Tej Zaj Lus Kawm Tim lub Qhov Dej
Peb muaj peev xwm tig mus rau tus Cawm Seej kom txais dag zog thiab kev kho mob uas yuav pab peb ua txhua yam uas peb raug xa los ua.
Zoo siab nrog nej sib sau ua ke hauv tuas poj niam ntawm lub tuam rooj sab laj no!
Kuv loj hlob nyob sab hnub poob ntawm lub xeev New York thiab koom ib pawg ntseeg me ntawm lub Koom Txoos uas nyob deb li nees nkaum mais ntawm peb lub tsev. Thaum kuv zaum nrog kuv tus phooj ywg Patti Jo hauv hoob Hnub Caiv Kev Kawm Vaj Lug Kub nyob theem hauv qab npoo av nyob hauv peb lub tsev koom txoos qub uas peb xauj, kuv yeej tsis tau xav tias kuv yuav yog ib feem ntawm ib pawg viv ncaus uas nyob thoob plaws lub ntiaj teb.
Tsib xyoo tas los, kuv tus txiv, Bruce, tau mob hnyav heev thaum peb nyob nrog thiab pab Haiv Neeg Ntseeg uas nyob hauv Cheeb Tsam Yuslauv Sab Hnub Tuaj. Wb rov los tsev, thiab ob peb lim tiam tom qab ntawd, nws tso lub ntiaj teb no tseg. Kuv lub neej tau hloov dhau ib hmo. Kuv nyuaj siab thiab kuv qaug zog thiab xav tias muaj kev plhom sij. Kuv thov kom tus Tswv coj kuv txoj hau kev: “Koj xav kom kuv ua dab tsi?”
Ob peb lim tiam tom qab ntawd, kuv tab tom saib kuv tej tsab ntawv thaum kuv pom ib daim duab ntawm phau ntawv teev tej khoom muag. Thaum kuv saib ze zuj zus, kuv pom tias yog ib tug kws kos duab kev piav qhia txog tus poj niam Xamalis nrog Yexus ntawm lub qhov dej. Tam sim ntawd tus Ntsuj Plig hais lus meej rau kuv: “Koj yuav tsum ua li ntawd.” Leej Txiv Saum Ntuj Ceeb Tsheej uas hlub peb tau caw kom kuv los cuag tus Cawm Seej thiab kawm.
Kuv xav qhia nej txog peb zag lus qhia kuv tab tom kawm thaum kuv haus dej los ntawm Nws lub qhov dej “muaj sia.”1
Thib ib: Tej Yam Xwm Txheej uas Peb Raug Yav Dhau Los thiab Tam Sim No Tsis Qhia tias Peb lub Neej Yav Tom Ntej Yuav Zoo Li Cas
Cov viv ncaus, kuv paub tias nej ntau tus yeej muaj kev nyuaj siab ib yam li kuv, tsis paub meej seb nej yuav tsum ntsib teeb meem nyuaj thiab tej uas ploj los poob li cas—ploj rau qhov nej lub neej tsis yog li nej tau vam rau, thov rau, thiab npaj rau.
Txawm peb qhov xwm txheej zoo li cas, peb lub neej dawb ceev thiab muaj lub ntsiab thiab lub hom phiaj. Peb txhua tus yog Vajtswv ib tug ntxhais, yug los saum ntuj los.
Peb yus Cawm Seej Yexus Khetos, los ntawm Nws txoj kev theej txhoj, ua kom peb ua tau neeg huv si thiab txais kev kho mob, peb thiaj ua tau peb lub hom phiaj hauv ntiaj teb txawm peb tsev neeg yuav txiav txim siab li cas, peb txoj kev txij nkawm, kev noj qab haus huv ntawm lub cev los kev puas hlwb, los yog lwm yam xwm txheej.
