Kev Hloov Siab Los Ntseeg Yog Peb lub Hom Phiaj

Xav txog tej lus tseem ceeb ntawm zaj lus qhia txog Los, Nrog Kuv Mus:

“Lub hom phiaj ntawm tag nrho kev kawm thiab kev qhia txog txoj moo zoo yog kom peb hloov siab los ntseeg Leej Txiv Saum Ntuj Ceeb Tsheej thiab Yexus Khetos. …

“… Tiam sis txoj kev kawm txog txoj moo zoo uas txhawb peb txoj kev ntseeg kom muaj zog thiab ua rau peb hloov siab los ntseeg tsis yog ib txoj kev uas peb muaj peev xwm ua tau ib me pliag xwb. Txoj kev kawm li no yeej tawm chav kawm mus nkag rau hauv peb lub siab thiab lub tsev. Ua li no yuav tsum rau rau siab to taub thiab ua neej raws li txoj moo zoo. Yuav tsum muaj tus Vaj Ntsuj Plig Dawb Huv tshoov peb lub siab kom hloov siab los ntseeg tiag.”¹

Qhov ntawd yog qhov txuj ci tseem ceeb uas peb xav nrhiav—thaum ib tug neeg kawm los ntawm cov vaj lug kub² thiab thaum nws kawm, tus Vaj Ntsuj Plig Dawb Huv tshoov nws lub siab. Tej kev kawm ntawd yog lub hauv paus muaj nqis rau peb txoj kev hloov siab los ntseeg tus Cawm Seej. Thiab tsis ntev tas los, Thawj Tswj Hwm Russell M. Nelson tau pab peb nco qab hais tias, yuav tsum txhawb nqa peb lub hauv paus ntawm sab ntsuj plig tsis tu ncua li.³ Kev hloov siab los ntseeg uas kav ntev yog ib qhov uas yuav tsum ua tas yus lub neej.⁴ Kev hloov siab los ntseeg yog peb lub hom phiaj

Yog xav ua zoo tshaj, yus txoj kev kawm los ntawm cov vaj lug kub yuav tsum yog yus ua yus tus kheej.⁵ Thaum yus nyeem los hnov txog lwm tus tej kev kawm thiab kev xav, pab tau, tiam sis yuav tsis muaj hwj chim pab los hloov siab los ntseeg tib yam li thaum yus kawm yus tus kheej. Tsis muaj ib yam dab tsi uas pauv tau yus lus sij hawm thaum yus nyeem cov vaj lug kub, es hnov tus Vaj Ntsuj Plig Dawb Huv hais lus rau yus.

Txhua lub lim tiam thaum kuv qhib kuv phau ntawv Los, Nrog Kuv Mus, kuv sau lus nug no rau ntawm phab ntawv sab saud: “Tus Vaj Ntsuj Plig Dawb Huv qhia kuv dab tsis lub lim tiam no thaum kuv nyeem cov tshooj no?”

Thaum kuv kawm cov vaj lug kub, kuv xav txog lus nug ntawd ntau zaus. Thiab txhua txhia lub sij hawm, kev tshoov siab ntawm sab ntsuj plig los rau kuv, thiab kuv sau tej ntawd rau kuv phau ntawv.

Ces, ua cas kuv yuav paub thaum twg tus Vaj Ntsuj Plig Dawb Huv qhia kuv? Es, ntau lub sij hawm nws tshwm sim los ntawm tej yam me me thiab yooj yim. Tej lub sij hawm ib zaj hauv vaj lug kub ua rau kuv ua tib zoo xav txog cov lus no zoo dua. Ho lwm lub sij hawm, kuv xav zoo li kuv lub hlwb tau nkag siab dua tej ntsiab cai ntawm txoj moo zoo. Kuv kuj hnov tus Vaj Ntsuj Plig Dawb Huv lub hwj huam thaum kuv tus poj niam, Anne Marie, thiab kuv tham txog tej yam uas wb nyeem. Nws tej kev xav yeej caw tus Ntsuj Plig tuaj txhua zaus.

