Lub Tuam Rooj Sab Laj
Hloov Siab Ua Raws Li Vajtswv lub Siab Nyiam
Plaub Hlis Ntuj xyoo 2022 lub Tuam Rooj Sab Laj

Hloov Siab Ua Raws Li Vajtswv lub Siab Nyiam

Los ntawm Txwj Laug Quentin L. Cook

Ntawm Pawg Kaum Ob tug Thwj Tim

Thaum peb hloov siab los ntseeg lawm ces peb lav ris txoj kev qhia Yexus Khetos txoj moo zoo rau neeg ntiaj teb.

Kuv yeej zoo siab uas Thawj Tswj Hwm Russell M. Nelson tau hais kom nej ua tub txib ntxhais txib thiab Thawj Tswj Hwm M. Russell Ballard thiab Txwj Laug Marcos A. Aidukaitis tau hais lus txog kev ua tub txib ntxhais txib tag kis no.

Xyoo tas los no kuv mus tshaj tawm txoj moo zoo hauv Great Britain, qhov no ua rau kuv xav txog tej xwm ntawm sab ntsuj plig uas yog lub hauv paus rau kuv txoj kev txiav txim mus ua ib tug tub txib.1 Thaum kuv muaj 15 xyoos kuv tus tij laug, Joe, uas muaj 20 xyoo—thaum ntawd yog thaum lawv pub yus mus ua tub txib. Nyob hauv lub Teb Chaws Amelikas, vim ua tsov rog hauv Kaublim Teb, ces tsuas pub tsawg tus neeg mus. Txhua xyoo tsuas pub ib tug neeg los ntawm txhua pawg ntseeg mus xwb.2 Ua rau peb xav tsis thoob thaum peb tus npisov thov Joe kom sib tham txog qhov no nrog wb txiv. Joe twb tab tom npaj cov ntawv thov mus rau tsev kawm ntawv kho mob. Wb txiv, uas tsis tshua muaj siab ntseeg lub Koom Txoos, tau npaj nyiaj txiag pab nws thiab tsis xav cia Joe mus ua tub txib. Kuv txiv hais tias Joe yuav ua zoo ntxiv yog nws mus kawm ntawv kho mob. Nov yog ib qho teeb meem loj hauv peb tsev neeg.

Thaum kuv nrog kuv tus tij laug uas muaj tswv yim thiab coj yam ntxwv zoo tham, wb tau txiav txim siab tias qhov uas nws yuav tsum mus ua tub txib thiab tsis txhob kawm ntawv yeej nyob ntawm peb lo lus nug: (1) Yexus Khetos puas los saum ntuj los? (2) Phau Ntawv Maumoos puas yog Vajtswv txoj lus? thiab (3) Joseph Smith puas yog tus Yaj Saub rau txoj Kev Muab Txoj Moo Zoo Txum Tim Rov Qab Los? Yog tias teb yog lawm rau tej lus nug no, ces peb yuav paub meej tias qhov uas Joe coj Yexus Khetos txoj moo zoo rau neeg ntiaj teb yuav zoo dua qhov uas nws los ua ib tug kws kho mob sai.3

Hmo no kuv tau rau siab thov Vajtswv tiag tiag. Tus Ntsuj Plig, tau qhia rau kuv paub tias tej lus teb peb lo lus nug no los muaj tseeb. Nov yog ib lub sij hawm tseem ceeb rau kuv. Kuv paub tias txhua txoj kev txiav txim kom tas kuv lub neej yuav hloov vim kuv paub tej yam tseeb no. Kuv kuj paub tias kuv yuav mus ua tub txib yog tias kuv muaj cib fim ua li ntawd. Vim muaj tej kev tshwm sim ntawm sab ntsuj plig thiab kuv tau ua hauj lwm pab lwm tus tas kuv lub neej, kuv to taub tias kev hloov siab los ntseeg yog los ntawm kev ua raws li Vajtswv lub siab nyiam, thiab tus Vaj Ntsuj Plig Dawb Huv coj tau tej yam peb ua.

Kuv twb paub tias Yexus Khetos yog tus Cawm Seej ntawm lub ntiaj teb. Hmo ntawd kuv tau txais ib zaj lus tim khawv ntawm sab ntsuj plig txog Phau Ntawv Maumoos4 thiab tus Yaj Saub Joseph Smith.

