Kev Hloov Siab Loj Heev:

Thaum hnub Friday, lub Kaum Hli Ntuj hnub tim 28, 1588, lub nkoj La Girona, uas yog ib lub nkoj uas koom teb chaws Spain Pawg Nkoj loj, nws tus ko tw nkoj twb tawg lawm es tsuas yog ib rab nquam nkoj kav nws mus, es lub nkoj no txawm cia li tsoo cov pob zeb pob tsuas ntawm Lacada Point hauv Teb Chaws Ireland Qaum Teb.¹

Lub nkoj no txawm ntxeev. Ib tug neeg uas seem tom qab lub nkoj tog coj ib nti nplhaib kub uas nws tus poj niam muab pub rau nws, es nyob hauv ntiv nplhaib no sau tias, “Kuv tsis muaj dab tsi ntxiv muab pub rau koj.”²

“Kuv tsis muaj dab tsi ntxiv muab pub rau koj”—ib zaj lus, thiab ib nti nplhaib uas muaj ib txhais tes tuav ib lub plawv, qhia tias tus poj niam hlub nws tus txiv.

Thaum kuv nyeem zaj dab neeg no, nws yeej tshoov kuv lub siab, thiab kuv xav txog qhov uas tus Cawm Seej hais kom peb ua hais tias “Nej yuav muab lub siab puas tas thiab lub siab xav ua zoo ua kev txi.”³

Kuv kuj xav txog tej yam uas tib neeg ua thaum lawv hnov Vaj Ntxwv Npeyamis tej lus: “Muaj tseeb tiag, peb ntseeg tag nrho tej lus uas koj tau hais rau peb … , uas ua rau peb hloov loj heev, los sis hloov peb lub siab, xwv kom peb tsis txhob muaj siab xav ua phem ntxiv, tiam sis xav ua zoo tsis tu ncua mus li.”⁴

Cia kuv qhia nej txog ib yam uas muaj los rau kuv thaum kuv muaj 12 xyoos.

Kuv niam hais tias, “Eduardo, tsuag tsuag. Peb lig lawm yuav mus rau kev sib ntsib Koom Txoos.”

Kuv teb tias, “Niad, kuv yuav nrog kuv txiv nyob hnub no.”

“Ua li lod? Koj yuav tsum mus koom lub pov thawj hwj txoj kev sib ntsib,” nws hais.

Kuv hais tias, “Ntxim tu siab rau kuv txiv! Nws yuav nyob nws ib leeg xwb. Kuv yuav nrog kuv txiv nyob hub no.”

Kuv txiv tsis yog Ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Kuv niam thiab kuv cov muam mus tom tej kev sib ntsib hnub Sunday. Ces kuv txawm mus ntsib kuv txiv hauv nws qhov chaw kho khoom, qhov chaw uas nws nyiam nyob thaum hnub Sunday, thiab ib yam li kuv tau qhia kuv niam, kuv siv sij hawm me ntsis nrog nws, ces kuv nug tias, “Kuv txiv, koj puas nyob zoo?”

Kuv txiv yeej meem kho xov tooj cua thiab moos, thiab nws luag nyav rau kuv.

Ces kuv qhia kuv txiv hais tias, “Kuv yuav mus nrog kuv cov phooj ywg ua si.”

Kuv txiv, twb tsis ntsia kuv hlo li, hais rau kuv hais tias, “Hnub no yog hnub Sunday. Puas yog koj yuav tsum mus rau lub tsev koom txoos?”

Kuv teb tias, “Yog los mas, tiam sis hnub no kuv qhia kuv niam tias kuv tsis mus.” Kuv txiv yeej meem kov nws tej khoom, thiab rau kuv, ua li ntawd yog lus tso kuv mus ua si.

Tag kis ntawd yog ib qho kev ncaws pob, thiab kuv cov phooj ywg hais tias lawv xav tau kuv pab. Kuv qhaj tsis tau li thiab peb tog yuav tsum yeej qhov kev ncaws pob ntawd.

Kuv qhov teeb meem yog kuv yuav tsum mus dhau lub tsev teev ntuj kom thiaj mus txog tshav pob.

Kuv rau siab khiav mus tom tshav pob thiab kuv nres kiag ua ntej qhov uas tav kuv kev, lub tsev teev ntuj. Kuv khiav mus tom sab kev sab tid es mub ob peb tsob ntoo siab tsawv, thiab kuv txiav txim siab khiav ib tsob ntoo mus rau ib tsob ntoo kom tsis muaj leej twg pom tau kuv, vim lub sij hawm ntawd cov mej zeej tab tom tuaj txog yuav mus rau lub tsev koom txoos.