Xav txog tus poj niam ntawm lub qhov dej. Nws lub neej zoo li cas? Yexus pom tias nws tau muaj tsib tug txiv thiab nws tsis tau yuav tus txiv neej uas nws tab tom nyob nrog. Tiam sis, txawm nws lub neej nyuaj npaum twg los, thawj zaug uas tus Cawm Seej tshaj tawm rau lwm tus tias Nws yog tus Mexiyas los Nws tau hais rau nws. Nws hais tias, “Kuv yog nws, kuv tab tom nrog koj tham no ntag.”2
Tus poj niam tau los ua ib tug tim khawv uas muaj zog, thiab nws tshaj tawm rau cov nyob hauv nws lub nroog tias Yexus yog tus Khetos. “Cov neeg Xamalis uas nyob hauv lub nroog ntawd muaj ntau leej ntseeg Yexus, rau qhov tus poj niam ntawd hais rau lawv.”3
Tej yam xwm txheej uas nws raug yav dhau los thiab tam sim ntawd tsis tau qhia tias nws lub neej yav tom ntej yuav zoo li cas. Ib yam li nws, peb muaj peev xwm xaiv kom tig mus rau tus Cawm Seej hnub no kom txais dag zog thiab kev kho mob uas yuav pab peb ua txhua yam uas peb raug xa los ua.
Thib Ob: Lub Hwj Chim Nyob hauv Peb
Nyob ntawm ib nqe lus hauv phau Lus Qhuab Qhia thiab Kev Khi Lus, tus Tswv txhawb cov txiv neej thiab poj niam kom “mob siab ua tej yam zoo, thiab ua ntau yam los ntawm lawv tus kheej txoj kev ywj siab xaiv, thiab coj kom muaj kev ncaj ncees ntau los; vim lub hwj chim nyob hauv lawv.”4
Cov muam, lub hwj chim nyob hauv peb kom muaj kev ncaj ncees ntau los!
Thawj Tshwj Hwm Russell M. Nelson tau hais, “Txhua tus poj niam thiab txhua tus txiv neej uas ua kev khi lus rau Vajtswv thiab ua raws li lawv tej kev khi lus, thiab ua neeg tsim nyog ua cov kab ke pov thawj hwj, yeej txais tau Vajtswv lub hwj chim.”5
Kuv paub tias thaum peb siv zog ua raws li peb tej kev khi lus thaum ua kev cai rau dej thiab hauv lub tuam tsev, tus Tswv yuav foom koob hmoov rau peb “nrog Nws lub hwj chim uas kho thiab ntxiv dag zog” thiab nrog “kev xav ntawm sab ntsuj plig uas [peb] tsis tau muaj ua ntej.”6
Thib Peb: “Los ntawm tej Yam Me Yuav Muaj tej Yam uas Loj Tawm Los.”7
Nyob hauv Zaj Lus Qhia Nyob Pem Roob, Yexus qhia nws cov thwj tim, “Nej yog cov ntsev uas las neeg ntiaj teb” 8 thiab “Nej yog lub teeb uas ci rau neeg ntiaj teb pom kev.”9 Tom qab ntawd, Nws muab txoj kev loj hlob ntawm lub nceeg vaj saum ntuj ceeb tsheej piv rau cov keeb, “uas ib tug poj niam muab xyaw rau peb siab hmoov nplej, thiab ua rau cov hmoov nplej su tas huv tib si.”10
-
Ntsev
-
Cov Keeb
-
Tus Duab Ci
Txawm muaj me ntsis xwb los, txhua yam yuav hloov yog muaj tej no nyob haud. Tus Cawm Seej caw kom peb siv Nws lub hwj chim ua zoo li ntsev, cov keeb, thiab tus duab ci.
Ntsev
Xav tsis thoob uas yus siv ntsev me ntsis xwb ces ua rau tej yam peb noj haj yam xis ncauj. Thiab ntsev yeej yog ib qho khoom pheej yig heev thiab yooj yim tshaj plaws.
Nyob hauv phau 2 Vaj Ntxwv, peb nyeem txog “ib tug ntxhais qhev”11 uas tau raug ntes los ntawm cov neeg Xilias thiab nws los ua ib tug qhev rau Na-amas, tus thawj tub rog, tus poj niam. Nws zoo li ntsev; nws hluas, tsis tseem ceeb rau lub ntiaj teb, thiab nws lub neej ua qhev hauv pej kum teb chaws tsis yog qhov nws tau cia siab rau.
Txawm li ntawd los, nws muaj Vajtswv lub hwj chim hais ob kab lus ua tim khawv rau Na-amas tus poj niam: “Kuv xav kom kuv tus tswv mus cuag tus cev Vajtswv lus uas nyob nram tebchaws Xamalis! [vim nws] yuav kho tau Na-amas tus mob ruas zoo.”12
Twb tau hais nws cov lus uas muaj kev ntseeg rau Na-amas, ces Na-amas ua raws li nws cov lus, Na-amas lub cev thiab sab ntsuj plig thiaj li tau txais kev kho mob.