Joseph Smith Yog Ib tug Cuab Yeej hauv tus Tswv Txhais Tes

Nej zaj lus tim khawv yuav muaj zog thaum nej paub hauv nej lub siab tias tus Yaj Saub Joseph Smith yog ib tug cuab yeej hauv tus Tswv txhais tes. Yim xyoo tas los no kuv ib txoj hauj lwm hauv Pawg Kaum Ob tug Thwj Tim yog kom nyeem tag nrho Joseph Smith cov ntawv thiab tej kev tshawb fawb uas siv thaum muab phau ntawv Saints luam tawm.5 Kuv zaj lus tim khawv thiab txoj kev qhuas Joseph Smith tau muaj zog tuaj tom qab kuv nyeem tej xwm ntawm nws lub neej uas tshoov kuv lub siab thiab nws txoj hauj lwm qhuab qhia thaum nws yog tus yaj saub.

Joseph txoj kev txhais Phau Ntawv Maumoos los ntawm Vajtswv lub txiaj ntsim thiab lub hwj chim yeej yog lub hauv paus ntawm txoj Kev Muab Txoj Moo Zoo Txum Tim Rov Qab Los.6 Cov lus hauv Phau Ntawv Maumoos yeej xwm yeem, zoo nkauj, thiab muaj tej lus tseem ceeb kom pab peb lub neej. Phau no yog ib zaj lus tim khawv ntxiv txog Yexus Khetos. Kuv ua tim khawv tias Joseph Smith ncaj ncees, muaj kev ntseeg, thiab yog ib tug cuab yeej hauv tus Tswv txhais tes kom muaj Phau Ntawv Maumoos.

Tej kev tshwm sim thiab tej xwm uas sau ntawv txog nyob hauv phau Lus Qhuab Qhia thiab Kev Khi Lus muab tej yawm sij, cov kab ke, thiab tej kev khi lus uas yuav tsum ua kom txais kev cawm seej thiab kev tsa nto. Muaj tej no kom txhim tsa lub Koom Txoos thiab muab tej lus qhuab qhia uas cia peb to taub lub hom phiaj ntawm lub neej no thiab pab peb muaj lub zeem muag pom mus ib txhis.

Ib yam uas qhia tias Joseph Smith yog ib tug yaj saub thiab ib tug cuab yeej hauv tus Tswv txhais tes los muaj nyob hauv tshooj 76 ntawm phau Lus Qhuab Qhia thiab Kev Khi Lus. Tshooj no yog kev ua yog toog pom ntuj ceeb tsheej, tsis hais tej nceeg vaj uas muaj yeeb koob, raws li tus Yaj Saub Joseph Smith thiab Sidney Rigdon tau koob hmoov txais thaum lub Ob Hlis Ntuj hnub tim 16, xyoo 1832. Thaum lub sij hawm ntawd, cov koom txoos feem ntau qhia tias tus Cawm Seej txoj Kev Theej Txhoj yuav tsis cawm neeg coob dim. Lawv ntseeg tias Nws yuav cawm neeg tsawg tsawg xwb, thiab feem coob yuav raug txim nyob hauv ntuj txias teb tsaus, raug tej kev tsim txom uas tsis muaj qhov kawg thiab “raug kev lim hiam tshaj plaws.”7

Txoj kev tshwm sim uas muaj nyob hauv tshooj 76 yog kev ua yog toog pom tej theem yeeb koob uas Leej Txiv Saum Ntuj Ceeb Tsheej cov me nyuam feem coob yuav mus nyob es nyob ntawd cov uas mob siab ntseeg nyob hauv lub neej ua ntej lub neej no yuav tau koob hmoov tom qab lawv raug txiav txim thaum kawg.8 Kev ua yog toog pom peb theem yeeb koob, theem qis tshaj plaws uas zoo nkauj “tshaj txhua txoj kev to taub,”9 twb tau qhia tias txoj kev ntseeg tias cov neeg feem coob yuav raug txim hauv ntuj txiag teb tsaus los tsis muaj tseeb.

