Nyob Khov Kho hauv Nag Xob Nag Cua
Thaum tej nag xob nag cua hauv lub neej no los, nej yuav tsum nyob khov kho vim tias nej sawv saum lub pob zeb ntawm nej txoj kev ntseeg.
Kuv cov kwv tij thiab cov muam, peb tau koob hmoov hnub no vim peb tau mloog Vajtswv cov tub qhe qhia thiab txhawb nqa peb. Peb txhua tus, txawm peb nyob qhov twg los xij, paub tias peb nyob hauv ib lub caij nyoog uas txaus ntshai zuj zus tuaj. Kuv thov kom zaj lus no yuav pab nej sawv khov kho kom dhau tej nag xob nag cua, thiab nyob kaj siab lug.1
Qhov uas yuav tsum pib hais yog kom peb nco ntsoov tias peb txhua tus yog Vajtswv ib tug me nyuam uas Nws hlub thiab Nws muaj cov tub qhe uas txais kev tshoov siab. Vajtswv cov tub qhe no tau pom lub caij nyoog uas peb nyob tam sim no. Tus Thwj Tim Povlauj tau sau ntawv rau Timautes hais tias, “Koj yuav tsum nco ntsoov hais tias thaum lub sij hawm uas ntiaj teb yuav kawg yuav muaj kev ntxhov siab heev.”2
Txhua tus uas txawj pom tej lub cim ntawm lub caij nyoog kawg no thiab muaj pob ntseg mloog cov yaj saub tej lus paub tias qhov no muaj tseeb. Tej xwm txheej phem nyuaj tshaj plaws los rau peb los ntawm kev phem kev qias. Tej lub hwj huam no yeej loj tuaj. Yog li ntawd lub neej no yuav nyuaj zuj zus tuaj, yeej yuav tsis yooj yim, rau peb ua raws li peb tej kev khi lus uas peb yuav tsum khi kom ua raws li Yexus Khetos txoj moo zoo.
Rau peb cov uas txhawj txog peb tus kheej thiab cov uas peb hlub, yeej muaj kev cia siab los ntawm Vajtswv cov lus cog tseg txog ib qhov chaw nyab xeeb hauv tej nag xob nag cua ntawm yav tom ntej.
Nov yog ib cov lus uas piav txog qhov chaw ntawd. Cov yaj saub tau hais txog qhov chaw no ntau zaus. Piv txwv hais tias, raws li sau hauv Phau Ntawv Maumoos, ib leej txiv tau qhia nws cov tub kom lawv paub txhawb lawv lub dag zog kom lawv thiaj li nyob khov kho tiv tau tej nag xob nag cua rau yav tom ntej: “Thiab nim no, kuv ob tug tub es, nco ntsoov, nco ntsoov tias twb yog nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb lub hauv paus; xwv kom thaum tus dab phem yuav xa nws tej cua muaj zog, muaj tseeb tiag, nws tej xub nyob hauv tej khaub zig cua, muaj tseeb tiag, thaum tag nrho nws tej lawg thiab nws tej cua daj cua dub uas muaj zog yuav los raug neb, tej ntawd yuav tsis muaj hwj chim kov yeej neb kom cab tau neb mus rau hauv tus kwj tob tob ntawm kev nyuaj siab thiab kev txom nyem uas tsis muaj qhov kawg, vim yog lub pob zeb uas neb tau cog rau saud, uas yog lub hauv paus ruaj nrees, … uas yog neeg cog rau saud lawv yuav tsis vau.”3
Kev nyuaj siab thiab kev txom nyem uas tsis muaj qhov kawg uas nws hais txog yog tej xwm txheej uas peb raug los ntawm peb tej kev txhaum yog tias peb tsis hloov siab lees txim. Tej nag xob nag cua uas loj tuaj yog Dab Ntxwg Nyoog tej kev ntxias thiab kev tawm tsam. Yeej tsis muaj ib lub sij hawm thaum peb yuav tsum to taub ntau tshaj tam sim no hais tias peb yuav ua li cas kom cog lub hauv paus ruaj nrees ntawd. Kuv xav tias tsis muaj ib qho chaw zoo dua kawm txog qhov no npaum li Vaj Ntxwv Npeyamis zaj lus qhia kawg, uas kuj nyob hauv Phau Ntawv Maumoos.
