Hlub, Qhia, Caw
Thaum peb hlub, muab faib, thiab caw, peb thiaj sib koom tes ua txoj hauj lwm zoo kawg nkaus uas pab npaj lub ntiaj teb rau tus Mexiyas txoj kev rov qab los.
Nrog kuv xav seb yuav zoo li cas yog tias sawv ntawm ib lub roob hauv Kalilais teb, pom qhov txuj ci thiab lub yeeb koom thaum tus Cawm Seej uas sawv rov los lawm es Nws los xyuas Nws cov thwj tim. Peb yuav xav tsis thoob li cas yog tias hnov cov lus uas Nws hais rau lawv, thaum Nws txib lawv hais tias “cia li tawm mus qhia txhua haiv neeg, tuav Leej Txiv, Leej Tub thiab Vaj Ntsuj Plig Dawb Huv lub npe muab lawv ua kev cai raus dej.”1 Tiag tiag mas cov lus no yuav ntxiv zog, txhawb pab thiab txib peb txhua tus, ib yam li ua rau Nws cov Thwj Tim. Muaj tseeb tiag, lawv tau siv tag nrho lawv lub neej ua raws li lo lus txib ntawd.
Yuav tsum paub hais tias tsis yog cov Thwj Tim nkaus xwb uas tau pib ua raws li Yexus qhia. Cov mej zeej hauv lub Koom Txoos thaum ub, cov uas nyuam qhuav los ntseeg mus rau cov qub, tau pib ua raws li tus Cawm Seej txoj lus txib, es faib txoj moo zoo rau cov neeg uas lawv ntsib thiab cov uas lawv paub. Lawv txoj kev rau siab ntso qhia lawv zaj lus tim khawv txog Yexus Khetos ua rau Nws lub Koom Txoos tshiab loj hlob tuaj heev.2
Peb sawv daws, uas yog Khetos cov ntseeg, niaj hnub no raug caw los ua raws li Nws txoj lus txib thiab, es ua tib yam nkaus li lawv nyob ntawm lub roob Kalilais thaum Nws xub tshaj tawm li no. Tau rov qab pib ua li no ntxiv thaum xyoo 1830, thaum Joseph Smith tsa nws tus kwv Samuel ua ib tug tub txib hauv Yexus Khetos lub Koom Txoos.3 Txij thaum ntawd los, coob tshaj 1.5 lab leej neeg tau ua tub txib mus thoob plaws ntiaj teb no qhia txhua haiv neeg thiab muab cov uas kam txais yuav txoj moo zoo ua kev cai raus dej.
Nov yog peb txoj lus qhuab qhia. Peb xav xav kom muaj li no.
Twb yog peb cov me nyuam yaus heev mus rau cov laus tshaj, peb yeej xav kom muaj lub sij hawm thaum peb yuav ua tau raws li tus Cawm Seej txoj lus txib thiab qhia txoj moo zoo no mus rau txhua lub teb chaws hauv ntiaj teb no. Kuv paub hais tias nej cov tub thiab ntxhais hluas tau xav tib yam li ntawd nag hmo thaum peb tus yaj saub caw nej los npaj siab mus ua tub txib puv sij hawm ib yam li tus Cawm Seej tau caw Nws cov Thwj Tim.
Zoo li cov neeg sib twv khiav thaum tos pib sib xeem, peb zoo siab tos txoj kev caw, uas muaj tus yaj saub xees npe rau ib daim ntawv, es thiaj pib sib twv khiav! Txoj kev xav ua li no yeej zoo kawg nkaus; tiam sis, cia peb xav txog lo lus nug no: vim li cas peb sawv daws thiaj tsis kam pib tam sim no ntag?
Tej zaum nej yuav nug hais tias, “Kuv yuav ua li cas thiaj ua ib tug tub txib yog tias kuv tsis muaj ib daim qhia npe?” Los yog peb qhia peb tus kheej tias, “Cov tub txib yog cov uas raug tsa los ua txoj hauj lwm no. Kuv kuj xav pab tiam sis yuav tau tos txog thaum kuv khoom me ntsis.”
