Kev Rau Siab Ua cov Thwj Tim hauv Hnub Nyoog Kawg
Xav kom peb ua siab loj, txhob lees thov txim, rau siab ntso, txhob txaj muag, rau siab ntseeg, txhob ntshai thaum peb muab tus Tswv txoj kev kaj ci rau lwm tus pom hauv hnub nyoog kawg no.
Kev ywj siab coj ncaj ncees yog Vajtswv lub txiaj ntsim muaj nqis heev rau Nws txhua tus me nyuam.1 Peb “muaj kev ywj siab xaiv txoj kev ywj pheej thiab txoj sia nyob mus ib txhis, uas yog los ntawm tus Neeg Nruab Nrab tseem ceeb ntawm tib neeg txhua tus, los sis xaiv txoj kev poob cev qhev thiab txoj kev tuag, raws li tus dab phem txoj kev poob cev qhev thiab lub hwj chim.”2 Vajtswv yeej yuav tsis yuam peb ua zoo, thiab tus dab phem tsis muaj hwj chim yuam peb ua phem.3 Txawm yog ib txhia xav tias kev ua neej hauv lub ntiaj teb no yog Vajtswv thiab tus yeeb ncuab txoj kev sib tw, tsuas yog tus Cawm Seej hais ib lo lus xwb ces “Dab Ntxwg Nyoog yuav tsum nyob twj ywm thiab raug ntiab tawm. … Lub neej no sim [peb] lub dag zog—tsis sim Vajtswv li.”4
Thaum kawg peb yuav raug tej yam uas peb tau xaiv nyob hauv lub neej no.5 Yog li ntawd peb tej kev xav, tej lus, thiab peb tej hauj lwm yuav qhia dab tsi txog peb txoj kev hlub tus Cawm Seej, Nws cov tub qhe uas Nws xaiv tseg lawm, thiab Nws lub Koom Txoos uas tau muab txum tim rov qab los? Peb tej kev khi lus uas peb khi thaum ua kev cai raus dej, txais lub pov thawj hwj, thiab ua hauv lub tuam tsev puas muaj nqis tshaj neeg ntiaj teb tej lus qhuas los sis muaj neeg nyiam peb npaum li cas hauv social media? Peb txoj kev hlub tus Tswv thiab Nws cov lus txib puas muaj zog tshaj peb txoj kev nyiam ib yam dab tsi los sis ib tug neeg twg hauv lub neej no?
Tus yeeb ncuab thiab cov uas raws nws qab yeej xav rhuav Yexus Khetos tej hauj lwm thiab Nws cov yaj saub. Ntshe tib neeg hauv lub ntiaj teb no feem coob tsis quav ntsej tus Cawm Seej tej lus txib los sis xav tias Nws tej lus txib tsis muaj nqis dab tsi li. Lawv saib tsis taus Vajtswv cov tub xa xov uas qhia tej lus tseeb uas tab kaum lawv. Tus Cawm Seej Nws tus kheej los muaj neeg hais tias “tus neeg no noj loj haus loj,”6 liam hais tias Nws ua rau neeg tsis sib raug zoo thiab ua rau cov pej xeem ntxhov hnyo. Cov neeg uas nyiam ntxias neeg “sab laj hais tias, lawv yuav nug li cas, Yexus thiaj hais txhaum,”7 thiab Yexus cov neeg Ntseeg Khetos thaum ub los nyob txhua qhov chaw tib neeg hais phem txog lawv.”8
Tus Cawm Seej thiab cov uas coj raws li Nws thaum ub tau raug kev tawm tsam nyob hauv lub koom txoos thiab nyob sab nraud, ib yam li peb raug niaj hnub no. Hnub no yog peb ua siab loj ua raws li peb txoj kev ntseeg ces yeej yuav muaj tej lub sij hawm thaum peb raug cov neeg uas nyiam ua li neeg ntiaj teb ua txoj kev thuam. Thaum peb coj raws li tus Cawm Seej ces peb yeej tau koob hmoov, tiam sis tej lub sij hawm peb yuav raug ntxias thaum tib neeg hais kom peb “yeej meem noj, yeej meem haus, thiab cia li zoo siab,”9 kom peb muab kev ntseeg Khetos, kev mloog lus, thiab kev hloov siab lees txim tso tseg thiab pib ntseeg tias Vajtswv yuav pub peb ua txhaum me ntsis vim Nws hlub peb heev.