Thaum yus paub tias Joseph Smith muaj 26 xyoo xwb, nws tsis tau kawm ntawv ntau, thiab tsis tau paub cov lus uas tau muab phau Npaivnpaum txhais, ces yus paub tias nws yog ib tug cuab yeej hauv tus Tswv txhais tes tiag. Nyob hauv nqe 17 ntawm tshooj 76, nws txais kev tshoov siab kom siv lo lus tsis ncaj es tsis siv lo lus raug txim uas tau hais nyob hauv phau Yauhas.10

45 xyoos tom qab ntawd ib tug thawj coj hauv lub koom txoos Anglican thiab ib tug kws kawm ntaub kawm ntawv,11 Frederic W. Farrar, tus uas tau siv ntau xyoo sau ib phau ntawv The Life of Christ,12 tau hais tias kev txhais lo lus damnation nyob hauv phau Npaivnpaum King James txoj Kev Txhais yeej yog vim lawv ua yuam kev thaum lawv txhais lus Henplais thiab lus Kilis ua lus Askiv.13

Nyob hauv peb hnub nyoog neeg coob ntseeg tias tsis tas muaj lub txim rau peb tej kev txhaum. Lawv txhawb nqa kev zam txim pub rau txhua txoj kev txhaum tsis tas hloov siab lees txim. Peb cov lus qhuab qhia ua rau peb paub tias txoj kev ntseeg tias tib neeg feem coob yuav raug txim nyob hauv ntuj txiag teb tsaus yog ib txoj kev ntseeg tsis yog lawm thiab peb paub tias tus Tswv tau txib kom peb hloov siab lees txim kom thiaj li siv taus tus Cawm Seej txoj Kev Theej Txhoj thiab txais lub nceeg vaj xilethi-aus ua peb tug.14 Kuv ua tim khawv tias Joseph Smith yog ib tug cuab yeej hauv tus Tswv txhais tes tiag tiag kom muab Nws txoj moo zoo txum tim rov qab los!

Vim tau muab Yexus Khetos txoj moo zoo txum tim rov qab los, peb thiaj li to taub vim li cas kev hloov siab lees txim thiab “tej hauj lwm ncaj ncees”15 tseem ceeb npaum li cas. Peb to taub tias tus Cawm Seej txoj Kev Theej Txhoj thiab Nws cov kab ke thiab kev khi lus, tsis hais tej kev khi lus hauv lub tuam tsev, muaj nqis npaum li cas.

“Tej hauj lwm ncaj ncees” yog tej yam uas los ntawm peb txoj kev hloov siab los ntseeg. Peb hloov siab los ntseeg tiag tiag thaum peb cog lus tias peb yuav ua raws li Vajtswv lub siab nyiam.16 Cov koob hmoov uas los ntawm kev hloov siab los ntseeg yog kev nyob kaj siab lug tas mus li thiab kev nplij siab tias yuav muaj kev zoo siab kawg nkaus17—txawm yog peb raug tej cua daj cua dub ntawm lub neej no.

Kev hloov siab los ntseeg tus Cawm Seej ua rau ib tug neeg ntawm sab cev nqaij daim tawv hloov los ua ib tug neeg dawb huv uas yug dua tshiab—ib tug uas nrog Yexus Khetos koom txoj sia.18

Muaj Neeg Coob uas Tsis Paub Qhov Tseeb Tsuas Yog Vim Lawv Tsis Paub Mus Nrhiav Qhov Tseeb Nyob rau Qhov Twg

Peb yuav tsum ua dab tsi tom qab peb hloov siab los ntseeg? Nyob hauv lub Tsev Kaw Liberty tus Yaj Saub Joseph tau qhia tias “muaj neeg coob uas tsis paub qhov tseeb tsuas yog vim lawv tsis paub mus nrhiav qhov tseeb nyob rau qhov twg.”19

