Tsis Txhob Ntshai: Cia Li Ntseeg Xwb!

Hnub no kuv xav hais lus rau cov hluas hauv lub Koom Txoos, uas txhais tias ib tug neeg twg uas muaj hnub nyoog ib yam li Thawj Tswj Hwm Russell M. Nelson rov haud. Kuv tsis tshua siv duab thaum kuv hais lus, tiam sis kuv yuav tsum muab qhov no rau nej saib.

Daim Duab

Tsab ntawv los ntawm Marin Arnold

Qhov kev quaj thov no los ntawm kuv ib tug phooj ywg muaj yim xyoo Marin Arnold, nws twb sau thaum nws muaj xya xyoo. Kuv mam li txhais nws tes ntawv Iyiv rau nej:

Li ntawd ces, Marin, zaj lus kuv yuav hais tam sim no tej zaum yuav tsis lom zem rau koj dua ib zaug ntxiv. Tiam sis thaum koj sau ntawv mus rau koj tus npisov, tseem ceeb heev uas koj qhia nws kuv lub npe hu ua “Kearon. Txwj Laug Patrick Kearon.”

Yuav luag ob xyoos no ib phaum mob tau roos peb lub ntiaj teb, thiab txawm tias phaum mob ntawd ua rau yuav luag txhua yam nres, muaj tseeb tiag, tseem muaj kev lim hiam, kev kub ntxhov, thiab kev thab plaub ntawm kam teb kam chaw—ntawm lub teb chaws los sis thoob plaws lub ntiaj teb. Tsis tas li ntawd xwb, peb tseem muaj teeb meem ntawm kev sib hais haum thiab tej kab lis kev cai, txawm yog kev pluag nyiaj los mus rau qhov chaw puag ncig puas los mus rau haiv neeg tsis muaj vaj huam sib luag thiab txuas ntxiv.

Tej kev cov nyom no yeej yuav ua tau rau cov hluas hauv peb poob siab, lawv cov uas peb cia siab rau rau peb lub neej tom hauv ntej. Luag tias “lub hwj chim ntawm cov tub hluas ntxhais hluas yog qhov muaj nuj nqis tshaj plaws rau lub ntiaj teb tag nrho. Cov … hluas … yog … peb lub sij hawm tom hauv ntej.”² Hais txuas ntxiv, peb cov me nyuam yog cov uas muaj ib hnub twg yuav coj kav lub Koom Txoos no.

Twb yog vim peb lub caij nyoog no zoo li cas, yeej to taub tau yog tias cov hluas tsis tshua cia siab lawm. Dr. Laurie Santos, ib tug kws qhia ntawv rau ntawm Yale University, tsis ntev tas los no tau tsim ib hoob kawm ntawv hu ua Kev Kawm txog Paj Hlwb thiab lub Neej Zoo. “Thawj xyoos uas qhia hoob kawm ntawd, yuav luag [ib feem plaub] ntawm [tag nrho] cov tub ntxhais kawm ntawv tau sau npe kawm.”³ Ntau tshaj 64 lab tug neeg tau mloog nws qhov podcast. Sau txog qhov uas muaj los no, muaj ib tug tub muab xwm uas sau tias yeej ntxim tu siab uas pom coob tug tub ntxhais kawm ntawv—thiab neeg laus—rau rau siab “nrhiav kom tau ib yam uas lawv ua poob” los sis, ntxim phem tshaj, kho siab rau ib yam uas lawv yeej tsis tau muaj li.⁴

Qhov uas kuv thov hnub no hais rau peb cov hluas, thiab nej cov ua niam ua txiv thiab cov neeg laus uas pab tswv yim rau lawv, yog kom pib nrhiav kev zoo siab rau ntawm tej txiaj ntsim uas peb twb tau txais lawm los ntawm tus neeg uas muab txhua qhov khoom plig zoo pub.⁵ Thaum tib lub sij hawm uas neeg coob heev hauv lub ntiaj teb tab tom nug tej lus nug tob heev ntawm sab ntsuj plig, peb yuav tsum qhia txog “txoj moo zoo”⁶ ntawm Yexus Khetos ua lus teb. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, uas tshaj tawm txog tus Cawm Seej txoj hauj lwm thiab txoj lus hais tseg cia rau lub ntiaj teb, peb lub koom txoos no qhia txoj kev tseem ceeb tshaj plaws kom nrhiav tau qhov zoo thiab ua qhov zoo thaum lub caij nyoog kawg no.