“Txawm yog los ntawm [Nws] lub suab los sis los ntawm [Nws] cov tub qhe lub suab,”10 tus Tswv tau hais tias nyob hauv peb lub caij nyoog “yuav tsis muaj neeg xav mloog Vajtswv Txoj Lus lawm [thiab] … lawv yuav mus nrhiav ntau tus xib hwb los qhia tej zaj uas sawv daws nyiam mloog” thiab yuav muaj neeg coob uas “tsuas nyiam mloog tej dab neeg xwb.”11 Nws tau hais tias “Qhov uas lawv pe hawm kuv tsis muaj nqis li, rau qhov lawv muab neeg tej kev cai los qhia ib yam li tej kev cai ntawd yog kuv tej kev cai.”12 Nws tau ceeb toom hais tias “txawm yog hauv nej cov los yeej yuav muaj qee leej qhia tsis tseeb ntxias cov ntseeg kom mus ua lawv thwj tim.”13 Nws tau pom tias yuav muaj neeg “hu qhov phem ua qhov zoo, thiab qhov zoo ua qhov phem”14 thiab pom tias ib tug neeg “cov yeeb ncuab [yuav] los ntawm [nws] tsev neeg.”15
Yog li ntawd peb yuav ua li cas? Puas tsim nyog peb yuav txaj muag los sis ntshai? Puas yog peb yuav tsum ua raws li peb txoj kev ntseeg ntsiag to? Tsis yog li ntawd! Nrog kev ntseeg Khetos, peb tsis tas ntshai tib neeg tej kev thuam thiab tsis tas ntshai lawv tej lus cem.16 Vim tus Cawm Seej yog tus thawj thiab muaj cov yaj saub coj peb txoj hau kev, “leej twg tseem yuav tawm tsam tau peb?”17 Xav kom peb ua siab loj, txhob lees thov txim, rau siab ntso, txhob txaj muag, rau siab ntseeg, txhob ntshai thaum peb muab tus Tswv txoj kev kaj ci rau lwm tus pom hauv hnub nyoog kawg no.18
Tus Cawm Seej tau qhia meej tias “tus uas lees tab meeg sawv daws hais tias, nws yog kuv li, ces kuv yuav lees yuav tus ntawd tab meeg kuv Txiv … ib yam li ntawd. … Tiam sis tus uas tsis lees yuav kuv tab meeg sawv daws, kuv yuav tsis lees tus ntawd tab meeg kuv Txiv … thiab.”19
Yog li ntawd, txawm yog ib txhia xav kom muaj ib tug Vajtswv uas tsis muab tej lus txib dab tsi, xav kom peb ua tim khawv, raws li Txwj Laug D. Todd Christofferson hais tias, “ib tug Vajtswv uas tsis muaj tej kev cai yeej zoo li ib tug Vajtswv uas tsis muaj txoj sia nyob.”20
Txawm yog ib txhia xav xaiv tej lus txib uas lawv kam ua los, xav kom peb xyiv fab ua raws li tus Cawm Seej qhia kom “ua neej raws li txhua lo lus uas tawm hauv Vajtswv lub qhov ncauj los.”21
Txawm yog muaj neeg coob ntseeg tias tus Tswv thiab Nws lub Koom Txoos pom zoo “ua txhua yam raws li [peb] lub siab xav ua,”22 xav kom peb rau siab tshaj tawm tias yeej tsis tsim nyog kom “nrog pab neeg coob mus ua txhaum,”23 vim “tej pawg neeg tsis muaj peev xwm ua qhov yog thaum ua tej yam uas Vajtswv hais tias yog kev txhaum.”24
“Auj, nco ntsoov, cia li nco ntsoov … Vajtswv tej lus txib nruj npaum li cas [thiab pab yus muaj kev ywj siab].”25 Thaum peb qhia meej txog tej yam no ces ib txhia yuav xav tias peb ntxub lawv. Yog li ntawd thov kom peb yuav ua tib zoo qhia tias peb yeej hlub Vajtswv cov me nyuam uas tsis ntseeg zoo ib yam li peb.
