Qhia Kev Vam Khom Yus tus Kheej rau cov Me Nyuam thiab cov Tub Hluas Ntxhais Hluas

Kuv yuav hais lus txog kev vam khom yus tus kheej thiab yuav ua li cas kom qhia rau cov me nyuam thiab cov tub hluas ntxhais hluas. Tej zaum nej yuav xav tias kev vam khom yus tus kheej yog ib yam yus qhia rau cov laus xwb. Kuv tau kawm hais tias cov laus yuav txawj vam khom lawv tus kheej thaum lawv kawm txog Yexus Khetos txoj moo zoo nyob hauv tsev thiab thaum lawv tau xyaum ua raws li cov lus qhuab qhia thiab cov ntsiab cai no txij thaum lawv yog cov me nyuam thiab yog cov tub hluas ntxhais hluas los.

Qhov piv txwv zoo tshaj yeej yog ib tug uas coj yam ntxwv zoo txog qhov no. Wilfried Vanie, nws xya tus kwv tij thiab muam, thiab nws niam tau koom lub Koom Txoos nyob hauv Abidjan, teb chaws Ivory Coast, thaum nws muaj rau xyoo xwb. Nws tau ua kev cai raus dej thaum nws muaj yim xyoo. Nws txiv, tus uas khwv ua hauj lwm pab nws tsev neeg, tau tuag thaum Wilfried muaj kaum ib xyoo xwb.

Txawm yog nws tsev neeg nyuaj siab heev, Wilfried txiav txim siab kawm ntawv, mus ntxiv vim nws niam thiab lub Koom Txoos tau txhawb nqa nws. Nws tau kawm tiav thiab tau mus ua tub txib nyob hauv qhov chaw tshaj tawm txoj moo zoo Ghana Cape Coast, es nyob ntawd nws tau kawm lus Askiv. Tom qab nws tau ua tub txib tas lawm, nws tau kawm ntawv qib siab thiab tau ib daim ntawv pov thawj qhia tias nws kawm tiav txog kev suav nyiaj txiag. Txawm nyuaj rau nws nrhiav hauj lwm li no los, nws twb nrhiav hauj lwm pab neeg uas tuaj ncig lwm lub teb chaws.

Nws pib ua ib tug neeg nqa zaub mov nyob hauv ib lub tsev pw uas zoo npaum li tsib hnub qub, tiam sis nws muaj siab xav kawm mus txog thaum nws tau los ua ib tug txawj hais ob yam lus pab neeg uas tuaj. Thaum lawv qhib ib lub tsev pw tshiab, lawv ntiav nws ua tus neeg kws suav nyiaj thaum tsaus ntuj. Tom qab ntawd, nws tau koom ua BYU–Pathway Worldwide thiab tab tom kawm kom tau ib daim ntawv pov thawj txog kev kev tswj hwm tsev pw thiab txais neeg ncig teb chaws. Nws yeej xav ua tus thawj saib xyuas ib lub tsev pw kim kim. Wilfried yeej khwv txaus kom nws tus khub mus ib txhis thiab ob tug me nyuam tau noj tau haus, thiab nws kuj pab nws niam thiab nws cov kwv tij cov muam thiab. Nws tab tom ua hauj lwm hauv lub Koom Txoos ua ib tug mej zeej hauv ceg txheem ntseeg pawg sab laj hlob.

Kev vam khom tau yus tus kheej yog “txoj kev cog lus thiab kev sib zog ua hauj lwm kom muab tej yam ntawm sab ntsuj plig thiab sab cev nqaij daim tawv ntawm lub neej no rau yus tus kheej thiab yus tsev neeg.”¹ Kev siv zog kom vam khom peb tus kheej yeej yog peb txoj hauj lwm uas los ntawm peb tej kev khi lus thiab yuav coj peb rov qab mus cuag Leej Txiv Saum Ntuj Ceeb Tsheej thiab Nws Leej Tub, Yexus Khetos. Qhov no yuav txhawb peb txoj kev ntseeg Yexus Khetos dag zog thiab muaj kev xyiv fab khi lus nrog Nws thiab ua cov kab ke ntawm kev cawm seej thiab kev tsa nto. Kev vam khom yus tus kheej yog cov lus qhuab qhia ntawm Yexus Khetos txoj moo zoo thiab tsis yog ib lub txheej xwm xwb. Yeej yog ib tug txheej txheem uas yus ua kom tas yus lub neej, tsis yog ib lub sij hawm xwb.

Peb yuav vam khom peb tus kheej tas peb lub neej thaum peb txais dag zog ntawm sab ntsuj plig, sab cev nqaij daim tawv, thiab hauv siab ntsws, kawm ntawv thiab ua hauj lwm, thiab npaj tej khoom rau peb lub neej.² Puas yog peb yuav ua txoj hauj lwm tiav nyob hauv lub neej no? Tsis yog, yeej yog ib tug txheej txheem ntawm kev kawm, kev loj hlob, thiab kev ua hauj lwm. Yeej tsis ua tiav; yog ib tug txheej txheem yus ua txhua hnub mus li.

