qhia peb kom saib txhua tus ntawm Nws cov me nyuam zoo li lawv yog peb cov kwv tij thiab cov muam, thiab peb xav muab tej yam uas peb muaj ntawm sab ntsuj plig thiab sab cev nqaij daim tawv rau txhua tus.

Cov lus qhuab qhia uas kav mus ib txhis kuj qhia ib qho tseem ceeb txog cov me nyuam. Peb saib tias kev muaj me nyuam thiab kev tu me nyuam yog ib feem ntawm Vajtswv txoj hau kev. Cov uas muaj hwj chim ua li no muaj ib lub luag hauj lwm xyiv fab thiab dawb ceev. Yog li ntawd, peb yuav tsum qhia thiab xeem kom tau tej ntsiab cai thiab tej kev coj ua uas npaj tej qhov chaw zoo rau txhua tus me nyuam yaus txoj kev loj hlob tuaj thiab kev zoo siab.

Qhov kawg, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej yog ib lub Koom Txoos uas saib tsev neeg rau nqi heev. Tiam sis ib qho uas neeg coob tsis to taub zoo yog qhov uas peb txoj kev tsom ntsoov rau lub cuab lub yig yeej tsis yog rau tej kev sib txheeb sib ze hauv lub neej no xwb. Peb ntseeg hais tias tej kev txheeb ze nyob mus ib txhis li yeej ua lub hauv paus ntawm peb txoj kev ntseeg. Lub Koom Txoos no ntiag tug hauj lwm yog kom pab Vajtswv cov me nyuam tsim nyog txais tej yam uas Vajtswv xav kom lawv muaj. Vim txhua tus txais kev txhiv dim dhau los ntawm Yexus Khetos txoj Kev Theej Txhoj, txhua tus muaj cib fim txais tau txoj sia nyob mus ib txhis (kev tsa nto hauv lub nceeg vaj xilethi-aus), uas Evas hais tias “Vajtswv muab rau txhua tus uas mloog lus.”¹⁴ Qhov no zoo tshaj kev cawm seej xwb. Thawj Tswj Hwm Russell M. Nelson tau pab peb nco qab hais tias “nyob hauv Vajtswv txoj hau kev nyob mus ib txhis li, kev cawm seej yog rau yus tus kheej; [tiam sis] kev tsa nto yog ib yam uas tsev neeg ncav kom tau ua ke.”¹⁵

Ib qho tseem ceeb heev yog qhov uas Vajtswv muab tshwm sim qhia tias yus txais tau kev tsa nto tsuas yog yus rau siab ntseeg ua raws li tej kev khi lus ntawm ib tug txiv neej thiab ib tug poj niam txoj kev sib yuav mus ib txhis li.¹⁶ Yog vim muaj cov lus qhuab qhia no peb thiaj li qhia tias “qhov uas yus yog ib tug poj niam los yog ib tug txiv neej yog ib yam tseem ceeb ntawm ib tug neeg tus xeeb ceem thiab lub ntsiab, txawm hais tias nyob lub qub neej los yog, lub neej no los yog, lub neej nyob mus ib txhis li los yog.”¹⁷

Yog vim li no tus Tswv thiaj li kom Nws lub Koom Txoos tawm tsam tej kev yuam kom txhob qhia Nws cov lus qhuab qhia txog kev sib yuav ntawm ib tug txiv neej thiab ib tug poj niam thiab tawm tsam tej yam uas yuav hloov qhov uas yus yog ib tug poj niam los txiv neej, tawm tsam tej yam uas ua kom poj niam thiab txiv neej zoo ib yam los sis ua rau neeg tsis paub lawv yog txiv neej los sis poj niam.