Kuv tuaj txog thas yuav ncaws pob. Kuv txawm ncaws pob thiab rov qab mus tsev ua ntej kuv niam los txog.

Txhua yam mus zoo; peb tog yeej, thiab kuv zoo siab heev. Tiam sis txawm tias kuv sim nyiag mus tom tshav pob los tus pab tswv yim rau pawg dikas tau pom kuv.

Tij Laug Félix Espinoza tau pom kuv khiav ib tsob ntoo rau ib tsob ntoo, nyiag mus.

Thaum lub lis piam pib, Tij Laug Espinoza tuaj xyuas kuv lub tsev xav nrog kuv tham. Nws tsis hais dab tsi txog tej yam uas nws pom thaum hnub Sunday, thiab nws tsis nug kuv saib yog vim li cas kuv qhaj txoj kev sib ntsib.

Nws tsuas muab ib phau ntawv qhia rau kuv thiab hais tias, “Kuv xav kom koj qhia hoob pov thawj hwj thaum hnub Sunday. Kuv tau khij zaj lus qhia rau koj. Nws tsis nyuaj heev. Kuv xav kom koj nyeem zaj lus qhia, thiab kuv yuav tuaj xyuas koj ob hnub saum no kom thiaj pab koj npaj qhia.” Nws hais li no, muab phau ntawv qhia rau kuv thiab txawm mus.

Kuv tsis xav qhia hoob kawm dikas ntawd, tiam sis kuv tsis pom qab yuav hais tias kuv tsis kam. Hnub Sunday tuaj ntawd, kuv tau npaj siab yuav nrog kuv txiv nyob dua ib zaug ntxiv, uas txhais tias, muaj dua ib qho kev ncaws pob tseem ceeb uas kuv xav mus koom pab.

Tij Laug Espinoza yog ib tug neeg uas cov tub hluas ntxhais hluas saib taus.⁵ Nws nrhiav tau txoj moo zoo thiab tau hloov nws lub neej los sis, los yog hais tias, nws lub siab.

Thaum hnub Saturday yav tav su tuaj txog, kuv xav hais tias, “Tej zaum, tag kis sawv ntxov kuv yuav muaj mob, thiab kuv yuav tsis tas mus rau lub tsev koom txoos.” Tsis yog qhov kev ncaws pob uas ua rau kuv txhawj; twb yog hoob dikas ntawd uas kuv yuav tsum qhia, twb yog ib zaj lus qhia txog Hnub Caiv.

Hnub Sunday tuaj, thiab kuv sawv tsis muaj mob li. Kuv keb tsis tau li—dim tsis tau li.

Yog thawj zaug uas kuv qhia ib zaj lus qhia rau leej twg li, tiam sis Tij Laug Espinoza nyob ntawm kuv ib sab thiab hnub ntawd yog ib hnub uas kuv hloov siab loj heev.

Txij thaum ntawd los, kuv pib hwm hnub Caiv kom dawb huv, thiab nyob nyob, ua Thawj Tswj Hwm Russell M. Nelson cov lus, hnub Caiv yog ib txoj kev zoo siab.⁶

“Tus Tswv, kuv muab txhua yam rau Koj; kuv tsis muaj dab tsi ntxiv muab pub rau Koj.”

Peb yuav ua li cas txais tau ib qho kev hloov siab loj? Yus pib ua tej yam yuav hloov thiab thaum kawg txawm muaj tiag

1. thaum peb kawm cov vaj lug kub kom tau kev txawj ntse uas yuav ntxiv dag zog rau peb txoj kev ntseeg rau ntawm Yexus Khetos uas yuav tsim ib txoj kev hloov hauv peb lub siab ntsws;⁷

2. thaum peb thov Vajtswv thiab yoo mov peb ua rau peb txoj kev muaj lub siab xav ua li ntawd loj hlob tuaj;⁸

3. thaum peb ua tej yam zoo, raws li tej lus qhuab qhia peb tau kawm los sis txais, thiab peb khi lus tias peb yuav muab peb tej siab tej ntsws pub rau Nws, ib yam li tus vaj ntxwv Npeyamis cov neeg.⁹