Cov kwv tij thiab cov muam, nws yeej yooj yim tshaj qhov ntawd! Ua Vajtswv tsaug, vim tus Cawm Seej txoj lus txib no yog ib yam uas yooj yim ua thaum peb ua raws li tej ntsiab cai me me uas peb sawv daws tau kawm txij thaum peb ua me nyuam yaus los hais tias: hlub, muab faib, thiab caw.
Hlub
Thawj thawj yam peb ua yog kom hlub lwm tus neeg li Khetos hlub.
Peb yeej muaj kev nyuaj siab vim tam sim no peb pom tib neeg raug kev txom nyem thiab kev tsis sib haum thoob plaws ntiaj teb no vim muaj kev kub kev ntxhov. Tiam sis, peb kuj txais tau kev tshoov siab thaum pom tib neeg muaj kev khuv leej thiab ua siab zoo ib leeg rau ib leeg nyob txhua qhov txhia chaw thaum lawv ncav tes mus pab cov neeg txom nyem—cov uas tsis muaj tsev nyob, cov uas raug cais tawm ntawm lawv tsev neeg, los sis cov uas muaj lwm yam kev nyuaj siab thiab poob siab.
Tsis ntev tas los no, cov neeg qhauj xov xwm qhia txog tej leej niam hauv Poland teb, uas txhawj txog tej yim neeg uas tawg ri niab, lawv tau tso cov laub me nyuam rau ntawm qhov chaw tsheb ciav hlau ua ib kab, tos thiab npaj cia rau cov poj niam tawg rog nrog lawv cov me nyuam uas xav tau cov laub no thaum lawv hla ciam teb chaws es tawm ntawm lub tsheb ciav hlau. Muaj tseeb tiag, peb Leej Txiv Saum Ntuj Ceeb Tsheej luag nyav rau txoj kev hlub tshua zoo li no, vim thaum peb sib pab ris nra peb thiaj “coj raws li Yexus Khetos txoj kev cai.”4
Thaum twg peb muaj kev hlub li Yexus hlub rau peb ib tug neeg zej zog, peb yeej qhia txoj moo zoo—tab txawm peb tsis hais ib lo lus li.
Kev hlub lwm tus neeg twg yog qhov uas peb ua raws li lo lus txib tseem ceeb thib ob kom hlub peb cov neeg zej zog;5 qhov no qhia tias tus Vaj Ntsuj Plig Dawb Huv tab tom kho peb lub siab lub ntsws. Thaum hlub lwm tus neeg li Yexus hlub, tej zaum peb yuav kom lwm tus neeg uas pom tej peb ua ntawd yuav los “qhuas [peb] Leej Txiv tus uas nyob saum ntuj ceeb tsheej.”6
Peb ua li no yeej tsis xav kom leej twg pauj txiaj ntsim li.
Peb cia siab tias lawv mam li txais peb txoj kev hlub thiab peb zaj lus, tiam sis qhov uas lawv yuav ua li cas tsis yog ib yam uas peb tswj tau.
Tej yam peb ua thiab peb yog leej twg yeej yog tej yam uas peb tswj tau.
Thaum hlub lwm tus neeg li Yexus hlub lawv, peb thiaj qhia txog tej yam zoo hauv Yexus txoj moo zoo uas pauv tau tib neeg lub neej, thiab peb thiaj pab ua raws li Nws txoj lus txib tseem ceeb no.
Qhia
Yam thib ob uas peb ua tau yog qhia lwm tus.
Hauv thawj ob peb hli uas muaj tus phaum mob COVID-19, Tij Laug Wisan uas nyob Thaib Teb tau kev tshoov siab kom qhia nws tej kev xav thiab tej kev tshoov siab uas nws kawm tau hauv Phau Ntawv Maumoos nyob rau hauv nws tej tshooj social media. Hauv ib qho uas nws tshaj tawm, nws qhia zaj dab neeg txog ob tug tub txib, Amas thiab Amulej, hauv Phau Ntawv Maumoos.