Peb muaj peev xwm hlub thiab saib taus lwm tus es peb tsis tas pom zoo rau lawv txoj kev ntseeg los sis tej yam uas lawv ua tsis raws li tus Tswv lub siab nyiam. Peb tsis tas tso qhov tseeb tseg kom thiaj li sib raug zoo thiab ua rau lwm tus pom zoo rau peb.
Xi-oos thiab Npanpiloos nyob tsis taus ua ke. “Tsis muaj leej twg yuav ua qhev tau rau ob tug tswv.”26 Xav kom peb txhua tus nco txog tus Cawm Seej tej lus nug hais tias, “Vim li cas nej hu kuv hais tias, Tus Tswv, Tus Tswv, tiam sis nej ho tsis ua raws li kuv tej lus?”27
Cia peb qhia tus Tswv tias peb hlub Nws los ntawm peb txoj kev mloog Nws lus kawg siab kawg ntsws.
Yog tias nej xav tias nej tsis paub xaiv txoj kev ua thwj tim los sis txoj kev ua raws li neeg ntiaj teb ua, thov nco ntsoov tias nej tus Cawm Seej uas hlub nej “caw tib neeg txhua tus, nws txhais caj npab hlub tshua cev tuaj rau [nej], thiab nws hais tias: Cia li hloov siab lees txim, es kuv mam li txais nej.”28
Thawj Tswj Hwm Russell M. Nelson qhia hais tias Yexus Khetos “yuav ua Nws tej hauj lwm zoo tshaj plaws tam sim no mus rau thaum Nws yuav rov qab los.”29 Tiam sis nws kuj qhia tias “cov uas xaiv tus Tswv txoj kev nyaj yuav raug kev tsim txom.”30 Tej lub sij hawm “Vajtswv [yuav] pom zoo cia cov uas qhia Yexus zaj raug kev txaj muag”31 thaum peb “cia Nws lub suab nrov dua li lwm lub suab.”32
Tus Cawm Seej hais tias, “Tus uas [tsis txaj muag rau kuv], tus ntawd tau koob hmoov.”33 Thiab peb kawm tias “cov neeg uas nyiam koj txoj kev cai nyob tso siab plhuav, thiab tsis muaj ib yam dab tsi ua rau lawv dawm ntog li.”34 Tsis muaj ib yam dab tsi! Yog li ntawd xav kom peb nug peb tus kheej tias, “Puas yog kuv nyiaj mus kom dhau ib me pliag xwb, tiam sis thaum kuv raug kev tsim txom thiab kev txom nyem vim kuv ua raws li txoj lus, kuv muab tso tseg?35 Puas yog kuv nyob ruaj khov rau saum lub pob zeb ntawm Yexus Khetos thiab Nws cov tub qhe?”
