Peb Yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg
Lub Koom Txoos tsis yog cov tsev thiab tej kev cai teev ntuj xwb; lub Koom Txoos yog peb, cov mej zeej, nrog Khetos uas yog tus thawj thiab tus yaj saub uas yog tus uas cev Nws lus.
Tom qab uas kuv tau txais kev caw kom “los thiab saib,”1 thaum kuv muaj 26 xyoo, kuv tau koom thawj zaug Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Thaum sij hawm no, kuv nyuam qhuav sib nrauj kuv tus txiv. Kuv muaj ib tug me nyuam tub muaj peb xyoos. Thiab kuv poob siab vim kuv ntshai kawg. Thaum kuv nkag mus hauv lub koom txoos, kuv muaj kev kub siab pov npo thaum kuv txawj pom kev ntseeg thiab kev xyiv fab ntawm cov neeg nyob ib puag ncig kuv. Yeej yog “kev tiv thaiv kom txhob raug cua daj cua dub” tiag tiag.2 Peb lim tiam tom qab ntawd, kuv ua kev cai raus dej thiab khi lus nrog Leej Txiv Saum Ntuj Ceeb Tsheej thiab pib kuv txoj kev ua Yexus Khetos tus thwj tim, txawm tias kuv ua neej yeej tsis zoo tag nrho.
Yuav tsum muaj ntau yam ntawm sab cev nqaij daim tawv thiab sab ntsuj plig kom kuv txais tau cov koob hmoov uas nyob mus ib txhis ntawd. Twb tau muab Yexus Khetos txoj moo zoo txum tim rov qab los lawm; muaj neeg ua thiab saib xyuas lub tsev koom txoos; muaj cov thawj coj rau kev teev ntuj, tsis hais tus yaj saub los yog cov thawj coj hauv pawg ntseeg los yog; thiab ib ceg ntseeg uas muaj mej zeej uas tau khi lus thiab npaj txais kuv thiab kuv tus tub thaum coj wb los cuag tus Cawm Seej, “Vajtswv txoj lus zoo los yug [wb]”3 thiab wb txais cib fim pab lwm tus.4
Txij thaum chiv keeb los, Vajtswv tau npaj Nws cov me nyuam thiab muab lawv sau los ua ke5 “kom peb txais tau kev tsis txawj tuag thiab txoj sia nyob mus ib txhis.”6 Kom muaj raws li lub hom phiaj no, Nws tau qhia kom peb txhim tsa tej chaw teev ntuj, 7 kom peb txais kev txawj ntse thiab cov kab ke cawm seej thiab kev tsa nto; khi lus uas khi peb rau Yexus Khetos; 8 txais vaj txiaj ntsim “lub hwj chim ua neeg zoo li Vajtswv”;9 thiab sib koom ua ke ntau zaus kom nco txog Yexus thiab kom ib leeg txhawb ib leeg dag zog los ntawm Nws.10 Lub Koom Txoos thiab cov tsev koom txoos muaj nyob kom pab peb sab ntsuj plig. “Lub Koom Txoos … yog lub hauv paus uas pab peb txhim tsa tsev neeg nyob mus ib txhis.”11
Thaum kuv tham nrog ib tug phooj ywg uas tab tom muaj kev nyuaj siab, kuv noog nws seb nws puas muaj nyiaj txiag txaus. Nws los kua muag thiab teb tias nws tus npisov tau muab cov nyiaj yoo mov rau nws. Nws hais tias, “Kuv tsis paub seb kuv thiab kuv tsev neeg yuav ua li cas yog tsis muaj lub Koom Txoos.” Kuv teb tias, “Lub Koom Txoos yog cov mej zeej. Lawv yog cov uas zoo siab hlo pub nyiaj yoo mov kom pab peb cov uas raug txom nyem. Nej tau txais tej uas muaj los ntawm lawv txoj kev ntseeg thiab kev mob siab xav coj raws li Yexus Khetos.”
Cov uas nrog kuv ua Yexus Khetos cov thwj tim, thov kom peb txhob saib tsis taus tej hauj lwm zoo kawg nkaus uas tus Tswv ua dhau los ntawm peb, Nws lub Koom Txoos, txawm tias peb tseem ua yuam kev los. Tej lub sij hawm peb yog cov muab thiab tej lub sij hawm peb yog cov txais, tiam sis peb sawv daws yog ib tsev neeg los ntawm Yexus Khetos. Nws lub Koom Txoos yog lub koom haum uas Nws tau pub rau peb kom coj peb thiab foom koob hmoov rau peb thaum peb teev tiam Nws thiab ib leeg pab ib leeg.