Nws tus kwv, Winai, txawm nws muaj nws txoj kev ntseeg ntuj, raug kev tshoov siab ces xa xov es thov hais tias, “Kuv yuav puas tau phau ntawv no ua lus Thaib?”
Wisan ua tib zoo hais kom ob tug ntxhais txib nqa Phau Ntawv Maumoos mus rau nws, ces nkawd tau pib qhia nws tus kwv.
Wisan sib koom tej zaj qhia hauv koob piv tawj es tau qhia seb nws xav li cas txog Phau Ntawv Maumoos. Winai kawm kev thov Vajtswv thiab kawm raws li tus ntsuj plig qhia, ces txawm txais yuav qhov tseeb. Ces tom qab ob peb hlis, Winai tau ua kev cai raus dej!
Yav tom qab ntawd Wisan hais tias, “Peb muaj kev lav ris yuav tsum ua ib qho cuab yeej hauv Vajtswv txhais tes, thiab peb yuav tsum npaj siab tas li los cia Nws ua Nws txoj hauj lwm raws li Nws lub siab nyiam.” Lawv tsev neeg muaj qhov txuj ci no vim Wisan tau qhia txoj moo zoo ua ib qho yooj yim thiab zoo ua.
Peb txhua tus qhia tej yam rau luag tej. Peb ua li no ntau. Peb qhia seb peb nyiam tej zaj yeeb yam thiab zaub mov dab tsi, tej yam txaus luag uas peb pom, tej chaw peb ncig mus xyuas, cov duab uas peb nyiam, tej lus uas tshoov peb lub siab.
Peb yuav ua li cas thiaj qhia txog peb txoj kev hlub Yexus Khetos txoj moo zoo ntxiv rau tej yam uas peb yeej faib tawm lawm?
Txwj Laug Dieter F. Uchtdorf piav hais tias: “Yog leej twg nug seb nej ua dab tsi thaum hnub Saturday thiab Sunday, cia li nrog lawv tham txog tej yam uas nej ua hauv lub koom txoos. Qhia lawv txog cov me nyuam uas sawv rau ntawm ib pawg neeg thiab rau siab hu nkauj hais tias lawv sim ua neeg zoo li Yexus. Qhia txog cov tub hluas ntxhais hluas uas tau siv sij hawm pab cov laus hauv tej tsev rau neeg laus kom sau tau lawv zaj keeb kwm.”7
Kev qhia tsis yog sim “muag” txoj moo zoo. Nej tsis tas yuav sau ib zaj lus qhuab qhia los sis kho lwm tus neeg tej kev xav uas tsis yog.
Thaum hais txog cov tub txib tej hauj lwm mas, Vajtswv tsis xav kom nej yuav ua Nws tus tub ceev xwm; tiam sis, Nws yeej thov kom nej yuav ua tus sawv cev qhia txog Nws.
Thaum qhia tej yam zoo uas peb muaj hauv txoj moo zoo no rau lwm leej lwm tus, peb thiaj sib pab ua raws li tus Cawm Seej txoj lus txib tseem ceeb no.
Caw
Yam thib peb uas nej ua tau yog kev caw.
Muam Mayra yog ib tug uas nyuam qhuav los ntseeg tshiab hauv Ecuador teb. Nws txoj kev zoo siab hauv txoj moo zoo haj yam loj tuaj tom qab nws ua kev cai raus dej thaum uas nws caw nws cov phooj ywg thiab lwm tus neeg hauv nws tej tshooj social media. Coob tug neeg hauv nws tsev neeg uas pom tej yam uas nws qhauj tawm tau muaj lus nug li ub li no. Mayra nrog lawv sib tiv tauj, feem ntau caw lawv los ntsib cov tub txib hauv nws lub tsev.
