Khetos Kho Yam Twg uas Puas Lawm
Nws kho tau tej kev tsis sib raug zoo nrog Vajtswv, tej kev tsis sib raug zoo nrog lwm tus neeg, thiab tej yam uas puas ntawm peb tus kheej.
Ob peb xyoos tas los no, thaum peb tsev neeg sib sau ua ke, kuv tus nus tus tub uas muaj yim xyoo William tau nug wb tus tub hlob Briton, seb nws puas xav ua si pov pob. Briton txawm teb hais tias, “Xav mas! Kuv yeej nyiam ua li ntawd!” Tom qab nkawd ua si ntev tsawv, Briton txais tsis tau ib lub pob ces nws thiaj ua rau nws pog yawg ib lub hwj qub qub tawg.
Briton yeej nyuaj siab kawg. Thaum nws khoov mus muab tej qhov uas tawg ntawd, tus me nyuam tub William mus rau nws tus kwv tij ntawd thiab maj mam ntaus nws lub nrob qaum. Ces nws hais lus nplij siab hais tias, “Tsis txhob txhawj Briton. Muaj ib zaug uas kuv ua rau ib yam dab tsi hauv Pog Yawg lub tsev tawg thiab, ces Pog los khawm kuv thiab hais tias, ‘Tsis ua li cas, William. Koj tsuas muaj tsib xyoos xwb.’”
Ces Briton teb hais tias, “Tiam sis, William, kuv muaj 23 xyoos!”
Peb kawm tau ntau yam los ntawm cov vaj lug kub uas qhia seb peb tus Cawm Seej, Yexus Khetos, yuav ua li cas thiaj pab peb kho tej yam hauv peb lub neej uas puas lawm, tab txawm peb muaj hnub nyoog li cas los xij. Nws kho tau tej kev tsis sib raug zoo nrog Vajtswv, tej kev tsis sib raug zoo nrog lwm tus neeg, thiab tej yam uas puas ntawm peb tus kheej.
Tej Kev Tsis Sib Raug Zoo nrog Vajtswv
Thaum tus Cawm Seej tab tom qhia neeg tim lub tuam tsev, cov neeg Falixais thiab cov xib hwb qhia Vajtswv txoj kev cai txawm coj ib tug poj niam tuaj cuag Nws. Peb tsis paub tag nrho nws zaj, tsuas paub hais tias nws tau “deev luag txiv.”1 Feem ntau mas, cov vaj lug kub tsuas qhia me me ntawm ib tug neeg lub neej, thiab raws li zaj ntawd, peb ib txhia sim tsa lawv nto los sis rau txim rau lawv. Yus yeej tsis to taub ib tug neeg lub neej thaum pom ib qho zoo kawg nkaus los sis ib qho uas lawv ua yuam kev loj. Lub ntsiab rau tej zaj hauv vaj lug kub no yog kom pab peb pom hais tias Yexus Khetos yog tus uas pab tau thaum ntawd, thiab Nws yog tus uas pab tau tam sim no. Nws paub tag nrho peb zaj dab neeg thiab seb peb raug kev nyuaj siab li cas, thiab kuj paub tias peb muaj cuab kav li cas thiab tsis muaj zog li cas.
Khetos hais lus rau Vajtswv tus ntxhais uas muaj nqi no hais tias “Kuv yuav tsis rau txim rau koj thiab: Koj cia li mus thiab tsis txhob ua txhaum ntxiv lawm.”2 Ua lwm yam lus hais “Koj cia li mus thiab tsis txhob ua txhaum ntxiv lawm” pauv tau ua cov lus no “cia li mus thiab hloov siab.” Tus Cawm Seej tab tom caw nws los hloov siab lees txim: hloov tej yam nws ua, nws cov phooj ywg, thiab seb nws xav li cas txog nws tus kheej, nws lub siab.
Vim muaj Yexus Khetos, peb txoj kev txiav txim kom “cia li mus thiab hloov siab” kuj yuav ua rau peb “cia li mus thiab txais kev kho,” rau qhov Nws yog tus uas pab kho txhua yam uas puas hauv peb lub neej. Ua tus Sawv Nruab Nrab thiab tus Tuaj Peb Tog nrog Leej Txiv, Khetos kho thiab ua kom tej kev tsis sib raug zoo yuav rov qab ua zoo—qhov tseem ceeb tshaj yog peb txoj kev nrog Vajtswv sib raug zoo.