Vaj Ntxwv Npeyamis cov lus yeej muaj nqis rau peb hauv peb lub caij nyoog. Nws paub los ntawm nws tus kheej txog tej kev ntshai los ntawm kev ua tsov ua rog. Nws tau tiv thaiv nws cov neeg thaum nws tawm tsam cov yeeb ncuab, nws tso siab rau Vajtswv lub hwj chim. Nws pom Luxifaws tej lub hwj chim phem meej heev kom ntxias Vajtswv cov me nyuam, sim kov yeej lawv, thiab ua rau lawv poob siab.
Nws tau caw nws cov neeg thiab peb cog rau saum lub hauv paus ruaj nrees, uas yog tus Cawm Seej. Nws tau qhia meej tias peb muaj kev ywj siab xaiv qhov yog thiab qhov tsis yog thiab peb dim tsis tau kev raug tej yam los ntawm tej uas peb xaiv. Nws tau hais ncaj qha vim nws paub cov uas tsis mloog nws lus thiab ua raws li nws ceeb toom yuav muaj kev tu siab npaum li cas.
Nws tau piav txog tej xwm txheej uas muaj tom qab peb xaiv kom coj raws li tus Ntsuj Plig tshoov peb lub siab ua los sis ua raws li tej lus phem uas los ntawm Dab Ntxwg Nyoog, tus uas xav dag ntxias peb thiab ua rau peb puas tsuaj:
“Vim saib seb, muaj ib txoj kev txom nyem uas tau muab foom rau tus uas xaiv mus mloog tus ntsuj plig ntawd lus; vim yog tias nws xaiv mus mloog tus ntsuj plig ntawd lus, thiab nyob thiab tuag thaum tseem muaj nws tej kev txhaum, tus ntawd haus kev raug txim rau nws tus kheej tus ntsuj plig; vim nws yuav tau txais txoj kev rau txim uas kav ib txhis los ua nws nqi zog, vim nws ua txhaum Vajtswv txoj kev cai tsis raws li tej yam uas nws paub. …
“Yog li ntawd yog hais tias tus neeg ntawd tsis hloov siab lees txim, thiab nyob thiab tuag li ib tug yeeb ncuab rau Vajtswv, ces tej nqi ntawm txoj kev txim lij saum ntuj yuav tsa kom nws tus ntsuj plig uas tsis txawj tuag los paub tseeb txog nws lub txim, uas ua rau nws txav tawm ntawm tus Tswv lub xub ntiag mus, thiab ua nws lub hauv siab muaj kev txhaum puv npo, thiab kev mob, thiab kev ntxhov siab, uas zoo li ib lub cub tawg tsis txawj tuag, uas muaj nplaim sawv mus ib txhiab thiab ib txhis li.”