Xyoo no peb kawm txog Phau Qub—cov vaj lug kub dawb huv uas ua rau peb muaj txoj kev kaj. Thaum nyeem Phau Qub, zoo li kuv nrog cov kws uas kuv tso siab rau uas coj peb kev: Adas, Evas, Enauj, Nau-as, Anplaham, thiab ntau tus ntxiv.

Lub lim tiam no, thaum kawm hauv Khiav Dim tshooj 7–13, peb kawm tias tus Tswv tau pab cov neeg Ixayees dim ntawm txoj kev ua qhev hauv Iyiv Teb. Peb nyeem txog cuaj qhov foom phem—cuaj yam uas qhia txog Vajtswv lub hwj chim uas tshwm sim zoo heev—es Falaus pom thiab tsis muaj siab mos siab muag li.

Ces tus Tswv qhia Nws tus yaj saub, Mauxes, txog qhov foom phem thib kaum—uas txhua tsev neeg hauv Ixayees teb chaws npaj tau. Ntawm ib qhov uas lawv muab hu ua kev cai Hla Dhau, cov neeg Ixayees yuav tsum txi tej me nyuam yaj txiv neej uas tsis muaj qhov ceb. Ces tom qab ntawd, lawv yuav tsum muab cov ntshav ntawm tus me nyuam yaj npleev lawv lub qhov rooj. Tus Tswv cog lus tias tag nrho cov tsev uas npleev cov ntshav yuav nraug kev tiv thaiv ntawm qhov foom phem uas yuav tshwm sim tom ntej no.

Cov vaj lug kub hais, “Thiab cov neeg Ixayees … tau ua li tus Tswv … txib Mauxes” (Khiav Dim 12:28). Muaj ib qhov dab tsi uas muaj hwj chim heev hauv zaj lus ntawd uas qhia txog kev ua raws li Vajtswv.

Vim cov neeg Ixayees tau ua raws li Mauxes hais thiab muaj kev ntseeg ua tej yam, Vajtswv tau cawm lawv ntawm qhov foom phem thiab, lub sij hawm tom ntej, cawm lawv ntawm lawv txoj kev ua qhev.

Ces, tus Vaj Ntsuj Plig Dawb Huv qhia dab tsi rau kuv hauv cov tshooj no?

Nov yog ob peb lub tswv yim uas tau nkag hauv kuv lub siab:

• Tus Tswv ua hauj lwm dhau los ntawm Nws tus yaj saub kom tiv thaiv thiab cawm tau Nws cov neeg.

• Kev ntseeg thiab kev txo hwj chim los raws tus yaj saub los ua ntej tej qhov txuj ci tseem ceeb uas tiv thaiv thiab pab lawv dim.

• Cov ntshav pleev ntawm qhov rooj yog lub cim sab nraud uas qhia txog kev ntseeg hauv siab txog Yexus Khetos, tus Me Nyuam Yaj.

Kuv yeej qhuas txog txoj kev uas tus Tswv foom koob hmoov rau Nws cov neeg hauv Phau Qub zoo me ntsis li txoj kev Nws foom koob hmoov rau Nws cov neeg hnub no.

Thaum tus Tswv tus yaj saub niaj hnub nim no, Thawj Tswj Hwm Nelson, hais kom siv phau Los, Nrog Kuv Mus pab peb kawm cov vaj lug kub, nws tau caw peb hloov peb cov tsev los ua tej chaw dawb huv uas muaj kev ntseeg thiab tej chaw kawm txog txoj moo zoo .

Ces tom qab, nws tau cog lus yuav muaj plaub yam koob hmoov:

1. nej cov Hnub Caiv yuav ua rau nej zoo siab,

2. nej cov me nyuam yuav zoo siab hlo kawm thiab ua raws li tus Cawm Seej tej lus qhia.