Joseph Smith Kev Txhais Lus qhia meej tias tus poj niam tau ua raws li tus Cawm Seej ntuas thiab tau hloov nws lub neej: “Thiab txij thaum ntawd los tus poj niam qhuas Vajtswv, thiab ntseeg nws lub npe.”3 Tu siab vim peb tsis paub nws lub npe, los sis lwm yam txog nws lub neej tom qab lub sij hawm no, vim hais tias nws yuav tsum rau siab ntseeg, txo hwj chim, thiab rau siab ntso ua raws li Yexus Khetos nws thiaj tau hloov siab lees txim thiab pauv nws lub neej. Tiam sis peb paub hais tias nws yog ib tug poj niam uas “ntseeg nws lub npe” es paub tias nws tseem txais tau Nws txoj kev pab thiab kev txi uas kav mus ib txhis.
Tej Kev Tsis Sib Raug Zoo nrog Lwm tus Neeg
Hauv Lukas tshooj 15 peb nyeem zaj paj lug txog ib tug txiv neej uas muaj ob tug tub. Tus tub yaus thov nws txiv muab nws tej qub txeeg qub teg rau nws es nws tau tawm mus rau pej kum teb chaws thiab siv nws tej nyiaj ntawd ua lwj ua liam.4
“Nws ywj siab siv ua dog ua dig, nws muab nws tej nyiaj poob tas, thaum ntawd muaj kev tshaib plab thoob plaws lub teb chaws, nws tsis tshuav dab tsi li lawm.
“Nws thiaj mus nrog ib tug txiv neej hauv lub nroog ntawd nyob, tus ntawd txib nws mus zov npua tom teb.
“Nws xav noj cov plhaub taum uas npua noj, kom tsau nws plab los tsis muaj leej twg pub rau nws noj.
“Thaum nws nco dheev txog hais tias, Kuv txiv cov tub zog muaj noj muaj haus tsis tas, ua li cas kuv yuav tuaj yoo tshaib ntawm no!
“Kuv yuav rov mus cuag kuv txiv thiab hais tias, Txiv, kuv ua txhaum rau Vajtswv thiab ua txhaum rau koj lawm,
“Kuv tsis tsim nyog ua koj tus tub lawm; thov koj suav kuv ib yam li kuv yog koj ib tug tub zog xwb.
“Nws txawm sawv tsees taug kev rov mus cuag nws txiv. Thaum nws los tsis tau txog uas tseem nyob hov deb, nws txiv pom nws thiab hlub nws kawg; nws txiv dhia loo mus puag nkaus tus tub nwj.”5
Kuv xav tias qhov uas leej txiv khiav nrawm nroos rau nws tus tub, yog ib yam tseem ceeb heev. Tej zaum leej txiv twb mob siab heev vim nws tus tub tau ua li ntawd. Tsis tas li ntawd xwb, tej zaum leej txiv yeej txaj muag rau tej uas nws tus tub tau ua.
Ces vim li cas leej txiv thiaj tsis tos nws tus tub los thov txim ntawm nws? Ua cas nws tsis tau tos kom tus tub muab kho los sis hloov los ua zoo tso nws mam li zam txim thiab hlub nws tus tub? Qhov no yog ib yam uas kuv twb xav txog ntau heev lawm.
Tus Tswv qhia peb hais tias peb yuav tsum zam txim rau sawv daws: “Kuv, tus Tswv, yuav zam txim rau tus uas kuv pom zoo zam txim, tiam sis nej yuav tsum zam txim rau txhua tus neeg.”6 Yus yuav tsum ua siab loj thiab txo hwj chim thiaj zam tau txim rau lwm tus neeg. Thiab tej zaum yuav siv sij hawm ntev tsawv. Yuav tsum tso siab ntseeg thiab vam tus Tswv thaum peb lees yuav tej kev xav hauv peb lub siab. Qhov no thiaj yog qhov tseem ceeb thiab lub hwj chim rau peb txoj kev ywj siab xaiv.
Thaum xav txog zaj dab neeg txog leej txiv thiab tus tub loj leeb no, tus Cawm Seej qhia tias kev zam txim yog ib lub txiaj ntsim zoo tshaj plaws uas peb muab tau rau lwm tus neeg thiab tiag tiag rau peb tus kheej. Txoj kev tshem tej nra ntawm peb lub siab thaum peb zam txim yeej tsis yog ib yam uas yooj yim ua, tiam sis los ntawm Yexus Khetos lub hwj chim, peb yeej ua tau.
Tej Yam uas Puas ntawm Peb tus Kheej
Hauv phau Tes Hauj Lwm tshooj 3 peb kawm txog ib tug txiv neej uas yug los tuag tes tuag uas “los zaum ntawm lub rooj vag uas hu ua lub Rooj Vag Zoo Nkauj. Niaj hnub muaj neeg kwv nws tuaj nyob ntawm rooj vag thiab thov nyiaj ntawm cov neeg uas tuaj thov Vajtswv hauv lub tuam tsev.”7
Tus neeg tuag ceg ntawd muaj 40 xyoo rov saud8 es tag nrho nws lub neej pheej xav tau ub no thiab nyob ntawd tos xwb, vim nws vam luag tej kev pab thiab kev ua siab dawb faib lawv cov nyiaj.