Peb yuav ua li cas kom qhia cov lus qhuab qhia thiab cov ntsiab cai txog kev vam khom yus tus kheej rau peb cov me nyuam thiab cov tub hluas ntxhais hluas? Ib txoj kev tseem ceeb rau peb ua li no yog kev siv lub txheej xwm rau cov Me Nyuam thiab cov Tub Hluas Ntxhais Hluas. Cov niam tsev txiv tsev thiab cov me nyuam kawm txog Yexus Khetos txoj moo zoo, koom ua ke pab lwm tus thiab ua tej yam ntxim saib ntxim ua, thiab ua hauj lwm ua ke ua plaub qhov no kom txhua tus me nyuam loj hlob tuaj zoo. Nyias yeej yuav tsum ua li nyias xav ua.

Phau Children’s Guidebook hais tias, “Thaum Yexus muaj hnub nyoog ib yam li nej, Nws tau kawm thiab loj hlob tuaj. Nej kuj kawm thiab loj hlob tuaj ib yam thiab. Cov vaj lug kub hais tias: ‘Yexus loj hlob zoo, muaj tswv yim, nws ua haum Vajtswv siab thiab haum neeg siab’ (Lukas 2:52).”³ Vaj lug kub no hais txog kev kawm txog sab ntsuj plig uas yog kev ua haum Vajtswv siab; kev sib raug zoo, uas yog kev haum neeg siab; sab cev nqaij daim tawv, yog qhov uas Yexus loj hlob zoo; thiab sab paj hlwb, uas yog kev muaj tswv yim. Tej no yeej pab tau peb tsis hais peb muaj hnub nyoog npaum li cas los yog. Peb yuav tsum qhia txog tej no thaum twg? Nyob hauv 2 Kev Cai 6:6–7 peb nyeem hais tias:

“Nej yuav tsum nco ntsoov tej lus uas hnub no kuv qhia rau nej:

“Nej yuav tsum muab qhia rau nej tej me nyuam, thiab niaj hnub hais txog tej lus ntawd, tsis hais thaum nej nyob hauv tsev, thaum nej taug kev, thaum nej so thiab thaum nej ua hauj lwm.”

Peb qhia tej no rau cov me nyuam los ntawm peb txoj kev coj yam ntxwv zoo, kev ua hauj lwm pab lawv, kev kawm vaj lug kub, thiab kev ua raws li Yexus Khetos tej lus qhia uas cov yaj saub qhia rau peb.

Kuv tau hais tias nyob hauv lub txheej xwm rau cov Me Nyuam thiab cov Tub Hluas Ntxhais Hluas no, cov me nyuam xaiv tej hom phiaj nyob hauv plaub qhov kev loj hlob zoo no. Yeej yog ib qho tseem ceeb uas lawv cuab tej hom phiaj rau lawv tus kheej ua tej no. Cov niam tsev txiv tsev thiab cov thawj coj yeej muaj peev xwm qhia, ntuas, thiab txhawb nqa lawv.

Piv txwv hais tias, peb tus ntxhais xeeb ntxwv Miranda yeej xav loj hlob tuaj ntawm sab ntsuj plig thaum nws koom tej chav kawm seminary thaum sawv ntxov txhua hnub. Nws tau xav ua li no thaum nws hnov lwm tus hauv nws pawg ntseeg hais lus zoo txog seminary. Nws niam tsis tas tsa nws sawv kom nws mus kawm ntawv. Nws ua nws tus kheej, nws tsim los thiab koom kev sib ntsib videoconference thaum lub sij hawm uas teem tseg 6:20 sawv ntxov vim tias nws tau kawm tej txuj ci zoo uas pab nws ua li ntawd. Kuv niam kuv txiv tau qhia kuv tias Miranda hais lus rau nkawd ntxiv thaum nws mus xyuas lawv, vim nws tau kawm ntseeg nws tus kheej. Tej yam zoo li no uas peb kawm hauv lub neej no yeej muaj tej yam zoo.

Cov niam tsev txiv tsev, cov pog thiab yawg, cov niam tais thiab yawm txiv, cov thawj coj, thiab cov phooj ywg yeej pab tau cov me nyuam loj hlob tuaj. Cov kwv tij thiab cov muam uas txhawb pab, ua ke nrog cov thawj coj pov thawj hwj thiab cov thawj coj hauv pawg ntseeg muaj peev xwm txhawb nqa lawv. “Tsev Neeg: Ib zaj Lus Tshaj Tawm rau lub Ntiaj Teb” hais tias: “Los ntawm lub tswv yim los saum ntuj los, cov txiv tsev yuav tsum kav lawv tej tsev neeg los ntawm kev hlub thiab kev ncaj ncees thiab lav ris npaj ua kom muaj tej yam uas lawv tsev neeg yuav tsum muaj kom thiaj ua neej tau thiab txais tau kev pov hwm rau lawv tsev neeg. Cov niam tsev txoj kev lav ris thib ib yog tu lawv cov me nyuam. Nyob rau tej kev lav ris tseem ceeb dawb ceev no, tej niam tsev txiv tsev yuav tsum sib pab xws li nkawd nyob sib txig. … Thaum twg ib tse neeg xav tau kev pab nws tsim nyog tej kwv tij neej tsa cev tes mus pab thiab.”⁴ Kab lus kawg no yeej hais txog cov neeg xws li pog, yawg, niam tais, thiab yawm txiv.