3. Dab Ntxwg Nyoog lub hwj chim hauv nej lub neej thiab nej lub tsev yuav tsawg zuj zus mus, thiab

4. tej kev hloov loj no yuav kav ntev hauv nej tsev neeg.⁶

Tam sim no, peb tsis muaj cov ntawv ceev xwm txheej los ntawm cov neeg uas tau nyob lub caij Kev Cai Hla Dhau nrog Mauxes nyob hauv Iyiv Teb. Tiam sis, peb kuj muaj ntau tej lus tim khawv los ntawm Haiv Neeg Ntseeg, uas muaj kev ntseeg tib yam li lawv ua raws Thawj Tswj Hwm Nelson tej lus ntuas thiab txais cov koob hmoov uas nws cog lus tseg tias lawv mam li muaj.

Nov yog lawv ib txhia zaj lus tim khawv:

Ib tug niam tsev hluas tau hais: “Peb ua tib zoo hais txog Khetos thiab zoo siab txog Khetos hauv peb tsev. Kuv xav tias qhov ntawd yog txoj koob hmoov zoo tshaj—hais tias kuv cov me nyuam loj hlob thaum peb sib tham txog txoj moo zoo hauv tsev uas pab lawv mus ze tus Cawm Seej.”⁷

Ib tug kwv tij laus me ntsis hu nws txoj kev kawm cov vaj lug kub los ntawm Los, Nrog Kuv Mus “yog ib txoj kev uas muaj txoj kev kaj uas pab peb pom cov lus qhuab qhia ntawm txoj moo zoo uas tseem ceeb rau peb txoj kev nyob zoo ntawm sab ntsuj plig.”⁸

Ib tug poj niam hluas qhia txog cov koob hmoov hauv nws txoj kev sib yuav: “Kuv tau los paub kuv tus txiv lub siab zoo dua, thiab kuv tau qhib kuv lub siab rau nws zoo dua thaum wb kawm ua ke.”⁹

Ib tug niam tsev ntawm ib tsev neeg loj tau pom tias nws tej kev qhia nws tsev neeg tau pauv. Nws hais tias: “Xav txog yav tas los, zoo li kuv ntaus piano nrog tej hnab looj tes loj. Zoo nkaus li kuv siv sij hawm lam ua xwb, thiab cov nkauj tsis tshua zoo. Tam sis no tau hle cov hnab looj tes loj, thiab txawm kuv cov nkauj tsis zoo tag nrho los, kuv hnov qhov txawv. Los, Nrog Kuv Mus tau ua rau kuv txawj pom kev, txawj ua, tsom ntsoov, thiab muaj lub hom phiaj.”¹⁰

Ib tug txiv tsev hluas tau hais: “Tej yam tseem ceeb tshaj rau kuv ua hauv tsev los kuv tau pom meej dua txij thaum kuv tau nyeem phau Los, Nrog Kuv Mus txhua sawv ntxov. Thaum kuv kawm ua rau kuv xav ntxiv txog tej yam uas tseem ceeb tshaj rau kuv, ib yam li lub tuam tsev, kuv txoj kev nrog kuv tus poj niam, thiab kuv txoj hauj lwm. Kuv zoo siab uas kuv lub tsev yog ib qhov chaw uas siv sij hawm rau Vajtswv ua ntej.”¹¹

Ib tug muam qhia tias: “Txhua hnub kuv txoj kev kawm los ntawm phau Los, Nrog Kuv Mus los kuv tsis tshua nco qab ntau, tiam sis tom qab sij hawm dhau mus kuv tau pom tias kuv hloov li cas thaum kuv tsom ntsoov, tsis tu ncua kawm cov vaj lug kub. Tej kev kawm li ntawd ua rau kuv txo hwj chim, qhia kuv, thiab hloov kuv zuj zus.”¹²

Ib tug tub txib uas twb rov qab los tsev qhia tias: “Thaum kuv siv phau Los, Nrog Kuv Mus ces ua rau kuv rov qab kawm vaj lug kub zoo li thaum kuv ua ib tug tub txib, thiab kuv tau kawm zoo dua qhov uas lam tau kawm xwb mus rau kev kawm uas cia kuv los paub Vajtswv.”¹³