Peb yuav ua li cas paub tias peb lub siab hloov?¹⁰

1. Thaum peb xav ua rau Vajtswv zoo siab rau ntawm txhua yam.¹¹

2. Thaum peb ua siab zoo rau lwm tus neeg thiab hwm lawv thiab txawj xav txog lawv.¹²

3. Thaum peb pom tias peb tus xeeb xwm rais los mus ua zoo li Khetos tus xeeb xwm.¹³

4. Thaum peb hnov tus Vaj Ntsuj Plig Dawb Huv coj peb kev raws nraim.¹⁴

5. Thaum peb ua raws li ib txoj lus txib uas tau nyuaj heev rau peb ua raws li thiab yeej meem ua raws li ntawd.¹⁵

Thaum peb ua tib zoo mloog peb cov thawj coj cov lus qhuab qhia thiab txiav txim siab ua raws li cov lus ntawd, puas yog peb tau hloov siab loj heev?

“Tus Tswv, kuv muab txhua yam rau Koj; kuv tsis muaj dab tsi ntxiv muab pub rau Koj.”

Peb yuav ua li cas tswj tuav qhov kev hloov loj ntawd?

1. Thaum peb noj lub cim nco txog txhua lub lis piam thiab rov qab khi lus kom ris Yexus Khetos lub npe, nco qab ntsoov txog Nws, thiab ua raws li Nws cov lus txib.¹⁶

2. Thaum peb tig mus rau lub tuam tsev.¹⁷ Thaum peb mus tom lub tuav tsev ntshawv ntshis ua li ntawd yuav pab peb tswj tuav ib lub siab tshiab thaum peb ua tej kab ke.

3. Thaum peb hlub thiab ua hauj lwm pab peb cov neeg zej zog thaum peb txhawb pab lawv thiab ua cov tub txib txoj hauj lwm.¹⁸

Ces ua rau peb zoo siab, uas txoj kev hloov siab ntawd loj hlob tuaj muaj zog thiab txi txiv zoo.¹⁹

Txoj kev hloov loj coj ib qho kev ywj siab, kev tso siab, thiab kev nyob kaj siab lug.²⁰

Qhov kev hloov siab no tsis yog ib lub sij hawm nkaus xwb; twb yuav tsum muaj siab ntseeg, siab loj, thiab kev rau rau siab rau ntawm sab ntsuj plig kom thiaj muaj. Nws pib thaum peb muaj lub siab xav ua raws li tus Tswv lub siab xav, thiab nws khov kho tuaj thaum peb nrog Nws khi lus.

Qhov uas peb ua peb tus kheej yeej zoo rau peb thiab rau cov neeg ib ncig ntawm peb.

Ua Thawj Tswj Hwm Russell M. Nelson cov lus, “tej kev ua tsov ua rog nyob thoob plawb lub ntiaj teb—thiab kev sib cav sib ceg hauv peb lub neej—yuav ploj mus yog tias peb txhua tus yuav xaiv coj raws li Yexus Khetos thiab ua raws li Nws tej lus qhia.”²¹ Thaum peb ua raws li tus Cawm Seej tej lus qhia ces peb lub siab hloov loj heev.

Kuv cov kwv tij thiab cov muam, cov tub hluas ntxhais hluas, thiab cov me nyuam, thaum peb koom lub rooj sab laj hnub Saturday thiab Sunday no, cia peb cov yaj saub cov lus, uas los ntawm tus Tswv los, nkag peb lub siab thiab ua rau peb hloov siab tiag.

Rau nej cov uas tsis tau los koom tus Tswv lub Koom Txoos uas txum tim rov qab los, kuv caw nej mloog cov tub txib es muaj lub siab xav paub saib Vajtswv xav kom nej ua li cas kom thiaj hloov tau nej lub siab sab hauv tuaj.²²

Hnub no yog hnub kom txiav txim siab coj raws li tus Tswv Yexus Khetos. “Tus Tswv, kuv muab txhua yam rau koj, kuv lub siab; kuv tsis muaj dab tsi ntxiv muab pub rau koj.”

Ib yam li ntiv nplhaib uas nrhiav tau hauv lub nkoj uas tog lawm, thaum peb muab peb tej siab ntsws pub rau Vajtswv, Vajtswv npo peb dim ntawm tej dej hiav txwv npau taws hauv lub neej no, thiab ua li ntawd, peb tau kev ntxuav kom dawb huv dhau ntawm Khetos txoj Kev Theej Txhoj kom rais los mus ua “Khetos cov me nyuam” es tau ntawm sab ntsuj plig “yug dua tshiab vim yog Nws.” ²³ Kuv ua tim khawv txog tej no los ntawm Yexus Khetos lub npe, amees.