Nyob hauv zaj lus piav txog phau Lus Qhuab Qhia thiab Kev Khi Lus, twb tau hais tus Tswv lub hom phiaj rau peb. Nws hais tias, “Yog li ntawd, kuv uas yog tus Tswv, vim kuv paub tej kev puas tsuaj uas yuav los rau cov neeg hauv lub ntiaj teb, kuv thiaj hu kuv tus tub qhe Joseph Smith, tus Hluas, thiab hais lus saum ntuj ceeb tsheej los rau nws, thiab muab tej lus txib rau nws.” Ces nws hais tias, “Xwv kom cov neeg qaug zog thiab cov neeg dog dig yuav plov meej txhij txhua ntawm kuv txoj moo zoo mus kom thoob ntiaj teb.”20 Cov ntawd yog cov tub txib ntxhais txib. Cov ntawd yog peb txhua tus thiab. Peb yeej yuav tsum tsom ntsoov rau qhov no yog peb tau koob hmoov hloov siab xav ua raws li Vajtswv lub siab nyiam. Tus Cawm Seej caw peb los sawv Nws cev ua Nws lub suab thiab Nws txhais tes.21 Tus Cawm Seej txoj kev hlub yuav ua ib lub teeb uas ci rau peb pom kev. Tus Cawm Seej tau qhia Nws cov thwj tim tias, “Yog li ntawd nej cia li mus, thiab qhia txhua haiv neeg.”22 Thiab rau Joseph Smith, Nws hais tias, “Tshaj tawm kuv txoj moo zoo rau txhua tus neeg uas tsis tau txais txoj moo zoo.”23

Ib lub lim tiam tom qab muab lub Tuam Tsev Kirtland fij tseg thaum lub Plaub Hlis Ntuj 3, 1836, uas yog Hnub Caiv Easter thiab Kev Cai Hla Dhau, Joseph thiab Oliver Cowdery tau ua yog toog pom tus Tswv. Tus Tswv tau txais yuav lub tuam tsev thiab hais tias, “Qhov no yog qhov pib ntawm txoj koob hmoov uas yuav muab nplua mias foom rau saum kuv cov neeg taub hau.”24

Tom qab txoj kev ua yog toog tas lawm, Mauxes tau tshwm sim los “thiab muab cov yawm sij ntawm txoj kev muab Ixayees sau los ua ke tim plaub ceg kaum ntiaj teb, … thiab txoj kev coj kaum xeem nyob thaj av sab qaum teb los.”25

Thawj Tswj Hwm Russell M. Nelson, peb tus yaj saub uas niaj hnub no tuav cov yawm sij no, tau qhia tag kis no tias: “Twb tau tshwj nej cov tub hluas no tseg rau lub caij nyoog thaum tau cog lus tias yuav muab Ixayees sau los ua ke.” Thaum nej ua tub txib, nej ua ib txoj hauj lwm tseem ceeb kawg hauv lub caij nyoog kawg no!”26

Yog peb xav ua raws li tus Cawm Seej txoj kev txib kom tshaj tawm txoj moo zoo, peb yuav tsum hloov siab xav ua raws li Vajtswv lub siab nyiam; peb yuav tsum hlub peb cov neeg zej zog txhua tus, tshaj tawm Yexus Khetos txoj moo zoo, thiab caw tag nrho cov neeg los thiab saib. Vim peb yog cov mej zeej ntawm lub Koom Txoos, peb nyiam tus Yaj Saub Joseph txoj kev teb John Wentworth, tus kho ntawv rau Chicago Democrat, nyob rau xyoo 1842. Nws xav paub txog lub Koom Txoos. Joseph tau teb nws thaum nws sau “Tus Chij rau Qhov Tseeb” ua ib zaj lus ua ntej kaum peb Nqe Kev Ntseeg. Zaj no siv tej lus tsawg tsawg hais tias peb yuav tsum ua dab tsi:

“Tsis muaj ib txhais tes uas tsis dawb huv yuav nres tau txoj hauj lwm no; yuav muaj kev tsim txom, tej pab laib sib sau ua ke, tej pab tub rog yuav sawv los, tib neeg yuav taug xaiv yuav dag, tiam sis Vajtswv txoj lus tseeb tseem yuav tawm mus nrog kev ua siab loj, kev hwm, thiab nyob nws tus kheej, mus txog thaum qhov tseeb tau nkag mus hauv txhua thaj av, tau xyuas txhua txhia qhov chaw, tau mus thoob plaws txhua lub teb chaws, thiab txhua tus neeg tau hnov; txog thaum Vajtswv cov hom phiaj muaj tiav tas, thiab tus Yehauvas uas Muaj Hwj Chim yuav hais tias txoj hauj lwm twb tiav lawm.”27

Nov yog cov lus uas tau hu Tsoom Haiv Neeg Ntseeg hauv Hnub Nyoog Kawg tiam neeg coob, qhov tseem ceeb yog cov tub txib. Raws li tus “Chij rau Qhov Tseeb,” no hais, peb zoo siab vim thaum peb raug phaum mob thoob ntiaj teb no cov tub txib ntxhais txib uas rau siab ntseeg tau tshaj tawm txoj moo zoo. Cov tub txib ntxhais txib, peb hlub nej! Tus Tswv thov kom peb txhua tus tshaj tawm Nws txoj moo zoo los ntawm peb hais thiab ua. Thaum peb hloov siab los ntseeg lawm ces peb lav ris txoj kev qhia Yexus Khetos txoj moo zoo rau neeg ntiaj teb.