Thawj Tswj Hwm Russell M. Nelson tau hais tias tiam tub hluas ntxhais hluas no muaj peev xwm “ua qhov [zoo] hauv lub ntiaj teb ntau tshaj ib tiam neeg twg yav tas los.”⁷ Peb cov neeg yuav tsum “hu zaj nkauj ntawm txoj kev hlub txhiv dim,”⁸ tiam sis ua li ntawd peb yuav tsum tswj hwm peb tus kheej—“ua ib tug thwj tim,” tiag tiag—tus uas tiv thaiv peb tus kheej kom tsis txhob coj xeeb xwm tsis zoo thiab xyaum ua tej yam uas coj mus rau kev puas tsuaj uas yuav ua rau peb hu zaj nkauj ntawm txoj kev cawm dim tsis tau zoo.

Txawm tias peb ua tib zoo “coj kom zoo siab ntau,”⁹ tej lub sij hawm peb yeej yuav ntsib tug neeg uas yeej meem yuav yws yws txog ub no. Nej paub tias nws pheej hais li no hais tias: “Yeej tsaus ntuj nti ua ntej yuav dub nciab.” Saib lub neej li no yeej tsis zoo thiab tsis zoo rau yus tus kheej li! Muaj tseeb tiag, qee zaum peb xav khiav tawm ntawm qhov chaw peb nyob, tiam sis peb yuav tsum tsis txhob khiav tawm ntawm qhov uas saib peb yog leej twg—peb yog cov me nyuam ntawm Vajtswv uas muaj sia nyob thiab Nws hlub peb, yeej los npaj zam txim pub rau peb, thiab Nws yeej yuav tsis tso peb tseg. Nej yog qhov uas Vajtswv saib rau nqi tshaj plaws. Nej yog Nws cov me nyuam, thiab Nws tau muab yaj saub thiab lus cog, tej txiaj ntsim ntawm sab ntsuj plig thiab kev tshwm sim, tej txuj ci tseem ceeb thiab lus xov, thiab cov tim tswv nyob ntawm ob sab daim ntaub thaiv pub rau peb tib si.¹⁰

Nws kuj muab ib lub koom txoos rau nej uas ntxiv dag zog rau tsev neeg hauv lub neej no thiab muab lawv sib khi ua ke nyob mus ib txhis li. Lub Koom Txoos no muaj ntau tshaj 31,000 pawg ntseeg thiab ceg ntseeg es nyob ntawd cov tseeg sib sau ua ke thiab hu nkauj thiab yoo mov thiab thov Vajtswv ib leeg rau ib leeg thiab muab lawv cov nyiaj txiag pub rau cov pluag. Nyob hauv lub Koom Txoos txhua tus neeg muaj npe, teev txog, thiab peb ib leeg pab saib xyuas ib leeg, thiab nyob hauv peb cov phooj ywg thiab cov neeg zej zog sib pab ua tej hauj lwm hauv lub koom txoos. Cov tub hluas ntxhais hluas—thiab cov khub niam txiv laus thiab—mus ua tub txib txhiab txhiab leeg, lawv siv lawv cov nyiaj them cov nqi thiab lawv tsis xaiv tias lawv yuav mus ua tub txib qhov twg, thiab cov mej zeej hluas thiab laus uas mus tom tej tuam tsev ua tej kab ke dawb ceev uas khi tsev neeg ua ke nyob mus ib txhis—ib yam zoo kawg nkaus hauv ib lub ntiaj teb uas sib cais tiam sis qhov no qhia tias tej kev sib cais no nyob tsis ntev. Tej no yog ob peb yam xwb uas yog vim li cas peb thiaj “cia siab hauv [peb].”¹¹

Ham tsis, hauv peb lub caij nyoog no, Yexus Khetos ib tug thwj tim twg yeej ntsib tej kev cov nyom ntau. Cov thawj coj ntawm Nws lub Koom Txoos no tab tom siv zog nrhiav kom tau tus Tswv txoj kev kho tej kev cov nyom no. Yog tias tej cov nyom ib txhia tsis kho rau li txhua tus neeg txaus siab, tej zaum tej ntawd yog ib feem ntawm tus ntoo khaub lig Yexus hais tias peb yuav tsum ris kom thiaj ua raws li Nws hais.¹² Twb yog vim yuav muaj tej hnub tsaus ntuj nti thiab tej kev cov nyom ntau Vajtswv thiaj cog lus tias Nws yuav cob qhia cov yaj saub, muab ib tug nqaj hlau, qhib ib lub me nyuam qhov rooj mus rau ib txoj kev ncaj, thiab qhov tseem ceeb tshaj muab hwj chim pub rau peb ua peb tej hauj lwm hauv lub neej no tiav tas.¹³

Yog li ntawd thov nyob twj ywm thiab noj pluas mov tag nrho txawm tias nej tsis paub tseeb xyov nej puas xis cov zaub paj. Cia Yexus qhov kaj roos nej thiab muab nej tus tswm ciab taws rau txoj hauj lwm no.¹⁴ Lawv hais yog hauv lub Koom Haum Me Nyuam Yaus: Yexus yeej xav tau “[nej] ua ib tug duab tshav ntuj.”¹⁵

Thaum tus thawj coj Yudais hu ua Yailus thov kom Yexus kho nws tus ntxhais 12 xyoos, uas tab tom yuav tas sim neej tom tsev, cov neeg ib ncig Yexus txiv rau tus Cawm Seej ntev txaus tias muaj ib tug tub qhe tuaj hais rau leej txiv hais tias, “Koj tus ntxhais twb tuag lawm, koj tsis txhob tab kaum xib hwb ntxiv lawm.”