Ib txia viv ncaus tau thov txim rau kuv, lawv xav tias lawv tsis tshua mus rau lub Koom Haum Niam Tsev rau qhov lawv pab hauv Koom Haum Me Nyuam los Koom Haum Ntxhais Hluas. Cov viv ncaus ntawd yog cov mej zeej zoo tshaj hauv Koom Haum Niam Tsev rau qhov lawv pab peb cov me nyuam thiab cov hluas uas muaj nuj nqis kom txhawb lawv txoj kev ntseeg Yexus Khetos.
Lub Koom Haum Niam Tsev tsis yog ib chav hauv ib lub tsev koom txoos, tsis yog ib zaj lus qhia thaum hnub Sunday, tsis yog ib yam ntxim saib ntxim ua, los sis ib pawg tuam thawj tswj hwm. Lub Koom Haum Niam Tsev yog cov poj niam khi lus ntawm lub Koom Txoos; yog peb—peb txhua tus thiab peb sawv daws. Lub koom haum no yog peb “pawg thoob ntiaj teb uas muaj kev khuv leej thiab pab lwm tus.”12 Txhua qhov chaw peb mus, peb ib txwm yog ib feem ntawm lub Koom Haum Niam Tsev thaum peb siv zog ua kom tiav lub hom phiaj uas los saum ntuj los, uas yog kom poj niam ua Vajtswv txoj hauj lwm lawv tus kheej thiab hauv ib pab pawg13 los ntawm kev muab kev pab: “pab cov neeg txom nyem, pab cov neeg mob, pab neeg kom tsis ua xyem xyav, pab lawv txais kev txawj ntse—pab lawv tshem txhua yam uas tab kaum … kev xyiv fab thiab kev vam meej.”14
Yeej muaj kev sib koom siab zoo sib thooj hauv pawg txwj laug thiab koom haum hauv lub Koom Txoos rau txhua lub hnub nyoog, suav nrog peb cov me nyuam thiab cov hluas. Lub Koom Txoos tsis yog cov tsev thiab tej kev cai teev ntuj xwb; lub Koom Txoos yog peb, cov mej zeej. Peb yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, nrog Khetos uas yog tus thawj thiab tus yaj saub uas yog tus uas cev Nws lus. Tus Tswv tau hais tias:
“Saib seb, nov yog kuv txoj lus qhuab qhia—tus uas hloov siab lees txim thiab los cuag kuv, ces tus ntawd yog kuv lub koom txoos. …
“Thiab … txhua tus uas nyob hauv kuv lub koom txoos nyiaj mus kom txog thaum kawg, ces tus ntawd kuv yuav tsa rau saum kuv lub pob zeb.”15
Cov viv ncaus thiab cov nus, cia peb pom tias peb tau txais txiaj ntsim loj npaum li cas vim peb koom Yexus Khetos lub Koom Txoos, ib qhov chaw uas peb muab peb txoj kev ntseeg, lub siab, lub zog, thiab txhais tes koom ua ke kom cia Nws ua Nws tej txuj ci tseem ceeb. “Rau qhov lub cev [ntawm Khetos lub Koom Txoos] tsis yog muaj ib yam xwb, tiam sis muaj tes muaj taw, muaj taub hau thiab muaj siab muaj ntsws huv tib si.”16
Ib tug tub hluas qhia nws niam, “Thaum kuv yaus, txuas zaus kuv muaj ib dolaj them nyiaj ib feem kaum, kuv xav tias yuav siv ib dolaj ntawd ua ib lub tsev koom txoos. Ruam puas yog?”
Nws teb tias, “Ntxim hlub kawg! Koj puas xav txog qhov ntawd hauv koj lub siab?”
“Xav tiag!” nws hais. “Tej tsev ntawd yeej zoo nkauj heev, thiab muaj ntau lab lub tsev koom txoos!”17
Kuv cov phooj ywg zoo, cia peb muaj kev ntseeg ib yam li ib tug me nyuam thiab muaj kev zoo siab paub tias peb txoj kev ua qhov me tshaj plaws yeej tseem ceeb hauv Vajtswv lub nceeg vaj.
Peb lub hom phiaj hauv Nws lub nceeg vaj yog kom peb ib leeg coj ib leeg mus cuag Khetos. Raws li peb nyeem hauv phau vaj lug kub, tus Cawm Seej caw cov neeg Nifais:
“Nej puas muaj neeg mob nyob hauv nej? Coj lawv los ntawm no. Nej puas muaj neeg … uas raug txom nyem ib yam dab tsi? Coj lawv los ntawm no thiab kuv yuav kho kom lawv zoo, vim kuv muaj kev khuv leej rau nej; kuv lub siab muaj kev hlub tshua puv npo.