Kev hloov siab los ua raws li Vajtswv lub siab nyiam thiab kev cia Vajtswv yeej hauv peb lub neej yog ob txoj koob hmoov uas los ntawm kev tshaj tawm txoj moo zoo.28 Peb pab lwm tus kom lawv “hloov siab loj heev.”29 Yuav muaj kev xyiv fab mus ib txhis li thaum yus pab coj neeg los cuag Khetos.30 Kev ua hauj lwm kom yus tus kheej thiab lwm tus yeej yog txoj hauj lwm tseem ceeb tshaj.31 Kuv hais lus tim khawv li no los ntawm Yexus Khetos lub npe, amees.

Lus Cim

  1. Kuv tau ua hauj lwm nyob hauv the Qhov Chaw Tshaj Tawm Txoj Moo Zoo British txij thaum lub Cuaj Hlis Ntuj 1, 1960, mus txog Cuaj Hlis Ntuj 1, 1962.

  2. Lwm tus tub hluas yuav tsum nyob tos seb puas yuam lawv ua tub rog.

  3. Tom qab Joe mus ua tub txib rov qab los, nws tau kawm ntawv tiav los ua ib tug kws kho mob zoo heev. Nws txoj kev ua tub txib kuj pab nws npaj ua ib tug npisov, ceg txheem ntseeg tus thawj tswj hwm, tus sawv cev ntawm thaj tsam thiab qhov chaw tshaj tawm txoj moo zoo tus thawj tswj hwm.

  4. Saib Maulaunais 10:4. Kuv twb nyeem Phau Ntawv Maumoos lawm. Vim qhov teeb meem no tseem ceeb rau peb tsev neeg, kuv twb thov tiag tiag.

  5. Saib Saints: The Story of the Church of Jesus Christ in the Latter Days, phau 1, The Standard of Truth, 1815–1846 (2018) thiab phau 2, No Unhallowed Hand, 1846–1893 (2020).

  6. Tau pib txhais lus thaum lub Plaub Hlis Ntuj 7, 1829, thiab txhais tiav thaum hnub tim ib ntawm lub Xya Hli Ntuj xyoo 1829. Kuv xav tsis thoob txog tej yam tseeb ntawm txoj kev txhais lus phau no. Kuv nyiam nyeem tus kws luam ntawv cov ntaub ntawv thiab cov ntaub ntawv uas sau thaum xub thawj uas tau luam tawm hauv phau 3 thiab 5 nyob hauv feem Revelations and Translations ntawmThe Joseph Smith Papers. Ob phau no yog ob phau uas muaj keeb kwm heev.

  7. Frederic W. Farrar, Eternal Hope: Five Sermons Preached in Westminster Abbey, Kaum Ib Hlis Ntuj thiab Kaum Ob Hlis Ntuj 1877 (1892), xxii.

  8. Txoj kev ua yog toog no suav cov uas tsis kawm txog Yexus Khetos hauv lub neej no, cov me nyuam uas tuag ua ntej txog hnub nyoog lav ris, thiab cov uas tsis to taub.

  9. Lus Qhuab Qhia thiab Kev Khi Lus 76:89.

  10. Saib Yauhas 5:29.

  11. Farrar tau kawm ntawv nyob hauv King’s College, London, thiab Trinity College, Cambridge. Nws yog ib tug xib hwb hauv Church of England (Anglican), archdeacon ntawm Westminster Abbey, dean ntawm Canterbury Cathedral, thiab tus xib hwb thov ntuj hauv pawg tub rog rau Royal Household.