Lub Koom Txoos txoj kev qhia txog tej yam tseem ceeb no ua rau neeg coob xav tawm tsam peb. Peb to taub qhov ntawd. Peb Leej Txiv Saum Ntuj Ceeb Tsheej txoj hau kev cia kom “txhua yam nyias muaj nyias qhov fab ntxeev,”¹⁸ thiab Dab Ntxwg Nyoog tej kev tawm tsam heev tshaj plaws yog tawm tsam tej yam uas tseem ceeb tshaj plaws rau Vajtswv txoj hau kev. Yog li ntawd, nws xav tawm tsam kom tib neeg tsis txais tau kev tsa nto thaum nws rhuav kev sib yuav, qhia kom txhob muaj me nyuam, los sis ua rau tib neeg tsis paub xyov puas yog poj niam los txiv neej. Tiam sis, peb paub tias thaum kawg, Leej Txiv Saum Ntuj Ceeb Tsheej hlub peb es Nws lub hom phiaj thiab txoj hau kev yuav tsis hloov. Tej zaum nyias yuav muaj nyias tej xwm txheej, thiab Vajtswv txoj hau kev npaj kom thaum kawg, cov uas rau siab ntseeg ua raws li lawv tej kev khi lus yuav muaj cib fim txais tau txhua yam uas Vajtswv tau cog lus lawm.¹⁹

Ib co lus qhia uas muaj nqis heev kom pab peb npaj txais tau txoj sia nyob mus ib txhis, “Vajtswv lub txiaj ntsim zoo tshaj plaws,”²⁰ yog xyoo 1995 zaj lus tshaj tawm txog tsev neeg.²¹ Tej lus tshaj tawm hauv zaj no yeej txawv ntawm tej kev cai hauv tej lub teb chaws thiab tej yam uas tib neeg xav tau, xws li nyob ua ke thaum tsis tau sib yuav thiab txiv neej yuav txiv neej thiab poj niam yuav poj niam. Cov uas tsis to taub txog Vajtswv txoj hau kev rau Nws cov me nyuam tej zaum yuav xav tias zaj lus tshaj tawm txog tsev neeg yeej yog ib tsab cai uas yuav hloov xwb. Tiam sis, peb paub tias zaj lus tshaj tawm txog tsev neeg yeej yog cov lus qhuab qhia uas tsis hloov thiab qhia hais tias saib hom tsev neeg twg thiaj yuav tsim tau qhov tseem ceeb tshaj ntawm peb txoj kev loj hlob tuaj ntawm sab ntsuj plig.

Nov yog qhov uas yuav tsum nco ntsoov txog cov lus qhuab qhia thiab tej tsab cai ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Hauv tej kev sib raug zoo thiab tej xwm txheej ntawm lub neej no, peb txhua tus yuav tsum hlub cov neeg txawv. Vim peb coj raws li Khetos peb yuav tau hlub peb cov neeg zej zog, peb yuav tsum ua neej kaj siab lug nrog cov uas tsis ntseeg li peb. Peb txhua tus yog Leej Txiv Saum Ntuj Ceeb Tsheej cov me nyuam uas Nws hlub. Nws tau pub txiaj ntsim rau peb txhua tus kom muaj txoj sia tom qab peb tuag, thiab thaum kawg, mus hauv ib lub nceeg vaj uas muaj yeeb koob. Vajtswv xav kom peb txhua tus sib zog kom txais tau Nws tej koob hmoov zoo tshaj plaws thaum peb ua raws li Nws cov lus txib, tej kev khi lus, thiab cov kab ke, thaum kawg ua tej no hauv Nws cov tuam tsev uas peb ua thoob plaws lub ntiaj teb. Peb yuav tsum muaj siab xav qhia tej lus tseeb mus ib txhis li no rau lwm tus. Tiam sis nrog kev hlub uas yuav tsum pub rau peb cov neeg zej zog tag nrho, peb yeej lees lawv tej kev txiav txim. Raws li ib tug yaj saub hauv Phau Ntawv Maumoos qhia, peb yuav tsum mus tom ntej, nrog “kev hlub Vajtswv thiab txhua tus neeg.”²²

Ib yam li Thawj Tswj Hwm Russell M. Nelson tau hais nyob hauv lub tuam rooj sab laj tas los: “Yeej tsis tau muaj ib lub sij hawm hauv lub ntiaj teb no thaum txhua leej txhua tus yuav tsum paub txog peb tus Cawm Seej. … Khetos cov lus qhuab qhia dawb huv muaj hwj chim heev. Cov lus no hloov txhua tus lub neej uas to taub thiab nrhiav kev kom ua raws li cov lus no.”²³