“Thaum Yexus hnov li ntawd, Yexus hais rau Yailus hais tias, Koj tsis txhob ntshai; cia li ntseeg, koj tus ntxhais yeej yuav ciaj.”¹⁶

Thiab nws tau rov zoo lawm. Nej yuav zoo ib yam thiab. “Tsis txhob ntshai: cia li ntseeg xwb.”

Vim Vajtswv saib nej txhua tus rau nqi thiab lub Koom Txoos saib nej zoo ib yam, kuv xaus lus thiab ua ib tug thwj tim tshwj xeeb kuv tshaj tawm li nram qab no. Ua ntej nej tau txais lub txiaj ntsim ntawm tus Vaj Ntsuj Plig Dawb Huv, nej muaj Khetos txoj Kev Kaj cog rau hauv nej sab ntsuj plig,¹⁷ uas “ci rau txhua txhia yam, … muab txoj sia rau txhua yam nyob,”¹⁸ thiab yog qhov uas coj tib neeg txhua tus xav ua zoo tsis hais txhua tus uas nyob txij thaum chiv keeb los thiab cov uas txij no mus yuav nyob los yog. Txoj kev kaj no yog muab pub rau nej kom thiaj pov hwm nej thiab qhia nej. Txoj kev kaj no ib txoj lus tseem ceeb tshaj yog lub neej no yeej yog ib lub txiaj ntsim tsim nuj nqi tshaj plaws, ib lub txiaj ntsim uas nyob mus ib txhis li dhau ntawm tus Tswv Yexus Khetos txoj Kev Txheej Txhoj. Vim Nws yog txoj Kev Kaj thiab txoj Sia ntawm lub Ntiaj Teb,¹⁹ Vajtswv Tib Leeg Tub nqis los muab txoj sia rau peb thaum nws kov yeej txoj kev tuag.

Peb yuav tsum muab siab npuab lub txiaj ntsim ntawm txoj sia no thiab mus pab lawv cov uas xav tias lawv yuav tso qhov txiaj ntsim no pov tseg. Nej cov ua thawj coj, neeg pab tswv yim, phooj ywg, neeg txheeb ze—cia li ua tib zoo saib puas muaj kev ntxhov siab, poob siab, los sis xav tias yuav ua li cas rau lawv tus kheej. Cev tes mus pab. Ua tib zoo mloog. Yeej meem pab raws li pab tau.

Rau nej cov tub hluas ntxhais hluas uas tab tom nyuaj siab, txawm ntej txhawj xeeb los sis muaj kev cov nyom li cas, kev txo yus tus kheej tsis pab kho tej ntawd. Qhov ntawd yeej yuav tsis nplij nej lub siab los sis ua rau lwm tus txais kev nplij siab. Hauv ib lub ntiaj teb uas xav tau qhov kaj ntau, thov tsis txhob saib tsis rau nqi Vajtswv txoj kev kaj nyob mus ib txhis uas Nws muab tso rau hauv nej sab ntsuj plig ua ntej ntuj tsim teb raug. Nrog leej twg sib tham. Thov kom tau kev pab. Tsis txhob txo txoj sia uas Khetos muab Nws txoj sia txo kom tshwj tseg cawm dim. Koj ris tau tej kev cov nyom kev txom nyem hauv lub neej no vim peb yuav pab nej ris tej ntawd. Nej muaj zog tshaj nej xav. Yeej muaj kev pab, los ntawm cov neeg ib ncig ntawm nej thiab twb yog los ntawm Vajtswv los. Peb hlub nej thiab saib nej rau nqi. Peb xav tau nej! “Tsis txhob ntshai: cia li ntseeg xwb.”

Muaj ib tug neeg uas ntsib tej kev cov nyom kev txom nyem hnyav tshaj nej thiab kuv tau ntsib muaj ib zaug nws hais tias: “Mus lawm tom ntej [kuv cov phooj ywg hluas]. Ua siab loj, … thiab cia li mus, mus tsis tu ncua kom txog thaum yeej! Nej lub siab cia li xyiv fab, thiab cia li zoo siab heev.”²⁰ Muaj ntau yam uas tsim nyog peb yuav zoo siab txog. Peb ib leeg muaj ib leeg, thiab peb muaj Yexus. Thov tsis txhob ua kom peb tsis muaj nej, los ntawm tus Tswv Yexus Khetos, peb tus Xib Hwb, lub npe dawb huv, amees.