Feem ntau, peb tsom ntsoov rau cov qhev uas ntxias Na-amas mus da dej hauv tus dej Yauladees, ib yam li tus yaj saub Elisas tau txib, tiam sis yog tsis muaj tus “ntxhais qhev” ntawd, Na-amas yeej tsis mus rau Elisas lub qhov rooj.
Tej zaum nej hluas los sis nej xav tias nej tsis tseem ceeb, tiam sis nej zoo li ntsev rau nej tsev neeg, thaum nej nyob hauv tsev kawm ntawv, thiab rau nej zej zog.
Cov Keeb
Nej puas tau noj qhob cij uas tsis muaj cov keeb? Nej yuav piav li cas? Ntom? Hnyav? Tawv? Siv cov keeb me me xwb, qhob cij sawv, los sib zog thiab mos.
Thaum peb caw Vajtswv lub hwj chim los rau hauv peb lub neej, peb hloov tau “kev lwj siab”13 thaum peb txhawb nqa lwm tus thiab ua rau lawv qhib lawv lub siab kom kho tau lawv zoo.
Tsis ntev los no, kuv ib tug phooj ywg pw hauv txaj thaum hnub Christmas sawv ntxov, nws tu siab kawg nkaus. Nws cov me nyuam thov kom nws sawv; tiam sis nws mob siab vim nws thiab nws tus txiv yuav sib nrauj. Nws pw hauv txaj thiab quaj, thiab nws thov nws Leej Txiv Saum Ntuj Ceeb Tsheej kawg siab kawg ntsws, qhia Vajtswv txog nws txoj kev poob siab.
Thaum nws xaus nws tej lus thov Vajtswv, tus Ntsuj Plig tau ntxhi lus rau nws qhia nws tias Vajtswv paub txog nws txoj kev mob. Vajtswv txoj kev khuv leej tau puv nws lub siab. Qhov dawb ceev no tau pab txhawb nqa nws lub siab ntsws thiab muab kev cia siab rau nws kom paub tias tsis yog nws tu siab nyob nws ib leeg xwb. Nws tau sawv, mus nraum zoov, thiab nws ua ib tug snowman nrog nws cov me nyuam, nws hloov qhov hnyav thaum sawv ntxov nrog kev luag thiab kev kaj siab xyiv fab.
Tus Duab Ci
Yuav tsum muaj qhov kaj npaum li cas kom pom kev hauv ib chav tsaus ntuj? Ib tug duab ci xwb. Thiab tus duab ci hauv ib qhov chaw tsaus ntuj yuav los ntawm Vajtswv lub hwj chim nyob hauv nej.
Txawm nej xav tias nej nyob ib leeg hauv cua daj cua dub ntawm lub neej no, nej txawj ua lub teeb ci thaum nyob hauv qhov tsaus ntuj ntawm kev to taub yuam kev, tsis meej pem, thiab kev tsis ntseeg. Nej lub teeb ntawm kev ntseeg hauv Yexus Khetos yeej ruaj khov, coj cov neeg nyob ib puag ncig nej mus rau kev nyab xeeb thiab kev nyob kaj siab lug.
Cov viv ncaus, peb lub siab yuav hloov thiab peb lub neej yuav tau koob hmoov thaum peb muab ntsev, cov keeb, thiab ib tug duab ci.
Kuv hais lus tim khawv tias tus Cawm Seej yog cov ntsev hauv peb lub neej, caw peb tuaj saj ntawm nws txoj kev xyiv fab thiab nws txoj kev hlub.14 Yog Nws uas yog cov keeb thaum peb lub neej nyuaj, muab kev cia siab rau peb15 thiab ris peb tej nra16 los ntawm Nws lub hwj chim thiab kev hlub.17 Nws yog peb lub teeb uas ci,18 ci rau peb txoj kev kom rov qab los tsev.
Kuv thov kom peb yuav los cuag tus Cawm Seej, ib yam li tus poj niam ntawm lub qhov dej, thiab haus Nws cov dej muaj sia. Ces nrog cov Neeg Xamalis, peb yuav tshaj tawm tias, “Nim no peb ntseeg, … tsis yog vim tej lus uas koj hais, tiam sis peb ntseeg vim peb tau hnov nws tej lus thiab peb paub hais tias nws yog neeg ntiaj teb tus Cawm Seej tiag.”19 Los ntawm Yexus Khetos lub npe, amees.