“… Kuv pom tias nej txoj kev ntseeg twb muaj txaus rau kuv kho kom nej zoo.”18
Peb txhua tus puas muaj tej kev txom nyem uas peb coj tau tuaj rau tus Cawm Seej txhais ko taw? Peb ib txhia muaj tej teeb meem ntawm lub cev, feem coob ntxiv tawm tsam kev nyuaj siab txhawj xeeb, thiab lwm tus sim nrhiav kev sib raug zoo, thiab peb txhua tus nrhiav chaw dim thaum peb sab ntsuj plig raug xwm txheej nyuaj heev. Peb txhua tus muaj ib yam kev txom nyem.
Peb nyeem tias “tag nrho cov neeg coob coob, ua ib ke, coj lawv tej neeg muaj mob mus thiab … tag nrho lawv tej neeg uas raug txom nyem txhua yam; thiab nws kho tau lawv txhua tus zoo thaum lawv coj cov neeg no mus rau nws.
“Thiab lawv txhua tus, tsis hais cov uas nws kho tau zoo thiab cov uas tsis muaj mob, cia li qhau cev rau ntawm nws ko taw, thiab teev tiam nws.”19
Ib tug me nyuam tub uas muaj kev ntseeg them ib feem kaum, los sis ib leej niam uas xav tau tus Tswv txoj kev tshav ntuj txhawb nws zog, los sis ib leej txiv uas khwv kom nws tsev neeg tau noj tau haus, los sis peb cov poj koob yawm txwv uas xav txais cov kab ke cawm seej thiab kev tsa nto, los sis peb txhua tus uas rov qab khi lus nrog Vajtswv txhua lub lim tiam, peb puav leej ib leeg xav tau ib leeg, thiab peb ib leeg muaj peev xwm coj tau ib leeg rau tus Cawm Seej txoj kev txhiv dim.
Kuv cov viv ncaus thiab cov nus, cia peb coj raws li Yexus Khetos txoj kev caw kom peb coj peb tus kheej thiab peb tej kev txom nyem rau Nws. Thaum peb los cuag nws thiab coj cov uas peb hlub tuaj rau Nws, Nws pom peb txoj kev ntseeg. Nws yuav kho kom lawv zoo tag nrho, thiab Nws yuav ua kom peb zoo tag nrho.
Peb yog “cov uas nyob kaj siab lug coj raws li Khetos,”20 peb siv zog los ua ib haiv neeg uas “koom ib siab thiab ib ntsws”21 thiab txo hwj chim; mloog lus; muaj siab mos siab muag; yooj yim qhia; muaj kev ua siab ntev puv npo thiab ua siab ntev nyiaj; tswj peb tus kheej rau txhua yam; rau siab coj Vajtswv tej lus txib txhua lub sij hawm; muaj kev ntseeg, kev cia siab, thiab kev siab hlub, thiab ua tau ntau yam zoo tas mus li.22 Peb mob siab hloov los ua neeg zoo li Yexus Khetos.
Kuv hais lus tim khawv tias vim peb yog Yexus Khetos lub Koom Txoos, thiab peb tus Cawm Seej, Yexus Khetos, yuav siv peb “ua Nws tej hauj lwm zoo tshaj plaws tam sim no mus rau thaum thaum Nws yuav rov qab los,”23 ib yam li Thawj Tswj Hwm Russell M. Nelson tau qhia.
Tus Tswv tau hais tias:
“Saib seb, kuv yuav khiav kuv txoj hauj lwm nrawm nroos raws li lub sij hawm tsim nyog.
“Thiab kuv muab ib lo lus txib rau nej, … kom nej mus txoos nej tus kheej ua ke, thiab kho nej tus kheej, thiab npaj nej tus kheej, thiab hloov nej tus kheej ua dawb huv; muaj tseeb tiag, hloov nej lub siab kom huv, thiab ntxuav nej txhais tes thiab nej txhais ko taw rau kuv pom, kom kuv yuav ua rau nej huv.”24
Kuv thov kom peb yuav ua raws li tus Tswv txoj kev caw no thiab muaj kev xyiv fab sib sau ua ke, npaj, thiab hloov ua neeg dawb huv, los ntawm Yexus Khetos lub npe, amees.