  12. Saib Frederic W. Farrar, The Life of Christ (1874).

  13. Saib Farrar, Eternal Hope, xxxvi–xxxvii. Fredrick Farrar xav tias nws yuav tsum kho cov lus qhia txog kev raug txim thiab ntuj txiag teb tsaus. Nws tshaj tawm txog tej yam nws hu ua “tej lus tseeb uas yooj yim to taub thiab dag tsis tau. … Lo lus ‘to damn’ thiab cov lus zoo li ntawd yeej tsis siv ib zaug li nyob hauv Phau Qub. Tsis muaj ib lo lus uas muaj lub ntsiab no nyob hauv Phau Tshiab uas sau lus Kilis.” Nws kuj piav tias lo lus damnation yog “kev txhais lus uas txhaum loj heev … [thiab] hloov thiab ua kom lub ntsiab ntawm tus Tswv tej lus hloov” (Eternal Hope, xxxvii). Farrar kuj qhia tias muaj ib Leej Txiv Saum Ntuj Ceeb Tsheej uas hlub peb heev nyob hauv phau Npaivnpaum kom qhia tias lub ntsiab ntawm hell thiab damnation zoo li siv hauv kev txhais lus Askiv tsis raug lawm (saib Eternal Hope, xiv–xv, xxxiv, 93; kuj saib Quentin L. Cook, “Our Father’s Plan—Big Enough for All His Children,” Liahona, Tsib Hlis Ntuj 2009, 36).

  14. Qhov uas txoj kev hloov siab lees txim thiab txoj Kev Theej Txhoj sib txuas los qhia txog qhov no nyob hauv Lus Qhuab Qhia thiab Kev Khi Lus 19:15–18, 20. Tsis tas li ntawd xwb, twb qhia tias kev rau txim uas tsis muaj qhov kawg txhais li cas nyob hauv Lus Qhuab Qhia thiab Kev Khi Lus 19:10–12.

  15. Lus Qhuab Qhia thiab Kev Khi Lus 59:23.

  16. Saib Mauxiyas 27:25; Lus Qhuab Qhia thiab Kev Khi Lus 112:13; kuj saib Dale E. Miller, “Bringing Peace and Healing to Your Soul,” Liahona, Kaum Ib Hlis Ntuj 2004, 12–14.

  17. Saib Mauxiyas 2:41.

  18. Saib Dallin H. Oaks, “The Challenge to Become,” Ensign, Kaum Ib Hlis Ntuj 2000, 33; Liahona, Ib Hlis Ntuj 2001, 41; kuj saib 2 Kauleethaus 5:17; Bible Dictionary, “Conversion.”

  19. Lus Qhuab Qhia thiab Kev Khi Lus 123:12.

  20. Lus Qhuab Qhia thiab Kev Khi Lus 1:17, 23.

  21. Yog peb xav ua li no, ces Vajtswv “hu [peb] mus ua txoj hauj lwm no” (Lus Qhuab Qhia thiab Kev Khi Lus 4:3; kuj saib Thomas S. Monson, “Called to the Work,” Liahona, Rau Hli Ntuj 2017, 4–5).

  22. Mathais 28:19.

  23. Lus Qhuab Qhia thiab Kev Khi Lus 112:28.

  24. Lus Qhuab Qhia thiab Kev Khi Lus 110:10.

  25. Lus Qhuab Qhia thiab Kev Khi Lus 110:11.

  26. Saib Russell M. Nelson, “Tshaj Tawm txog Txoj Moo Zoo ntawm Kev Thaj Yeeb,” Liahona, Tsib Hlis Ntuj 2022, 6–7; kuj saib Russell M. Nelson, “Hope of Israel” (kev tshaj tawm rau cov neeg hluas thoob ntiaj teb, Rau Hli Ntuj 3, 2018), HopeofIsrael.ChurchofJesusChrist.org.

  27. Teachings of Presidents of the Church: Joseph Smith (2007), 444.

  28. Saib Russell M. Nelson, “Cia Vajtswv Yeej,” Liahona, Kaum Ib Hlis Ntuj 2020, 92–95.

  29. Amas 5:14.

  30. Saib Lus Qhuab Qhia thiab Kev Khi Lus 18:15; kuj saib Yakaunpaus 5:19–20.

  31. Saib Amas 26:22; Lus Qhuab Qhia thiab Kev Khi Lus 18:13–16; kuj saib Bible Dictionary, “Conversion.”