Muaj ib hnub nws pom “Petus thiab Yauhas tab tom yuav mus hauv lub tuam tsev, nws txawm thov kom nkawd pub ib yam dab tsi rau nws.
“Nkawd tsa qhov muag saib tus txiv neej uas tuag ceg ntawd, ces Petus txawm hais tias, Koj cia li saib wb.
“Tus txiv neej ntawd xav hais tias nyaj nkawd yuav pub ib yam dab tsi rau nws ntag.
“Tiam sis Petus hais rau nws hais tias, Kuv tsis muaj nyiaj tiam sis kuv yuav muab yam uas kuv muaj rau koj: Kuv tuav Yexus Khetos tus uas yog neeg Naxales lub npe hais rau koj hais tias koj cia li sawv thiab mus kev.
“Petus tuav nkaus tus txiv neej ntawd sab tes xis rub nws sawv. Tam sim ntawd nws ob txhais ceg thiab ob lub pob taws txawm muaj zog lawm.
“Nws sawv tsees nrog Petus thiab Yauhas mus rau hauv lub Tuam Tsev thiab nws dhia paj paws ua Vajtswv tsaug.”9
Feem ntau peb yuav pom hais tias peb muaj ntsis zoo li tus neeg tuag ceg thov khawv rau ntawm lub qhov rooj rau lub tuam tsev, ua siab ntev tos—los sis tej thaum ua siab luv—“tos tus Tswv.”10 Tos kev kho yus sab cev nqaij daim tawv los sis sab paj hlwb. Tos cov lus teb uas mus tog rau hauv peb nruab siab. Tos kom muaj ib qho txuj ci loj.
Txoj kev tos tus Tswv ua tau ib yam dawb ceev thiab dawb huv—ib yam uas pab kho thiab hloov tau peb kom peb los paub tus Cawm Seej zoo dua. Txoj kev tos tus tus Tswv kuj ua tau ib yam uas ua rau peb muaj tej lub sij hawm thaum peb nug hais tias, “Auj Vajtswv, koj nyob qhov twg?”11—ib yam uas ua rau peb sab ntsuj plig muaj kev ntseeg Yexus Khetos thaum uas peb ua tib zoo xaiv Nws ib zaug dhau ib zaug dhau ib zaug. Kuv yeej paub qhov no, thiab to taub hais tias txoj kev tos li no yog li cas tiag tiag.
Kuv siv ntau xuab moos hauv ib lub tsev kho tib neeg uas mob khasxawj, nrog lwm cov neeg uas raug mob li kuv es sawv daws yeej xav kom muab tus mob kho kom zoo. Ib txhia tseem ciaj, ho ib txhia tso lub neej no tseg. Kuv kawm tau hais tias peb nyias muaj nyias txoj kev dim peb tej teeb meem, ces yog li ntawd peb yuav tsum tsis txhob xav txog txoj kev uas peb yuav dim tej ntawd tiam sis yuav tsum xav txog tus Cawm Dim nkaus xwb. Peb yuav tsum xav ntsoov txog Yexus Khetos txhua lub sij hawm!
Txoj kev ntseeg Yexus yog tso siab rau Vajtswv lub siab thiab rau Nws lub sij hawm. Vim Nws paub tseeb hais tias peb xav tau dab tsi thiab peb yuav tsum tau thaum twg. Thaum peb ua raws li tus Tswv lub siab nyiam, peb yeej yuav txais ntau tshaj qhov uas peb lub siab xav tau.
Kuv cov phooj ywg es, peb sawv daws yeej muaj ib yam dab tsi hauv peb lub neej uas puas uas xav tau kev kho, hloov, los sis kho kom zoo. Thaum peb tig mus rau tus Cawm Seej, thaum peb kho peb lub siab thiab lub paj hlwb kom ua tib yam li Nws ua, thaum peb hloov siab lees txim, Nws los ntsib peb “muab kev kho los ntawm nws phab tis,”12 es ua tib zoo puag peb, thiab hais tias, “Tsis ua li cas. Koj tsuas muaj 5—los sis 16, 23, 48, 64, 91 xyoo xwb. Wb mam li sib koom siab muab kho!”
Kuv hais lus tim khawv tias tsis muaj ib yam dab tsi hauv nej lub neej uas puas ntau dhau uas Yexus Khetos tsis muaj hwj chim kho, txhiv dim los sis muab kho kom zoo. Hais los ntawm tus uas muaj hwj chim kho, uas yog Yexus Khetos, lub npe, amees.