Vaj Ntxwv Npeyamis tau hais ntxiv tias, “Auj, tag nrho nej cov neeg laus, thiab nej cov neeg hluas, thiab nej cov me nyuam yaus uas to taub kuv tej lus, vim kuv tau hais yooj yim heev rau nej xwv kom nej yuav to taub, kuv thov Vajtswv kom nej tsim los rau txoj kev nco ntsoov txog qhov txaus ntshai heev ntawm cov uas tau poob mus rau kev ua txhaum.”4
Lub hwj chim ntawm cov lus ceeb toom kom hloov siab lees txim no ua rau kuv xav txog ib lub sij hawm thaum peb yuav sawv rau ntawm tus Cawm Seej tom qab lub neej no. Peb xav xav kom txhob txaj muag, tiam sis peb xav ntsia Nws, pom Nws luag nyav, thiab hnov Nws hais tias, “Zoo heev, koj yog tus tub [qhe] uas zoo thiab ncaj ncees: … Koj cia li los nrog kuv nyob kaj siab lug.”5
Tus Vaj Ntxwv qhia meej tias peb yuav muaj kev cia siab hnov tej lus ntawd yog tias peb kawm hauv lub neej no kom cia Yexus Khetos txoj Kev Theej Txhoj hloov peb tej cwj pwm. Nov yog tib txoj kev rau peb cog saum lub hauv paus ruaj nrees thiab sawv khov kho thaum muaj tej nag xob nag cua ntawm kev ntxias thiab kev sim siab nyob rau yav tom ntej. Vaj Ntxwv Npeyamis piav txog txoj kev hloov peb tej cwj pwm li no thaum nws siv ib zaj lus piv txwv uas ib txwm tshoov kuv lub siab txhua zaus. Cov yaj saub hauv txhua lub caij thiab tus Tswv Nws tus kheej tau siv zaj lus piv txwv no. Hais li no: peb yuav tsum hloov los ua zoo li ib tug me nyuam—ib tug me nyuam yaus.
Yuav tsis yooj yim rau ib txhia lees yuav tej lus qhia no. Peb feem coob xav muaj zog. Ntshe peb yuav xav tias kev ua li ib tug me nyuam yog kev tsis muaj zog. Cov niam tsev txiv tsev xav kom lawv cov me nyuam tsis txhob ua li cov me nyuam ua. Tiam sis Vaj Ntxwv Npeyamis, uas to taub zoo npaum li lwm tus neeg hais tias ib tug neeg uas muaj zog thiab ua siab loj yuav zoo li cas, los nws qhia meej tias kev ua zoo li ib tug me nyuam yeej tsis yog yus ua li me nyuam ua. Yus ua li tus Cawm Seej ua, tus uas tau thov Nws Leej Txiv kom muaj zog txaus ua raws li Nws Leej Txiv lub siab nyiam thiab theej tag nrho Nws cov me nyuam lub txhoj ces twb mus ua li ntawd. Peb tej cwj pwm yuav tsum hloov los ua li ib tug me nyuam kom muaj zog txaus sawv khov kho thiab nyob kaj siab lug thaum nyob hauv ib lub caij nyoog uas muaj xwm txheej ceev.
Vaj Ntxwv Npeyamis piav tias yuav ua li cas kom hloov siab li no: “Vim tus neeg ntawm sab cev nqaij daim tawv yog ib tug yeeb ncuab rau Vajtswv, thiab ib txwm yog txij thaum Adas poob los, thiab yuav yog, mus ib txhiab thiab ib txhis, tsuas yog nws ywj rau tus Vaj Ntsuj Plig Dawb Huv tej kev tshoov siab, thiab tso tus neeg ntawm sab cev nqaij daim tawv tseg thiab los ua ib tug neeg dawb huv los ntawm tus Tswv Khetos txoj kev theej txhoj, thiab hloov los ua zoo li ib tug me nyuam, mloog lus, muaj siab mos siab muag, txo hwj chim, ua siab ntev, muaj kev hlub puv npo, txaus siab ua txhua yam uas tus Tswv pom tias tsim nyog muab rau nws ua, ib yam li ib tug me nyuam yaus txaus siab ua txhua yam rau nws txiv.”6
Peb hloov siab li ntawd thaum peb ua raws li peb tej kev khi lus nrog Vajtswv. Ces ua rau peb muaj lub hwj chim ntawm Yexus Khetos txoj Kev Theej Txhoj kom hloov peb lub siab. Peb yuav hnov qhov no txhua lub sij hawm thaum peb txais lub cim nco txog, ua ib txoj kab ke hauv lub tuam tsev rau ib tug poj koob yawm txwv uas tau tuag lawm, ua tim khawv txog tus Cawm Seej, los sis ua Yexus Khetos tus thwj tim kom saib xyuas lwm tus.