Mayra niam thiab txiv, cov niam laus niam hluas thiab cov nus, nws tus phauj, ob tug kwv tij, thiab ob peb tug phooj ywg tau ua kev cai raus dej thiab vim rau qhov nws ua siab loj caw lawv “los saib,” “los pab,” thiab “los koom ua ke.” Vim nws lam tau lam caw, coob tshaj 20 leej neeg tau ua raws li nws caw kom los ua kev cai raus dej ua ib tug mej zeej hauv Yexus Khetos lub Koom Txoos. Tau muaj li no vim hais tias Muam Mayra lam caw lwm tus neeg los txais txoj kev zoo siab uas nws muaj vim nws ua ib tug mej zeej hauv lub Koom Txoos.
Muaj ntau pua txoj kev uas peb caw tau tib neeg los ua. Peb muaj cuab kav caw lwm tus “los saib” ib txoj kev sib ntsib noj lub cim nco txog, ib txoj kev ua si hauv pawg ntseeg, saib ib daim vidi-aus nyob online uas piav txog Yexus Khetos txoj moo zoo. Kev “los saib” ua tau ib txoj kev caw kom los nyeem Phau Ntawv Maumoos los sis xyuas ib lub tuam tsev tshiab thaum qhib rau tib neeg saib ua ntej muab lub tuam tsev fij tseg. Tej thaum, txoj kev caw yog ib yam uas nyob hauv nruab siab—ib yam li caw peb tus kheej, qhia rau peb paub thiab pom tej yam uas nyob ntawm peb ib ncig, es pib ua ib yam dab tsi.
Nyob hauv peb lub caij nyoog no, vim txhua yam nyob hauv hluav taws xob cov mej zeej faib ib zaj xov hauv social media. Muaj ntau pua, ntau txhiab, yam uas txhawb tau tib neeg siab ntsws uas nej yuav xav qhia rau lawv. Tej zaj no muaj lus caw kom “los saib,” “los pab,” thiab “los koom ua ke.”
Thaum peb caw lwm tus neeg los kawm ntxiv txog Yexus Khetos txoj moo zoo, peb thiaj pab ua raws li tus Cawm Seej txoj lus txib kom pab khiav Nws tej hauj lwm.
Lus Xaus
Kuv cov kwv tij thiab cov muam, hnub no peb tau tham txog peb yam me me xwb—tej yam yooj yim ua—uas leej twg los tau muaj cuab kav ua. Tej yam nej muaj peev xwm ua! Tej zaum nej twb ua tej no lawm—txawm nej tsis paub hais tias nej twb ua lawm!
Kuv caw nej los xav seb nej yuav hlub, qhia, thiab caw tib neeg li cas. Thaum nej ua li no, nej yuav haj yam muaj kev zoo siab vim nej paub hais tias nej tab tom ua raws li peb tus Cawm Seej tej lus txib.
Yam uas kuv yaum kom nej ua no tsis yog ib yam tshiab. Nej twb hnov tej ntsiab cai no dua. Nov tsis yog “lwm yam loj loj” uas lub Koom Txoos thov kom nej yuav ua. Peb yam no tsuas yog tej yam ntxiv rau tej uas peb ua lawm vim peb yog Yexus Khetos cov neeg ntseeg.
Tsis tas muaj ib daim ntawv qhia npe los sis ib tsab ntawv.
Tsis tas yuav hu nej rau txoj hauj lwm no.
Thaum peb yam no yog tej yam ntawm peb tus cwj pwm thiab lub neej, ces tej no yuav yog tej yam uas peb niaj hnub ua xwb, yog ib txoj kev qhia seb peb hlub lwm tus li cas.
Ib yam li Yexus cov thwj tim uas sib sau ua ke los mloog Nws lus hauv Kalilais teb 2,000 xyoo tas los no, peb kuj yuav ua raws li tus Cawm Seej txoj lus txib thiab yuav mus thoob ntiaj teb no tshaj tawm txoj moo zoo.
Thaum peb hlub, muab faib, thiab caw, peb thiaj sib koom tes ua txoj hauj lwm zoo kawg nkaus uas pab npaj lub ntiaj teb rau tus Mexiyas txoj kev rov qab los.
Kuv thov Vajtswv kom peb yuav ua raws li tus Cawm Seej txoj lus txib no thiab sim ua Nws tej hauj lwm es kuv thov li no los ntawm Yexus Khetos lub npe, amees.