Thaum kuv thiab kuv tus poj niam wb ua hauj lwm nyob hauv Afikas Teb Sab Hnub Poob, kuv tus poj niam Nuria yeej tau txhawb pab thiab sib tham ntau nrog wb tsev neeg thiab cov me nyuam xeeb ntxwv uas nyob hiav txwv sab tim ub. Nws siv tej txuj ci technology ua li no. Nws nyeem ntawv rau cov xeeb ntxwv yaus. Nws qhia cov ntxhais xeeb ntxwv uas laus zog tej yam xws li peb tsev neeg zaj dab neeg, science, zaj liv xwm txog Puerto Rico, Tej Nqe Kev Ntseeg, thiab Yexus Khetos txoj moo zoo. Qhov uas peb ib leeg nyob deb ntawm ib leeg yeej tsis tab kaum peb txoj kev koom ua ke, kev txhawb pab, thiab kev qhia tiam neeg uas tab tom loj hlob tuaj uas yog peb tsev neeg. Kuv kuj koom ua ke nrog Nuria thaum kuv khoom kom qhia wb cov me nyuam xeeb ntxwv, hlub lawv, thiab ua rau lawv luag ntxhi.

Nej yuav tsum pom tias lub txheej xwm rau cov Me Nyuam thiab cov Tub Hluas Ntxhais Hluas thiab kev vam khom yus tus kheej sib xws npaum li cas. Plaub qhov kev loj hlob tuaj no yeej muaj ntsis zoo ib yam. Kev muaj zog ntawm sab ntsuj plig kom vam khom yus tus kheej yeej muaj ntsis zoo li lub hom phiaj ntawm sab ntsuj plig hauv lub txheej xwm rau cov Me Nyuam thiab cov Tub Hluas Ntxhais Hluas. Kev nyob zoo ntawm sab cev nqaij daim tawv thiab hauv siab ntsws ntawm kev vam khom yus tus kheej yeej txuas rau sab cev nqaij daim tawv thiab kev sib raug zoo hauv lub txheej xwm rau cov Me Nyuam thiab cov Tub Hluas Ntxhais Hluas. Kev kawm ntawv, kev ua hauj lwm, thiab kev npaj khoom ntawm kev vam khom yus tus kheej yeej zoo li kev muaj tswv yim nyob hauv lub txheej xwm rau cov Me Nyuam thiab cov Tub Hluas Ntxhais Hluas.

Kuv xaus lus hais kom peb cia li coj raws li peb tus Cawm Seej Yexus Khetos thiab Nws txoj moo zoo thaum peb kawm vam khom peb tus kheej kom tas peb lub neej, thiab qhia li no rau peb cov me nyuam thiab cov tub hluas ntxhais hluas. Zoo tshaj yog tias peb

1. coj yam ntxwv zoo txog kev pab lwm tus,

2. qhia thiab ua raws li cov lus qhuab qhia thiab cov ntsiab cai txog kev vam khom yus tus kheej, thiab

3. ua raws li txoj lus txib kom vam khom yus tus kheej uas yog ib feem ntawm Yexus Khetos txoj moo zoo.

Lus Qhuab Qhia thiab Kev Khi Lus 104:15–16 hais tias:

“Yog kuv lub hom phiaj kom nrhiav noj nrhiav haus rau kuv haiv neeg ntseeg, vim txhua yam yog kuv li.

“Tiam sis yeej yuav tsum ua li no raws li kuv tus kheej txoj kev; thiab saib seb qhov no yog txoj kev uas kuv, tus Tswv, tau tshaj tawm tias yuav nrhiav noj nrhiav haus rau kuv haiv neeg ntseeg, kom yuav muab cov pluag tsa sawv, li ntawd txo kom cov nplua nuj qis.”

Nov yog Yexus Khetos lub Koom Txoos. Nws txoj moo zoo yeej foom koob hmoov rau tej tsev neeg nyob hauv lub ntiaj teb no thiab nyob mus ib txhis. Nws txoj moo zoo yuav pab coj peb lub neej thaum peb siv zog rais los ua tsev neeg uas nyob mus ib txhis. Kuv paub qhov no muaj tseeb. Los ntawm Yexus Khetos lub npe, amees.