Cov uas xav tias tsis muaj qhov ncaj ncees tiag qhia tias qhov tseeb yog qhov uas tib neeg tsim xwb, tsis muaj qhov tseeb tiag. Lawv hais tias yeej tsis muaj kev txhaum,36 “txawm ib tug neeg ua dab tsi los nws yeej tsis txhaum kev cai,”37 es tus yeeb ncuab zoo siab qhia tias nws tau tawm lub tswv yim no! Cia peb ceev faj cov hma uas ua txuj li lawv yog cov yaj, cov uas pheej “siv lawv lus txawj ntse kom zam lawv tus kheej tej kev coj tsis ncaj.”38
Yog peb xav ua siab loj ua Yexus Khetos cov thwj tim, ces peb yuav nrhiav ib txoj kev ua li ntawd. Yog peb tsis ua, ces tus yeeb ncuab yeej xav muab lwm yam kom ntxias peb. Tiam sis vim peb yog cov thwj tim uas rau siab ntseeg, “peb tsis tas thov txim rau peb tej kev ntseeg los sis thim kom txhob ua li tej yam uas peb paub tias muaj tseeb.”39
Kuv xav xaus lus hais txog Vajtswv 15 tug tub qhe uas zaum ntawm no. Txawm neeg ntiaj teb xav “hais kom cov cev Vajtswv lus nyob twj ywm [thiab hais tias] tsis txhob qhia tej qhov tseeb rau peb paub,”40 cov uas rau siab ntseeg “yuav tau tej koob hmoov saum ntuj ntoo, muaj tseeb tiag, thiab nrog rau tej lus txib uas tsis yog tsawg, thiab nrog rau tej kev tshwm sim thaum txog lawv lub sij hawm.”41
Peb tsis tas xav tsis thoob vim cov neeg uas tsis zoo siab txog Vajtswv txoj lus raws li cov yaj saub qhia hais lus chim siab txog lawv. Cov neeg uas xyeej cov yaj saub no tsis to taub tias “yeej tsis muaj ib tug uas yuav muaj tswv yim txhais tau tej lus qhia tshwm uas cov cev Vajtswv lus tau sau tseg lawm” los sis tib neeg lub siab nyiam tsis muaj cai hloov Vajtswv txoj lus, “tiam sis yog Vaj Ntsuj Plig tus Dawb Huv tshoov neeg lub siab kom lawv qhia Vajtswv txoj lus xwb.”42
Ib yam li Povlauj, Vajtswv cov txiv neej no yeej “txaj muag ua tim khawv txog peb tus Tswv zaj” thiab lawv zoo li cov neeg uas “raug kaw”43 vim tias cov lus qhuab qhia lawv qhia tsis yog lawv li tiam sis yog tus uas hu lawv txoj lus xwb. Ib yam li Petus, “tej uas [lawv] hnov thiab [lawv] pom lawm, [lawv] yeej yuav qhia, [lawv] tsis npog li.”44 Kuv ua tim khawv tias Thawj Pawg Thawj Tswj Hwm thiab Pawg Kaum Ob tug Thwj Tim yog cov txiv neej zoo thiab ncaj ncees uas hlub Vajtswv thiab Nws cov me nyuam thiab Nws hlub lawv. Peb yuav tsum txais lawv tej lus zoo li yog los ntawm tus Tswv lub qhov ncauj los “nrog tag nrho txoj kev ua siab ntev thiab kev ntseeg. Vim los ntawm kev ua tej yam no ces tej qhov rooj ntawm ntuj txiag teb tsaus yuav kov tsis yeej [peb]; … thiab tus Tswv Vajtswv yuav ua kom tej hwj chim ntawm txoj kev tsaus ntuj yaj ploj ntawm [peb] mus.”45
“Tsis muaj ib txhais tes uas tsis dawb huv yuav nres tau txoj hauj lwm no”;46 Nws txoj hauj lwm yuav mus tom ntej yog tsis muaj nej los yog tsis muaj kuv, yog li ntawd “cia li xaiv hnub no nej yuav hawm leej twg.”47 Tsis txhob raug ntxias los yog ntshai tej lub suab nrov uas tawm tsam peb los ntawm lub tsev loj thiab dav. Lawv nrov npaum li cas los yeej yuav tsis kov yeej lub hwj huam ntawm lub suab me thiab yau uas hais rau cov neeg uas muaj lub siab mob thiab lub siab xav ua zoo.
Kuv ua tim khawv tias Yexus Khetos muaj txoj sia nyob, Nws yog peb tus Cawm Seej thiab tus Txhiv Dim, thiab Nws coj Nws lub Koom Txoos dhau los ntawm Thawj Pawg Thawj Tswj Hwm thiab Pawg Kaum Ob tug Thwj Tim, yog li ntawd peb thiaj li yuav tsis txhob “mloog cov neeg dag tej lus, thiab raws luag qab rau ub rau no.”48
Thawj Tswj Hwm Nelson qhia hais tias, “Yexus Khetos cov thwj tim tseeb yeej txaus siab sawv, hais lus, thiab ua txawv ntawm lwm tus tib neeg hauv lub ntiaj teb. Lawv tsis ntshai, rau siab, thiab ua siab loj.”49
Cov kwv tij thiab cov muam, yeej yog ib hnub zoo rau peb ua zoo! Los ntawm Yexus Khetos lub npe dawb ceev, amees.