Thaum peb ua tej no, peb haj yam los ua li ib tug me nyuam yaus kom muaj kev hlub ntxiv thiab mloog lus. Peb yuav sawv saum lub hauv paus ruaj nrees. Peb txoj kev ntseeg Yexus Khetos yuav ua rau peb hloov siab lees txim thiab ua raws li Nws cov lus txib. Peb mloog lus, thiab peb txais lub hwj chim kom tiv tau kev ntxias, thiab peb tau tus Vaj Ntsuj Plig Dawb Huv ua peb tus khub raws li Vajtswv tau cog lus.
Peb tej cwj pwm hloov los ua li ib tug me nyuam yaus, uas nyiam mloog Vajtswv lus thiab hlub lwm tus. Txoj kev hloov no yuav ua rau peb zoo siab txais tej txiaj ntsim uas los ntawm tus Vaj Ntsuj Plig Dawb Huv. Qhov uas peb muaj tus Ntsuj Plig nrog nraim peb nyob yuav nplij peb lub siab, coj peb kev, thiab txhawb peb dag zog.
Kuv tau kawm me ntsis txog tej yam uas Vaj Ntxwv Npeyamis hais thaum nws hais tias peb yuav muaj peev xwm los ua ib tug me nyuam yaus rau Vajtswv pom. Kuv tau kawm tias thaum tus Vaj Ntsuj Plig Dawb Huv hais lus ces feem ntau Nws hais lus yau thiab yooj yim rau yus hnov tau thaum yus muaj lub siab mos siab muag, zoo li ib tug me nyuam yaus. Muaj tseeb tiag, kev thov li no yeej zoo “Kuv tsuas xav tau qhov uas Koj xav tau. Cia li qhia kuv tias Koj xav tau dab tsi. Kuv mam li ua.”
Thaum tej nag xob nag cua hauv lub neej no los, nej yuav tsum nyob khov kho vim tias nej sawv saum lub pob zeb ntawm nej txoj kev ntseeg. Nej txoj kev ntseeg yuav ua rau nej hloov siab lees txim txhua hnub thiab ua raws li nej tej kev khi lus tsis tu tsis tseg. Ces nej yuav nco ntsoov Nws. Thiab txawm nej raug tej kev ntxub thiab kev phem los, nej yuav nyob khov kho thiab muaj kev cia saib.
Tsis tas li ntawd xwb, nej yuav pom tias nej nyiam ncav tes pab lwm tus thiab txhawb nqa lawv kom lawv nyob nyab xeeb saum lub pob zeb no. Kev ntseeg Yexus Khetos yeej ua rau neeg muaj kev cia siab ntxiv thiab muaj kev siab hlub lwm tus, uas yog Khetos txoj kev hlub dawb paug.
Kuv ua tim khawv tias tus Tswv Yexus Khetos tau caw nej kom “Los cuag kuv.”7 Nws caw nej, vim nws hlub nej thiab hlub cov uas nej hlub, kom los cuag Nws muaj kev thaj yeeb hauv lub neej no thiab txoj sia nyob mus ib txhis li hauv lub neej tom ntej. Nws paub tag nrho txog tej nag xob nag cua uas nej yuav tiv tau nyob hauv txoj hau kev zoo siab no.
Kuv thov nej lees yuav tus Cawm Seej tej lus caw. Ib yam li ib tug me nyuam uas muaj siab mos siab muag, cia li txais Nws txoj kev pab. Ua raws tej kev khi lus uas Nws khi nrog nej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Tej kev khi lus ntawd yuav txhawb nej lub zog. Tus Cawm Seej paub txog tej nag xob nag cua thiab tej qhov chaw nyab xeeb thaum nej taug kev los cuag Nws thiab peb Leej Txiv Saum Ntuj Ceeb Tsheej. Nws paub txoj kev mus. Nws yeej yog Txoj Kev ntawd. Kuv ua tim khawv li no los ntawm Yexus Khetos lub npe dawb ceev, amees.