Ib tug kwv tij hais tias: “Kuv hnov tus Vaj Ntsuj Plig Dawb Huv ntxiv hauv kuv lub neej thiab hnov Vajtswv txoj kev tshwm sim thaum kuv muaj tej yam txiav txim siab. Kuv muaj kev sib tham zoo tshaj plaws txog qhov zoo nkauj ntawm Khetos cov lus qhuab qhia uas yooj yim thiab Nws txoj Kev Theej Txhoj.”¹⁴

Ib tug me nyuam uas muaj xya xyoo tau hais: “Kuv yuav ua kev cai raus dej, thiab Los, Nrog Kuv Mus yuav pab kuv npaj. Kuv tsev neeg thiab kuv tham txog kev cai raus dej, thiab kuv tsis ntshai txog txoj kev cai raus dej lawm. Los, Nrog Kuv Mus pab tus Vaj Ntsuj Plig Dawb Huv nkag los rau kuv lub siab, thiab kuv zoo siab thaum kuv nyeem cov vaj lug kub.”¹⁵

Thiab thaum kawg, los ntawm ib tug niam uas muaj ntau cov me nyuam: “Thaum peb kawm txog Vajtswv txoj lus, Nws tau pab peb tsev neeg kom mus dhau kev txhawj hloov los muaj lub hwj chim, dhau tej kev sim siab thiab kev nyuaj los tso peb dim; dhau tej kev tsis sib haum thiab kev thuam los muaj kev hlub thiab kev kaj siab; thiab dhau tus yeeb ncuab tej kev ntxias los txais tus Tswv Vajtswv lub hwj huam.”¹⁶

Cov neeg no thiab cov uas rau siab ntseeg coj raws li Yexus Khetos coob ntxiv kuj tau pleev cov ntshav ntawm Vajtswv tus Me Nyuam Yaj rau ntawm lawv lub qhov rooj ntawm lawv lub tsev. Lawv tau qhia txog lawv tej kev txiav txim siab coj raws li tus Cawm Seej. Lawv txoj kev ntseeg los ua ntej tej txuj ci tseem ceeb. Qhov ntawd yog qhov txuj ci tseem ceeb uas thaum ib tug neeg kawm cov vaj lug kub ces tus Vaj Ntsuj Plig Dawb Huv tshoov nws lub siab.

Thaum peb kawm cov vaj lug kub, yeej tsis muaj kev tshaib kev nqhis ntawm sab ntsuj plig. Ib yam li Nifais hais, “Cov uas mloog Vajtswv txoj lus, thiab tuav txoj lus no tsis tso, lawv yuav tsis piam sij ib zaug li; thiab tej kev haub ntxias thiab tus yeeb ncuab tej xib xub hluav taws yuav kov tsis yeej lawv ua rau lawv dig muag, kom coj lawv mus rau txoj kev puas tsuaj” (1 Nifais 15:24)

Nyob puag thaum ub, thaum cov neeg Ixayees tau coj raws li tus Tswv txoj hau kev uas tus Tswv qhia rau tus yaj saub Mauxes, Vajtswv tau foom koob hmoov rau lawv nrog kev nyab xeeb thiab kev ywj pheej. Hnub no, thaum peb coj raws li tus Tswv txoj hau kev los ntawm peb tus yaj saub uas muaj txoj sia nyob, Thawj Tswj Hwm Nelson, Vajtswv yuav foom koom hmoov rau peb kom peb muaj kev hloov siab los ntseeg hauv peb lub siab thiab kev tiv thaiv hauv peb tej tsev.

Kuv ua tim khawv tias Yexus Khetos muaj txoj sia nyob. Nov yog Nws lub Koom Txoos, uas tau muab txum tim rov qab los dhau ntawm tus Yaj Saub Joseph Smith. Thawj Tswj Hwm Russell M. Nelson yog tus Tswv tus yaj saub hauv lub ntiaj teb hnub no. Kuv hlub thiab txhawb nqa nws. Los ntawm Yexus Khetos lub npe, amees.